Te Haapiiraa i te Evanelia i Roto i te Utuafare

Eiaha to tatou utuafare ia riro noa ei mau vahi moʻa, ia riro atoa râ ei mau vahi no te faaineineraa, na reira atu hoi to tatou mau feia apî i te haere atu i mua ma te tiaturi papu, no te faatere e no te tiʻa atu i mua i te hoê ao arepurepu. Ua ite paatoa tatou e, te mea e apohia i roto i te utuafare, e tiʻa ïa i te vai- maite-raa; te mea e iteahia e te mata e o te ravehia i roto i te utuafare, e riro ïa ei tautururaa e aore râ, ei faainoraa i to tatou mau feia apî i roto i te mau matahiti e rave rahi. E nehenehe i to tatou mau utuafare ia riro ei hiʻoraa no te taata nei, tera râ, e mea tiʻa ia tatou ia haapaʻo maite atu â i te aʻoraa a te feia faatere o te Ekalesia no niʻa i teie nei tumu parau, hau atu i ta tatou i rave noa mai na e tae roa mai i teie nei. Ua riro noa na teie ohipa ei titauraa taaʻe, ua rahi-roa’tu râ i teie nei no te ino rahi e vai nei i roto i te mau utuafare o to tatou nei anotau. E nehenehe i te mau tamarii “ia taa e ia ite” i te faaohipa-raa-hia te evanelia i te utuafare. E tiʻa ia ratou ia ite i to’na afaro e to’na mana no te taime matamua roa; e tiʻa ia ratou ia ite e, e mea nahea te evanelia ia pahono i te mau hinaaro o te taata.²

Ua faahiti-tamau-noa-hia te parau o te na ô ra e, o te utuafare te niu no te hoê oraraa paieti. …Na te mau heheuraa a te Atua e te haapiiraa a te taata nei e faaite nei ia tatou i te faufaa rahi o te utuafare i roto i te parau no te hamaniraa i te oraraa o te taata.³

Te papu noa’tura i teie nei e, o te utuafare te taviri no te ananahi o te Ekalesia. Te hoê tamarii o tei ore i herehia, te hoê tamarii o tei ore i ite eaha te haapaʻo, eaha te ohipa, e aore râ, eaha te hopoiʻa, e imi oia i te mau raveʻa pi’o no te titau i te oaoa—te raau taero, te hinaaroraa e tamata i te hiaai o te pae tino i te tane e i te vahine, e te orurehau, e mau raveʻa anei no te maramarama, e aore râ, no to’na iho huru. …

Aita e vahi maitai atu i te utuafare no te haapii e no te titau i te ite i te parau no te faaipoiporaa, no te here, no te taotoraa te tane e te vahine, e ia amuihia teie mau mea atoa i roto i te hoê faaipoiporaa i roto i te hiero moʻa. Aita e vahi maitai atu no te faatitiaifaro i te manaʻo tapitapi o to tatou mau taurearea maori râ, te hoê vahi tei reira te here—te utuafare. E nehenehe i te here e faatiamâ i to tatou mau taurearea no te faaroo i te feia o ta ratou i ite e, e nehenehe e tiaturi. …

E tiʻa anei i te hoê tamarii ia here i to’na taata tupu mai te mea e, aita oia iho i ite eaha te here? E tiʻa anei i te hoê taurearea ia ite i te parau no te tiaturi mai te mea e, aita oia iho i tiaturihia aʻe nei? Te hoê tamaiti iti aita oia i ite i te parau no te ohipa e aore râ, te parau no te hopoiʻa, e tiʻa anei ia’na ia ite i te faufaa rahi o taua mau mea ra no te tapearaa i to tatou oraraa totiare i te vahi hoê? Te hoê tamahine aitâ i parahi papu aʻe nei i roto i te mau aparauraa no niʻa i te mau parau tumu o te evanelia i roto i to’na utuafare, e ite anei oia e, nahea ia pahono i te mau faahapahaparaa a to te ao nei e te mau aroraa manaʻo no niʻa i ta’na haa paʻoraa? … Ia ore ia faaohipahia te hoê parau tumu o te evanelia i roto i te oraraa, e rahi atu ïa te etaetaraa no te tiaturi i te reira parau tumu. …

Ua faahohoahia teie tau mai te anotau o Noa, e mea tiʻa ia tatou ia tauturu i to tatou feia apî ia ite e, nahea ia rave i te mau maitiraa tiʻa, nahea ia faatupu i te tiaturi ia’na iho, i te taime ihoa râ tei raro aʻe ratou i te faaurûraa o te utuafare, i reira hoi te here utuafare e faatupu ai i te tatarahaparaa mau. E riro te oraraa o to tatou mau feia apî i rapae au i te utuafare e i te Ekalesia, ei oraraa aore e maa to roto, te parau nei tatou i te parau no te mau mea faufaa o te oraraa nei; e aore râ, ei oraraa tei î i te mau feruriraa patoʻi i te mau parau tumu o te evanelia.⁴

Tei niʻa i te mau metua o te utuafare e i te Ekalesia te faautaraahia te hopoiʻa rahi no te haapii i te mau parau mau o te evanelia, ia roaa te hoê tutau no te varua tataitahi. Ia ore hoi te reira tutau, e au ïa te taata nei mai te “aru miti i patuhia e te mataʻi e fetoitoi aʻera,” e aueue noa i te mataʻi ra i tera parau e i tera parau, aita i taahia e, nohea mai râ, o te faataupupu roa i to’na feruriraa no niʻa i te mau mea tiʻa ore i mua i te aro o te Atua [a hiʻo Ephesia 4:14; Iakobo 1:6]. E mea tiʻa ia tatou ia riro ei mau taata haapii-maitai-hia aʻe i niʻa i te tino o te fenua nei, mai te mea e, e haapaʻo tatou i te aʻoraa a te Fatu.

No reira, mai te mea e, e na reirahia te haapuai i to tatou mau feia apî, e ore ïa ratou e haapeʻapeʻahia i roto i te parau no to ratou faaroo i te taime e û ai ratou i niʻa i te mau haapiiraa hape e ore e au i te mau parau mau o te evanelia. Ua ahuhia ïa ratou i te mauhaa no te paruru ia ratou i te mau nira taero o te parau faaino e te parau haavare.

No te mau tamaroa apî. …, mai te mea e na “te parau mau papu” ratou e aratai, eita ïa ratou, i roto i te hoê taime manaʻoore- hia, e fati i raro aʻe i te faahemaraa, o te riro ei haafifiraa i to- ’na oraraa taatoa. …

Mai te mea e, na te mau manaʻo o tei niuhia i niʻa i te parau mau o te evanelia, e aratai i te mau tamahine e faatata ra i te faaipoipo, e haamoʻa ïa ratou ia ratou iho na roto i te haapaʻoraa i te ture no te faaipoiporaa tiretiera ia roaa te oaoa mure ore ia ratou.⁵

Ua parau te Fatu e, aita te mana i horoʻahia ia Satane no te faahema i te mau tamariirii, “e tae noa’tu i te taime e riro ai ratou ei feia manaʻo papu i mua iaʻu nei” (PH&PF 29:47). Te parau faahou ra teie parau e: “Ia tiʻa ia titauhia te mau mea rarahi i te rima o to ratou ra mau metua tane ra” (PH&PF 29:48). I teie nei, o te mau metua teie e parauhia nei. No te aha aita te Fatu e faatia ia Satane ia faahema i te hoê tamarii naʻinaʻi e tae noa’tu i te taime ua taeʻahia to’na matahiti? No te horoʻaraa ïa i te mau metua te raveʻa auro no te ueueraa i roto i te aau o te mau tamariirii, i taua mau mea faufaa rahi ra, hou a tae mai ai te taime a ite ai ona no- ’na iho; ia ore anaʻe, ua taere roa.⁶

Tatou te mau metua tane, te mau orometua haapii, te mau metua vahine, e tuhaa ohipa rahi ta tatou i roto i te parau no te paturaa i te varua o te taata nei. E parau mau, eita e tiʻa ia Satane ia faahema i te mau tamariirii hou a riro ai ratou ei feia manaʻo papu; tera râ, te imi nei o Satane i te mau raveʻa atoa na roto i te tamataraa i te faariro ia tatou, tatou o tei faataahia no te aupuru e no te haapii ia ratou, ei mau taata paruparu, e te tauʻa ore, e o te faatia nei ia ratou iho ia rave i te tahi mau peu rii o te aratai ê roa ia ratou, e o te tapu ê ia ratou i te mau hopoiʻa rarahi no te upootiaraa i mua ia Satane, e te oreraa e ahu i te haana tamaʻi i te taime a riro ai ratou ei feia manaʻo papu.⁷

E mea tiʻa ia tatou ia haapapu maitai i te metua tane tataitahi e, tei niʻa ia’na te hopoiʻa no te maitai mure ore o to’na utuafare: oia hoi, ia tomo mai oia i roto i te Ekalesia nei e to’na utuafare; oia hoi, ia haere oia i te pureraa oroʻa e to’na utuafare; oia hoi, ia faatupu oia i te mau pô utuafare no te paruru ia vai maitai noa to’na utuafare; oia hoi, ia faaineine oia ia’na iho no te aratai ia ratou i te hiero, ia nehenehe, na roto i te reira, e faaineinehia te mau taahiraa no te faatiaraa i te hoê utuafare mure ore.⁸

Outou e te mau metua vahine, outou e te mau metua tane, te taparu nei au ia outou ia vai te manaʻonaʻoraa i roto ia outou no te haapaʻo-hope-raa i taua mau varua faufaa rahi ra. Mai te mea aita outou e faaineine ia ratou no taua mahana e tae mai ra, na vai ïa ratou e faaineine? Taua mahana ra i reira hoi [te Fatu] e tae mai ai mai te eiâ i te rui ra, te faaineine ra anei outou ia ratou ia tiʻa i mua i To’na ra aro? Ia tiʻa atu ratou i niʻa i te tahua aroraa, ia tiʻa atu ratou i mua i te ati, e i mua i te faahemaraa, e taeʻahia anei to outou here metua vahine i te atearaa e rave rahi tauatini maile no te tapeʻa i taua tamaiti ra e aore râ, i taua tamahine ia tiʻa papu noa oia?⁹

Teie ta te peropheta Enosa i papai no niʻa i te mau haapiiraa a to’na ra metua tane. Te na ô ra oia e, “Ua ite au o Enosa, i to’u ra metua tane, e taata parau-tia oia—e na’na hoi i haapii mai iaʻu nei … i te paari e te aʻo a te Atua ra—Ia haamaitaihia te iʻoa o to’u ra Atua i te reira” (Enosa 1:1). Ua feruri hohonu vau i niʻa i taua faahitiraa parau ra, “Ua haapii mai taʻu metua tane iaʻu nei i te paari.” Eaha to’na auraa? Te auraa o te paari e parauhia nei, o te faanahoraa ïa no te haapiiraa pae morare e i te pae faatitiaifaroraa. “Ua haapii mai e ua faatitiaifaro taʻu metua tane iaʻu nei i roto i te haapiiraa no te pae morare.” Eaha te auraa no te parau ra, te aʻo? o te faahaparaa ïa na roto i te mărû e i te auhoaraa, te mau faaararaa e aore râ, te mau faahaamanaʻoraa. Ia haamaitaihia te iʻoa o te Atua no te metua tane e te metua vahine o te haapii i te paari e te aʻo a te Fatu ra!¹⁰

Ua parau papu mai te Fatu iho no niʻa i teie faaineineraa no te paruru i te feia apî i te mau herepata riʻariʻa o te nehenehe e haamou roa ia ratou. Ua faauta oia i te hopoiʻa rahi i niʻa i te mau utuafare o teie nei fenua. Teie ta’na i parau:

“E teie faahou â, mai te mea e tamarii ta te mau metua i Ziona, e aore râ, i roto i te hoê o to’na ra mau tĭtĭ i haamauhia ra, o te ore hoi e haapii atu ia ratou ra ia ite papu roa i te parau no te tatarahapa, te faaroo i te Mesia te Tamaiti no te Atua ora, e no te bapetizoraa e te horoʻa no te Varua Maitai na roto i te tuuraa rima, ia tae i te vau o te matahiti ra, tei niʻa iho ïa te hara i te upoo o te mau metua. …

“E e haapii atoa ratou i to ratou ra mau tamarii ia pure, e ia afaro noa to ratou haerea i mua i te Fatu.” [PH&PF 68:25,28].¹¹

Ta tatou mauhaa puai aʻe no te aro i te mau ino o te ao nei i teie mahana, noa’tu eaha te huru o te ino, o te hoê ïa iteraa papu aueue ore no niʻa i te Fatu e Faaora, o Iesu Mesia. A haapii i ta outou mau tamariirii a vaivai aʻe ratou i niʻa i to outou turi avae, ei reira ratou e tupu ai i te rahi e ia riro mai ei feia puai. E hahi ê atu paha ratou, tera râ, na to outou here e to outou faaroo e faahoʻi faahou mai ia ratou.¹²

Ia haamanaʻo noa te mau metua ma te haapaʻo i ta ratou ohipa, oia te hiʻoraa eiaha ia vai te tamarii faatau, eiaha te tamarii ia tupu i roto i te ino, ia haapiihia râ ratou ia imi maite i te mau taoʻa no te tau mure ore, eiaha to ratou mau mata ia î i te nounou (a hiʻo PH&PF 68:30–31). O tera ïa te hopoiʻa a te hoê metua tane e a te hoê metua vahine. Te horoʻa nei te Fatu i te mau metua i te hopoiʻa matamua no te haapiiraa i te mau utuafare.¹³

E mea tiʻa ia haapiihia te tamarii tataitahi e, no roto mai oia i te metua hanahana, e ia ite hoi ratou e, e ohipa na te tamarii tataitahi ia haapii i te faariroraa ia ratou ei tamaiti e aore râ, ei tamahine na te Atua, ia tiʻa ia ratou ia pure i te mau taime e titauhia e ia farii i te mau haamaitairaa e au no te tamarii haapaʻo.

E mea tiʻa ia haapiihia te tamarii tataitahi e, e hiero to’na tino no te Atua, e ia haaviivii te hoê taata i te hiero o te Atua ra, e pohe oia i te Atua [a hiʻo 1 Korinetia 3:16–17].

E mea tiʻa ia haapiihia te tamarii tataitahi e, te faaroo e titauhia no te maitai-roa-raa o te taata, e tupu ïa te reira i te rahi na roto i te faatusiaraa e na roto hoi i te haapiiraa i te haavî i to’na mau hiaai e i to’na mau hinaaro tino na roto i te haapaʻoraa i te mau ture o te Evanelia, inaha, ia ore oia e na reira, e ore oia e haamoʻahia e ia moʻa i mua i te Fatu.

E mea tiʻa ia haapiihia te tamarii tataitahi i te faatura i te mau taipe o te mau mea moʻa e te auraro i te mana faatere i roto i te utafare, i roto i te Ekalesia, e i roto i te oraraa tivira.

E mea tiʻa ia haapiihia te tamarii tataitahi i te faaohipa i to’na mau rima, to’na upoo, e ia haapiihia e, na te Atua i horoʻa mai i te mau hiaai atoa, no te opuaraa a te Atua mai te mea e, e faateremaite- hia te reira.

E mea tiʻa i te tamarii tataitahi ia haapiihia i te faaohipa maitai i to’na taime ohipa ore, e ia ite oia e, e ere i te hauti-noa-raa te titauraa hopea. E raveʻa râ no te haapii i te tuhaa e titauhia ia’na ia hauti i roto i to’na oraraa taata paari.

E mea tiʻa ia horoʻahia i te mau tamarii atoa te raveʻa no te haapii, te taviniraa ma te titau ore i te faahoʻiraa, o te taviniraa ïa e roaa ai te oaoa, e te ohipa ta te hoê taata e rave ma te aufau-orehia, o te huru ohipa ïa o te faatupu mai i te oaoa rahi aʻe.¹⁴

E mea tiʻa i ta tatou mau tamarii ia faaroo, i roto i te utuafare iho, i te iteraa papu o to ratou mau metua. Aue ïa metua tane paari, e aore râ, aue ïa papa ruau paari, o te faaite i to’na iho iteraa papu i ta’na mau tamarii tataitahi, i tera e i tera tamarii!¹⁵

Ua haapapu-maitai-hia te parau no te haapiiraa te mau metua i te mau tamarii i roto i te utuafare, i roto i te faanahonahoraa o te pô utuafare. E ere teie i te ohipa apî. … I roto i te episetole hopea a te Peresideni Brigham Young e to’na na Tauturu i to te Ekalesia, ua faaitoitohia te mau metua ia haaputuputu pinepine i ta ratou mau tamarii e ia haapii ia ratou i te evanelia i roto i te utuafare. No reira i faaitoitohia ai te pô utuafare mai te tau a faatiahia ai te Ekalesia i roto i teie nei tau tuuraa evanelia.¹⁶

Mai te mea e, e haapaʻo ore tatou i to tatou nei mau utuafare ma te oreraa e faatupu i te pô utuafare, e mai te mea e, eita tatou e rave i ta tatou hopoiʻa i ô nei, eaha ïa te huru o te oraraa i te raʻi ra mai te mea e, ua moʻe ê te tahi pae na roto i to tatou haapaʻo ore? Eita te raʻi e riro ei raʻi maori râ, ua hope te mau mea atoa i te ravehia e tatou no te faaora i te feia atoa o ta te Fatu i tono mai na roto i to tatou reni tupuna. No reira, e mea tiʻa i to outou aau e te mau metua tane e te mau metua vahine ia faafariuhia’tu i ta outou mau tamarii i teie nei, mai te mea e, tei roto ia outou na te Varua o Eliaha, eiaha râ e manaʻo e, no te feia anaʻe e parahi ra i ô mai i te paruru teie parau. A faafariu atu i to outou aau i ta outou ra mau tamarii, e a haapii i ta outou mau tamarii; tera râ, e mea tiʻa ia outou ia rave i te reira a vai apî noa ai ratou. E mai te mea e, eita outou e haapaʻo i to outou po utuafare, te haapaʻo ore ra ïa outou i te haamataraa o te misioni a Eliaha, mai te huru e, te haapaʻo ore ra outou i te ohipa imiraa tuatapaparaa tupuna.¹⁷

Te haa tamau ra anei tatou i roto i to tatou iho utuafare i rotopu i ta tatou mau tamarii e ta tatou mau mootua? Te imi ra anei tatou i ta tatou iho mamoe o te riro i te atea ê i te tiʻai e aore râ, i te aua? Te haapii ra anei tatou i to tatou utuafare [i roto] i te pô utuafare? Te faatupu ra anei tatou i to tatou iho mau po utuafare, e aore râ, te parau ra anei tatou e, “E ere teie mau haapiiraa no tatou, o Mama anaʻe e o Vau, no te feia anaʻe e tamarii ta ratou”?¹⁸

I teie nei, te hinaaro nei au e ui ia outou i te hoê uiraa. Mai te mea e, ua ite outou e, ua roohia outou i te hoê maʻi eita e ora ia rapaau, e ua poto roa hoi to outou oraraa i niʻa i te fenua nei, e e tamarii naʻinaʻi to roto i to outou utuafare e te tiʻai ra ratou i ta outou aʻo, ta outou haapiiraa e ta outou aratairaa, eaha ta outou e rave no te faaineine ia ratou i to outou poheraa? Ua ui aʻe nei â outou ia outou iho i teie nei huru uiraa?

Te hinaaro nei au… e taiʻo atu i te rata a [te hoê metua vahine]: “I to’u tomoraa mai i roto ite Ekalesia nei, ua hiʻohiʻo haere au i te huru o te utuafare o taʻu e hinaaro i te hoê mahana. Ua feruri aʻe ra vau i te hoê hohoa nehenehe roa e te au maitai o te tiʻa iaʻu ia feruri. Ua tupu mau â taua hohoa ra i te taime a haaputuputu ai maua to’u hoa i ta maua mau tamarii no te haapii ia ratou i te evanelia. …Hoê mea tei maerehia e tei oaoahia e maua, maori râ, ua haapii ta maua mau tamarii, te taatoaraa, i te here i to matou mau pô utuafare. … Ua haamata vau i te ite e, e mea tupu vitiviti mau te mau tamarii e e mea poto hoi to tatou taime e te mau metua no te haapii ia ratou. …

“I te tau faatoparaa raoere i mairi aʻe nei, ua roohia vau i te hoê maʻi rahi. Mea maitai pai e, eita teie e riro ei ohipa faufaa ore, area râ, no te taime matamua, ite aʻera vau e, e faufaa rahi to’u no taʻu mau tamarii. … I roto i to’u maʻi, aita e tiʻa faahou iaʻu ia tauturu i te mau tamarii i roto i to ratou mau hinaaro, e ua ite atoa vau e, ua hope to’u mana i niʻa ia ratou i teie oraraa nei, maori râ, ia tiʻa i te Metua i te Ao ra, no reira, ua feruri aʻera vau i te faufaa rahi e te hinaro mau no taua mau hora ra o te mau hepetoma, te mau avaʻe e te mau matahiti i mua iaʻu.

“Ua feruri aʻera vau i te mau ohipa e rave rahi no niʻa i te huru no te faaohiparaa i taua taime ra, tei horoʻahia mai iaʻu nei. Te hoê o te reira mau ohipa, o te faatupuraa ïa i te tahi maa tuhaa iti o te raʻi i niʻa i te fenua nei, oia hoi, te faataaraa i te hoê taime i te ahiahi no te taiʻo e no te paraparau i te mau tamarii. … Taaʻe atu te tahi mau mea tei au-roa-hia e te mau tamarii, o te Buka a Moromona tei taiʻo-rahi-hia e au ia ratou mai roto mai i te buka aamu na te mau tamarii. …Ua ite au e, ua taa maitai ratou i te reira, i te mea e, te faaroo ra vau i taʻu tamaiti e vau matahiti ia faaite i to’na mauruuru i roto i ta’na mau pure no te mau peropheta o tei poihere maite i te mau papaa parau, e aore râ, i taʻu tamaiti iti e pae matahiti ia faaite i to’na mauruuru i te mea e, ua paruruhia o Nephi i roto i te medebara, e tae noa’tu i te feia tei haapaʻo, i te taime a titau ai o Lamana raua o Lemuela e taparahi ia’na. No reira, ua ite maua e, i te mau taime atoa e nehenehe ta maua e tauturu i ta maua mau tamarii ia faarahi i to ratou here e to ratou haroaroaraa no niʻa i te evanelia e i te Metua tei hamani ia ratou, ua tupu atoa to matou here te tahi i te tahi i te rahi, e ua maitai atoa te parau no te autaeaeraa i roto i to matou utuafare. O te reira te tumu i riro ai te pô utuafare i te mau hepetoma atoa ei ohipa faufaa rahi no matou.”¹⁹

I roto i to outou utuafare, te pure nei au ia parau atoa outou mai ta Iosua i parau ra e: “Area vau e to’u atoa ra utuafare, e haamori ïa matou ia Iehova” (Iosua 24:15). A haapii i to outou mau utuafare i roto i to outou pô utuafare; a haapii ia ratou ia haapaʻo i te mau faaueraa a te Atua, inaha hoi, i roto anaʻe i te reira e iteahia ai to tatou parururaa i teie mahana. Ia na reira hoi ratou, e tae mai te mau mana o te Manahope i niʻa ia ratou mai te hupe no te raʻi mai ra, e e roaa ia ratou te Varua Maitai.²⁰