Mataupu 3: Lesona 1—O Le Savali o le Toefuataiga o le Talalelei a Iesu Keriso
“Mataupu 3: Lesona 1—O Le Savali o le Toefuataiga o le Talalelei a Iesu Keriso,” Tala’i La’u Talalelei: O Se Taiala i le Faasoaina Atu o le Talalelei a Iesu Keriso (2023)
“Mataupu 3: Lesona 1,” Tala’i La’u Talalelei
Mataupu 3: Lesona 1
O Le Savali o le Toefuataiga o le Talalelei a Iesu Keriso
Ata
O Le Uluai Faaaliga
E Ono Manatu Tagata
O i ai ea se Atua?
E faapefea ona ou lagona le latalata i le Atua?
E mafai faapefea ona ou aoaoina le upumoni i le lalolagi fenumiai i aso nei?
E mafai faapefea ona fesoasoani le lotu ia te a’u?
Aisea ua tele naua ai ekalesia?
Aisea ua tele naua ai o’u luitau?
E mafai faapefea ona ou maua le filemu i taimi o faafitauli?
E mafai faapefea ona ou fiafia atili?
E mafai faapefea ona fesoasoani se perofeta i le lalolagi i aso nei?
Mai le amataga o le lalolagi, ua faaalia mai e le Atua le talalelei i Ana fanau e ala mai i perofeta. Ua Ia faia lenei mea e ala i Lona Alo, o Iesu Keriso. I anamuā, sa faailoa atu ai e Iesu le talalelei i perofeta e pei o Atamu, Noa, Aperaamo, ma Mose. Ae e toatele tagata na teenaina.
I le luaafe tausaga talu ai, na aoao atu ai ma faavaeina e Iesu Keriso lava Ia Lana Ekalesia. Sa teena lava e tagata ia Iesu. E le’i leva ona mavae Lona maliu, ae sa salalau solo le pauu ese mai le upumoni ma le Ekalesia a le Alii. O le atoaga o le talalelei ma le pule o le perisitua sa le’i toe i ai i le lalolagi.
I seneturi mulimuli ane, sa valaauina ai e le Atua se isi perofeta, Iosefa Samita. Na toefuatai mai e le Atua le atoaga o le talalelei e ala ia te ia ma faatagaina o ia e toe faatulaga le Ekalesia a Iesu Keriso.
O le mauaina o le atoatoaga o le talalelei a Iesu Keriso i le lalolagi o se tasi lea o faamanuiaga sili o o tatou aso. E fesoasoani le talalelei ia i tatou e tali fesili aupito sili ona sailiili o le olaga. O perofeta soifua e taialaina i tatou i taimi faigata. Ua toe i ai le pule o le perisitua a le Atua i luga o le fogaeleele e faamanuia ai Ana fanau.
Ata
faifeautalai o loo aoaoina se aiga
Fautuaga mo le Aoao Atu
O lenei vaega o loo tuuina atu ai se otootoga faataitai e fesoasoani ia te oe e saunia ai e aoao atu. E aofia ai foi faataitaiga o fesili ma valaaulia e mafai ona e faaaogaina.
A o e sauni e aoao atu, ia mafaufau ma le agaga tatalo i tulaga o tagata taitoatasi ma manaoga faaleagaga. Filifili po o le a se mea o le a sili ona fesoasoani e aoao atu. Sauni e faamatala ia faaupuga atonu e lē malamalama ai tagata. Fuafua e tusa ai ma le tele o le taimi o le a e maua, ia manatua e faapuupuu lesona.
Filifili mau e faaaoga a o e aoao atu. O le vaega o le “Faavae o Aoaoga Faavae” o le lesona o loo aofia ai le tele o mau aoga.
Mafaufau po o le fea fesili e fai atu a o e aoao atu. Fuafua ni valaaulia e faalautele atu lea o le a uunaia ai tagata taitoatasi e faatino.
Faamamafa atu faamanuiaga folafolaina a le Atua, ma faasoa atu lau molimau i mea e te aoaoina atu.
O Mea e Mafai Ona E Aoao Atu i Tagata i le 15–25 Minute.
Filifili se tasi pe sili atu o mataupu nei e aoao atu. O le faavae faaleaoaoga faavae mo mataupu faavae taitasi ua saunia pe a uma lenei otootoga.
O le Atua o lo Tatou Tama Faalelagi Agaalofa
O le Atua o lo tatou Tama, ma o i tatou o Ana fanau. Na Ia foafoaina i tatou i Lona lava faatusa.
E silafia patino i tatou e le Atua ma e alofa ia i tatou.
O Le Atua ua ia te Ia se tino faamamaluina, faaatoatoaina o aano ma ivi.
E finagalo le Atua e faamanuia i tatou i le filemu ma se atoaga o le olioli lea o le a tumau mo le faavavau.
Ona e alofa le Atua ia i tatou, na Ia auina mai ai Lona Alo, o Iesu Keriso, e togiola i tatou mai le agasala ma le oti.
E Faaali Mai e le Atua le Talalelei e ala i Perofeta i Tisipenisione Uma
E valaauina e le Atua perofeta e avea ma Ona sui i le lalolagi.
I aso anamua sa tofia ai e le Atua perofeta e pei o Atamu, Noa, Aperaamo, ma Mose.
E maua e se perofeta soifua faaaliga mai le Atua e aoao ma taitai i tatou i aso nei.
O Le Galuega Tala’i ma le Togiola a le Faaola i le Lalolagi.
O Iesu Keriso o le Alo o le Atua.
I le taimi o Lana galuega tala’i i le lalolagi, sa aoao atu ai e Iesu Lana talalelei ma faatuina Lana Ekalesia.
Na valaauina e Iesu so’o e sefululua ma tuu atu ia i latou le pule e taitai ai Lana Ekalesia.
I le faaiuga o Lona soifua, sa togiola ai Iesu mo a tatou agasala e ala i Lona puapuagatia i le Faatoaga o Ketesemane ma i le taimi o le Faasatauroga. Ina ua mavae le maliu o Iesu, sa toetu mai o Ia.
Ona o le taulaga togiola a Iesu, ua mafai ai ona faamagaloina ma faamamaina i tatou mai a tatou agasala pe a tatou salamo. O lenei mea e aumaia ia i tatou le filemu ma mafai ai ona tatou toe foi atu i le afioaga o le Atua ma maua ai se atoaga o le olioli.
Ona o le Toetu o Iesu, o le a tatou toetutu uma ai pe a mavae le oti. O lona uiga o le a toe faatasia le agaga ma le tino o tagata taitoatasi ma ola e faavavau.
O Le Pauu Ese
Ina ua maliliu Aposetolo a Iesu, sa salalau solo le pauu ese mai le talalelei ma le Ekalesia a Iesu Keriso.
I le taimi lea, na suia ai e tagata le tele o aoaoga o le talalelei. Na suia foi e tagata ia sauniga o le perisitua, e pei o le papatisoga. O le pule o le perisitua ma le Ekalesia lea na faatuina e Iesu ua le o toe i ai i le lalolagi.
O Le Toefuataiga o le Talalelei a Iesu Keriso e ala mai ia Iosefa Samita
Sa saili e Iosefa Samita ia iloa po o le fea o ekalesia le Ekalesia moni a le Atua ina ia mafai ona ia auai ai. Sa faaali mai le Tama Faalelagi ma Iesu Keriso ia te Ia i le 1820. Ua ta’ua lea mea o le Uluai Faaaliga.
Na valaauina Iosefa Samita e le Atua e avea ma se perofeta, e pei lava ona sa Ia valaauina perofeta i taimi muamua.
Na toefuataiina mai le Talalelei a Iesu Keriso e ala i le Perofeta o Iosefa Samita.
Na toefuatai mai e isi avefeau faalelagi le perisitua, ma sa faatagaina Iosefa e faatulaga le Ekalesia a Iesu Keriso.
O loo faaauau pea ona taitai e Iesu Keriso Lana Ekalesia i aso nei e ala i perofeta ma aposetolo soifua.
O Le Tusi a Mamona: O Se Tasi Molimau ia Iesu Keriso
O le Tusi a Mamona o se voluma o tusitusiga paia na tusia i aso anamua e perofeta i Amerika. Sa faaliliuina e Iosefa Samita e ala i le meaalofa ma le mana o le Atua.
Faatasi ai ma le Tusi Paia, ua tuuina mai ai e le Tusi a Mamona se molimau i le galuega a Iesu, aoaoga, ma le misiona o lo tatou Faaola.
E mafai ona tatou latalata atili atu i le Atua e ala i le faitauina o le Tusi a Mamona ma ola ai i ona mataupu.
E mafai ona tatou iloa o le Tusi a Mamona o le afioga a le Atua e ala i le faitauina, mafaufau loloto i ai, ma tatalo e uiga i ai. O lenei faagasologa o le a fesoasoani foi ia i tatou e iloa ai o Iosefa Samita o ia o se perofeta.
Tatalo ia Iloa le Upumoni e ala i le Agaga Paia
O le tatalo o se fesootaiga e lua ona itū i le va o le Atua ma Ana fanau.
E ala i le tatalo faamaoni, e mafai ai ona tatou iloa e moni le sāvali o le Toefuataiga o le talalelei a Iesu Keriso.
A o tatou tatalo, e aoao ma faamautu mai e le Agaga Paia upumoni ia i tatou.
Ata
faifeautalai o loo aoaoina alii talavou
O Fesili e te Ono Fesili ai i Tagata
O fesili nei o ni faataitaiga o mea e mafai ona e fesili atu ai i tagata. O nei fesili e mafai ona fesoasoani ia te oe e faia ai ni talanoaga anoa ma malamalama ai i manaoga ma le vaaiga a se tagata.
O le a se mea e te talitonu i ai e uiga i le Atua?
O le a faapefea e le lagona o le latalata atili atu i le Atua ona fesoasoani ia te oe?
O a mea ua e iloa e uiga ia Iesu Keriso? E faapefea ona uunaia oe e Ana aoaoga ma Lona soifuaga?
E faapefea ona e maua tali faatuatuaina i le lalolagi fenumia’i i aso nei?
E faapefea ona fesoasoani ia te oe le iloa o loo i ai se perofeta soifua i le lalolagi i aso nei?
Ua e faalogo ea i le Tusi a Mamona? E mafai ona matou faasoa atu pe aisea e taua ai?
E mafai ona e faasoa mai ou talitonuga e uiga i le tatalo? E mafai ona matou faasoa atu o matou talitonuga e uiga i le tatalo?
O Valaaulia E Te Ono Tuuina Atu
Pe o le a e ole atu i le Atua i le tatalo ina ia iloa o mea sa o matou aoaoina atu e moni? (Tagai i le “Malamalamaaga Faafaiaoga: Tatalo” i le vaega mulimuli o lenei lesona.)
Pe o le a e auai i le lotu i lenei Aso Sa e aoao atili ai e uiga i mea sa matou aoaoina atu?
Pe o le a e faitauina le Tusi a Mamona ma tatalo ina ia iloa o le afioga ia a le Atua? (E mafai ona e fautuaina atu ni mataupu po o ni fuaiupu faapitoa.)
E mafai ona seti se taimi tatou te toe feiloai ai?
Faavae Faale-Aoaoga Faavae
O lenei vaega ua tuuina atu ai aoaoga faavae ma mau mo oe e suesue ai e faamalosia ai lou malamalama ma le molimau o le talalelei ma fesoasoani ai ia te oe e aoao atu.
Ata
aiga
O le Atua o lo Tatou Tama Faalelagi Agaalofa
O le Atua o lo tatou Tama ma o i tatou o Ana fanau. Na Ia foafoaina i tatou i Lona lava faatusa. O Ia e faamamaluina ma atoatoa lona “tino o aano ma ivi e mafai ona paʼi i ai e pei o le tagata” (Mataupu Faavae ma Feagaiga 130:22).
E silafia patino i tatou e le Atua, ma e alofa o Ia ia i tatou e sili atu nai lo le mea e mafai ona tatou malamalama i ai. E malamalama o Ia i o tatou tofotofoga, faanoanoaga, ma vaivaiga, ma ua Ia ofoina mai e lagolagoina i tatou a’o tatou i ai i nei tulaga. E olioli o Ia i lo tatou alualu i luma ma o le a fesoasoani ia i tatou e faia filifiliga sa’o. E fia fesootai mai o Ia ia te i tatou, ma e mafai foi ona tatou fesootai atu ia te Ia e ala i le tatalo.
Ua tuuina mai e le Atua ia i tatou lenei aafiaga i le lalolagi ina ia mafai ona tatou aoao, tuputupu a’e, ma avea atili e faapei o Ia. Faatasi ai ma le alofa atoatoa, e finagalo o Ia ia tatou toe foi atu ia te Ia pe a tatou oti. Peita’i, e lē mafai ona tatou faia lenei mea na o i tatou. Ona e alofa le Atua ia i tatou, na Ia auina mai ai Lona Alo, o Iesu Keriso, e togiola i tatou. “Aua ua faapea lava ona alofa mai o le Atua i le lalolagi, ua ia au mai ai lona Atalii e toatasi, … ina ia faaolaina le lalolagi ia te ia” (Ioane 3:16–17).
E finagalo le Atua e faamanuia i tatou i le filemu ma se atoaga o le olioli lea o le a tumau mo le faavavau. Ua Ia saunia se fuafuaga e tuuina mai ai ia i tatou le avanoa e maua ai nei faamanuiaga. O lenei fuafuaga ua taʼua o le ata o le faaolataga (tagai i le lesona 2).
E Faaali Mai e le Atua le Talalelei e ala mai i Perofeta i Tisipenisione Uma
O Perofeta O Sui Vaaia O Le Atua i le Lalolagi
O se tasi o auala taua e faaalia ai e le Atua Lona alofa mo i tatou o le valaauina lea o perofeta, tuuina atu ia i latou le pule o le perisitua, ma musuia i latou e saunoa atu mo Ia. O Perofeta O Sui Vaaia O Le Atua i le Lalolagi. Sa faamaumau e le perofeta o le feagaiga tuai o Amosa “E le faia lava se mea e le Alii o Ieova, a e faaalia lona finagalo i ana auauna o perofeta” (Amosa 3:7). O nisi o faamanuiaga tatou te maua mai perofeta soifua o loo otooto atu i lalo.
O Molimau ia Iesu Keriso. O perofeta o ni molimau faapitoa ia Iesu Keriso, e molimau atu ia te Ia o lo tatou Faaola ma le Togiola.
Aoaoga. E maua e perofeta le taitaiga mai le Atua e fesoasoani tatou te iloatino ai le mea moni mai mea sese. Latou te aoao i tatou ia usiusitai i poloaiga a le Atua ma salamo pe a tatou lē atoatoa. Latou te tauleagaina le agasala ma lapatai mai i ona taunuuga.
O aoaoga a perofeta e siitia i tatou agai i le Atua ma fesoasoani ia i tatou ia maua faamanuiaga e finagalo ai o Ia mo i tatou. O lo tatou saogalemu sili ua i ai i le mulimulita’ia o le afioga a le Alii e auala mai i Ana perofeta.
Pule o le Perisitua. O le perofeta o i ai nei ua ia umia le perisitua pulefaamalumalu i luga o le fogaeleele. O le perisitua o le pule ma le mana a le Atua. Ua i ai i le perofeta le pule e saunoa ma galue ai i le suafa o le Atua mo le faaolataga o Ana fanau.
Taitaiga a le Ekalesia. O le Ekalesia a Iesu Keriso o loo fausia i luga o le faavae o aposetolo ma perofeta (tagai i le Efeso 2:19–20; 4:11–14).
O Perofeta i Aso Anamua
O Atamu o le uluai perofeta lea i le fogaeleele. Sa faaalia e le Atua le talalelei a Iesu Keriso ia Atamu, ma tuuina atu ia te ia le pule o le perisitua. Sa aoao e Atamu ma Eva a la’ua fanau i nei upumoni, ma uuna’ia ai i latou e atiina a’e le faatuatua ma ia ola ai i le talalelei.
Na i’u lava ina fouvale fanau a Atamu ma Eva ma liliuese mai le talalelei. O lenei mea na taitai atu ai i se tulaga ua ta’ua o le liliuese, po o se pauu ese. Pe a oo ina sosolo tele le liliuese, ona aveesea lea e le Atua o Lana pule o le perisitua lea e tatau ona i ai ina ia aoao ai ma faia sauniga o le talalelei.
O loo tusia i le Feagaiga Tuai le tele o taimi o le salalau ai o le liliuese. Ina ia faamutaina nei vaitau, sa aapa atu le Atua i Ana fanau e ala i le valaauina o se isi perofeta. Sa ia toe faaalia mai upumoni o le talalelei i nei perofeta ma tuuina atu ia i latou le pule o le perisitua. O nisi o nei perofeta o Noa, Aperaamo, ma Mose. O le mea e faanoanoa ai, i se mamanu faifai pea i le aluga o taimi, na i’u lava ina teena e tagata ia perofeta ma pauu ese ai.
O Le Galuega Tala’i a le Faaola i le Lalolagi ma le Togiola
O Iesu Keriso o le Alo o le Atua. O Iesu ma Lana Togiola e totonugalemu i le fuafuaga a le Atua mo i tatou. O Lana Togiola e aofia ai Lona puapuagatia i le Faatoaga o Ketesemane, o Lona puapuagatia ma le maliu i luga o le satauro, ma Lona Toetu.
Mai le taimi o Atamu ma Eva, sa tulimatai atu tagata i le afio mai o Iesu Keriso o lo latou Faaola ma le Togiola. Na auina mai e le Tama Faalelagi Iesu i le lalolagi i le silia ma le 2,000 tausaga ua mavae.
Sa soifua Iesu i se soifuaga atoatoa, e leai se agasala. Sa Ia aoaoina Lana talalelei ma faatuina Lana Ekalesia. Sa ia valaauina Aposetolo e toasefululua ma tuuina atu ia i latou le pule o le perisitua e aoao atu ai ma faatino ia sauniga paia, e pei o le papatisoga. Na Ia tuuina atu foi ia i latou le pule e taitai ai Lana Ekalesia.
I le faaiuga o Lona soifua, sa togiola ai Iesu mo a tatou agasala e ala i Lona puapuagatia i Ketesemane ma i le taimi o Lona Faasatauroga. Ona o le taulaga togiola a Iesu, e mafai ona tatou mama mai a tatou agasala pe afai tatou te salamo. O lenei mea ua mafai ai ona tatou toe foi atu i le afioaga o le Atua ma maua ai se atoatoaga o le olioli.
Ina ua uma ona faasatauroina Iesu, sa toetu mai o Ia, ma maua le manumalo i le oti e ala i le mana o le Tama Faalelagi. Ona o le Toetu o Iesu, o le a toetutu ai i tatou uma pe a mavae le oti. O lona uiga o le a toe faatasia le agaga ma le tino o tagata taitoatasi, ma o le a tatou ola e faavavau i se tino toetu atoatoa. (Tagai i le “O Le Togiola a Iesu Keriso” i le lesona 2.)
Ata
o le Perofeta o Iosefa Samita
Sa aoao mai ai e le Perofeta o Iosefa Samita, “O mataupu faavae autu o lo tatou talitonuga o molimau a Aposetolo ma Perofeta, e faatatau ia Iesu Keriso, o lea na Ia maliu, ma tanumia, ma toetu mai i le aso tolu, ma afio a’e i le lagi; ma o isi mea uma e faatatau i lo tatou talitonuga ua na o ni faaopoopoga i ai” (Aoaoga a Peresitene o le Ekalesia: Iosefa Samita [2007], 49).
Ina ua mavae le maliu o Iesu Keriso, sa saili Ana Aposetolo e tausisia le mamā a’ia’i o le aoaoga faavae a Keriso ma ia faatumauina le maopoopo i le Ekalesia. Peitai, sa toatele tagata o le Ekalesia na liliuese mai Aposetolo ma mai le aoaoga faavae na aoao mai e Iesu.
Ina ua mavae le fasiotia o Aposetolo, sa salalau solo le pauu ese mai le talalelei ma le Ekalesia a Iesu Keriso. O lenei pauu ese e ta’ua i nisi taimi o le Liliuese Tele. Ona o lena mea, na to ese mai ai e le Atua le pule o le perisitua mai le lalolagi. O lenei leiloloa na aofia ai le pule na manaomia e taitai ai le Ekalesia. O le taunuuga, o le Ekalesia na faatuina e Iesu ua lē o toe i ai i le lalolagi.
I le taimi lea, na suia ai e tagata le tele o aoaoga o le talalelei. O le tele o le malamalama e uiga i le natura moni o le Tama Faalelagi, Iesu Keriso, ma le Agaga Paia sa faauigaese pe leiloa. Na suia foi e tagata ia sauniga o le perisitua, e pei o le papatisoga.
I seneturi mulimuli ane, sa taumafai ai alii ma tamaitai e saili le upumoni e toefaatulaga ia aoaoga ma faiga ua suia. Sa latou saili mo le malamalama faaleagaga sili atu, ma o nisi o i latou na talanoa i le moomia o se toefuataiga o le upumoni. O a latou taumafaiga na tau atu ai i le faatuina o le tele o lotu.
O lenei vaitaimi na taunuu ai i se faamamafa faateleina i le saolotoga o tapuaiga, lea na tatalaina ai le ala mo le toefuataiga o le upumoni ma le pule mai le Atua.
Na mua’i ta’u mai e perofeta ma aposetolo le Liliuese Tele (tagai i le 2 Tesalonia 2:1–3). Sa latou muai ta’u mai foi o le a toefuatai mai le talalelei ma le Ekalesia a Iesu Keriso i le lalolagi (tagai i le Galuega 3:20–21). Ana faapea e leai se pauu ese, semanu e le manaomia se toefuataiga.
O Le Toefuataiga o le Talalelei a Iesu Keriso e ala mai ia Iosefa Samita
O Le Uluai Faaaliga ma le Valaauga o Iosefa Samita o se Perofeta
I le aluga o seneturi a o le’i i ai le atoatoaga o le talalelei a Iesu Keriso i le lalolagi, sa faaauau pea ona aapa atu le Tama Faalelagi i Ana fanau. I le aluga o taimi, sa Ia saunia le ala ina ia mafai ai ona toe faamanuiaina i latou i le atoaga o Lana talalelei. Ina ua sa’o ia tulaga, sa Ia valaauina Iosefa Samita o se perofeta lea o le a toefuatai mai ai le talalelei ma le Ekalesia a Iesu Keriso.
Sa nofo Iosefa Samita i sasae o le Iunaite Setete i se taimi o le vavao tele faalelotu. Sa tuuto atu tagata o lona aiga i le Atua ma sailia le upumoni. E tele ekalesia sa fai mai ua i ai le upumoni, ma sa manao Iosefa ia iloa po o le fea e sa’o (tagai i le Iosefa Samia—Talafaasolopito 1:18). O loo aoao mai le Tusi Paia e faapea e “tasi le Alii, e tasi le faatuatuaga, e tasi le papatisoga (Efeso 4:5). A o auai atu Iosefa i lotu eseese, sa le mautonu o ia po o le fea e auai ai. Ona ia saunoa mulimuli ane lea:
“Ae ona o le faanunununu ma le fefinauai tele o lotu eseese, sa faigata ai i se tagata laitiiti e pei o a’u … ona maua se tonu po o ai ua sa’o a o ai ua sese. …
“I le taulotoaiga o lenei taua o upu ma vevesi o taofi, sa masani ona ou fai ifo ai ia te aʼu lava ia: O le a le mea e ao ina faia? O ai o nei vaega uma ua sa’o pe ua sese faatasi ea i latou uma? Afai e i ai se tasi o i latou ua saʼo, o ai lea, ma e faapefea ona ou iloaina?” Iosefa Samita—Talafaasolopito 1:8, 10).
E pei o le toatele o tagata, sa i ai foi ni fesili a Iosefa Samita e uiga i le faaolataga o lona agaga. Sa manao o ia ia faamagaloina ana agasala ma ia mama i luma o le Atua. A o ia saili le upumoni i ekalesia eseese, sa ia faitau ai i le Tusi Paia, “A e afai ua leai se poto i so outou ina ole atu ia i le Atua, o le foai tele mai i tagata uma ma le le toe ta’uta’ua; ona foaiina mai ai lea ia te ia” (Iakopo 1:5).
Ona o lenei fuaiupu, sa tonu ai ia Iosefa e fesili atu i le Atua po o le a le mea e tatau ona ia faia. I le tautotogo o le 1820, na alu atu ai o ia i se togavao e lata ane i lona aiga ma tootuli ai e tatalo. E fa tala o le faaaliga vaaia na sosoo ai, o loo tusia e Iosefa Samita po o tusiupu i lalo o lana taitaiga (tagai i le Gospel Topics Essays, “First Vision Accounts”). I le tala ua faamaonia o se mau, sa ia faamatalaina ai lona aafiaga faapenei:
Ata
O Le Uluai Faaaliga, saunia e Linda Christensen ma Michael Malm
“Na ou vaaia ai se malamalama faaniutu i luga a’e tonu lava o lo’u ulu, ua sili atu le pupula i le la, ua alu ifo malie lava se’ia oo mai i o’u luga. Ina ua oo mai le malamalama i o’u luga, sa ou vaaia ni Tagata e toalua, o lo laua pupula ma le mamalu e lē mafaamatalaina, o tutu mai i o’u luga ae i le ea. Sa fetalai mai le tasi o i la’ua ia te a’u, ma fofoga mai ia te a’u i lo’u igoa ma fetalai mai, a’o tusi ane i le tasi—O Lo’u Atalii Pele lenei. Faalogo ia te Ia!” (Iosefa Samita—Talafaasolopito 1:16–17).
I lenei faaaliga vaaia, sa faaali atu ai le Atua le Tama ma Lona Alo, o Iesu Keriso, ia Iosefa Samita. Sa ta’u atu e le Faaola ia te ia e aua nei auai i soo se lotu.
I se isi tala e uiga i lenei faaaliga, sa faasoa mai ai e Iosefa faapea na ta’u atu foi e le Faaola ia te ia: “Ua faamagaloina au agasala. … Faauta, O a’u o le Alii o le mamalu. Sa faasatauroina a’u mo le lalolagi ina ia mafai ona maua e i latou uma o e talitonu mai i lo’u igoa le ola e faavavau.”
Ina ua mavae le faaaliga, sa manatunatu Iosefa, “Sa faatumulia lo’u agaga i le alofa, ma mo aso e tele sa mafai ona ou olioli ma le olioli tele ma sa faatasi mai le Alii ia te a’u” (Joseph Smith History, circa Summer 1832, 3, josephsmithpapers.org; ua faaonaponei le sipelaga ma faailoga).
E ala i lenei faaaliga vaaia, sa avea ai Iosefa Samita ma se molimau ia Iesu Keriso ma aoaoina ai upumoni taua e uiga i le Aiga Atua. Mo se faataitaiga, sa ia aoaoina o le Tama Faalelagi ma Iesu Keriso o ni tagata mavaevae. Ina ua La valaau atu ia te ia i lona igoa, sa ia iloa ai sa La silafia patino o ia. Ina ua ta’u atu ia Iosefa ua faamagaloina o ia, sa ia iloa ai e alofa mutimutivale le Atua. O lenei aafiaga na faatumulia ai o ia i le olioli.
E pei ona faia e le Atua i le tele o isi perofeta muamua, na Ia valaauina ai ia Iosefa Samita ina ia avea ma se perofeta e auala mai ai le toefuataiina mai o le atoatoaga o le talalelei i le lalolagi. O lenei toefuataiga o le a fesoasoani i fanau a le Atua ia maua le olioli i lenei lalolagi ma le ola e faavavau i le lalolagi a sau—e ala ia Iesu Keriso.
Toefuataiga o le Perisitua ma Ki o le Perisitua
Ata
I Luga o Oulua O’u Uso a Auauna e, saunia e Linda Curley Christensen ma Michael Malm
Ina ua mavae le faaali mai o le Tama ma le Alo, sa auina mai isi avefeau mai le lagi ia Iosefa Samita ma lana uo o Oliva Kaotui. Na faaali mai Ioane le Papatiso o se tagata toetu ma faaee atu le Perisitua Arona ma ona ki i luga o i laua. O le Perisitua Arona e aofia ai le pule e papatiso ai.
Ata
O Le Leo o Peteru, Iakopo, ma Ioane, saunia e Welden C. Andersen
E le’i leva, ae faaali mai Peteru, Iakopo, ma Ioane—o uluai Aposetolo e toatolu a Keriso—o ni tagata toetutu ma faaee atu le Perisitua Mekisateko ma ona ki i luga o Iosefa Samita ma Oliva Kaotui. O lenei perisitua o le pule lava lea e tasi na tuuina atu e Keriso i Ana Aposetolo anamua.
Ata
Image of Moses Elias and Elijah descending into the Kirtland temple and appearing to Joseph Smith.
I le Malumalu o Katelani, sa faaali atu ai Mose, Elaia, ma Elia ia Iosefa Samita ma Oliva Kaotui ma tuuina atu ia i laua le isi pule ma ki o le perisitua e manaomia e faataunuu ai le galuega a le Atua i aso e gata ai. O Mose sa tuuina mai ki o le faapotopotoina o Isaraelu. O Elaia sa tuuina mai le tisipenisione o le talalelei a Aperaamo. O Elia sa tuuina mai ki o le mana o faamauga. (Tagai i le Mataupu Faavae ma Feagaiga 110:11–16; tagai foi i le Tusitaulima Aoao, 3.1.)
Faatulagaga o le Ekalesia
Sa faatonuina Iosefa Samita ina ia toe faatulagaina le Ekalesia a Iesu Keriso i le lalolagi. Na auala mai ia te ia, le valaauina e Iesu Keriso o Aposetolo e toasefululua.
O perofeta i taimi faatusi paia sa o latou tusi faatatau i taimi nei ua tatou ola ai o aso mulimuli po o aso e gata ai. O le vaitaimi lea a o lumanai le Afio Faalua mai o Iesu Keriso. O le mafuaaga lena ua faaigoa ai le Ekalesia O Le Ekalesia a Iesu Keriso o le Au Paia o Aso e Gata Ai (tagai i le Mataupu Faavae ma Feagaiga 115:3–4; tagai foi i le 3 Nifae 27:3–8).
O Perofeta ma Aposetolo Soifua o Aso Nei
E pei lava ona valaauina e Iesu Aposetolo i le taimi o Lana galuega i le olaga nei e taitai Lana Ekalesia, ua Ia valaauina Aposetolo e taitaia aso nei. O le Au Peresitene Sili ma le Korama a Aposetolo e Toasefululua o perofeta, tagatavaai ma talifaaaliga
E na o le Aposetolo sinia e valaauina o le perofeta auā e pulefaamalumalu o ia i le Ekalesia atoa ma ua faatagaina i se tulaga ese e saunoa mo le Alii. O Ia o le tagata ua faatagaina e suitulaga ia Iosefa Samita. O ia ma Aposetolo o loo i ai nei e sailia la latou pule ia Iesu Keriso i se filifili lē motusia o faauuga lea na amata ina ua faauuina Iosefa Samita i lalo o lima o avefeau faalelagi.
O Le Tusi a Mamona: O Se Tasi Molimau ia Iesu Keriso
O le Tusi a Mamona o se tuufaatasiga anamua o tusitusiga paia e pei o le Tusi Paia. O le Tusi Paia o se tasi o molimau ia Iesu Keriso, ma o le Tusi a Mamona o se molimau lona lua o Lana galuega, o Ana aoaoga, ma Lana misiona o lo tatou Faaola.
Na taitai atu Iosefa Samita e se avefeau mai le lagi e igoa ia Moronae i se mauga lea sa nanaina ai ia papatusi auro mo senituri. O lenei faamaumauga, o loo tusia i luga o papatusi auro (laupepa manifinifi o uamea), o loo i ai tusitusiga a perofeta e uiga i feutagaiga a le Atua ma nisi o tagata anamua sa nonofo i Amerika. Sa faaliliuina e Iosefa Samita lenei faamaumauga e ala i le meaalofa ma le mana o le Atua.
Sa silafia e perofeta i totonu o le Tusi a Mamona ia le misiona a le Faaola ma aoao atu Lana talalelei. Ina ua mavae le toetu o Iesu, sa faaali atu o Ia i nei tagata ma auauna patino atu ia i latou. Sa Ia aoaoina i latou ma faatuina Lana Ekalesia.
E fesoasoani le Tusi a Mamona ia i tatou e faalatalata atili atu ai i le Atua a o tatou aoao, malamalama, ma faaaoga ona aoaoga. Na saunoa le Perofeta o Iosefa Samita e faapea “o se tane [po o se tamaitai] o le a latalata atili atu i le Atua e ala i le ola ai i mataupu [o le tusi], nai lo se isi lava tusi” (Aoaoga: Iosefa Samita, 64).
Ata
alii o loo faitau
Ina ia iloa o le Tusi a Mamona o le afioga a le Atua, e tatau ona tatou faitau i ai, mafaufau loloto i ai, ma tatalo e uiga i ai. Sa folafola mai e se perofeta o le Tusi a Mamona o le a faaali mai e le Atua le moni o le tusi ia i tatou a o tatou tatalo ma se loto faamaoni, ma le manatu moni i ai, ma le faatuatua ia Keriso (tagai i le Moronae 10:3–5). O le suesueina o le Tusi a Mamona e taua mo le tumau i le liuaina.
A o tatou faitauina le Tusi a Mamona ma tatalo e uiga i ai, o le a tatou aoao ai i upumoni e uiga ia Iesu Keriso lea o le a faamanuiaina ai o tatou olaga. O le a tatou iloa foi o Iosefa Samita o se perofeta a le Atua ma ua toefuatai mai le talalelei ma le Ekalesia a Iesu Keriso e ala mai ia te ia.
Ata
Peresitene Russell M. Nelson
“Ou te folafola atu a outou suesueina ma le agaga tatalo le Tusi a Mamona i aso uma, o le a outou faia ni faaiuga lelei atu i—aso uma. Ou te folafola atu a outou mafaufau loloto i mea tou te suesueina, o le a matala mai pupuni o le lagi, ma o le a outou mauaina tali i a outou lava fesili ma le taitaiga mo o outou lava olaga. Ou te folafola atu a e faatofuina oe lava ia i le Tusi a Mamona i aso taitasi, e mafai ona puipuia oe mai mea leaga o le aso, e aofia ai le mala faataumaoi o ponokalafi ma isi vaisu ua punitia ai le mafaufau i mea faaleagaga” (Russell M. Nelson, “O Le Tusi a Mamona: Faamata e Faape’i Lou Olaga e aunoa ma Ia?” Liahona,, Nov. 2017, 62–63).
Ona o le Atua o lo tatou Tama, o le a Ia fesoasoani mai ia tatou iloa le upumoni. E mafai ona tatou iloa o le sāvali o le Toefuataiga o le talalelei a Iesu Keriso e moni a o tatou faitauina le Tusi a Mamona ma tatalo i le Atua. Pe a tatou tatalo ma le faatuatua ma le manatu moni i ai, o le a Ia taliina a tatou fesili ma taiala o tatou olaga.
E masani ona tali mai le Atua i a tatou tatalo e ala i le Agaga Paia. A o tatou tatalo, e aoao ma faamautu mai e le Agaga Paia upumoni. O fesootaiga mai le Agaga Paia e mamana. E masani lava ona oo mai o se faamautinoaga filemu e ala i o tatou lagona, mafaufauga, ma uunaiga (tagai i le 1 Tupu 19:11–12; Helamana 5:30; Mataupu Faavae ma Feagaiga 8:2).
O le suesueina pea lava pea o tusitusiga paia (aemaise lava le Tusi a Mamona), auai i sauniga faamanatuga faalevaiaso, ma le tatalo faamaoni e fesoasoani tatou te lagona ai le mana o le Agaga Paia ma iloa ai le upumoni.
O le otootoga lenei o se faataitaiga o mea e mafai ona e aoao atu i se tasi pe afai e na o sina taimi puupuu e te maua ai. Pe a faaaogaina lenei otootoga, filifili se mataupu faavae se tasi pe sili atu e aoao atu. O le faavae faaleaoaoga faavae mo mataupu faavae taitasi o loo tuuina atu i le amataga o le lesona.
A o e aoao atu, fai atu fesili ma faalogo. Tuuina atu valaaulia o le a fesoasoani i tagata e aoao ai pe faapefea ona ola latalata atili i le Atua. O se tasi o valaaulia taua e mo le tagata e toe feiloai ai ma oe. O le umi o le lesona o le a faalagolago i fesili e te fesili ai ma le faalogo o loo e faia.
Ata
faifeautalai o loo talanoa atu i se alii
O Mea e Mafai Ona E Aoao Atu i Tagata i le 3–10 minute
O le Atua o lo tatou Tama Faalelagi, ma sa Ia faia i tatou i Lona faatusa. Na te silafia patino i tatou ma e alofa ia i tatou. E finagalo o Ia e faamanuia i tatou i le filemu ma se atoaga o le olioli lea o le a tumau mo le faavavau.
O Iesu Keriso o le Alo o le Atua. O Lana misiona o le mafai lea e i tatou ona faamamaina mai a tatou agasala, faatoilalo le oti, ma maua le ola e faavavau.
E valaauina e le Atua perofeta e avea ma Ona sui i le lalolagi. I anamuā, sa Ia tofia ai perofeta e pei o Atamu, Noa, Aperaamo, ma Mose. Ua maua e se perofeta soifua faaaliga mai le Atua e aoao ma taitai i tatou i aso nei.
I le taimi o le galuega a Iesu i le olaga nei, sa Ia faatuina ai Lana Ekalesia. Ina ua maliliu Aposetolo a Iesu, sa salalau solo le pauu ese mai le talalelei ma le Ekalesia a Iesu Keriso. Na suia e tagata le tele o aoaoga o le talalelei ma sauniga o le perisitua, e pei o le papatisoga.
Na valaauina Iosefa Samita e le Atua e avea ma se perofeta, e pei lava ona sa Ia valaauina perofeta i taimi muamua. Sa faaali mai le Tama Faalelagi ma Iesu Keriso ia Iosefa Samita. Na toefuatai mai le talalelei a Iesu Keriso e ala mai ia te ia.
O le Tusi a Mamona o se tuufaatasiga o tusitusiga paia. E pei o le Tusi Paia, o se molimau ia Iesu Keriso ma e fesoasoani tatou te latalata atili atu ai i le Atua a o tatou faitau i ai ma faaaoga ona mataupu. Sa faaliliuina e Iosefa Samita e ala i le meaalofa ma le mana o le Atua.
E ala i le tatalo faamaoni, e mafai ai ona tatou fesootai ma le Atua. E mafai ona tatou iloa e moni le sāvali o le Toefuataiga o le talalelei a Iesu Keriso.