Kapitulo 4

Nagpuyo sa Hingpit nga Kalipay sa mga Panahon sa Kasamok

“Ang kalipay dinhi ug karon naglangkob sa gawasnon, mahigugmaon, ug hingpit nga malipayong pag-ila sa kabubut-on sa Dios alang kanato—ug sa pagbuhat niini sa tanang mga paagi ug sa tanang mga kalihokan madako o magamay.”

Gikan sa Kinabuhi ni Ezra Taft Benson

Usa sa unang mga buluhaton ni Presidente Ezra Taft Benson isip Apostol mao ang pagtabang sa pagdala og kahupayan ngadto sa mga Santos sa Europe human sa Ikaduhang Gubat sa Kalibutan . Samtang nagbiyahe sa Germany, nahimamat niya ang matinud-anong mga tawo kinsa nakahimo sa pagbarug bisan sa pagkalumpag sa tanan nga naglibut kanila. Girekord niya sa iyang journal:

“Ang pinakagrabing pagkaguba nga akong nasaksihan nakita karon. … Samtang nagsakay ako agi sa mga dalan [sa Berlin] ug naglakaw sa dili maagian og awto, akong … nakita ang gutom nga mga babaye nga matinguhaong nagbayad og sobra ka mahal nga presyo alang sa mga panit sa patatas. … Nakita nako ang tigulang nga mga lalaki ug mga babaye nga may gamay nga mga wasay nga naghinamhinam sa pagkalot sa tuod sa kahoy ug mga gamut sa paninguha nga makakuha og mga piraso nga igsusugnod ug dayon guruyon kini ngadto sa panimalay nga minilya ang gilay-on gamit ang bisan unsa nga moligid—gikan sa duha ka gagmay nga ligid nga sa kaniadto sakyanan sa gamay nga bata ngadto sa gamay nga karomata —isip hayop nga tigdala og bug-at nga karga.

“Sa wala madugay akong gikaatubang diha sa ikatulong andana sa bugnaw nga awditoryum nga hapit mahurot kaguba dili layo sa gibombahan nga dalan ang 480 nga gitugnaw ug gigutom apan matinud-anong mga Santos sa Ulahing mga Adlaw diha sa miting sa komperensya. Usa kini ka inspirasyon nga makakita sa kahayag sa hugot nga pagtuo. … Walay kayugot o kasuko apan usa ka tam-is nga pagbinayloay sa maayong pagbati ug pahayag sa hugot nga pagtuo sa ebanghelyo.”¹

“Walay usa ka miyembro nga mipakita og bisan unsa nga pagmulo mahitungod sa ilang mga kahimtang bisan pa sa kamatuoran nga ang pipila anaa sa katapusang ang-ang sa kagutom diha atubangan gyud sa among mga mata.

“… Ang atong mga Santos … puno sa paglaum, kaisug, ug hugot nga pagtuo, ug bisan asa pa sila malipayon silang naglantaw sa unahan uban sa mga pahayag sa pinakalawom nga hugot nga pagtuo alang sa ebanghelyo ug alang sa ilang pagkamiyembro sa Simbahan. Kini usa sa pinakadakong pagpakita sukad nga atong nakita sa tinuod nga mga bunga sa ebanghelyo diha sa mga kinabuhi sa mga kalalakin-an ug mga kababayen-an.”²

Nakakita usab si Presidente Benson og mga ehemplo sa paglaum ug pagkapositibo nga susama sa ilang lugar, diin daghan sa iyang kaubang mga mag-uuma nagpabiling malipayon bisan sila nag-atubang og grabing kalisud. Siya miingon:

“Nakahinumdom ako nga nagtambong og miting duol sa Bancroft, Idaho. … Nindot kaayo ang among miting, ug sa nahuman kini, nakighimamat ako sa pipila ka maayong mga mag-uuma kinsa mitambong, ug usa kanila mao ang usa ka tawo nga ginganlan og Brother Yost, ug miingon ako, ‘Brother Yost, kumusta didto sa uma?’ Miingon si Brother Yost, ‘Aw, maayo, Brother Benson, apan 20 ka libo ka dolyares ang nawala nako tulo ka adlaw ang milabay.’ Miingon ako, ‘Unsa ang nahitabo—lain nga bagtik nga yamog?’ Miingon siya, ‘Oo, miigo kini sa trigo nga hapit na mahinog, ug nahibalo ka unsay gipasabut niana.’ Miingon siya, ‘Among paandaron sa buntag ang mga makinang tigharbas, apan ang tanan maayo ra. Kami aduna pay gamay nga trigo sa kamalig, ug kami hinoon may bahin na sa among panginahanglan sa tuig nga natipigan. Dili kami magutman, ug aduna pay laing abut.’ Sa among pagbiya kaniya, miingon ako ngadto sa akong asawa, ‘Unsa ka nindot nga espiritu.’

“Mipadayon kami og biyahe ngadto sa Logan [usa ka siyudad sa Utah, mga 80 ka milya, o 130 ka kilometro, gikan sa Bancroft]. Kuyog namo ang among mga anak, ug mihunong kami sa Main Street sa pag-adto sa grocery aron mopalit og mga biskwit alang sa mga bata. Ug kinsa ang akong gikakita diha sa daplin sa dalan kondili si Brother Yost. Miingon ako, ‘Uy, unsay imong gibuhat dinhi?’ Miingon siya, Brother Benson, kini among adlaw sa pag-adto sa templo.’ Ug ako miingon, ‘Hinoon, ang mga bati nga mga panghitabo dili makapaluya sa inyong mga espiritu bisan unsaon, dili ba?’ Niana mitudlo siya kanako og leksyon. Miingon siya, ‘Brother Benson, kon ang bati nga mga panghitabo moabut labaw pa natong gikinahanglan ang templo.’”³

Ang kaugalingong mga tubag ni Presidente Benson sa kalisdanan midasig niadtong kinsa nakaila kaniya, sama lamang nga ang mga ehemplo sa ubang mga Santos milig-on kaniya. Si Elder Neal A. Maxwell sa Korum sa Napulog Duha ka mga Apostoles mihulagway ni Presidente Benson isip usa ka “mabinantayong tigbantay sa mga panghitabo, [kinsa] nagpalambo og pagkapositibo ug pagkamaya nga kita gustong motan-aw. Ang mao nga pagkapositibo,” miingon si Elder Maxwell, “wala moabut gikan sa pagpakabaliwala sa mga nagpanghitabo, apan sa pagmatikod niini ug gani sa pagtan-aw niini lapas ngadto sa mga saad nga may kalabutan kon unsaon nga ang gingharian sa katapusan modaog.”⁴

Si Presidente Ezra Taft Benson nagpakita og ehemplo sa hingpit nga kalipay nga pagpuyo.

Mga Pagtulun-an ni Ezra Taft Benson

Kon kita adunay hugot nga pagtuo diha sa atong Langitnong Amahan, makabaton kita og paglaum alang sa umaabut, pagkapositibo sa atong mga buluhaton karon, ug malinawong pagbati.

Tanan kita adunay mga kahigawad ug kawad-an og kadasig—kana kabahin sa kinabuhi. Apan kon kita adunay hugot nga pagtuo, ang atong mga kapakyasan kadiyot ra ug ang kalampusan moabut gikan sa atong gipakaingon og mga kapakyasan. Ang atong Langitnong Amahan makahimo og mga milagro pinaagi sa kada usa kanato kon kita lamang mobutang sa atong kompyansa ug pagsalig diha Kaniya. ⁵

Kini dakong panalangin nga makabaton og malinawong pagbati, makabaton og kasigurohan, makabaton og diwa sa kahilom ug ka kalma sa panahon sa mga panagbangi ug pakigbisog, sa panahon sa kaguol ug mga kapakyasan. Kini makatagbaw sa kalag nga mahibalo nga ang Dios anaa sa timon, nga Siya mahunahunaon sa Iyang mga anak, ug nga kita uban sa hingpit nga kompyansa makabutang sa atong pagsalig diha Kaniya.⁶

Ang pag-ampo—makanunayong pag-ampo—makahimo kanato nga kanunayng makatawag sa Dios, ang atong pinakadakong tinubdan sa kahupayan ug tambag. “Pag-ampo kanunay, aron ikaw mahimo nga magmadaugon.” (D&P 10:5.) “Nanlimbasug sa akong tibuok nga mga gahum sa pagtawag sa Dios aron pagluwas kanako” mao ang paghulagway sa batan-ong Joseph Smith sa paagi nga iyang gigamit diha sa Sagradong Kakahoyan sa pagpugong sa kaaway gikan sa pagpukan kaniya. (JS—K 1:16.)⁷

Kon walay hugot nga pagtuo diha sa atong Langitnong Amahan, dili kita magmalampuson. Ang hugot nga pagtuo naghatag kanato og panan-awon sa unsay mahimong mahitabo, paglaum alang sa umaabut, ug pagkapositibo sa atong mga buluhaton karon. Kon adunay hugot nga pagtuo, dili kita magduha-duha sa labing importanting kalampusan sa trabaho.⁸

Kon itandi sa ubang mga tawo, kita isip mga Santos sa Ulahing mga Adlaw kinahanglan nga maoy labing positibo ug labing minos pagka-negatibo. Kay samtang kita nahibalo nga ang “kalinaw pagakuhaon gikan sa yuta, ug ang yawa makabaton og gahum ibabaw sa iyang kaugalingon nga gingsakupan,” kita gihatagan usab og kasigurohan nga “ang Ginoo makabaton og gahum ibabaw sa iyang mga santos, ug maghari diha sa ilang taliwala.” (D&P 1:35–36.)

Uban sa kasigurohan nga ang Simbahan magpabilin nga dili mabungkag kay ang Dios ang maggiya niini sa umaabut nga panahon sa kasamok, busa kini nahimo natong indibidwal nga responsibilidad sa pagtan-aw nga ang matag usa kanato magpabiling matinud-anon ngadto sa Simbahan ug sa mga pagtulun-an niini. “Siya nga magpabilin nga malig-on ug dili mabuntog, ang mao pagaluwason.” (JS—M 1:11.)⁹

Ang kalipay kinahanglan gayud nga pangitaon matag adlaw, apan kini takus sa pagpaningkamot.

Kita wala gyuy hinungdan nga maguol. Sunda ang ebanghelyo, sunda ang mga sugo. Himoa ang inyong mga pag-ampo sa gabii ug sa buntag diha sa inyong panimalay. Hupti ang mga sumbanan sa Simbahan. Paningkamot ug pagpuyo nga malinawon ug malipayon. … Ang kalipay kinahanglan gayud nga pangitaon matag adlaw. Apan kini angay lamang nga paningkamutan.¹⁰

Sa diha nga si George A. Smith masakiton kaayo, gibisitahan siya sa iyang ig-agaw, si Propeta Joseph Smith. Ang masakiton nga tawo mireport: “Siya [ang Propeta] misulti kanako nga ako kinahanglan dili gayud mawad-an og kadasig, bisan unsang mga kalisud ang molibut kanako. Kon ako iunlod ngadto sa kinailadman nga gahong sa Nova Scotia ug ang tibuok Rocky Mountain motabon kanako, dili ako kinahanglan nga mawad-an og kadasig, apan makigbisog, mogamit sa hugot nga pagtuo, ug magbaton og husto nga kaisug, ug ako kinahanglan nga makagawas sa tipun-og.” …

Adunay mga panahon nga kamo kinahanglan lamang sa matarung nga paagi makigbisog ug buntugon ang yawa hangtud nga ang iyang makapaunlod nga espiritu mobiya kanimo. Ingon nga ang Ginoo misulti ni Propeta Joseph Smith: “Ang imong kalisdanan ug ang imong mga kasakitan sulod lamang sa mubo nga higayon;

“Ug unya, kon ikaw molahutay pag-ayo, ang Dios mobayaw kanimo sa kahitas-an.” (D&P 121:7–8.)

Ang pagpadayon sa halangdong mga paningkamot, bisan kon giliyokan sa panganod sa kaguol, sa kadugayan modala kaninyo sa ibabaw ngadto sa kahayag. Bisan ang atong agalon nga si Jesukristo, samtang nag-atubang nianang kinalisdang pagsulay nga gibiyaan sa makadiyot sa atong Amahan sa panahon sa paglansang diha sa krus, mipadayon sa pagbuhat sa iyang mga buluhaton alang sa katawhan, ug sa wala madugay human niana siya nahimaya ug nadawat ang kahingpitan sa kalipay. Samtang kamo nagsagubang sa inyong pagsulay, makahinumdom kamo sa nanglabay ninyong mga kadaugan ug ipha ang mga panalangin nga anaa kaninyo uban sa tinuod nga paglaum nga mas dako ang mosunod kon kamo magmatinud-anon. Ug kamo makabaton niana nga kahibalo nga sa dili madugay ang Dios mopahid sa tanang mga luha ug nga ang “wala makita sa mata, ni madungog sa dalunggan, ni mosantop sa kasingkasing sa tawo, ang gikatagana sa Dios alang kanila nga nahigugma kaniya.” (1 Cor. 2:9.)¹¹

Pagmaya sa tanan ninyong buhaton. Pagpuyo sa hingpit nga kalipay. Pagpuyo nga malipayon. Pagpuyo nga madasigon, nasayud nga ang Dios dili mopuyo sa kangitngit ug kaguol, apan sa kahayag ug gugma.¹²

“Ang pagpuyo nga malipayon mao ang pagtubo sa espirituhanong kalig-on ngadto sa pagkahingpit.”

Ang Langitnong Amahan gusto kanato nga magmalipayon, ug Siya mopanalangin kanato samtang kita nagsunod sa Iyang kabubut-on alang kanato.

“Ang mga tawo naingon nga unta sila makabaton og hingpit nga kalipay” (2 Nephi 2:25). Ang atong Langitnong Amahan buot kanato nga magmalipayon. Nagpaabut siya kanato nga malipay. Apan walay kalipay sa pagpaubos sa mga sumbanan. Walay kalipay kon kamo mapakyas sa pagpuyo sumala sa inyong konbiksyon, sumala niana nga inyong nahibaloan nga husto. Kini sayon kaayo nga maanad sa pagpaubos sa sumbanan sa pipila ka mga butang. Kini sayon kaayo nga maanad sa pagpangita og sayop, o pagpanaway, sa pagdala diha sa atong mga kasingkasing og mga pagpanagana kalabut sa pipila ka mga butang sa Simbahan. Kini sayon kaayo alang kanato nga masuko og gamay, ug dayon padak-on kana, nga mahimong maguol ug magpakita nga naguol. Ang magul-anong nawong dili gayud modaug sa gubat o sa gugma.¹³

Kita ba nakaamgo nga ang kalipay dinhi ug karon naglangkob sa gawasnon, mahigugmaon, ug hingpit nga malipayong pag-ila sa kabubut-on sa Dios alang kanato—ug sa pagbuhat niini sa tanang mga paagi ug sa tanang mga kalihokan madako o magamay? Ang pagpuyo nga hingpit mao ang pagpuyo nga malipayon. Ang pagpuyo nga malipayon mao ang pagtubo sa espirituhanong kalig-on ngadto sa pagkahingpit. Ang matag lihok nga gihimo subay sa kabubut-on sa Dios kabahin niana nga pagtubo. Dili nato buwagon ang atong mga kinabuhi. Atong hiusahon ang atong mga kinabuhi, nga dili magtagad sa mga dili tinuod nga mga pasidungog ug mga pasibantog nga wala ihatag uban sa pagtugot sa Dios. Atong hinumduman nga ang tinuod nga tinubdan sa atong kalig-on ug kalipay dili makab-ot sa mga tawo ug sa mga sitwasyon.¹⁴

Kinahanglan gayud kita nga magkat-on ug magkat-on pag-usab nga pinaagi lamang sa pagdawat ug pagsunod sa ebanghelyo sa gugma ingon nga gitudlo sa Agalon ug pinaagi lamang sa pagbuhat sa Iyang kabubut-on nga kita makabugto sa mga higot sa pagka-ignorante ug sa pagduha-duha nga naghigot kanato. Kinahanglan gayud nga kita magkat-on niining yano, mahimayaong kamatuoran aron kita makasinati sa matam-is nga hingpit nga kalipay sa Espiritu karon ug sa kahangturan. Kinahanglan gayud nga kalimtan nato ang atong mga kaugalingon sa pagbuhat sa Iyang kabubut-on. Kinahanglan gayud nga unahon nato Siya sa atong mga kinabuhi. Oo, ang atong mga panalangin mapilo-pilo samtang kita nakigbahin sa Iyang gugma ngadto sa atong silingan.¹⁵

“Mga kaigsoonan,” miingon si Pablo, “apan kining usa ka butang nga ginabuhat mao kini, sa ginakalimtan ko ang nanagpangagi na, ug sa nagadasdas ako paingon sa anaa sa unahan,

“Ako nagapadayon paingon sa dauganan, ngadto sa ganti nga mao ang langitnong pagtawag kanato sa Dios diha kang Kristo Jesus.” (Filipos. 3:13–14.)

Pun-a ang inyong mga hunahuna sa tumong nga mahisama sa Ginoo, ug walay luna diha kaninyo ang makaguol nga mga hunahuna samtang kamo matinguhaong maningkamot nga makaila kaniya ug mobuhat sa iyang kabubut-on. “Batoni diha kaninyo kining hunahunaa,” miingon si Pablo. (Filipos. 2:5.) “Paghunahuna ngari kanako sa matag hunahuna,” miingon si Jesus. (D&P 6:36.) Ug unsa ang mosunod kon kita mohimo? “Pagabantayan mo siya diha sa pakigdait nga hingpit, kansang hunahuna sa kanunay anaa kanimo.” (Isa. 26:3.)¹⁶

Dili gayud kita mag-inusara kon kita magpuyo ingon nga kita gikinahanglan, tungod kay ang atong Amahan magauban kanato kanunay sa pagpanalangin kanato. Gusto niya nga magmalampuson kita. Gusto Niya nga magmalipayon kita. Gusto Niya nga matuman nato ang maayo nga mga tumong nga atong gihimo. Iyang buhaton ang Iyang bahin kon atong buhaton ang atong bahin.¹⁷

Mga Sugyot alang sa Pagtuon ug Pagtudlo

Mga Pangutana

Ngano sa inyong hunahuna nga ang hugot nga pagtuo diha sa Dios naghatag kanato og “paglaum alang sa umaabut, ug pagkapositibo sa atong mga buluhaton karon”? Hain nga mga pulong sa tambag gikan sa seksyon 1 mahimong inyo nga ipakigbahin sa usa ka tawo kinsa nangandoy alang sa malinawong pagbati? Ngano nga inyong pilion kadto nga mga pulong?
Samtang kamo magribyu sa seksyon 2, paghunahuna og panahon nga kamo nagkinahanglan nga “sa matarung nga paagi makigbisog” sa panahon sa kalisdanan. Hunahunaa unsa ang inyong naangkon gikan niana nga kasinatian. Sa unsa nga mga paagi ang Ginoo nagtabang kanato kon kita andam sa paglahutay og mga pagsulay sa matinud-anong paagi?
Unsa ang pipila ka mga kasinatian ang nagtabang kaninyo nga mahibalo nga ang Langitnong Amahan gusto kaninyo nga magmalipayon ug magmalampuson? Ngano sa inyong hunahuna ang “kalipay dinhi ug karon naglangkob sa … pag-ila sa kabubut-on sa Dios alang kanato”? (Tan-awa sa seksyon 3.)

May Kalabutan nga mga Kasulatan

Mateo 11:28–30; Juan 14:27; 16:33; Mga Taga-Galacia 5:22; Mosiah 2:41; Moroni 9:25–26; D&P 101:11–16

Tabang sa Pagtuon

“Kuhaa ang overview o kinatibuk-ang panabut pinaagi sa dinali-dali nga pagbasa sa basahon [book], kapitulo [chapter], o tudling [passage] o pinaagi sa pagribyu sa mga ulohan [headings]. Tinguhaa ang pagsabut sa kinatibuk-ang kahulugan o konteksto ug lintunganay o background” (Isangyaw ang Akong Ebanghelyo [2004], 27). Hunahunaa ang pagbasa og usa ka kapitulo o tudling sobra sa usa ka higayon aron mas masabtan ninyo kini. Samtang inyong buhaton ang mao, mahimong makakaplag kamo og lawom nga mga panabut.