Lesona 13: Aoaoina Atu o le Talalelei a Iesu Keriso (Vaega 1)
13
Aoaoina Atu o le Talalelei a Iesu Keriso (Vaega 1)
Folasaga
O le talalelei a Iesu Keriso e aofia ai aoaoga e faavavau, mataupu faavae, tulafono, feagaiga, ma sauniga e manaomia mo le tagata e toe ulu atu ai i totonu o le afioaga o le Atua ma ia faaeaina i le malo selesitila. O uluai mataupu faavae ma sauniga o le talalelei o le faatuatua i le Alii o Iesu Keriso, salamo, papatisoga i le faatofuina, ma le meaalofa o le Agaga Paia. E tatau ona saunia faifeautalai faaolioli e fesoasoani i tagata sailiili ia maua le faatuatua ia Iesu Keriso ma salamo ia latou agasala a‘o le‘i papatisoina i latou ma maua le Agaga Paia.
Fai ni kopi o le pepa e tufa atu ua faaautuina “Salamo,” o loo maua i le faaiuga o le lesona, e faaaoga faatasi ma le manatu aoaoina o le salamo (tuu i le faitalia).
Fautuaga mo le Aoaoina Atu
E Mafai Ona Faamamaina i Tatou mai Agasala e Ala ia Keriso
Ina ia fesoasoani i tamaiti aoga e aoao mai le lesona, tusi le fesili lenei i luga o le laupapa a‘o le‘i amataina le vasega.
O a auala e ese ai tulaga faatauaina a le lalolagi e uiga i le sa‘o ma le sese mai tulaga faatauaina a le Tama Faalelagi?
A uma ona amata le vasega, valaaulia ni nai tamaiti aoga e tali i le fesili o loo i luga o le laupapa. A uma ona tali mai ni nai tamaiti aoga, fai atu i se tamaitiiti aoga e faitau leotele le pusa ua faaautuina “Agasala” i le itulau e 61 o le Tala‘i La‘u Talalelei. Ona fesili atu lea:
Aisea e taua ai mo tagata sailiili ona malamalama i le mea e ta‘u o le agasala ae o a foi ona taunuuga, a‘o le‘i aoao e uiga i le talalelei a Iesu Keriso?
O a nisi o upumoni o loo aoaoina i lenei vaega e mafai ona fesoasoani i tagata sailiili ia mananao ai e faalatalata atili atu ia Iesu Keriso?
A uma ona tuu atu se taimi talafeagai i tamaiti aoga e faitau ai, valaaulia tamaiti aoga e faasoa mai mea na latou mauaina. O a latou tali e ono aofia ai mea nei:
Na auina mai e le Atua Lona Alo Pele o Iesu Keriso i le lalolagi, ina ia tatou maua le avanoa e toe foi atu ai e nonofo i Lona afioaga pe a tatou oti.
E na‘o le alofa mutimutivale ma le alofa tunoa o le Faaola e mafai ai ona tatou mama mai agasala.
E ala i le Togiola ma le Toetu a Iesu Keriso, ua toe aumaia ai tagata uma i le afioaga o le Alii ina ia faamasinoina.
E leai se mea e le mama e mafai ona nofo i le afioaga o le Atua.
Na fai Iesu Keriso ma o tatou sui ma mafatia i le sala mo a tatou agasala.
E faamagalo e Iesu Keriso a tatou agasala pe a tatou talia o Ia, salamo, ma usitai i Ana poloaiga.
O le mea e sosoo ai, tuu atu i tamaiti aoga ni nai minute e suesue pe faailoga ai nisi o mau fuaitau o loo lisiina i parakalafa na faatoa o latou faitauina po o i le pusa o Mau Suesueina i le itulau e 62 o loo faaalia ai se tasi o mataupu faavae na o latou faailoaina. Mafaufau e fai atu i le afa o le vasega e filifili ni fuaitau i parakalafa na faatoa o latou faitauina ae o le isi afa e filifili ni fuaitau i le pusa o Mau Suesueina. Fai atu i tamaiti aoga e sauni e faamatala pe faapefea ona o latou faaaogaina se mau fuaitau se tasi pe sili atu e fesoasoani ai i se tagata sailiili ia malamalama ma talisapaia le mea ua faia e le Tama Faalelagi ma Lona Alo o Iesu Keriso e fesoasoani ai ia i tatou e faatoilalo taunuuga o le agasala. A mavae ni nai minute, valaaulia ni nai tagata aoga e faamatala mai mea na latou aoaoina.
Faatuatua ia Iesu Keriso
Toe faamanatu ma tamaiti aoga le faamatalaga o le faamoemoega o le faifeautalai o loo mau ai le pusa ua faaautuina “O Lou Faamoemoega” i le itulau 1 o le Tala‘i La‘u Talalelei. Ona fesili atu lea:
O le a le eseesega i le va o le (1) fesoasoani i se tasi e “sau ia Keriso” ma le liuaina i Lana talalelei toefuataiina ma le (2) tau lava o le fesoasoani i se tasi ia avea ma se tagata o le Ekalesia?
Aisea e sili ai le taua mo faifeautalai ona fesoasoani i tagata ia o mai ia Keriso nai lo na o le fesoasoani ia i latou ia avea ma tagata o le Ekalesia?
Valaaulia tamaiti aoga e suesue i le parakalafa muamua i le vaega ua faaautuina “Faatuatua ia Iesu Keriso” i le itulau e 62 o le Tala‘i La‘u Talalelei. A‘o latou suesue, fai atu i tamaiti aoga e vaavaai mo auala e mafai ai e le faatuatua ia Iesu Keriso ona fesoasoani i se tagata ia liuaina i Lana talalelei toefuataiina. Ona fesili atu lea:
Mai mea sa e faitauina, o le a le uiga o le i ai o le faatuatua ia Iesu Keriso?
E mafai faapefea e le faatuatua ia Iesu Keriso ona taitai atu se tasi ia liuaina i Lana talalelei toefuataiina?
Tusi i luga o le laupapa: O le faatuatua ia Iesu Keriso e taitaiina atu ai i faatinoga. Valaaulia tamaiti aoga e faitau uma le vaega o loo totoe o le “Faatuatua ia Iesu Keriso” i le itulau e 62–63 o le Tala‘i La‘u Talalelei. A‘o latou faitau, valaaulia i latou e faailoga nisi o faatinoga e faaalia ai le faatuatua o se tagata ia Iesu Keriso ma Lana Togiola. A mavae ni nai minute, ia fesili atu:
O a nisi o faatinoga e mafai ona faaalia ai ua atiina a‘e e se tagata sailiili le faatuatua ia Iesu Keriso? (O tali e mafai ona aofia ai le: salamo, aoao e uiga ma avea faapei o le Faaola, usitai i poloaiga, aloese mai agasala, tatalo mo le malosi ia malo ai i faaosoosoga, aoao i le afioga a le Atua, ma le tausia o tautinoga e mulimuli i mataupu faavae o le talalelei.)
E tusa ai ma mea na e faitauina, a faaali lo tatou faatuatua ia Iesu Keriso, e faapefea ona Ia faamanuia i tatou i o tatou olaga i aso taitasi? (O tali e mafai ona aofia ai le: Na te tuuina mai ia i tatou le mana e faafetaia‘i ai luitau o le olaga; e fesoasoani o Ia e sui manaoga o tatou loto; Na te faamalolo i tatou faaletino ma faaleagaga.)
Fai atu i tamaiti aoga e tusi tali i fesili nei i a latou api talaaga mo suesuega:
E faapefea e lou faatuatua ia Iesu Keriso ona faaosofia oe e faatino auala na faamatalaina mai i lenei vaega?
O a nisi mea e mafai ona e faia e faaalia atili ai e i ai lou faatuatua ia Iesu Keriso?
Vaevae tamaiti aoga i paga po o soa. Valaaulia ia paga e saunia se lesona e lua i le tolu minute le umi e uiga i le faatuatua ia Iesu Keriso? A‘o latou sauniuni, fai atu i tamaiti aoga e faaaoga mea o loo i le Tala‘i La‘u Talalelei, itulau e 62–63, ia aofia ai se mau se tasi pe lua mai le pusa o Mau Suesueina . E mafai foi ona faaaoga e tamaiti aoga le tamaitusi a le faifeautalai ua faaautuina O Le Talalelei a Iesu Keriso. A ua lava loa se taimi na tuu atu i tamaiti aoga e sauniuni ai, faatulaga paga i ni vaega o tamaiti aoga taitoafa (e lua paga i vaega taitasi). Tofi se paga se tasi o tamaiti aoga e aoao atu i le isi paga. Faamalamalama atu, a‘o latou aoao atu, e tatau ona faaaoga a latou lava upu ma ia faafaigofie ma manino.
A‘o faaiu e tamaiti aoga a latou aafiaga faafaiaoga, tuu atu i vaega toalaiti e talanoa i latou lava i mea na lelei ona fai, ae o a foi ni mea na latou manatu sa luitau le aoaoina atu ma pe aisea? ma pe na faapefea ona fesoasoani a latou aoaoga ia i latou na aoaoina ia lagona le taua o le i ai o le faatuatua ia Iesu Keriso.
Ona fesuiai lea o matafaioi ma tuu atu i le isi paga e aoao atu. Ia mautinoa ia tuu atu le taimi mo i latou e maua ai foi ni manatu faaalia.
I le faaiuga o lenei gaoioiga faataitai, fesili atu i tamaiti aoga po o a ni a latou fesili sa i ai, po o a foi ni malamalamaaga sa‘o ma loloto na latou mauaina. Afai e faalotolotolua tamaiti aoga e tali mai, atonu e te fesili atu, “O a nisi o mea sa outou fiafia i ai na tou faalogo i ai mai ia i latou na aoaoina outou?” Fesili atu pe i ai ni tamaiti aoga e fia faasoa mai i le vasega se aafiaga mai o latou olaga i se taimi na faamanuiaina ai i latou e ala i le i ai o le faatuatua ia Iesu Keriso.
Salamo
Faaali atu se ata o Alema ma atalii o Mosaea (tagai i le Tusi Ata o le Talalelei, 77), ma valaaulia se tamaitiiti aoga e otooto faapuupuu le tala i le liua o Alema le Itiiti (tagai i le Alema 36:6–24). Ona tuu atu lea i ni nai tamaiti aoga e auauai e faitau leotele le Alema 36:13, 17–21, ma le 23–25.
Ata
agelu ma Alema ma atalii o Mosaea
Ona fesili atu lea:
Na faapefea ona faaalia e Alema sa i ai lona faatuatua ia Iesu Keriso?
O le a le mea na tupu o se taunuuga o le faaalia o le faatuatua o Alema?
O le taunuuga o le salamo faamaoni o Alema?
Tuu atu i tamaiti aoga se minute se tasi e tusi ai i a latou api talaaga mo suesuega se fuaiupu se tasi o le faauigaga o le salamo. Valaaulia ni nai tamaiti aoga e faitau atu a latou fuaiupu i le vasega. Ina ia fesoasoani i tamaiti aoga ia faamausali i o latou mafaufau se faauigaga faigofie o le salamo, faaali atu le upusii lenei mai ia Elder Neil L. Andersen o le Korama a Aposetolo e Toasefululua, ma fai atu i se tamaitiiti aoga e faitau leotele:
Ata
Elder Neil L. Andersen
“A tatou agasala, ua tatou liliu ese mai le Atua. A tatou salamo, ua tatou toe liliu atu i le Atua. …
“… O le salamo o le liliu ese mai nisi o mea, e pei o le le faamaoni, faamaualuga, ita, ma mafaufauga le mama, ae liliu agai atu i isi mea, e pei o le agalelei, le manatu faapito, onosai, ma le faaleagaga. O le ‘toe-liliu‘ agai atu i le Atua” (“Salamo … Ina Ia Ou Faamaloloina Outou,” Ensign po o le Liahona, Nov. 2009, 40–41).
E mafai faapefea ona fesoasoani lenei faauigaga faigofie ia te oe e faamatala ai le uiga o le salamo? (A‘o tali mai tamaiti aoga, tusi le mataupu faavae lenei i luga o le laupapa: O le salamo o le toe liliu agai atu i le Atua.)
Ina ia fesoasoani i tamaiti aoga ia malamalama lelei i le faagasologa ma taunuuga o le salamo, mafaufau e fai atu i tamaiti aoga e suesue le Mosaea 3:19; 4:1–3; ma le 5:2. A‘o latou suesue, fai atu i tamaiti aoga e su‘e upu ma fuaitau e fesoasoani e faamatala ai le uiga o le salamo. A lava loa se taimi na tuu atu i ai, fai atu i ni nai tamaiti aoga e faamatala atu i le vasega mea na latou mauaina. Ona fesili atu lea:
O le a se faamautinoaga o e vaaia i nei fuaitau e faapea, sa faaali e le nuu o le Tupu o Peniamina le faatuatua ia Iesu Keriso ina ia faapea ona maua ai le faamagaloga o a latou agasala?
Tufa atu pepa o loo i ai le siata lenei, pe tusi i luga o le laupapa ma fai atu i tamaiti aoga e kopi i totonu o a latou api talaaga mo suesuega.
Fai atu i tamaiti aoga e suesue i le vaega ua faaautuina “Salamo” i itulau 63–64 o le Tala’i Lavu Talalelei. A’o latou faitau, fai atu i tamaiti aoga e faatumu koluma o a latou siata po o pepa na tufa atu e faaaoga ai upu, fasifuaiupu, po o fuaiupu mai le Tala’i La’u Talalelei. Ina ia fesoasoani i tamaiti aoga ia iloa ituaiga o fasifuaiupu e mafai ona latou faaaofia ai, ua faapea ona avatu ai se faataitaiga i koluma taitasi. A uma, e tatau ona foliga faapenei a latou siata:
O le a le salamo?
E faapefea ona tatou salamo?
O a fua po o faamaoniga o le salamo?
Suiga i manatu, talitonuga, ma amioga
Vaaiga fou i le tagata lava ia, le Atua, ma le lalolagi
Aumai o tatou olaga ia ogatasi ma le finagalo o le Atua
Liliu ese mai le agasala ma ia le toe faia
Taumafai pea lava pea e faasa’o solitulafono ma ia alualu i luma
Lagona le faanoanoa po o le faanoanoa faaleatua
Taofia le faia o mea sese
Faaauau ona fai mea sa’o
Iloa a tatou agasala
Ta’uta’u atu a tatou agasala
Ole atu i le Atua mo se faamagaloga
Faasa’o ni faafitauli na mafua mai i a tatou faatinoga
Tetee atu i soo se manao e [fai] le agasala
Atiina a’e uiga faaKeriso, tuputupu a’e i le malamalama, auauna atu
Faaali atu le alofa mo le Atua e ala i le usitai
Maua le alofa tunoa o Keriso
Suia le vaaiga i le tagata lava ia ma le lalolagi
Malamalama i lo tatou faia i le Atua
Faasolo malosi atu le manao e mulimuli i le Atua
Lagona le faamagaloga a le Atua
Lagona le filemu o le Atua
Tafi ese le ta’usalaina ma le faanoanoa
Lagona le faateleina atili o le Agaga
Saunia lelei atu e nonofo ma le Atua ma Iesu Keriso
Avea atili e pei o Iesu
Lagona le olioli
A ua lava loa le taimi mo tamaiti aoga e faatumu ai a latou siata, valaaulia tamaiti aoga e talanoa ma se isi tagata o le vasega i fasifuaitau ma upu na latou faaaofiaina i a latou siata. Mafaufau e fesili atu i le vasega nisi po o fesili uma nei e faaloloto atili ai malamalamaaga o tamaiti aoga e uiga i aoaoga faavae ma mataupu faavae na latou faitau i ai:
E mafai faapefea e mataupu faavae na outou faailoaina mai i le koluma muamua ma le lua, ona fesoasoani e te iloa ai pe ua salamo moni se tagata sailiili?
E tusa ai ma mea na e tusia i le koluma lona tolu, o a ni faamanuiaga e oo mai mai le salamo, e faaopoopo atu i le mauaina o le faamagaloga o agasala?
Mafaufau i aitema o loo i koluma muamua ma le tolu. Aisea e ao ai ona i ai lo tatou faatuatua ia Keriso pe afai o nei mea o le a tutupu moni lava.
A’o tali mai tamaiti aoga, atonu e te faailoa atu e faapea, e aoao atu e faifeautalai le talalelei e fesoasoani ai i tagata e atina a’e le faatuatua ia Iesu Keriso ma ia faaosofia i latou e salamo. O le faatuatua ia Iesu Keriso ma le salamo o tuutuuga ia mo le mauaina o le Togiola. O le salamo o le a fesoasoani foi i tagata sailiili ia latalata atili atu ai i le Tama Faalelagi ma Iesu Keriso. Ina ia saunia tamaiti aoga e faataitai ona aoao atu e uiga i le salamo, faasoa atu le vaaiga lenei i le vasega:
Ua tusa ma le tolu vaiaso o oulua aoaoina ma lau soa ni uo se toalua tou te potu faatasi. O se tasi o i laua ua matuai sologa lelei lava. O le isi uo tou te potu faatasi e foliga mai ua le fia auai, ma ua tuua le potu pe a amata a outou lesona. Ina ua e maua mulimuli ane se avanoa e fesiligia ai le uo tou te potu faatasi ua le fia auai, sa ia faamatala mai, na te iloa e le o ola o ia i le taimi nei e tusa ai ma le finagalo o le Atua, ae o le ituaiga olaga lava lea sa ola mai ai i lona olaga atoa, ma ua manatu ai loa o le ituaiga tagata lava lea e i ai o ia, ma e le tele se mea e mafai ona faia i ai.
Vaevae tamaiti aoga i paga po o soa. Tuu atu ia lava se taimi i paga e saunia ai, pe o le a faapefea ona laua galulue faatasi e aoao le isi paga o tamaiti aoga, i se lesona puupuu e tolu i le fa minute e uiga i le salamo. Uunaia tamaiti aoga e sauni e faatino le aoaoga o uo e potu faatasi o loo i le vaaiga o le tala. Faamalamalama atu, o a latou aoaoga e tatau ona faafaigofie, manino, ma taulai atu i manaoga o uo e potu faatasi. E tatau ona latou mafaufau i auala e mafai ona latou fesoasoani ai i le uo ua le fia auai ia malamalama i le pogai e manaomia ai ona sui ma auala e fesoasoani ia ona iloa ai, e mafai ona salamo e ala i le fesoasoani a le Faaola. Fai atu i tamaiti aoga e faaaoga mea o loo i le Tala’i La’u Talalelei, itulau e 63–64, po o le tamaitusi a le faifeautalai ua faaautuina O Le Talalelei a Iesu Keriso. Uunai i latou ia faaaofia ai se mau fuaitau se tasi pe lua e faaalia ai le taua o le salamo.
Faatulaga tamaiti aoga i ni vaega toalaiti, e ta’i lua paga i vaega taitasi. Tofi se paga se tasi o tamaiti aoga e aoao le isi paga, o e o le a faia le vaega a uo e potu faatasi na faamatalaina i le vaaiga o le tala. Faamalamalama atu i tamaiti aoga, a latou faia le matafaioi o tagata sailiili, e tatau ona latou lagona le saoloto e faaali atu faamaoni ni atugaluga e ono i ai, ae e le tatau ona taumafai e soona mateletele pe tetee i tamaiti aoga o loo aoao atu.
A’o faaiu e tamaiti aoga o latou aafiaga faafaifaoaga, fai atu i le vaega ia talanoa e i latou lava mea na lelei ona fai ma mea na ono mafai ona fai faalelei e [tamaiti] faiaoga.
Ona fai atu lea i tamaiti aoga e fesuiai matafaioi ina ia maua e le isi paga o tamaiti aoga le avanoa e faataitai ai ona aoao atu. Ia mautinoa e i ai se taimi mo i latou e maua mai ai ni manatu faaalia.
A uma ona fai le tala faatino, fesili atu i tamaiti aoga po o a ni fesili po o ni malamalamaaga sa’o ma loloto na latou maua mai le aafiaga faafaiaoga.
Ina ia fesoasoani i tamaiti aoga ia lagona le moni ma le taua o le salamo, o le auala mo tagata e toe foi agai atu ai i le Atua, faaali atu le vitio “Jesus Christ Is the Way” (5:02).
A uma le vitio, fesili atu:
O le a se faamaoniga na e vaaia i le vitio lenei, sa suia moni lenei tuafafine e ala i le salamo ma sa toe liliu atu o ia i le Atua?
O a ni ou lagona sa i ai a’o e vaaia le ala na fesoasoani ai le savali o le talalelei i lenei tuafafine ina ia suia ma liliu atu i le Atua?
Faaiu i le fesili atu i tamaiti aoga pe i ai se isi e fia faasoa mai a latou molimau e uiga i le mana o le faatuatua ma le salamo, ma ta’u mai pe aisea latou te mananao ai e faasoa atu le talalelei. Faaiu e ala i le faasoa atu foi o lau molimau.
Valaaulia e Faatino
Valaaulia tamaiti aoga e aoao atili e uiga i faamanuiaga o le i ai o le faatuatua ia Iesu Keriso, ma maua le faamagaloga o agasala ma le olioli e ala i le salamo, e ala i le faia o se tasi pe sili atu o gaoioiga fautuaina nei:
Aoao atu se lesona i le afiafi faaleaiga a sau i le taua o le faatuatua ia Iesu Keriso ma le salamo.
Suesue i mau fuaitau e uiga i le faatuatua o loo i le pusa o Mau Suesueina i le itulau e 63 i le Tala’i La’u Talalelei. Faailoga pe valivali ia mau e te manao e faaaoga e aoao atu i isi i lau misiona.
Faaaoga le Topical Guide ma upu a perofeta ma aposetolo o aso nei e suesue ai e uiga i le aoaoga faavae o le salamo. Fai ni faamatalaga o mea e te aoaoina i se api talaaga mo suesuega. Mafaufau pe i ai sau molimau e uiga i lenei aoaoga faavae e mafai ona e faasoa atu i isi i le taimi o lau misiona. Ia faamalosia lou faatuatua i le mataupu faavae o le salamo e ala i le saili ia salamo i aso uma, ma tusi ou aafiaga i lau api talaaga mo suesuega.
Faaaoga meafaigaluega i luga o le initoneti e pei o ala o faasalalauga faaagafesootai e tuu ai i luga le vitio “Jesus Christ Is the Way” (po o se isi vitio e uiga i le Faaola ma Lana Togiola, e matamata ai isi. Ia faaaofia ai se faamalamalamaga pe aisea na anoa ai le vitio ia te oe.