Ositaulaga

O le perisitua o le mana ma le pule a le Atua. O se ositaulag o se tofi i le Perisitua Arona. E amata atu ia Ianuari o le tausaga e atoa i ai le latou ta’i 16 tausaga, e mafai ona faauuina alii talavou agavaa i le tofi o le ositaulaga—o se tofi latou te umiaina seia oo ina latou maua le Perisitua Mekisateko. O alii matutua faatoa papatisoina e faauuina foi o ni ositaulaga i se taimi e le mamao pe a uma o latou papatisoga.

O ositaulaga e faatulagaina i ni korama i totonu o o latou uarota ma paranesi. O le epikopo po o le peresitene o le paranesi e avea ma peresitene o le korama a ositaulaga, ma e fono faatasi ma i latou, e aoao i latou i o latou tiute o o latou tofi (tagai Mataupu Faavae ma Feagaiga 107:87–88).

O se ositaulaga e i ai tiutetauave uma o se tiakono ma se aoao. E i ai foi ia te ia tiutetauave nei (tagai Tusitaulima 2: Taitaiina o le Ekalesia, 8.1.1.3):

• Na te faatinoina le faamanatuga e ala i le faatautaiga i le laulau o le faamanatuga ma faia tatalo o le faamanatuga (tagai Mataupu Faavae ma Feagaiga 20:46, 77, 79; tagai foi Tusitaulima 2, 20.4.3).

• E tatau ona ia “talai atu, aoao atu, faamalamalama atu, apoapoai atu, … ma asiasi atu i fale o tagata taitoatasi o le ekalesia, ma apoapoai atu ia te i latou ia tatalo atu ma le leo ma i le mea lilo ma faasaga atu i tiute uma faaleaiga” (Mataupu Faavae ma Feagaiga 20:46–47).

• A faatagaina ai e le epikopo, na te faatinoina papatisoga, faaee atu le Perisitua Arona, ma faauuina ia tiakono, aoao, ma ositaulaga (tagai Mataupu Faavae ma Feagaiga 20:46, 48).

• Na te faia papatisoga i le malumalu mo e ua maliliu.

• E fesoasoani o ia i le au epikopo i isi auala e tusa ai ma le tofi o se ositaulaga.

Tusifaamaumau Ou Lagona Uunai

Savali Faaopoopo

“Toefuataiga o le Perisitua Arona”