Vahe 9
Fakaava Homou Lotó ki he ʻEikí ʻi he Lotu
ʻE lava ke tau ongoʻi ʻa e ivi tākiekina ʻo e Tamai Hēvaní ʻi heʻetau moʻuí mo hotau ngaahi ʻapí ʻi he lotu fakatāutaha mo fakafāmilí.
Mei he Moʻui ʻa Siaosi ʻAlipate Sāmitá
Naʻe hoko ʻa e lotú ko ha konga mahuʻinga ʻi he ʻapi naʻe tupu hake ai ʻa Siaosi ʻAlipate Sāmitá. Naʻá ne pehē, “Naʻe tokanga e mēmipa takitaha ʻo homau fāmilí ki he lotu liló mo e lotu fakafāmilí. Ne u ako ʻo ʻilo kei siʻi ʻoku tali lotu mai ʻa e ʻEikí he naʻá Ne tali ʻeku ngaahi lotú pea fakamoʻoniʻi kiate au ʻi he ngaahi founga lahi ʻokú Ne tokanga mai.”1
Naʻa mo e konga kimui ʻo e moʻui ʻa Palesiteni Sāmitá, naʻá ne manatu ʻofa ki hono akoʻi ia ʻe heʻene faʻeé, Sela Fā Sāmita, ke lotú:
“Naʻe akoʻi au ʻi he funga ʻo ha faʻē Siasi. Ko e taha ʻo e ngaahi ʻuluaki meʻa ʻoku ou manatuʻí ko ʻene puke hoku nimá ʻo taki hake au ki ʻolunga. Naʻe ʻi ai e mohenga ʻe ua he lokí, ko e mohenga ʻo ʻeku ongomātuʻá, mo ha kiʻi mohenga ʻi he tafaʻaki ʻe tahá naʻe teke holo pē. ʻOku lava pē ke u manatuʻi ʻo hangē naʻe toki hoko pē ʻaneafí. ʻI heʻema aʻu ki ʻolungá, naʻá ne tūʻulutui hifo ʻi hoku kiʻi veʻe mohengá. Naʻá ne ʻai ke u tūʻulutui ʻi muʻa ʻiate ia. Naʻá ne ʻai ke u kūnima peá ne pukepuke hoku ongo nimá ʻo akoʻi mai ʻeku fuofua lotú. He ʻikai ʻaupito ngalo ia ʻiate au. ʻOku ʻikai ke u loto ke ngalo ʻiate au. Ko e taha ia ʻo e ngaahi meʻa fakaʻofoʻofa taha ʻoku ou manatuʻi ʻi heʻeku moʻuí, ko ha faʻē ʻulungāanga hangē ha ʻāngeló naʻá ne tangutu ʻi hoku veʻe mohengá ʻo akoʻi au ke u lotu.
“Ko ha kiʻi lotu faingofua pē, ka … naʻe fakaava hake ʻe he lotu ko iá ʻa e ngaahi matapā ʻo e langí kiate au. Naʻe fakamafao mai ʻe he lotu ko iá ʻa e toʻukupu ʻo ʻeku Tamai ʻi hēvaní kiate au, he naʻe fakamatalaʻi mai ʻe heʻeku faʻeé hono ʻuhingá ke mahino ki ha tamasiʻi siʻi. Talu meí he ʻaho ko iá ʻo aʻu mai ki he taimí ni, neongo ne u fononga holo he maile ʻe taha miliona ʻi māmani ʻi he lotolotonga ʻo e fānau kehe ʻa ʻetau Tamaí, ʻi he ʻaho mo e pō kotoa pē, ʻi he feituʻu pē ne u ʻi ai, ʻi heʻeku ʻalu ke mohé mo ʻeku tuʻu haké, ne u ongoʻi ʻa ʻeku ofi ki heʻeku Tamai Hēvaní. ʻOku ʻikai ke Ne mamaʻo.”2
Naʻe fakafalala ʻa Palesiteni Sāmita ʻi he lotú ʻi he kotoa ʻo ʻene moʻuí, ʻo ʻikai ko ha founga pē ke ne ofi ange ai ki he ʻOtuá ka ke kole tokoni foki kiate Ia ʻi he taimi naʻe faingataʻaʻia aí. Ko e meʻa ʻeni naʻe hoko lolotonga haʻane kaukau tahi ʻi he ʻŌseni Pasifikí ʻi he matāfanga pē ʻo Kalefōniá:
“Naʻe lau ko ha tokotaha kakau lelei ʻaupito au pea naʻá ku fuʻu saiʻia ʻaupito he kakaú. Naʻe huʻa e tahí he ʻaho ko ʻení mo mālohi e peaú. ʻI heʻeku mavahe mei ʻuta ʻo kakau atu ki he lotó, naʻe tui mai e ngaahi fuʻu peau lalahí ʻo fasi ʻia au ʻou viku kotoa. Naʻá ku fakataumuʻá ki he ngaahi fuʻu peau naʻe aake mei muʻa he ngaahi peau naʻe fasí ke u fakatētē loufusi he aake ʻa e ngaahi foʻi peaú.
“Lolotonga ʻeku tokanga ke fai ʻení, naʻe haʻu ha fuʻu peau pea fasi ia ʻoku teʻeki ai ke u tuʻu lelei hili e fuʻu peau naʻe toki ʻosi atú. Ne maʻu au ʻe he peau hono uá ʻo ne ʻave au ki kilisitahi. Naʻá ku ongoʻi hono fusi hifo au ʻe he mālohi ʻo e peaú. Ne haʻu hokohoko ha ngaahi peau lahi lolotonga e taimi ko ʻení pea naʻe teʻeki ai ke u lava ʻo tuʻu lelei ke u kakau mei he peau ki he peau. Naʻá ku ʻiloʻi kuo vave pē mole hoku iví, pea naʻe fie maʻu ke u kumi tokoni. ʻI heʻeku tētē ʻi ʻolunga he fuʻu peau ʻe taha, naʻá ku sio ki he ngaahi fuʻu pou ʻo ha kiʻi uafu ofi mai pē, peá u fakakaukau kapau te u feinga mālohi ʻaupito te u lava ʻo aʻu ki he ngaahi fuʻu poú pea te u moʻui.
“Naʻá ku kole fakalongolongo pē ki heʻeku Tamai Hēvaní ke foaki mai ha ivi ke u aʻu ki he feituʻu ne u fakataumuʻa ki aí. ʻI hono ʻave atu au ʻo ofi ki he uafú, naʻá ku ala atu ʻo puke e taha ʻo e ngaahi fuʻu poú. Naʻe pipiki ai ha fanga kiʻi fingota māsila mo lanu pulū mālohi, pea ʻi heʻeku kuku ia ʻaki hoku ongo nimá mo e vaʻé ke u haó, naʻe lavelavea hoku fatafatá, vaʻé mo e alangá. Naʻá ku pipiki ki ai ʻi he lōloa taha naʻá ku lava ke kātakiʻi e mamahí mo fakasio ha fuʻu peau ʻe haʻu ke u tētē mai ai ki ha fuʻu pou ʻe ofi ange ki ʻutá. Naʻá ku lotu ʻi hoku lotó ʻi he taimi kotoa pē naʻá ku feinga ai mei he fuʻu pou ki he fuʻu pou ʻi hono ʻomi au ʻe he peaú.
“Naʻe māmālie kae pau mo faingataʻa ʻaupito ʻeku feinga mai ki he matātahí ʻa ia naʻe mamaha feʻunga ai ke u luelue ai ki he ʻoneʻoné. ʻI heʻeku aʻu atu ki he ʻoneʻone māfaná, ne u tō hifo ki lalo he ne u helaʻia. Naʻe vaivai ʻaupito hoku sinó, peá mei melemo, ʻo ʻikai ai ke u lava ʻo lue ki ʻapi kae ʻoua kuó u mālōlō. ʻI heʻeku tokoto he ʻoneʻone māfana mo malú, ne u fakakaukau ki he meʻa ne toki hokó pea naʻe fonu hoku lotó ʻi he fakafetaʻi mo e loto-fakatōkilalo ʻi hono fakahaofi ʻe he ʻEikí … ʻeku moʻuí.”3 [Vakai, fokotuʻu 1 he peesi 107.]
Ngaahi Akonaki ʻa Siaosi ʻAlipate Sāmitá
ʻOku tau lava ʻi he lotú ʻo fakataufolofola ai ki heʻetau Tamai Hēvaní ʻo hangē pē ʻokú Ne ai tonú.
Ko ha tāpuaki fakaʻofoʻofa ʻoku tau maʻu ʻi he ngaahi taimi faingataʻa mo taʻepau ko ʻení ke ongoʻi pau ʻoku tataki kitautolu ʻe he ʻOtuá, ke maʻu ha tui moʻoni ki ha ʻOtua fakatāutaha ʻoku tokanga mai kiate kitautolu pea ʻoku fanongo mai mo tali ʻetau ngaahi lotú.4
ʻI he ngaahi taʻu kuo hilí … ne u fanongo ai ʻi hono leleakiʻi [ha] kiʻi tamasiʻi paea taʻu hiva ki he fale mahakí, pea ʻi hono siví, naʻe fie maʻu ke fai hano tafa ʻo ʻikai toe tatali. Naʻá ne nofo pē mo hano ngaahi kaungāmeʻa ʻi honau ʻapí. Naʻe akoʻi ia ʻe heʻene tamaí mo ʻene faʻeé (ʻi heʻena kei moʻuí) ke lotu; ko ia, ko e meʻa naʻá ne fie maʻu ʻi heʻene aʻu ki fale mahakí ke tokoniʻi ia ʻe he ʻEikí.
Naʻe fakakaukau e kau toketaá ke nau talanoa ki he meʻa ʻe faí. ʻI hono teke atu ia ki he loki tafá, naʻá ne sio takai he kau neesi mo e kau toketā naʻa nau talanoa ki hono puké. Naʻá ne ʻilo naʻe lahi, pea ʻi heʻenau teuteu ke fai hono fakamohé, naʻá ne pehē ange ki hanau toko taha: “ ʻE Toketā, kimuʻa pea kamata e tafá, kātaki muʻa ʻo fai ha lotu maʻaku?”
Naʻe hangē ʻoku mā e toketaá, peá ne pehē ange, “He ʻikai ke u lava ʻo lotu maʻau.” Pea kole ange ʻa e tamasiʻí ki he kau toketā kehé, mo e tali tatau pē.
Faifai pea hoko ha meʻa fakaofo ʻaupito: naʻe pehē ange e kiʻi tamasiʻí, “Kapau he ʻikai ke mou lava ʻo lotu maʻaku, mou kātaki muʻa ʻo tatali kau fai pē ʻe au ʻeku lotú?”
Naʻa nau toʻo e tupenu kafú, peá ne tūʻulutui he tepile faiʻanga tafá, punou hono ʻulú peá ne pehē, “ ʻE Tamai Hēvani, ko ha tamasiʻi paea pē au. ʻOku ou fuʻu puke lahi. Fakamolemole muʻa ʻo ʻai ke u sai? Tāpuakiʻi e kau tangata ko ʻeni te nau fai e tafá ke tonu ʻenau ngāué. Kapau te ke ʻai ke u sai, te u feinga ke u tupu hake ʻo hoko ko ha tangata lelei. Mālō ʻe Tamai Hēvani Hoʻo ʻai au ke u saí.”
ʻI he ʻosi ʻene lotú, naʻá ne tokoto hifo. Naʻe fakatē loʻimata e kau toketaá mo e kau nēsí. Naʻá ne pehē ange leva, “Kuó u maau.”
Naʻe fakahoko e tafá. Naʻe fakafoki e kiʻi tamasiʻí ki hono lokí, pea ʻosi pē ai ha ngaahi ʻaho siʻi naʻa nau fakaʻatā ia mei falemahaki, pea naʻá ne fakaakeake ai pē ke sai ʻaupito.
Hili ha ngaahi ʻaho mei ai, naʻe haʻu ha tangata naʻe fanongo he meʻa naʻe hokó ki he ʻōfisi ʻo e taha ʻo e kau toketā tafá ʻo pehē ange, “Fakamatala mai angé ki he tafa naʻá ke fai he ngaahi ʻaho siʻi kuo ʻosí—ʻa e tafa ʻo e kiʻi tamasiʻí.”
Naʻe pehē ange ʻe he toketā tafá, “Kuo tokolahi ha fānau tangata kuó u tafa.”
Ne toe pehē atu e tangatá, “Naʻe fie maʻu ʻe he kiʻi tamasiʻi ko ʻení ha taha ke fai ha lotu maʻana.”
Ne lea fakamātoato atu ʻa e toketaá, “Naʻe ʻi ai, kae heiʻilo, ʻoku fuʻu toputapu ia ke u talanoa ki ai.”
Ne pehē ange e tangatá, “Toketā, kapau te ke talamai, te u fakaʻapaʻapaʻi ia; ʻoku ou fie fanongo ki ai.”
Naʻe fai leva ʻe he toketaá e talanoá ʻo hangē pē ko ʻeku fai atu hení, peá ne toe pehē: “Kuó u tafa ha kakai ʻe toko laungeau, ko e kakai tangata mo e kakai fefine naʻa nau pehē ʻoku nau maʻu ʻa e tuí ke fakamoʻui kinautolu; ka ne teʻeki ai ha taimi kuó u ongoʻi ʻoku ʻi ai e ʻOtuá tālunga ʻeku tuʻu he tafaʻaki ʻo e kiʻi tamasiʻi ko iá. Naʻe fakaava ʻe he tamasiʻí ʻa e ngaahi matapā ʻo e langí ʻo talanoa ki heʻene Tamai Hēvaní ʻo hangē pē ko ha talanoa fehangahangai ʻa ha ongomeʻa. ʻOku ou fie talaatu kuó u hoko ko ha tangata lelei ange ʻi heʻeku tuʻu ko ia ʻo fanongo ki he talanoa ʻa ha kiʻi tamasiʻi ki heʻene Tamai ʻi hēvaní ʻo hangē pē naʻá ne ʻi aí.”5 [Vakai, fokotuʻu hono 2 he peesi 107.]
Tau moʻui angé ʻi ha founga ʻe hoko ai e taimi ʻoku tau tūʻulutui hifo ʻi he pō kotoa pē ke lotu mo e pongipongi kotoa pē ʻoku tau punou ai ʻi he ʻao ʻo e ʻEikí ʻi he fakafetaʻí, ke ʻiate kitautolu ʻa e mālohi ke fakaava ʻa e langí koeʻuhí ke fanongo mai mo tali ʻe he ʻOtuá ʻa ʻetau ngaahi lotú ʻo tau ʻiloʻi ʻokú Ne hōifua mai kiate kitautolu.6
Kapau te tau moʻui ʻo ofi ki heʻetau Tamai Hēvaní, ʻe ueʻi kitautolu ke tau ʻiloʻi e meʻa ke tau lotuá.
Naʻe kei talavou ʻeku tamaí pea naʻe [meimei] mole ʻene moʻuí ʻi he Vaitafe Polovó. … Naʻe ʻi Sōleki Siti ʻene tamaí, pea naʻá ne ongoʻi pē ke ʻalu ki ha loki naʻe tuku mavahe pē ki he lotú. Naʻá ne … tūʻulutui hifo … peá ne pehē, “Tamai Hēvani, ʻoku ou ongoʻi ʻoku ʻi ai e meʻa ʻoku hoko ki hoku fāmilí ʻi Polovo. ʻOkú Ke ʻafioʻi pē he ʻikai ke u lava ʻo ʻi ai mo kinautolu peá u toe ʻi heni. Tamai Hēvani, fakahaofi muʻa mo maluʻi kinautolu. …”
ʻI he taimi naʻá ne lotu aí, naʻe meimei ko e taimi pē ia naʻe tō ai ʻeku tamaí ki he loto vaitafé. Ko e taimi ʻeni ʻo e tāfeá. Naʻe ʻohifo ʻa e ʻakau mo e makamaka mei he teleʻá pea naʻe ʻikai ke ne lava ʻo fai ha meʻa. Naʻe sio ʻa kinautolu naʻe ofi atú ki heʻene faingataʻaʻiá, ka naʻe ʻikai ke nau lava ʻo aʻu ki ai. Naʻe fuʻu mālohi e tafe ʻa e vaí ʻo faingataʻa ke lava ʻo moʻui ai ha taha. Naʻa nau tuʻu pē mo e manavahē. Naʻe fai ʻe heʻeku tamaí ʻa e meʻa kotoa pē naʻe lavá ke ʻasi pē hono ʻulú ʻi ʻolunga he vaí, ka naʻe liaki holo ia pea tau hono ʻulú he maka mo e ʻū kupuʻi ʻakaú. ʻOhovale pē kuo hikiʻi hake ia ʻe ha foʻi peau mei he vaí ʻo lī ia ki ʻuta. Ko e tali fakahangatonu ia ki ha … lotu.7
ʻOku totonu ke tau tokanga ki heʻetau ngaahi lotu liló. ʻOku totonu ke tau moʻui ʻo ofi ki heʻetau Tamai Hēvaní koeʻuhí ko e taimi ʻoku tau punou hifo ai ʻi hono ʻaó ʻoku tau ʻilo ʻe hōifua ki he meʻa ʻoku tau kolé, pea ka ʻikai ke tali mai ʻi he founga ʻoku tau kole aí te tau ʻiloʻi te tau maʻu ʻa e tāpuaki ʻoku totonu ke tau maʻú pea ʻe hoko moʻoni ia ko ha tāpuaki.8 [Vakai, fokotuʻu hono 3 he peesi 107.]
Ko ha ivi tākiekina mālohi ʻa e lotú ʻi heʻetau moʻui fakatāutahá, ʻi hotau ngaahi ʻapí, mo hotau tukui koló.
Kuo fakamatalaʻi kiate kitautolu ʻe he ʻEikí … ʻa e founga te tau maʻu ai e ngaahi tāpuakí ʻo fakafou ʻi he lotú. ʻOku tokolahi e kakai ʻi māmani ʻoku ʻikai ke nau ʻiloʻi e ngaahi lelei moʻoni ʻo e lotú. ʻOku ʻi ai hono ivi tākiekina ʻoku tokosiʻi ʻaupito e kakai ʻoku mahino kiate kinautolú. …
… Ko e toko fiha ʻi he Siasí ni ʻoku ʻikai ke nau ʻiloʻi ʻoku ʻi ai ʻenau totonu, ʻa e totonu taʻefehuʻia, ke lotu ki heʻenau Tamai ʻi hēvaní ʻo kole kiate Ia ke toʻo atu ʻenau faingataʻaʻiá pea tataki kinautolu ki he nongá mo e fiefiá?9
ʻOku ngali kehe ke fakaʻaiʻai ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ke fai ʻene lotú, ka ʻoku ʻi ai e kakai ia ʻoku ʻikai ke nau lotu lilo pe fai ʻenau ngaahi lotu fakafāmilí. Ka ʻe mole meiate kitautolu ʻa e maluʻi ʻoku ʻomi ʻe he lotú ʻo kapau he ʻikai ke tau lotu.10 [Vakai, fokotuʻu hono 4 he peesi 101.]
ʻOku ou fie fakamamafaʻi ʻeni: ʻOku ou ʻamanaki pē he ʻikai ngalo ʻi he Kāingalotú ke fai ʻenau ngaahi lotú, ʻa ʻenau ngaahi lotu liló mo ʻenau lotu fakafāmilí. ʻOku mole ʻa e ngaahi tāpuaki lahi mei he fānau ʻoku tupu hake ʻi he ngaahi ʻapi ʻoku ʻikai fai ʻenau lotu fakafāmilí mo e lotu liló, pea ʻoku ou manavasiʻi naʻa ʻikai fai ha lotu ʻa ha ngaahi ʻapi pea ʻikai ke nau maʻu e ngaahi tāpuaki ʻa e ʻEikí tupu mei he meʻa fakapuputuʻu ʻo e māmaní, mo e fakavavevavé mo e lahi ʻo e ngaahi meʻa ʻoku faí; he ʻikai kei hokohoko atu e fiefia ʻa e ngaahi ʻapi ko ʻení. ʻOku tau moʻui ʻi ha kuonga ʻoku tau fie maʻu ai ʻa ʻetau Tamai Hēvaní, ʻo lahi ange ia ʻi hano fie maʻu Ia ʻi ha toe kuonga.11
ʻOua naʻa mou tekeʻi meiate kimoutolu ʻa e mālohi ʻo e ʻOtuá. Tauhi maʻu ʻi homou ngaahi ʻapí ʻa e ivi tākiekina ʻo e lotú mo e loto fakamāloó, pea ʻoatu ʻa e fakafetaʻí kiate ia naʻá ne fakatupu kitautolú mo e tokotaha ʻokú ne foaki mai ʻa e lelei kotoa peé.12
Tuku muʻa ke hoko hotau ngaahi ʻapí ko e feituʻu ʻoku fai ai ʻa e lotú mo e fakafetaʻí mo e fakamāloó. … Tau lotua ʻa e kau tangata mo e kau fafine maʻongoʻonga ʻo e māmaní ʻoku nau fie maʻu e ʻEikí ka ʻoku ʻikai mahino kiate kinautolu ʻene tokanga angé. Lotua … hotau kau kōvaná, hotau kau pule koló, ʻa e kau tangata ʻoku ʻi ai honau ivi tākiekina ʻi he ngaahi meʻa fakapolitikalé ʻi hotau ngaahi tukui koló, ke nau fai ʻa e ngaahi meʻa ko ia ʻe lelei ange maʻatautolú pea tau fiefia ange aí, pea fakahōifua ki heʻetau Tamai Hēvaní. Ko hotau faingamālie ia. ʻOku ou pehē kiate kimoutolu ko e mālohi ʻo e lotú ko ha meʻa ia he ʻikai lava ke fakafuofuaʻi.13
ʻOku ʻomi ʻe he lotu fakafāmilí ʻa e uouangatahá ki he ngaahi fāmilí.
He ʻikai tatau maʻu ai pē ʻetau sió ʻi heʻetau hoko ko ha [kau mēmipa ʻo e fāmilí]; he ʻikai tatau maʻu pē ʻa e fakaʻuhinga ʻa e houʻeiki tangatá mo honau uaifí pe ko e uaifí mo e husepānití, ka ʻo ka mou lotu fakataha ʻi he loto moʻoni ke mou uouangataha, ʻoku lava ke u talaatu, te mou loto tatau ʻi he ngaahi meʻa mahuʻinga kotoa pē.
Ne u fakatokangaʻi … ʻi ha papa tuʻuaki: “Ko e fāmili ʻoku lotu fakatahá ʻoku nau fāitaha.” ʻOku ʻikai ke u ʻiloʻi pe ko hai naʻá ne fokotuʻu aí, ka ʻoku ou fie tala atu kapau te mou kiʻi fakakaukau hifo ki ai te mou ʻilo ʻoku moʻoni. ʻOku ou ekinaki atu ke mou lotu fakataha ki he ʻEikí, pea ʻoku ʻikai ko ʻeku ʻuhingá ke mou lea pē ʻo lotu, ʻoku ʻikai ko ʻeku ʻuhingá ke … toutou lea ʻaki pē ʻa e meʻa tatau, kae fakaava hake homou lotó ki he ʻEikí ʻi homou ʻapí ko e husepāniti mo e tamai, pea tuku ke kau atu mo homou uaifí mo e fānaú. ʻAi ke nau kau. ʻE toki maʻu leva ʻi ʻapi ha ivi tākiekina ʻoku lava ke mou ongoʻi ʻi he taimi ʻoku mou ō ai ki aí.14
ʻI heʻeku hoko ko e taha ʻo kinautolu kuo kole mai e ʻEikí ke faiakó, ʻoku ou kole atu ai ke mou fakamaau homou ngaahi falé. ʻOua naʻa mou fakafiemālie pē ʻi he ngaahi meʻa lahi. ʻOua naʻa tataki atu ʻa kimoutolu ki he ngaahi meʻa laulaunoa mo vaivai ʻo e māmaní. Maluʻi homou ngaahi fāmilí ʻi he founga kotoa pē ʻe ala lavá. Fakatahatahaʻi mai kinautolu ʻi he ivi tākiekina ʻo e lotú. … Ko e lotú ko ha mālohi ia te ne tauhi kitautolu ʻi he hala ki he moʻui taʻengatá pea taki atu ʻa kitautolu ki he puleʻanga silesitialé!15 [Vakai, fokotuʻu hono 5 he peesi 107.]
Ngaahi Fokotuʻu ki hono Ako mo Akoʻí
Fakakaukauʻi e ngaahi fakakaukau ko ʻení lolotonga hoʻo ako e vahé pe teuteu ke akoʻí. Ki ha tokoni makehe, vakai ki he peesi vii–ix.
-
Fakatokangaʻi “Mei he Moʻui ʻa Siaosi ʻAlipate Sāmitá” (peesi 99–101), hono tākiekina ʻo Palesiteni Sāmita ʻi hono kotoa ʻo ʻene moʻuí ʻe he ngaahi meʻa naʻá ne aʻusia ki muʻa fekauʻaki mo e lotú. Ko e hā ha ngaahi founga ʻaonga ke akoʻi ʻaki e fānaú kau ki he mālohi ʻo e lotú?
-
Toe fakamanatu e talanoa kau ki he kiʻi tamasiʻi taʻu hivá (peesi 101–102). Ko e hā ʻoku hangē ai ʻetau ngaahi lotú he taimi ʻe niʻihi ʻoku ʻikai te tau ongoʻi ko haʻatau talanoa fehangahangai mo e Tamai Hēvaní? Fakakaukau ki he meʻa ʻe lava ke ke fai ʻi hoʻo ngaahi lotu fakatāutahá ke ke faʻa ongoʻi ʻokú Ne ʻafio ai.
-
ʻI hoʻo fakalaulauloto ki he ngaahi akonaki ʻa Palesiteni Sāmita ʻi he peesi 103–04), fakakaukau ki ha taimi naʻe ueʻi ai koe ke ke lotu ʻo kole ha faʻahinga meʻa. Ko e hā hoʻo lea ʻe fai ki ha taha ʻokú ne ongoʻi naʻe ʻikai tali mai ʻene ngaahi lotú?
-
Fakakaukau ki he lea ʻa Palesiteni Sāmitá, “ ʻOku mole meiate kitautolu ʻa e maluʻi ʻoku ʻomi ʻe he lotú ʻo kapau he ʻikai ke tau lotu” (peesi 104). Ko e hā ha ngaahi founga kuó ke ongoʻi ai ʻa e mālohi mo e maluʻi ʻa e lotú? Fakakaukau ke vahevahe hoʻo fakamoʻoni ki he mālohi ʻo e lotú mo kinautolu ʻoku mou faiako fakaʻapi pe faiako ʻaʻahi ki aí.
-
Naʻe akonaki ʻa Palesiteni Sāmita ʻo pehē “ ʻe tauhi kitautolu [ʻe he lotú] ʻi he hala ki he moʻui taʻengatá” (peesi 106). ʻOkú ke pehē ko e hā nai hono ʻuhingá? Ko e hā nai ʻe lava ke fai ʻe he ngaahi fāmilí ke fakapapauʻi ʻoku nau lotu fakataha maʻu pē? Fakakaukau ki he meʻa ʻe lava ke ke fai ke hoko ai e lotu fakatāutahá ko ha konga ʻuhingamālie ange ʻo hoʻo moʻuí.
Ngaahi Potufolofola Fekauʻakí: Mātiu 6:7–13; 7:7–11; 2 Nīfai 4:35; ʻAlamā 34:18–27; 37:37; 3 Nīfai 18:20–21; Tokāteline mo e Ngaahi Fuakava 88:63–64
Tokoni fakafaiakó: “Ko e fānau akó ʻoku fie maʻu ke fakangāueʻí. ʻI he taimi ʻoku fakatefito ai ʻa e tokangá ʻi he faiakó, peá ne hoko ko e tokotaha mahuʻinga taha he lokiakó, fai kotoa e talanoá mo ne puleʻi kotoa e ngaahi ʻekitivitií, ʻoku meimei fakapapauʻi ai ʻokú ne fakafeʻātungiaʻi e ako ʻa e kau mēmipa ʻo e kalasí” (Asahel D. Woodruff, ʻi he ʻOku ʻIkai ha Ui ʻe Mahuʻinga Ange ʻi he Faiakó, 68).
“Ko ha tāpuaki fakaʻofoʻofa ʻoku tau maʻú … ke ongoʻi pau ʻoku tataki kitautolu ʻe he ʻOtuá, ke maʻu ha tui taʻe toe fehuʻi ki ha ʻOtua fakatāutaha ʻoku tokanga mai kiate kitautolu pea ʻoku fanongo mai mo tali ʻetau ngaahi lotú.”
“ ʻOku totonu ke tau moʻui ʻo ofi ki heʻetau Tamai Hēvaní koeʻuhí ko e taimi ʻoku tau punou hifo ai ʻi hono ʻaó ʻoku tau ʻilo ʻe hōifua ki he meʻa ʻoku tau kolé.”
“Maluʻi homou ngaahi fāmilí ʻi he founga kotoa pē ʻe ala lavá. Fakatahatahaʻi mai kinautolu ʻi he ivi tākiekina ʻo e lotú.”