Ang Dakong Sugo—Higugmaa ang Ginoo

Ang dakong pagsulay sa kinabuhi mao ang pagkamasulundon ngadto sa Dios. “Kita mosulay kanila dinhi,” miingon ang Ginoo, “aron pagsuta kon sila mobuhat ba sa tanan nga mga butang bisan unsa ang isugo sa Ginoo nga ilang Dios ngadto kanila” (Abraham 3:25).

Ang dakong buluhaton sa kinabuhi mao ang pagkat-on sa kabubut-on sa Ginoo ug dayon ang pagbuhat niini.

Ang dakong sugo sa kinabuhi mao ang paghigugma sa Ginoo.

“Duol ngadto kang Kristo,” awhag ni Moroni diha sa panapos sa iyang pagpamatuod, “… ug mohigugma sa Dios uban sa tibuok ninyo nga gahum, hunahuna ug kusog” (Moroni 10:32).

Busa, kini mao, ang una ug dakong sugo: “Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan, ug sa tibuok mong kusog” (Marcos 12:30; tan-awa usab sa Mateo 22:37; Deuteronomio 6:5; Lucas 10:27; Moroni 10:32; D&P 59:5).

Kini mao ang tiunay nga gugma ni Kristo, nga gitawag og gugma nga putli, nga gipamatuod sa Basahon ni Mormon nga mao ang labing mahinungdanon sa tanan—nga dili mopakyas, nga molahutay sa hangtud, nga ang tanan nga mga tawo kinahanglan nga magbaton, ug nga kon wala niana sila walay kapuslanan (tan-awa sa Moroni 7:44–47; 2 Nephi 26:30).

“Busa, akong hinigugma nga mga kaigsoonan,” hangyo ni Moroni, “pag-ampo ngadto sa Amahan uban sa tibuok kusog sa [inyong] kasingkasing, nga kamo unta mapuno niini nga gugma, diin siya mitugyan diha sa tanan kinsa tinuod nga mga sumusunod sa iyang Anak, nga si Jesukristo; aron mahimo kamo nga mga anak sa Dios; nga kon siya moabut kita mahisama kaniya” (Moroni 7:48).

Diha sa panapos nga mga asoy sa mga Jaredite ug mga Nephite, girekord ni Moroni nga gawas kon ang mga tawo makabaton niining tiunay nga gugma ni Kristo, nga gitawag og gugma nga putli, dili sila makapanunod niana nga dapit nga giandam ni Kristo diha sa mga mansyon sa Iyang Amahan ni sila maluwas ngadto sa gingharian sa Dios (tan-awa sa Ether 12:34; Moroni 10:21).

Ang bunga nga gikaon ni Lehi diha sa iyang panan-awon ug mipuno sa iyang kalag og tumang hingpit nga kalipay ug ang labing madanihon labaw sa tanan nga mga butang mao ang gugma sa Dios.⁵

Kon ako maghunahuna sa gugma nga putli, ako … maghunahuna sa akong amahan ug nianang adlaw nga siya gi-call nga magmisyon [tan-awa sa mga pahina 5–7 niini nga basahon]. Ako nagtuo nga pipila dinhi sa kalibutan tingali moingon nga ang iyang pagdawat niana nga calling usa ka pruweba nga wala gyud niya higugmaa ang iyang pamilya. Ang pagbiya og pito ka mga anak ug mabdos nga asawa sa panimalay nga mag-inusara sulod sa duha ka tuig, tinuod ba kana nga gugma? Apan ang akong amahan nahibalo og mas dakong panan-awon bahin sa gugma. Siya nahibalo nga “sa matag usa ka butang ang Dios nagabuhat og maayo uban kanila nga mga nahigugma sa Dios.” (Mga Taga-Roma 8:28). Nahibalo siya nga ang labing maayo nga butang nga iyang mahimo alang sa iyang pamilya mao ang pagsunod sa Dios.⁶

Ang paghigugma sa Dios sa tibuok ninyong kasingkasing, kalag, hunahuna, ug kusog mopuno sa tibuok natong pagkatawo. Dili kini usa ka paningkamot nga mahimo nato kon kulang kita sa pasalig. Kini usa ka hingpit nga pasalig sa ato gayud nga pagkatawo—sa pisikal, mental, emosyonal, ug espiritwal— ngadto sa gugma sa Ginoo.

Ang gilapdon, giladmon, ug ang gidak-on niining gugma sa Dios milugway ngadto sa tanang bahin sa kinabuhi sa tawo. Ang atong mga tinguha, espirituhanon o temporal man kini, kinahanglan nga magagikan diha sa gugma sa Ginoo. Ang atong mga hunahuna ug mga pagbati kinahanglan nga isentro diha sa Ginoo. “Himoa nga ang tanan nimo nga mga hunahuna ipunting ngadto sa Ginoo,” miingon si Alma, “oo, himoa nga ang tanan nga mga pagbati sa imong kasingkasing ibutang diha sa Ginoo sa kahangturan” (Alma 37:36).⁷

Nganong gibutang sa Dios ang unang sugo diha sa una? Tungod kay Siya nahibalo nga kon kita sa tinud-anay nahigugma Kaniya kita gusto nga mosunod sa Iyang tanang mga sugo. “Kay ang paghigugma alang sa Dios mao kini,” nag-ingon si Juan, “nga pagabantayan ta ang iyang mga sugo” (1 Juan 5:3; tan-awa usab sa 2 Juan 1:6).

Kinahanglan nga unahon nato ang Dios sa tanang butang diha sa atong mga kinabuhi. Kinahanglan siyang unahon, sama sa Iyang gipahayag diha sa nag-una sa Iyang Napulo ka mga Sugo: “Dili ka magbaton og lain nga mga dios sa atubangan ko” (Exodo 20:3).

Kon atong unahon ang Dios, ang tanan nga mga butang mapahimutang sa tukma nilang dapit o mawala kini sa atong mga kinabuhi. Ang atong gugma sa Ginoo modumala sa mga pag-angkon alang sa atong pagbati, sa gipangayo sa atong panahon, sa mga kaayohan nga atong gitinguha, ug sa pagpahimutang sa atong mga prayoridad.

Kinahanglan unahon nato ang Dios kay ni bisan kinsa pa diha sa atong mga kinabuhi.

Sa panahon nga si Jose didto sa Ehipto, unsa ang nag-una sa iyang kinabuhi—ang Dios, iyang trabaho, o ang asawa ni Potiphar? Sa dihang misulay ang asawa ni Potiphar sa pagtintal kaniya, mitubag siya pinaagi sa pag-ingon, “Busa unsaon ko paghimo kining dakong pagkadautan, ug makasala batok sa Dios?” (Genesis 39:9).

Nabilanggo si Jose tungod kay giuna niya ang Dios. Kon kita mag-atubang og sama nga pagpili, asa nato ibutang ang atong unang pag-unong? Makabutang ba kita sa Dios og una sa seguridad, kalinaw, mga tinguha, katigayunan, ug mga kadungganan sa mga tawo?

Sa dihang si Jose napugos sa pagpili, mas labaw siyang matinguhaon sa pagpahimuot sa Dios kay sa pagpahimuot sa asawa sa iyang agalon. Kon kita gikinahanglan nga mopili, mas labaw ba kitang matinguhaon nga mopahimuot sa Dios kay sa atong boss, atong magtutudlo, atong silingan, o atong ka date?

Imahe

Ancient Examples/Modern Promises

Ang Ginoo miingon, “Ang mahigugma sa iyang amahan o inahan labaw pa kanako, dili takus kanako: ug ang mahigugma sa iyang anak nga lalaki o anak nga babaye labaw pa kanako, dili takus kanako” (Mateo 10:37). Usa sa labing malisud sa tanang mga pagsulay mao nga kon kamo kinahanglan nga mopili tali sa pagpahimuot sa Dios o sa pagpahimuot sa usa ka tawo nga inyong gihigugma o gitahud—ilabi na kon sakop sa pamilya.

Giatubang ni Nephi kana nga pagsulay ug maayo kini nga pagkadala sa dihang ang iyang buotang amahan mibagulbol og kadiyut batok sa Ginoo (tan-awa sa 1 Nephi 16:18–25). Gipabilin ni Job ang iyang integridad ngadto sa Ginoo bisan tuod og ang iyang asawa misugo kaniya sa pagtunglo sa Dios ug magpakamatay (tan-awa sa Job 2:9–10).

Ang mga kasulatan nag-ingon, “Tahuron mo ang imong amahan ug ang imong inahan” (Exodo 20:12; tan-awa usab sa Mosiah 13:20). Usahay ang tawo kinahanglan gayud nga mopili sa pagtahud sa Langitnong Amahan labaw sa mortal nga amahan.

Kinahanglan hatagan nato ang Dios, ang Amahan sa atong mga espiritu, og bugtong nga paghari sa atong mga kinabuhi. Siya adunay nag-unang pagkaginikanan nga pag-angkon sa atong mahangturong kaayohan, nag-una sa tanan nga mga relasyon nga mahimong mobugkos kanato dinhi o human dinhi.

Ang Dios, ang atong Amahan; si Jesus, ang atong Magulang nga Igsoong Lalaki ug atong Manunubos; ug ang Espiritu Santo, ang Tigpamatuod, hingpit. Nakaila sila kanato pag-ayo ug nahigugma kanato labaw sa tanan ug dili mobiya og usa ka butang nga dili mabuhat alang sa atong mahangturon nga kaayohan. Dili ba sila kinahanglan natong higugmaon tungod niini ug unahon sila sa pagpasidungog?

Adunay matinud-anong mga miyembro kinsa mipasakop sa Simbahan bisan pa sa mga pagsupak sa ilang mga paryente niini nga kinabuhi. Pinaagi nga unahon ang Dios, sa kadugayan daghan ang mahimong mga instrumento sa paggiya niadtong mga hinigugma ngadto sa gingharian sa Dios.

Miingon si Jesus, “Sa kanunay ginabuhat ko man ang makapahimuot sa [Dios]” (Juan 8:29).

Unsa ang kahimtang sa atong mga panimalay? Naningkamot ba kita nga unahon ang Ginoo ug sa pagpahimuot Kaniya?

Mga amahan, makapahimuot ba sa Ginoo kon adunay inadlaw nga pag-ampo sa pamilya ug pagbasa sa kasulatan diha sa inyong panimalay? Ug ang mahitungod diay sa paghimo og sinemana nga mga family home evening ug sa matag karon ug unya nga paggahin og kaugalingong panahon sa inyong asawa ug matag anak? Ug kon ang inyong anak mahisalaag sa makadiyot, sa inyong hunahuna makapahimuot ba kini sa Ginoo ug mopasidungog ba Siya sa inyong mga paningkamot kon kamo mopadayon sa pagpuyo og maayong kinabuhi, kanunay nga mag-ampo ug magpuasa alang niana nga anak, ug mosulat sa pangalan nianang anak nga lalaki o babaye diha sa prayer roll sa templo?

Kamong mga inahan, kinsa mao gayud ang gihatagan og talagsaong katungdanan sa matarung nga pagmatuto sa kabatan-onan sa Zion, wala ba ninyo unaha ang Dios kon inyong gipasidunggan ang inyong balaan nga calling? … Giuna sa atong mga inahan ang Dios kon ilang gibuhat ang ilang pinakataas nga misyon sulod sa mga bongbong sa ilang kaugalingong mga panimalay.

Mga anak, nag-ampo ba kamo alang sa inyong mga ginikanan? Naninguha ba kamo sa pagsuporta sa ilang halangdon nga mga paningkamot? Makahimo sila og mga sayop, sama kaninyo, apan sila adunay usa ka balaang misyon nga tumanon sa inyong kinabuhi. Motabang ba kamo kanila sa pagbuhat niini? Modugang ba kamo og pasidungog sa ilang pangalan ug modala og kahupayan ug suporta ngadto kanila sa ilang katigulangon?

Kon may usa ka tawo nga gustong makigminyo kaninyo nga dili sa templo, kinsa ang inyong paningkamutan sa pagpahimuot—ang Dios o ang tawo? Kon kamo moinsister og kaminyoon diha sa templo, nagpahimuot kamo sa Ginoo ug nagpanalangin sa lain nga tawo. Ngano? Tungod kay kana nga tawo mahimong takus sa pagsulod sa templo—nga usa ka panalangin—o mobiya—nga mahimo usab nga panalangin tungod kay ni usa kaninyo ang gusto nga magpas-an sa mao rang usa ka yugo (tan-awa sa 2 Mga Taga-Corinto 6:14).

Kinahanglan kamong mahimong takus nga makasulod sa templo. Niana mahibalo kamo nga walay usa nga igo ka maayo alang kaninyo nga makigminyo nga dili sa templo. Kon ang mao nga mga indibidwal ingon niana ka maayo, mabutang nila ang ilang mga kaugalingon sa usa ka kahimtang nga sila usab mahimong maminyo diha sa templo.⁸

Ang mga kalalakin-an ug mga kababayen-an kinsa mosalig sa ilang mga kinabuhi ngadto sa Dios makadiskobre nga Siya makahimo og daghan pa sa ilang mga kinabuhi kay sa ilang mahimo. Siya makapadaghan sa ilang mga kalipay, mas makapalambo sa ilang panglantaw, makapaabtik sa ilang mga hunahuna, makapalig-on sa ilang mga unod, makapabayaw sa ilang mga espiritu, makapadugang sa ilang mga panalangin, makapadaghan sa ilang mga oportunidad, makahupay sa ilang mga kalag, makahatag og daghang mga higala, ug makabu-bu og kalinaw. Bisan kinsa ang mawagtangan sa iyang kinabuhi diha sa pagserbisyo sa Dios magapatunhay og kinabuhing dayon.⁹

Gisugo sa Dios si Abraham sa pagsakripisyo sa iyang anak nga si Isaac. Kon gihigugma pa ni Abraham si Isaac labaw kay sa Dios, mosugot kaha siya? Ingon nga gipakita sa Ginoo diha sa Doktrina ug mga Pakigsaad, si Abraham ug si Isaac sa karon naglingkod isip mga dios (tan-awa sa D&P 132:37). Andam sila nga mosakripisyo o isakripisyo sumala sa gikinahanglan sa Dios. Sila adunay mas lawom nga paghigugma ug pagtahud alang sa usag usa tungod kay silang duha andam nga unahon ang Dios.

Ang Basahon ni Mormon nagtudlo nga “kini gikinahanglan gayud, nga adunay katugbang sa tanan nga mga butang” (2 Nephi 2:11)—ug busa kini aduna. Ang katugbang naghatag og mga kapilian, ug ang mga kapilian nagdala og mga sangputanan —maayo o dautan.

Ang Basahon ni Mormon nagpasabut nga ang mga tawo “gawasnon sa pagpili sa kalingkawasan ug sa kinabuhi nga dayon, pinaagi sa halangdon nga Tigpataliwala sa tanan nga mga tawo, o pagpili sa pagkabihag ug sa kamatayon, sumala sa pagkabihag ug sa gahum sa yawa” (2 Nephi 2:27).

Ang Dios nahigugma kanato; ang yawa nasilag kanato. Gusto sa Dios nga kita makabaton og hingpit nga kalipay ingon nga Siya aduna. Ang yawa gusto nga kita mahimong maalaot sama kaniya. Naghatag ang Dios kanato og mga sugo aron sa pagpanalangin kanato. Gusto sa yawa nga mosupak kita niini nga mga sugo aron sa pagtunglo kanato.

Kada adlaw, sa kanunay, nagpili kita pinaagi sa atong mga tinguha, sa atong mga hunahuna, ug sa atong mga lihok kon kita gusto ba nga mapanalanginan o matunglo, malipay o maalaot. Usa sa mga pagsulay sa kinabuhi mao nga sa kasagaran dili dayon nato madawat ang hingpit nga panalangin alang sa pagkamatarung o ang hingpit nga tunglo alang sa pagkadautan. Nga kana moabut may kasigurohan, apan usahay adunay panahon sa paghulat nga mahitabo, ingon sa sitwasyon ni Job ug ni Jose.

Sa pagkakaron ang dautan naghunahuna nga sila nakahimo og sala nga walay sangputanan. Ang Basahon ni Mormon nagtudlo nga ang dautan “makabaton sa kalipay sa ilang mga buhat sa mubo nga higayon, [apan] sa hinay-hinay ang katapusan moabut, ug sila isalikway ug ilabay sa kalayo, diin walay pagbalik” (3 Nephi 27:11).

Sulod niining panahon sa pagsulay ang matarung kinahanglan gayud nga magpadayon sa paghigugma sa Dios, pagsalig sa Iyang mga saad, magmapainubsanon, ug mahupay, sumala sa gisulti sa usa ka magbabalak, nga “kinsa ang nagbuhat sa trabaho sa Dios makadawat sa bayad sa Dios.” …

Mopamatuod ako kaninyo nga ang bayad sa Dios mao ang labing maayo nga bayad nga nahibaloan niini nga kalibutan o bisan hain nga kalibutan. Ug kini moabut sa hilabihan gayud ka daghan ngadto lamang niadtong kinsa nahigugma sa Ginoo ug giuna Siya.

Ang dakong pagsulay sa kinabuhi mao ang pagkamasulundon sa Dios.

Ang dakong buluhaton sa kinabuhi mao ang pagkat-on sa kabubut-on sa Ginoo ug dayon ang pagbuhat niini.

Ang dakong sugo sa kinabuhi mao ang, “Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan ug sa tibuok mong kusog” (Marcos 12:30).

Hinaut nga ang Dios magapanalangin kanato nga unahon ang unang sugo ug, agi og resulta, moani og kalinaw niini nga kinabuhi ug sa kinabuhing dayon nga may hingpit nga kalipay sa kinabuhi nga umaabut.¹⁰

• Diha sa seksyon 1, si Presidente Benson nagtudlo mahitungod sa “ang una ug dakong sugo” (Mateo 22:38). Ngano sa inyong hunahuna kini nga sugo kinahanglan nga unahon alang kanato? Unsa nga mga panghunahuna ang inyong naangkon gikan sa paagi nga gipakiglabut ni Presidente Benson ang gugma nga putli ngadto niini nga sugo?

• Unsa ang kahulugan sa “unahon ang Dios” alang kaninyo? (Alang sa pipila ka mga ehemplo, tan-awa sa seksyon 2.) Kanus-a kamo nakakita nga “ang tanan nga mga butang mapahimutang sa tukma nilang dapit o mawala kini sa atong kinabuhi” kon unahon nato ang Dios?

• Pamalandunga ang mga saad ni Presidente Benson ngadto niadtong kinsa “mosalig sa ilang mga kinabuhi ngadto sa Dios” (seksyon 3). Unsa nga mga ehemplo ang inyong nakita sa mga tawo nga naghatag sa ilang mga kinabuhi ngadto sa Dios? Sa unsa nga mga paagi ang Dios naghimo niadto nga mga tawo nga mas maayo kay sa kon sila ra ang pasagdan sa ilang kaugalingon?

Josue 24:14–15; Mateo 6:33; 7:21; Juan 14:15, 21–24; 17:3; 1 Mga Taga-Corinto 2:9; 1 Nephi 3:7; Moroni 10:32

“Siguroha nga dili kamo magtuo nga kamo ang ‘tinuod nga magtutudlo.’ Kana seryoso nga sayop. … Pagbantay nga dili kamo mosapaw. Ang importante nga tahas sa usa ka magtutudlo mao ang pag-andam sa pamaagi aron nga ang mga tawo makabaton og espirituhanong kasinatian uban sa Ginoo” (Gene R. Cook, gikutlo sa Pagtudlo, Walay Labaw Ka Mahinungdanon Nga Tawag [1999], 41).