Kapitulo 10

Pagpuno sa Yuta ug sa Atong mga Kinabuhi sa Basahon ni Mormon

“Adunay gahum sa [Basahon ni Mormon] nga mosugod sa pagdagayday diha sa inyong mga kinabuhi sa higayon nga sugdan ninyo ang tinuoray nga pagtuon sa basahon.”

Gikan sa Kinabuhi ni Ezra Taft Benson

Niadtong Abril 1989 nga kinatibuk-ang komperensya, si Presidente Thomas S. Monson mibasa og mensahe gikan ni Presidente Ezra Taft Benson ngadto sa mga kabataan sa Simbahan. Niini nga mensahe, si Presidente Benson miingon:

“Nasayud ako nga kamo nagbasa sa Basahon ni Mormon, kay nakadawat ako og gatusan ka personal nga mga sulat gikan kaninyo nga nagsulti kanako nga kamo nagbasa niining sagrado nga basahon. Nakapahilak kini kanako sa hingpit nga kalipay sa pagkadungog nako niini. …

“Unsa ang akong kahimuot sa pagkadungog nako sa inyong gugma alang sa Basahon ni Mormon. Ako usab nahigugma niini, ug ang Langitnong Amahan buot kaninyo nga mopadayon sa pagkat-on gikan sa Basahon ni Mormon matag adlaw. Kini espesyal nga gasa sa Langitnong Amahan nganha kaninyo. Pinaagi sa pagsunod sa mga pagtulun-an niini, makakat-on kamo sa paghimo sa kabubut-on sa atong Amahan sa Langit.”¹

Sa tibuok Simbahan, ang mga Santos sa Ulahing mga Adlaw mipatalinghug niini nga tambag gikan sa ilang propeta. Ang mosunod nga mga asoy naghatag og ehemplo sa mga panalangin nga miabut niadtong kinsa mitubag sa panawagan ni Presidente Benson sa “pagpuno sa yuta ug sa [ilang] mga kinabuhi sa Basahon ni Mormon.”²

“‘Wala siya magtiaw-tiaw!’ naghunahuna si Margo Merill … sa dihang una niyang nadungog ang hangyo ni Presidente Ezra Taft Benson nga ang mga ginikanan magbasa sa Basahon ni Mormon uban sa ilang mga bata. ‘Ang akong mga anak sayis, singko ug dos anyos ang mga panuigon. Mag-usik lang ko sa akong oras ug pailub.’

“Si Brother ug Sister Merill mihukom sa pagsulay og basa sa Basahon ni Mormon uban sa ilang mga anak bisan pa niana. Sa dihang miabut sila sa istorya ni Nephi ug sa iyang nabali nga gapasan, ang sayis anyos nga si Melissa nasakit og numonya.

“‘Mihangyo si Melissa kanako nga pabalikon siya og eskwela bisan tuod siya nagkasakit,’ [miingon] si Margo. ‘Miingon siya nga kon siya dili mobalik, ang iyang higala, si Pamela—kinsa usa ka miyembro og laing simbahan—dili mahibalo unsa ang nahitabo ni Nephi. Dayon si Melissa mibakho ug milup-og sa akong mga bukton. Gipahiran nako ang iyang mga luha ug misugyot nga iyang tawgon si Pamela sa telepono ug sultihan siya unsa ang nahitabo ni Nephi.

“‘Samtang nadunggan nako si Melissa nga detalyadong nag-asoy sa hitabo kabahin sa nabali nga gapasan ni Nephi, nahinumduman nako ang akong unang mga hunahuna mahitungod sa pag-usik sa akong panahon ug pailub sa pagbasa sa Basahon ni Mormon ngadto sa akong gagmay nga mga anak. O, giunsa nako pagpakaminos ang ilang abilidad sa pagkat-on sa mga leksyon sa Basahon ni Mormon!’”³

Si Howard J. McOmber II namalandong sa pag-awhag ni Presidente Benson sa pagpuno sa yuta sa Basahon ni Mormon. Siya naghunahuna, “Unsaon nako isip usa ka indibidwal nga mahimong importanting bahin sa ingon nga pagpuno?

“Dayon usa ka gabii,” miingon si Brother McOmber, “samtang ako namalandong niini nga problema akong naamguhan nga ako makahatag sa matag indibidwal diha sa akong dalan sa oportunidad sa pagdawat og kopya sa Basahon ni Mormon.

“Apan dihay problema—nakaila sila kanako. Nahibalo sila mahitungod sa akong iro nga mopaghut kanunay—ug usab sa sayo sa kabuntagon. Nahibalo sila nga ang akong natad dili ang labing nindot pagkaatiman nga tanaman sa kasilinganan. Nahibalo sila sa akong mga sayop isip usa ka silingan, tingali sila motalikod kanako.

“Mihukom akong magbaton og hugot nga pagtuo ug mopadayon bisan pa niana. Hatagan ko sila sa basahon—bisan kon ila kining ilabay, o paabugan sa ilang mga estante sulod sa mga katuigan. Apan nakita nako ang akong kaugalingon nga negatibo og hunahuna; hapit ko makombinser ang akong kaugalingon nga walay mahitabo sa akong mga paningkamot.

“Dayon akong nahinumduman nga ako nakaila sa akong mga silingan ingon man nga sila nakaila kanako. Pipila ang miistorya og dili maayo nga komedya diha sa katapusang miting sa pagpalambo sa komunidad, ug pipila ang nakainom og maayo sa katapusang barbecue sa kasilinganan. Ang uban ingon og adunay gamay nga katuyoan sa ilang mga kinabuhi. Ako naghunahuna sama sa unsa kaha kon ako dili pa miyembro sa Simbahan, o kon ako wala gayud makadungog kabahin sa Basahon ni Mormon. Sa klaro, kini nga basahon makatabang niadtong kinsa mohatag niini og higayon.

“Busa akong gikontak ang tanan nga diha sa akong dalan ug gihatagan sila og kopya sa Basahon ni Mormon—ug tanan sila mipasalamat kanako! Maayo kaayo ang dagan niini nga ako miadto sa sunod nga dalan, gihuman ang tanan sa akong subdivision, ug dayon miadto sa sunod nga subdivision. Sa dihang ako nahuman, akong nabisitahan ang 104 ka mga balay ug nakabutang og 40 ka mga basahon.

“Kini misugod nga nahimong mas sayon ang paghatag og mga kopya sa Basahon ni Mormon ngadto sa mga kaila.

“Wala madugay nahatagan nako ang setentay singko ka mga empleyado sa akong gitrabahoan og mga kopya sa Basahon ni Mormon. Baynte tres kanila midawat og mga panaghisgot sa misyonaryo. Ang pito sa wala madugay gibunyagan, ug upat ka mga anak sa akong mga katrabaho ang mipasakop usab sa Simbahan. Usa ka tawo midawat og duha ka mga panaghisgot apan nawad-an og interes sa pag-investigate sa Simbahan. Pito ka buwan sa wala madugay, human siya mibalhin og trabaho ngadto sa laing kompaniya, mitawag siya kanako sa pagsulti nga siya nagbasa sa Basahon ni Mormon ug nakaamgo nga iyang gibati ang makahupay, malinawong pagtandog sa Espiritu, sama sa akong paghulagway niini. Siya, usab, sa wala madugay natapos sa mga panaghisgot ug nabunyagan.

Nagustuhan ko ang Basahon ni Mormon. Ako naghunahuna niini isip usa ka tarheta [calling card] sa Ginoo, ug ako natingala sa unsa ka sayon kini sa pagsugod og usa ka espirituhanong pagpuno pinaagi niini sa personal nga kahimtang. Kon kita maghimo sa buhat sa Ginoo, kita adunay tabang gikan kaniya.”⁴

Lain nga miyembro ang misulti kabahin sa kausaban nga nahitabo diha sa iyang pagpamatuod samtang siya misunod sa tambag ni Presidente Benson nga magbasa sa Basahon ni Mormon: “Sa dihang si Presidente Benson mihagit kanato sa pagbasa sa Basahon ni Mormon, ako 15 anyos. Usa na ako ka matinud-anong tigbasa sa kasulatan, nag-focus sa kasagaran sa Bag-ong Tugon. Apan sa pag-awhag ni Presidente Benson, misugod ako sa pagtuon sa Basahon ni Mormon matag adlaw. Kadto usa ka kritikal kaayo nga kausaban alang kanako. Ang Bag-ong Tugon mitudlo kanako mahitungod sa yutan-ong pangalagad ni Jesukristo, ug ako kanunay nga mapasalamaton alang niana. Apan ako nagkinahanglan sa gahum nga miabut gikan sa pagtuon sa Basahon ni Mormon. Samtang ang Biblia mitabang kanako sa pagkahibalo unsay gihimo ni Jesus alang sa mga katawhan sa Balaang Yuta, ang Basahon ni Mormon mihatag kanako og mas lawom nga pagsabut unsay Iyang nabuhat alang kanako. Pinaagi sa pagtuon sa Basahon ni Mormon, nakaangkon ako og pagpamatuod sa mahangturong Pag-ula sa akong Manluluwas. Ug sa kadugayan, kon ako nag-atubang og kalisud nga misulay sa akong hugot nga pagtuo, midangop ako ngadto sa Basahon ni Mormon alang sa kahupayan ug sa kalig-on. Karon dili ako mopalabay og adlaw nga dili magbasa sa Basahon ni Mormon.”⁵

Minilyon ang miduol ngadto ni Kristo tungod sa mga kamatuoran diha sa basahon nga gihatag ni Moroni ngadto ni Joseph Smith.

Mga Pagtulun-an ni Ezra Taft Benson

Ang Basahon ni Mormon gisulat alang kanato.

Ang Basahon ni Mormon … gisulat alang sa atong panahon. Ang mga Nephite sukad wala makabaton sa basahon; ni ang mga Lamanite sa karaan nga mga panahon. Kini gigahin alang kanato. Si Mormon misulat sa hapit na matapos ang sibilisasyon sa Nephite.Ubos sa inspirasyon sa Dios, kinsa nakakita sa tanang mga butang gikan sa sinugdanan, iyang gipamubo ang mga rekord sa daghang mga siglo, nagpili sa mga istorya, mga pakigpulong, ug mga panghitabo nga labing makatabang kanato.

Ang pinakaimportanting mga tigsulat sa Basahon ni Mormon nagpamatuod nga siya misulat alang sa umaabut nga mga henerasyon. … Kon ilang nakita ang atong panahon ug mipili niadtong mga butang nga labing bililhon kaayo alang kanato, dili ba ingon niana unsaon nato ang atong pagtuon sa Basahon ni Mormon? Kinahanglan nga kanunay natong pangutan-on ang atong kaugalingon, “Ngano nga ang Ginoo nagdasig ni Mormon (o Moroni o Alma) sa paglakip niana sa iyang rekord? Unsa nga leksyon ang akong makat-unan gikan niana nga makatabang kanako sa pagpuyo niining panahona?

Ug adunay daghang mga ehemplo kon unsaon kana nga pangutana matubag. Pananglit, sa Basahon ni Mormon kita makakita og sumbanan sa pagpangandam alang sa Ikaduha nga Pag-anhi. Usa ka dakong bahin sa basahon nagtumong sa pipila ka mga dekada sa wala pa ang pagbisita ni Kristo sa Amerika. Pinaagi sa mabinantayon nga pagtuon niana nga panahon, kita makatino nganong ang uban gilaglag diha sa ngilngig nga mga paghukom sa wala pa ang Iyang pag-abut ug unsa ang nakapahimo sa uban nga mobarug sa templo didto sa yuta sa Bountiful ug mihikap sa mga samad sa Iyang mga kamot ug tiil.

Gikan sa Basahon ni Mormon kita nakakat-on giunsa sa pagpakabuhi sa mga disipulo ni Kristo sa mga panahon sa gubat. Gikan sa Basahon ni Mormon atong makita ang mga kadautan sa tinago nga mga kalihokan nga gihulagway nga tataw ug makahahadlok nga kamatuoran. Diha sa Basahon ni Mormon kita makakita og mga leksyon nga naghisgot kabahin sa pagpanggukod ug sa apostasiya. Kita makakat-on og daghan kon unsaon paghimo ang misyonaryo nga buhat. Ug labaw sa bisan asa, atong makita diha sa Basahon ni Mormon ang mga peligro sa pagkakalibutanon ug sa paghan-ay sa atong mga kasingkasing sa mga butang sa kalibutan. Aduna bay tawo nga magduha-duha nga kini nga basahon gitagana alang kanato ug nga diha niini kita makakaplag og dakong gahum, dakong kahupayan, ug dakong proteksyon?⁶

Samtang kita nagtuon sa Basahon ni Mormon matag adlaw, ang gahum sa basahon modagayday ngadto sa atong mga kinabuhi.

Ang Basahon ni Mormon wala lamang magtudlo kanato sa kamatuoran, bisan kon sa tinuod naghimo kini niana. Dili lamang nga ang Basahon ni Mormon nagpamatuod ni Kristo, bisan kon sa tinuod naghimo kini usab niana. Apan adunay butang nga mas labaw pa. Adunay gahum niana nga basahon nga mosugod sa pagdagayday diha sa inyong mga kinabuhi sa higayon nga sugdan ninyo ang tinuoray nga pagtuon sa basahon. Makaplagan ninyo ang mas dakong gahum sa pagsagubang sa tintasyon. Makaplagan ninyo ang gahum sa paglikay sa panglingla. Makaplagan ninyo ang gahum nga magpabilin sa higpit ug pig-ot nga dalan. Ang mga kasulatan mao ang gitawag og “mga pulong sa kinabuhi” (D&P 84:85), ug walay dapit nga mas tinuod kana kay sa diha sa Basahon ni Mormon. Kon kamo magsugod sa pagkagutom ug pagkauhaw niadto nga mga pulong, kamo makakaplag sa kinabuhi nga mas buhong.⁷

Ang mga tawo mahimong molingla sa usag usa, apan ang Dios dili molingla og mga tawo. Busa, ang Basahon ni Mormon naghan-ay sa labing maayo nga pagsulay alang sa pagtino sa kamatuoran niini—nga mao ang, basaha kini ug dayon pangutana sa Dios kon kini tinuod ba [tan-awa sa Moroni 10:4]. …

Busa, kini, mao ang labing gamhanang kasigurohan alang sa matinuoron nga kasingkasing—nga mahibalo pinaagi sa personal nga pagpadayag gikan sa Dios nga ang Basahon ni Mormon tinuod. Minilyon ang misulay niini ug nahibalo, ug nagtubo nga minilyon ang mahibalo pa.

Karon ang espiritu, ingon man ang lawas, nanginahanglan sa kanunay nga pag-amuma. Ang kagahapong pagkaon dili igo sa pagsustento sa mga panginahanglan karon. Busa mao usab ang dili kanunay nga pagbasa sa “labing tukma sa bisan hain nga basahon dinhi sa yuta” ingon nga gitawag kini ni Joseph Smith, dili igo. (History of the Church, 4:461.)

Dili ang tanang mga kamatuoran managsama og importansya, ni ang tanang mga kasulatan managsama og bili. Unsay mas maayo pang paagi sa pag-amuma sa espiritu kay sa kanunay nga pagbusog gikan sa basahon nga giingon ni Propeta Joseph Smith nga modala sa tawo nga “mas maduol sa Dios, pinaagi sa pagsunod sa iyang mga lagda, kay sa bisan hain nga basahon”? (History of the Church, 4:461.)⁸

“Ang mahangturon ba nga mga sangputanan nag-agad sa atong pagsanong niini nga basahon? Oo, sa atong panalangin o sa atong kaalautan.

Ang matag Santos sa Ulahing mga Adlaw kinahanglang himoon ang pagtuon niini nga basahon nga usa ka buluhaton sa tibuok kinabuhi. Kay kondili, nagbutang siya sa iyang kalag sa kakuyaw ug nagpasagad nianang makahatag og espiritwal ug intelektwal nga panaghiusa sa iyang tibuok kinabuhi. Adunay kalainan tali sa usa ka kinabig kinsa natukod sa bato ni Kristo pinaagi sa Basahon ni Mormon ug nanggunit pag-ayo sa gunitanan nga puthaw, ug sa tawo kinsa [nga] wala.⁹

Kita adunay nagtubo nga gidaghanon kinsa nakombinser, pinaagi sa Basahon ni Mormon, nga si Jesus mao ang Kristo. Karon kita nagkinahanglan og nagtubo nga gidaghanon kinsa mogamit sa Basahon ni Mormon aron mahimong may pasalig ngadto ni Kristo. Kita kinahanglang makombinser ug mapasaligon.

… Akong minahal nga mga kaigsoonan, basahon nato ang Basahon ni Mormon ug magpakombinser nga si Jesus mao ang Kristo. Magpadayon kita sa pagbalik og basa sa Basahon ni Mormon aron kita mahimo unta nga mas hingpit nga moduol ngadto ni Kristo, mopasalig Kaniya, mopunting Kaniya, ug mahingpit diha Kaniya.

Kita nagbangga sa kaaway matag adlaw. Ang mga hagit niini nga panahon moparang sa bisan hain nga milabay, ug kini nga mga hagit modaghan sa espiritwal ug temporal nga paagi. Kinahanglan gayud nga kita mopaduol ni Kristo, kita kinahanglan nga inadlaw nga modala sa Iyang pangalan diha kanato, kanunay nga mohinumdom Kaniya ug mohupot sa Iyang mga sugo.¹⁰

Kinahanglan gayud nga atong pun-on ang kalibutan ug ang atong mga kinabuhi sa Basahon ni Mormon.

Kitang tanan nagkinahanglan nga mokuha sa atong kaugalingong pagpamatuod sa Basahon ni Mormon pinaagi sa Espiritu Santo. Niana ang atong pagpamatuod, inubanan sa Basahon ni Mormon, kinahanglan nga ipakigbahin ngadto sa uban aron sila, usab, makahibalo pinaagi sa Espiritu Santo sa kamatuoran niini.¹¹

Makahunahuna ba kamo unsa ang mahitabo uban sa nagtubong gidaghanon sa mga kopya sa Basahon ni Mormon diha sa mga kamot sa nagtubong gidaghanon sa mga misyonaryo kinsa nakahibalo unsaon sa paggamit niini ug kinsa natawo sa Dios? Kon kini mahitabo, atong makuha ang daghang ani sa mga kalag nga gisaad sa Ginoo.¹²

“Ako adunay panan-awon sa pagpuno sa yuta sa Basahon ni Mormon.”

Ako may konbiksyon: Kon mas motudlo kita ug mosangyaw gikan sa Basahon ni Mormon, mas mapahimuot nato ang Ginoo ug mas dakong mahimo ang atong gahum sa pagsulti. Sa pagbuhat sa ingon, atong mapadaghan og maayo ang atong mga makabig, sa sulod sa Simbahan ug taliwala niadtong atong gisangyawan. … Busa ang atong sugo mao ang pagtudlo sa mga baruganan sa ebanghelyo nga anaa sa Biblia ug sa Basahon ni Mormon. “Kini mao ang ilang mga pagtudlo, ingon nga sila gimandoan pinaagi sa Espiritu” (D&P 42:13).¹³

Ang Basahon ni Mormon mao ang instrumento nga gidisenyo sa Dios nga “mosilhig sa yuta ingon sa usa ka lunop, aron pagpundok sa [Iyang] pinili.” (Moises 7:62.) Kining sagrado nga basahon sa kasulatan kinahanglan nga mahimong mas sentro sa atong pagsangyaw, sa atong pagtudlo, ug sa atong misyonaryo nga buhat.

… Niini nga panahon sa electronic media ug sa dinaghang pag-apud-apod sa giimprinta nga pulong, ang Dios mohimo kanato nga may tulubagon kon kita karon dili mopalihok sa Basahon ni Mormon sa hilabihan kakusog nga paagi.

Ania kanato ang Basahon ni Mormon, kita adunay mga miyembro, kita adunay mga misyonaryo, kita adunay mga kapanguhaan, ug ang kalibutan adunay panginahanglan. Ang panahon mao karon!

Akong hinigugmang mga kaigsoonan, hapit dili nato matugkad ang gahum sa Basahon ni Mormon, ni ang balaang tahas nga kinahanglan gayud nga buhaton niini, ni ang lugway diin kini kinahanglan gayud nga ipalihok. …

Naghagit ako kanatong tanan sa pagmainampoon sa paghunahuna og mga lakang nga kita personal nga makahimo sa pagdala niining bag-o nga saksi alang ni Kristo nga mas hingpit diha sa atong kaugalingong mga kinabuhi ug ngadto sa usa ka kalibutan nga dako kaayo og panginahanglan niini.

Ako adunay panan-awon sa mga panimalay nga gipabantay, mga klase nga alegre, ug mga pulpito nga nagdilaab sa espiritu sa mga mensahe sa Basahon ni Mormon.

Ako adunay panan-awon sa mga home teacher ug mga visiting teacher, mga opisyales sa ward ug branch, ug mga lider sa stake ug misyon nga nagtambag sa atong mga tawo gikan sa labing tukma nga basahon sa yuta—ang Basahon ni Mormon.

Ako adunay panan-awon sa mga tigpasundayag nga naghimo og pelikula, drama, literatura, musika, ug mga painting sa mahinungdanong mga tema ug halangdong mga tawo gikan sa Basahon ni Mormon.

Ako adunay panan-awon sa liboan ka mga misyonaryo nga moadto sa natad sa misyon uban ang gatusan ka mga tudling nga gimemorya gikan sa Basahon ni Mormon aron sila unta makahatag sa mga panginahanglan sa kalibutan nga gutom sa espiritwal.

Ako adunay panan-awon sa tibuok Simbahan nga nagkaduol ngadto sa Dios pinaagi sa pagsunod sa mga lagda sa Basahon ni Mormon.

Sa pagkatinuod, ako adunay panan-awon sa pagpuno sa yuta sa Basahon ni Mormon.¹⁴

Ako modayeg kaninyo matinud-anong mga Santos kinsa naninguha sa pagpuno sa yuta ug sa inyong mga kinabuhi sa Basahon ni Mormon. Dili lamang kita kinahanglan gayud nga mopadayon sa unahan og daghan pang kopya sa Basahon ni Mormon sa usa ka hilabihan ka kusog nga paagi, apan kita kinahanglan gayud nga may kaisug sa pagpadayon sa unahan gamit ang daghan pang nindot kaayo nga mga mensahe niini diha sa atong mga kinabuhi ug sa tibuok yuta.¹⁵

Mga Sugyot alang sa Pagtuon ug Pagtudlo

Mga Pangutana

Sa seksyon 1, ribyuha ang tambag ni Presidente Benson mahitungod kon unsaon pagtuon ang Basahon ni Mormon. Unsaon niini nga tambag pagtabang kanato sa pagsagubang sa atong mga hagit? Unsa ang pipila ka mga tudling diha sa Basahon ni Mormon ang nag-asoy sa mga hagit nga atong giatubang?
Sa unsa nga mga paagi nga inyong nakita ang katumanan sa mga saad nga gilista diha sa seksyon 2? Unsa ang pipila ka mga butang nga kita makahimo sa pagpakigbahin sa Basahon ni Mormon sa mga tawo kinsa nagkinahanglan niini nga mga saad diha sa ilang mga kinabuhi?
Unsa sa inyong hunahuna ang gipasabut sa “pagpuno sa yuta ug sa [atong] mga kinabuhi sa Basahon ni Mormon? (Alang sa pipila ka mga ehemplo, tan-awa sa seksyon 3.)

May Kalabutan nga mga Kasulatan

2 Nephi 27:22; Mormon 8:26–41; Moroni 1:4; 10:3–5; tan-awa usab ang pasiuna sa Basahon ni Mormon

Tabang sa Pagtuon

Samtang kamo nagbasa, “linyahi ug markahi ang mga pulong ug hugpong sa mga pulong nga inyong mailhan tali sa mga ideya diha sa usa ka [tudling]. … Diha sa mga margin isulat ang mga pakisayran nga kasulatan nga nagtin-aw sa mga tudling nga inyong gitun-an. (Pagtudlo, Walay Labaw ka Mahinungdanon nga Tawag [2004], 26).