Aoaoina Atu o le Savali o le Toefuataiga (Vaega 2)

Faaali le vitio puupuu muamua mai le lauga a Peresitene Thomas S. Monson “Come, All Ye Sons of God,” lea na faasoa mai ai e Peresitene Monson le aafiaga o le liliuga o Elmer Pollard:

Ata

Peresitene Thomas S. Monson

“A o ou auauna ai o se peresitene o se misiona i Kanata i le silia ma le 50 tausaga talu ai, sa maofa ai se tasi o faifeautalai talavou na sau mai se tamai nuu maotua, i le telē o Toronto. Sa fai si ona puupuu ae sa umī i lana molimau. E lei leva ona taunuu o ia, faatasi ai ma lana soa, ae asiasi atu i le fale o Elmer Pollard i Oshawa, Ontario, Kanata. I le momomo o lona loto i alii talavou o e, i le taimi o se matagi kiona malosi, sa o atu ai mai lea fale i lea fale, sa valaaulia ai e Mr. Pollard ia faifeautalai i totonu o lona maota. Sa la tuuina atu ia te ia le la savali. Na te lei mauaina le agaga. Ina ua maea na ia fai atu ia i laua e tuumuli ma aua nei toe foi atu. O ana upu mulimuli i faifeautalai a o la o ese atu mai lona faitotoa i luma sa tautala atu ai ma le faatauemu: ‘E le mafai ona oulua tau mai ia te au e te lua talitonu moni o Iosefa Samita o se perofeta a le Atua!’

“Sa tapunia le faitotoa” (“O Mai, Alo o le Atua,” Ensign po o le Liahona, Me 2013, 68).

A uma ona faaali le ata puupuu, ia fesili atu:

• Ana faapea o oe o se tasi o nei faifeautalai, o a ni mafaufauga ma ni lagona e te ono maua a‘o e aluese mai le fale o Mr. Pollard?

• O le a se mea e te ono faia i lenei taimi?

Faaali atu le vitio puupuu lona lua, o loo i ai le vaega o totoe o le tala a Peresitene Monson:

Ata

Peresitene Thomas S. Monson

“Sa savavali atu faifeautalai i le ala. Sa fai atu le tatou tama mai tuā i lana soa: ‘Soa, ta te lei tali atu ia Mr. Pollard. Sa ia fai mai ta te le talitonu o Iosefa Samita o se perofeta moni. Ta toe foi ma ta molimau atu ia te ia.’ I le taimi muamua sa tau le mautonu le faifeautalai na tele lona potomasani, ae sa iu lava ina malie e o atu ma lana soa. Sa taia o la loto i le fefe a o la latalata atu i le faitotoa lea sa lei leva atu ona teenaina ai i laua. Sa la tuitui, faailoa atu ia Mr. Pollard, faatali ma le tiga mo sina taimi, ona tautala atu loa lea o la tatou faifeautalai e le lava se poto masani, ma le mana mai le Agaga: ‘Mr. Pollard, na e fai mai ma te le talitonu moni lava o Iosefa Samita o se perofeta a le Atua. Ou te molimau atu ia te oe o Iosefa o se perofeta. Sa ia faaliliuina le Tusi a Mamona. Na ia vaai i le Atua le Tama ma Iesu le Alo. Ua ou iloaina.’

“I se taimi mulimuli ane, na tu ai Mr. Pollard, lea ua Uso Pollard nei, i se sauniga perisitua ma tautino ai, ‘O lena po sa le mafai ona ou moe. Sa ou faalogoina pea upu: O Iosefa Samita o se perofeta a le Atua. Ua ou iloaina. Ua ou iloaina. Ua ou iloaina.” O le aso na sosoo ai sa ou telefoni atu ai i faifeautalai ma fai atu i ai e toe foi mai. O le la savali, na aufaatasi ma le la molimau, na suia ai lo’u olaga ma olaga o lo’u aiga’” (“O Mai, Alo o le Atua,” Ensign po o le Liahona, Me 2013, 68).

Fesili atu:

• Aisea e te manatu ai, sa i ai se aafiaga loloto o le molimau a le faifeautalai e uiga i le Perofeta o Iosefa Samita ia Mr. Pollard?

Fai atu i tamaiti aoga e sue i le Iosefa Samita—Talafaasolopito i le Penina Tau Tele. Fai atu i se tamaitiiti aoga e faitau leotele ia fuaiupu e 5–6, ona fai atu lea i se isi tamaitiiti aoga e faitau leotele ia fuaiupu e 7–9. Ona fesili lea i tamaiti aoga:

• E faapefea ona e aotelea nei fuaiupu i na o ni fuaiupu se tasi pe lua?

Fai atu i se tamaitiiti e faitau leotele le Iosefa Samita—Talafaasolopito 1:10. Ao faitau le fuaiupu, fai atu i tamaiti aoga e mafaufau pe faapefea ona tutusa le sailiga e Iosefa Samita o upumoni faalelotu ma [sailiga] a le toatele o tagata o le a latou fetaui i a latou misiona. Ona fesili atu lea:

• O a fesili sa tauivi ma le taulealea o Iosefa Samita?

• O le a le mea na matuai faigata ai ia Iosefa ona filifili po o le fea ekalesia e auai ai?

• E ono tutusa faapefea fesili a Iosefa Samita ma fesili o i ai a tagata i le lalolagi i aso nei?

Fai atu i se tamaitiiti aoga e faitau leotele le Iosefa Samita—Talafaasolopito 1:11–13. Ona fesili atu lea:

• O le a le mataupu faavae na aoao e Iosefa Samita e uiga i le auala e maua ai upumoni faaleagaga? (E ui latou te ono faaaogaina ni upu eseese, atonu e tau mai e tamaiti aoga le mataupu faavae lenei: E mafai ona tatou aoaoina upumoni faaleagaga mai le Atua pe a tatou tatalo atu ia te Ia mo tali ma naunau e faatino.)

• E mafai faapefea ona e faaaogaina le faataitaiga a Iosefa Samita e fesoasoani ai i isi o fia maua upumoni faaleagaga?

Fai atu i se tamaitiiti aoga e faitau lemu le Iosefa Samita—Talafaasolopito 1:14–19. Ao latou faia, fai atu ia i latou e mafaufau e uiga i se aafiaga tumau ua faia e le Uluai Faaaliga i le lalolagi ma i o latou olaga patino. A mavae se taimi filemu e faauma ai le faitauga, fai atu fesili e pei o nei:

• O a nisi o mafuaaga na osofai ai e le fili ia Iosefa Samita ao lei faaali mai le Tama Faalelagi ma Lona Alo o Iesu Keriso? (Sa manao le fili e taofi Iosefa mai le iloaina o upumoni faaleagaga ma iu ina taofia ai le Toefuataiga mai le faataunuuina.

• O a ni auala na amata faatoilalo ai e le Uluai Faaaliga ia taunuuga o le Liliuese Tele? (Faamamafa atu le upumoni lenei i tamaiti aoga: E ala i le Uluai Faaaliga, sa toe matalaina le lagi ma amataina ai le Toefuataiga.

• O a ni upumoni faaleaoaoga faavae e mafai ona aoaoina mai le Uluai Faaaliga? (O le Tama ma le Alo o ni tagata mavaevae, o loo matala le lagi, e mafai ona tatou maua faaaliga, ma isi mea faapena.)

• Aisea e te manatu ua fautuaina ai e le Tala‘i La‘u Talalelei ia aoao atu e faifeautalai le Uluali Faaaliga i le taimi muamua lava o le latou feiloaiga ma se tagata sailiili?

• E mafai faapefea e le iloa e uiga i le faaali mai o le Tama Faalelagi ma Lona Alo o Iesu Keriso, ona fesoasoani i tagata sailiili i la latou sailiga mo upumoni faaleagaga?

Ina ia fesoasoani i tamaiti aoga ia faaloloto o latou malamalamaaga i le taua o le Uluai Faaaliga, tuu atu i tamaiti aoga taitoatasi se kopi o le pepa e tufa atu ua faaautuina “O Le Faavae Ofoofogia o lo Tatou Faatuatuaga,” lea o loo i ai se vaega o le lauga a Peresitene Gordon B. Hinckley.

Ata

pepa e tufa atu o le Faavae

Fai atu i se tamaitiiti aoga e faitau leotele parakalafa muamua e tolu. Ona fesili atu lea:

• Aisea e faalagolago ai le “malosiaga atoa” o Le Ekalesia a Iesu Keriso o le Au Paia o Aso e Gata Ai” i le moni a’ia’i o le Uluai Faaaliga? (E tatau i tamaiti aoga ona malamalama afai e moni le tala a Iosefa Samita e uiga i lana faaaliga, o lona uiga e moni foi la o Le Ekalesia a Iesu Keriso o le Au Paia o Aso e Gata Ai, e pau lea o le ekalesia moni i luga o le fogaeleele ua i ai le faamaoniga ma le pule atoa a le Tama Faalelagi ma Iesu Keriso.)

• E tusa ai ma le saunoaga a Peresitene Hinckley, o a ni auala sa ese ai le galuega a Iosefa Samita mai galuega sa faia e taitai na muamua atu o ekalesia o e sa toe faatulagaina le faiga o tapuaiga ma aoaoga faavae?

Tuu atu ni nai minute i tamaiti aoga e faitau filemu ai le vaega o totoe o le pepa e tufa atu. A o latou faitau, uunai i latou e faailoga upu, fuaitau, po o faamatalaga e tulaga ese ia i latou. A uma ona faitau tamaiti aoga, valaaulia ni isi o i latou e faasoa mai ni mea na latou faailogaina ma faamalamalama pe aisea na taua ai ia i latou. Mafaufau e fai atu fesili e pei o nei:

• Aisea atonu e faigata ai i nisi o tagata ona talia le moni o le faaaliga a Iosefa Samita?

• Pe a mafaufau atu i mataupu faavae na suesueina i le tatou lesona ua mavae atu, e faapefea ona ofi le Uluai Faaaliga i le mamanu o tisipenisione, liliuese, ma le toefuataiga? (I le mavae ai o se vaitaimi o le liliuese, o le Uluai Faaaliga na ta‘imuaina se toefuataiga ma se tisipenisione fou o le talalelei. E pei o tisipenisione na muamua atu, sa valaauina se perofeta e le Atua e toefuatai mai upumoni o le talalelei ma le pule o le perisitua.) Sa valaauina Iosefa Samita e avea ma perofeta o le “ tisipenisione o le faaatoaga o tausaga” [Efeso 1:10]. O le uiga o lenei mea, o le a le toe aveesea le talalelei e ala i le liliuese ae o le a tumau ai i luga o le fogaeleele seia oo i le Afio Mai Faalua o Keriso.)

• E mafai faapefea e le fesoasoani i se tagata sailiili ia malamalama i lenei mamanu faaletusi paia o le liliuese ma le toefuataiga, ona fesoasoani ia te ia e talia ai le moni o le Uluai Faaaliga ma le Toefuataiga i ona po nei o le talalelei?

Valaaulia le vasega e sue i le itulau e 37 i le Tala‘i La‘u Talalelei ma faitau filemu i parakalafa mulimuli e tolu o loo i le itulau, ma vaavaai mo mea sa toefuatai mai pe toe faatulagaina e ala mai i le Toefuataiga. Ona fai atu lea i tamaiti aoga e faasoa mai mea ua latou mauaina. Atonu e te manao ia mautinoa e ta‘ua e le vasega le (1) o le toefuataiga o le pule, ki ma sauniga o le perisitua, (2) o le toe faatulagaina o le Ekalesia a Keriso, (3) o le valaauga o Aposetolo e Toasefululua, (4) o le ta‘imuaga o se tisipenisione fou o le talalelei, ma le (5) o le valaauina o se perofeta soifua.

Ina ia fesoasoani i tamaiti aoga e lagona le moni ma le taua o le Uluai Faaaliga ma le Toefuataiga, fai atu i le vasega e tali i fesili e pei o nei:

• Na faapefea ona e maua se molimau i le moni ma le taua o le Uluai Faaaliga?

• O a ni auala na aafia ai e lau molimau e uiga i le Uluai Faaaliga lou talitonuga i le Toefuataiga o le talalelei a Iesu Keriso?

Fesili atu pe i ai se tamaitiiti aoga e fia faasoa atu i le vasega a latou molimau e uiga i le Uluai Faaaliga po o le Toefuataiga.

Vaevae le vasega i paga. Faatulaga tamaiti aoga i ni vasega toalaiti pe taitoafa (e lua paga i vaega taitasi) Ia lava se taimi e tuu atu i tamaiti aoga e saunia ai pe faapefea ona latou aoao atu se lesona puupuu e tolu minute e faatatau i le Uluai Faaaliga ma le Toefuataiga. Faamalamalama atu, o a latou aoaoga e tatau ona faigofie ma manino. Fai atu i tamaiti aoga e toe faamanatu mea o loo i le Tala‘i La‘u Talalelei, i itulau e 36–37, po o le itulau e  11 i le tamaitusi a le faifeautalai ua faaautuina O Le Toefuataiga o le Talalelei a Iesu Keriso. Uunai tamaiti aoga e faaaoga a latou lava upu e faamatala ai le aafiaga a Iosefa Samita (vagana ai pe a latou siiina pe faitau mai le Iosefa Samita—Talafaasolopito 1:16–17). Faamanatu atu ia i latou e faaiu i a latou molimau. Tofi se paga e tasi i vasega taitasi e aoao le isi paga.

A maea aafiaga faafaiaoga a tamaiti aoga, fai atu i vaega taitasi e talanoa i latou lava po o a itu sa lelei i le taimi o le aoaoga ae o a foi itu e ono faalelei atili e faiaoga.

Ona, fesuiai lea o matafaioi ma tuu atu i le isi paga e faiaoga. Ia mautinoa ia i ai se taimi mo manatu faaalia. A uma ona aoao atu paga uma, valaaulia tagata o le vasega e faasoa mai ni malamalamaaga sa‘o ma loloto mai o latou aafiaga i le vasega atoa.

Atonu e aoga mo tamaiti aoga ona iloa le ala e tali atu ai i fesili faigata e faatatau i tala eseese o le Uluai Faaaliga na tusia e Iosefa Samita. Faamalamalama atu e faapea, o le tala i le Uluai Faaaliga o loo maua i le Iosefa Samita—Talafaasolopito, sa tusia e le Perofeta i le 1838 o se vaega o le talafaasolopito aloaia o le Ekalesia, sa tuu e tuuina atu i le lalolagi. Talu ai sa sili atu ia le faatasi (1) ona tusia e Iosefa Samita lona aafiaga, ua faapea ai ona i ai isi tala o le Uluai Faaaliga. Faamalamalama atu i tamaiti aoga e faapea, o nei tala taitasi e fai si eseese i lona faamamafaga ma faamatalaga auiliili. O nisi o tagata faitio ua finau sese mai e faapea, o soo se eseesega i le toefaamatalaina [o le tala] o ni faamaoniga lea o le talafatu. Ae peitai, a toe faamatala e se tagata se aafiaga i ni tulaga se tele i aofia eseese i le aluga o ni tausaga se tele, o ia tala o le a matele ina faamamafa ai ni itu eseese o le aafiaga ma i ai ni faamatalaga auiliili tulaga ese. Mo se faataitaiga, o eseesega e talitutusa ma tala i le Uluai Faaliga, o loo i ai i tala a Paulo e uiga i lana faaaliga vaaia i le ala i Tamaseko (tagai Galuega 9:3–9; 22:6–11; 26:12–18).

Ia amata i le faatulagaina o le taua o lenei vaega o le lesona, e ala i le fai atu i se tamaitiiti aoga e faitau leotele parakalafa mulimuli e lua i le folasaga i le Tusi a Mamona. Valaaulia tamaiti aoga e vaavaai mo folafolaga ua tuuina mai ia i latou o e filifili e faitau le Tusi a Mamona, mafaufau loloto i ai, ma ole atu i le Atua pe moni. Valaaulia tagata o le vasega e faasoa mai mea na latou maua.

Fai atu i tamaiti aoga e su‘e i le itulau e 38 i le Tala‘i La‘u Talalelei, ma fai atu i se tamaitiiti e faitau leotele le parakalafa muamua i le vaega “O Le Tusi a Mamona: O Se Tasi Molimau ia Iesu Keriso.” Fesoasoani i tamaiti aoga e faailoa mai se mataupu faavae ua aoaoina i lenei parakalafa e ala i le fesili atu:

• Aisea ua avea ai le Tusi a Mamona ma se meafaigaleuga taua ma malosi mo faifeautalai? (Fesoasoani i tamaiti aoga ia iloa o le Tusi a Mamona ua i ai le talalelei e faavavau, o le faamaoniga talitonuina o Iosefa Samita o se perofeta a le Atua, ma o se tasi o molimau ia Iesu Keriso. (Tagai i le MF&F 20:8–11.)

Ina ia fesoasoani i tamaiti aoga ia malamalama lelei i lenei aoaoga favae, fai atu ni nai fesili e pei o nei:

• Aisea ua avea ai le Tusi a Mamona ma faamaoniga talitonuina o Iosefa o se perofeta a le Atua? (Afai e faia e se tagata se faaiuga e faapea e moni le Tusi a Mamona, ona tatau foi lea ona latou faia se faaiuga o Iosefa Samita sa galue e tusa ai ma le taitaiga faalelagi ia maua ma faaliliu [le Tusi a Mamona] ma o se perofeta a le Atua.)

• O a auala e faamanuiaina ai tagata sailiili pe a latou faitau i le Tusi a Mamona ma maua ai se molimau e moni. (O le a latou iloa o Iosefa Samita o se perofeta, ma o le a latou saunia e talia le Toefuataiga o le talalelei a Iesu Keriso ma maua sauniga faaola.)

Fai atu i se tamaitiiti e faitau le Moronae 10:3–5. Fai atu fesili nei:

• O a ni laasaga e ao ona faia e se tagata ina ia maua ai se molimau e moni le Tusi a Mamona? (E ui latou te ono faaaogaina ni upu eseese, atonu e ta‘u mai e tamaiti aoga le mataupu faavae lenei: A o tatou faitau, mafaufau loloto, ma tatalo ma le manatu moni i le Tusi a Mamona, o le a faaali mai e le Atua lona moni ia i tatou e ala i le mana o le Agaga Paia.)

• O le a le uiga o le “ole atu ma le manatu moni i ai” (Moronae 10:4)? (O le manao faamaoni ia maua se tali e ala mai i le Agaga Paia ma le tautino atu e faatino e tusa ai ma le tali.)

Ina ia faaalia le pogai e taua ai i se tagata sailiili ona faitau le Tusi a Mamona ma tatalo ma le manatu moni e uiga i lona moni, faaali atu le vitio “Valaaulia ina ia Faitau le Tusi a Mamona: Jynx” (8:06).

Taofi le vitio i le 0:55 ma fai atu i le vasega e mafaufau loloto mo se taimi, po o a ni manatu ma ni lagona latou te ono maua pe ana faapea o i latou o se tasi o faifeautalai e aoaoina Jynx. Valaaulia ni nai tamaiti aoga e faasoa mai ni a latou faamatalaga o le a fai atu ia te ia.

Ao faaali le vaega o totoe o le vitio, mafaufau e fai atu i le afa o le vasega e vaavaai mo mafuaaga e tatau ai i tagata sailiili ona faitau ma tatalo e uiga i le Tusi a Mamona ina ia mafai ona maua se molimau i lona moni. Fai atu i le isi afa o le vasega e vaavaai mo faamatalaga na fai atu e faifeautalai sa faapea ona fesoasoani ia Jynx e lagona ai le faaosofia e faitau le Tusi a Mamona. A uma le vitio, ia talanoaina le faamatalaga lenei ma tamaiti aoga:

• O le a le mea na fai atu ai ma faia e faifeautalai e faaosofia ai Jynx e faitau ma tatalo e uiga i le Tusi a Mamona?

• O le a le mea na fai atu ai pe na faia e faifeautalai na valaauina ai le Agaga Paia e molimau atu e uiga i a laua upu.

• Aisea e taua ai i se tagata sailiili ona faitau ma tatalo e uiga i le moni o le Tusi a Mamona? (Ia mautinoa ua malamalama tamaiti aoga, e le lava le na ona tufa atu e faifeautalai o kopi o le Tusi a Mamona. O le matafaioi o se faifeautalai o le fesoasoani lea ia lagona e isi le taua o le faitauina ma le tatalo e uiga i le Tusi a Mamona, ina ia mafai ona latou iloa o Iosefa Samita o se perofea a le Atua ma ua toefuatai mai le talalelei a Iesu Keriso.)

Faamalamalama atu i le vasega, o le a latou maua nei se avanoa e faatino ai ona valaaulia se tagata e faitau le Tusi a Mamona. Faataitai le faailoaina atu o le Tusi a Mamona ma tuu atu se valaaulia e faitau i ai ma tatalo ina ia iloa ai e moni lana savali. Ona vaevae lea o le vasega i paga, pe mafaufau e faaaoga le tasi o faatulagaga fautuaina faafaiaoga o loo maua i le vaega “Gaoioiga e Aoao Atu Ai” i le folasaga o lenei tusi lesona.

Ia lava se taimi e tuu atu i tamaiti aoga e saunia ai e valaaulia se tagata sailiili e faitau i le Tusi a Mamona ma ia tatalo ia iloa pe moni. Valaaulia tamaiti aoga e faitau le pusa ua faaautuina “Faaaoga le Tusi a Mamona e Faamautuina ai le Moni o le Toefuataiga,” o loo i le pito i luga o le itulau e 39 o le Tala‘i La‘u Talalelei. Atonu foi e faaaoga e tamaiti aoga le itulau e 15 o le tamaitusi a le faifeautalai e faaautuina O Le Toefuataiga o le Talalelei a Iesu Keriso. E tatau ona latou faamaeaina le gaoioiga faataitai e ala i le faasoa atu o a latou molimau i le Tusi a Mamona ma tuuina atu le valaaulia e faitau ma tatalo e uiga i lona moni.

A uma ona maua e tamaiti aoga uma le avanoa e faataitai ai le faasoaina atu o a latou molimau i le Tusi a Mamona, ma tuuina atu le valaaulia e faitau ma tatalo, fai atu i tagata o le vasega e faasoa mai ni malamalamaaga sa‘o ma loloto mai o latou aafiaga i le vasega atoa.

A‘o e faamaeaina lenei lesona, ia faamanatu i tamaiti aoga ia faamanuiaga o le faitauina ma le faamalolosia o o latou molimau patino i le Tusi a Mamona a‘o lei amataina le auaunaga o se faifeautalai faamisiona. Fesili atu pe i ai se tasi o i latou e fia faasoa mai a latou molimau i le Tusi a Mamona. Faasoa atu lau molimau i le Tusi a Mamona, ma faamautinoa atu i tamaiti aoga o le a latou maua le olioli a‘o latou valaaulia isi e faitau i lenei molimau mamana a Iesu Keriso.