Aualofa

O le Aualofa o le faalapotopotoga o tamaitai o Le Ekalesia a Iesu Keriso o le Au Paia o Aso e Gata Ai. O lona faamoemoega o le fesoasoani e saunia tamaitai mo faamanuiaga o le ola e faavavau a o latou faateleina le faatuatua i le Tama Faalelagi ma Iesu Keriso ma Lana Togiola; faamalosia o tagata taitoatasi, aiga, ma auaiga e ala i sauniga ma feagaiga; ma galulue i le lotogatasi e fesoasoani ia i latou e manaomia le fesoasoani.

O tamaitai matutua uma i le Ekalesia o sui auai ia o le Aualofa. E ala i le Aualofa, ua “maua e [tuafafine] se vaaiga mamao ma se faamautinoaga o o latou faasinomaga o ni afafine o le Atua” ma ni soifuaga o le faamoemoe ma le taitaiga (O Afafine i Lo’u Malo: O Le Talafaasolopito ma le Galuega a le Aualofa [2011], 171). E faateleina foi e tuafafine lo latou faalagolago i le tagata lava ia, faalautele a latou taleni, ma faateleina lo latou atamai, faamalosia aiga, ma aapa atu ia i latou e le tagolima. O nei avanoa mo auaunaga, taitaiga, ma aoaoga e faamalosia ai tamaitai i a latou taumafaiga ia avea ma soo o Iesu Keriso.

Na saunoa le Au Peresitene Sili, “Matou te molimau atu ua toefuatai mai e le Alii le atoaga o le talalelei e ala i le Perofeta o Iosefa Samita ma o le Aualofa o se vaega taua o lena toefuataiga” (O Afafine i Lo’u Malo, ix).

Na faatulagaina le Aualofa ia Mati 1842 e le Perofeta o Iosefa Samita. Sa uluai ta’ua o le Aualofa a Tamaitai o Navu, ma sa filifilia Ema Hale Samita, le faletua o Iosefa Samita, o lona peresitene muamua. A o le’i faatulagaina e Iosefa Samita le Aualofa, sa ia faamalamalama mai, o le a faatulagaina tuafafine “e pei o le mamanu o le perisitua.” Na folafola mai e le Perofeta o Iosefa Samita, ‘E lei atoatoa lava ona faatulagaina le Ekalesia seia tusa ai ona faatulagaina tamaitai’ [Aoaoga a Peresitene o le Ekalesia: Iosefa Samita [2007], 451).

“E ui ina itiiti se mea o iloa e uiga i se faalapotopotoga aloaia a tamaitai i le Feagaiga Fou, ae ua fautuaina mai ni mea e faamaonia ai e faapea o fafine o ni tagata taua ia sa auai i le faatinoga o le galuega a le Faaola” (O Afafine i Lo’u Malo, 3). Sa tusi atu Paulo i le Au Paia i Roma, e faapea, “Ou te faailoa atu ia te outou lo tatou tuafafine o Fipe, o le tiakono lea o le ekalesia o i Kenikerea: ina ia talia o ia e outou i le Alii, faapei ona tatau i le au paia, ia outou fesoasoani foi ia te ia i se mea a outou e aoga ia te ia: aua foi e toatele ua ia fesosoani i ai, atoa ma a’u nei” (Roma 16:1–2).

O faamaumauga o le talafaasoloioto o le Ekalesia i lo tatou tisipenisione ua faamatala ai le tuuto o tamaitai anamua o le Aualofa a o latou molimau atu e uiga i le talalelei a Iesu Keriso ma auauna i e mama’i ma matitiva o i latou ina ia atinae ai le malo o le Atua. O le Aualofa na tuuina atu ai avanoa mo tamaitai o le Au Paia o Aso e Gata Ai e faalautele o latou aafiaga ma ia faamanuia ai o latou aiga, uarota, siteki, afioaga, ma atunuu. Mai lava i lona talafaasolopito, ua talanoa mai ai sui auai o le faalapotopotoga e uiga i faafitauli e faatatau i o latou taimi. O loo faaauau pea ona tuuina mai e le Aualofa ni avanoa faapena mo tamaitai i aso nei.

Tusifaamaumau Ou Lagona Uunai

Savali Faaopoopo