Ang Kinabuhi ug Pangalagad ni Ezra Taft Benson

Niadtong Agosto 4, 1899, si Sarah Dunkley Benson ug George Taft Benson Jr. mi-welcome sa una nilang anak. Siya ilang ginganlan og Ezra Taft Benson, gikan sa iyang apohan sa tuhod, si Elder Ezra T. Benson, kinsa miserbisyo isip sakop sa Napulog Duha ka mga Apostoles.

Si Ezra natawo sa balay nga may duha ka kwarto sa umahan nga gitukod sa iyang amahan sa miaging tuig. Ang pagpanganak dugay ug lisud, ug ang doktor nagtuo nga ang 11¾-ka libra (5.3-kg) nga bata dili maluwas. Apan ang lola sa bata adunay lahi nga ideya. Ilang gipuno ang planggana og tubig—ang usa init, ug ang lain bugnaw—ug gibalhin-balhin og gituslob ang ilang apo diha sa planggana hangtud nga mihilak siya.

Imahe

Ezra Taft Benson at three months old.

Ang batan-ong Ezra Taft Benson, sagad nga tawagon og “T” sa mga sakop sa pamilya ug mga higala, nakasinati og mabungahong kabatan-on sa umahan nga naglibut sa balay kon asa siya natawo. Si Presidente Gordon B. Hinckley, kinsa miserbisyo uban ni Presidente Benson hapit 33 ka tuig diha sa Korum sa Napulog Duha ka mga Apostoles ug sa Unang Kapangulohan, misaysay sa mga leksyon nga nakat-unan sa batan-ong Ezra:

“Siya usa ka bata nga nagdako sa umahan, sa literal ug tinuoray nga paagi, magsul-ob og over-all nga pangtrabaho, pula-pula og aping nga bata [sunburned boy] kinsa sa sayo nga pangedaron nasayud sa balaod sa ting-ani: ‘Bisan unsay igapugas sa tawo, mao usab kana ang iyang pagaanihon’ (Mga Taga-Gal. 6:7).

“Iya kining nakat-unan sa panahon sa kalisud nga kon dili ka gayud molihok, mga sagbut ra ang manubo. Kinahanglang magkugi, walay katapusan ug kanunay, kon adunay gustong anihon. Ug busa kinahanglang magdaro sa tinglarag ug sa tingpamulak—ang makapasingot nga trabaho sa umahan sa tibuok adlaw luyo sa kusgang mga kabayo. Kaniadto daro lang ang gigamit, ug kinahanglang kuptan gayud kanunay ang mga gunitanan aron ang suwab sa daro modulot sa yuta ug maayo ang pagkadaro. Human niana, siya kapuyon pag-ayo ug makatulog og maayo. Apan sa dili madugay moabut na sab ang kabuntagon.

“Ang umahan nagkinahanglan og sudlay sa pagdaro, nga birahon usab sa kabayo, aron matudling ang yuta ug maandam para tamnan og liso. Ang pagtanom lisud, sakit sa buko-buko. Ug dayon himoan og irigasyon. Ang umahan sa Benson anaa sa nasud nga uga ang yuta, napalambo lang tungod sa irigasyon. Ang tubig kinahanglang bantayan, dili lang sa tibuok adlaw apan sa tibuok gabii sab. Walay mga electric flashlights o propane lanterns. Lampara ra ang anaa nga makahimo og gamayng yellow nga kahayag. Kinahanglanon gayud nga ang tubig moabut sa katapusang bahin sa umahan. Adunay leksyon nga dili gayud makalimtan.

“Akong mahunahuna kining gamayng bata, nagpas-an og pala, naglakaw sa mga kanal ug sa umahan aron mahatagan og kinabuhi pinaagi sa pagpaumog ang nag-uga nga yuta.

“Dayon miabut na ang panahon sa paghabas sa dakong hektarya nga dagami. Ang mower gihigot sa kabayo, ang batang lalaki misaka sa karaang lingkuran hinimo sa metal, ug ang suwab gigamit sa pagpamutol, miputol og mga lima ka pye nga mga dagami samtang ang kabayo mobira padulong sa unahan. Inubanan sa mga langaw ug lamok, abug ug grabe nga init, lisud gayud ang trabaho. Dayon ang mga dagami kinahanglang i-rake, dayon pundokon gamit ang hand fork ngadto sa cock hangtud mauga. Ang tayming importante. Kon moabut na ang hustong panahon kini ibalhin ngadto sa hayrack, usa ka karwahe nga adunay dako, flat nga butanganan. Sa stack yard, usa ka puliya nga birahon sa kabayo makaalsa niini gikan sa karwahe aron mapatong-patong og taas ang mga dagami. Walay mga aparatu nga pangbugkos niadtong panahona, ni adunay mga de makina nga pangkarga. Ang anaa ra mao ang mga pangkaw-it ug kusog sa tawo.

“… Dili kaayo ikatingala nga ang iyang lawas dako ug kusgan. Kaming nakaila kaniya sa kaulahiang bahin sa iyang kinabuhi kanunay mokomentaryo sa gidak-on sa iyang pulso. Himsog nga panglawas, nalig-on kini sa iyang pagkabatan-on, usa sa dakong mga panalangin sa iyang kinabuhi. Hangtud sa katapusan niyang katuigan, siya adunay talagsaong kusog.

“Sa tibuok panahon sa iyang pagkahamtong, kon siya makig-uban sa mga presidente ug mga hari, wala gyud siya makalimot sa iyang mga nakat-unan sa umahan. Wala mawala ang iyang kapasidad sa pagtrabaho. Wala gayud mawala ang iyang determinasyon nga mobangon sa kadlawon ug motrabaho hangtud gabii.

“Apan adunay sobra pa sa talagsaong kinaiya sa pagtrabaho nga namugna sa panimalay sa pagkabata pa. Adunay siguradong kalig-on nga naggikan sa yuta. Kini pahinumdom kanunay sa pahayag nga gihatag ngadto kang Adan ug Eva sa dihang gipalayas sila sa tanaman: ‘Sa singot sa imong nawong magakaon ikaw sa tinapay, hangtud nga mopauli ka sa yuta’ (Gen. 3:19). Ang diwa sa pagpaningkamot sa kaugalingon natisok diha sa mga mag-uuma. Kaniadto wala pay mga programa sa umahan gikan sa gobyerno, walay bisan unsa nga matang sa hinabang. Ang dili matag-an nga panahon kinahanglang dawaton. Ang makamatay nga katugnaw, wala sa panahon nga mga unos, hangin, ug huwaw dawaton isip risgo sa kinabuhi diin wala pay insurance nianang higayona. Ang pagtipig niining panahona alang sa adlawng malisud kinahanglanon, kay kon dili adunay kagutom. Ang bugtong kapanguhaan batok sa risgo sa kinabuhi mao ang pag-ampo, pag-ampo ngadto sa atong mahangturon, mahigugmaong Langitnong Amahan, ang Magkakagahum nga Dios sa uniberso.

“Adunay daghang pag-ampo sa gamayng panimalay sa Whitney, Idaho. Adunay pag-ampo sa pamilya, gabii ug buntag, diin ipahayag ang pasalamat sa kinabuhi lakip na sa mga hagit ug mga oportunidad, ug ang pangamuyo para sa kalig-on sa pagbuhat sa buluhaton nianang adlawa. Kadtong nanginahanglan gihinumduman, ug kon ang pamilya mobarug human sa pag-ampo, ang inahan, nga mao ang presidente sa Relief Society sa ward, adunay usa ka karwahe nga puno sa pagkaon nga ipakigbahin ngadto sa nanginahanglan, ang kinamagulangang anak maoy iyang drayber. Ang mga leksyon dili gayud makalimtan.”²

Kining mga leksyon sa kakugi, panaghiusa sa pamilya, serbisyo, ug pagsunod sa ebanghelyo nagsugod sa paglambo dihang ang mga ginikanan sa 12 anyos nga si Ezra miuli gikan sa miting sa Simbahan uban sa wala damhang balita. Sa wala madugay gisaysay og balik ni Presidente Benson:

“Samtang nagsakay sa kabayo ang akong Amahan sa pagpauli, giablihan sa akong inahan ang mailbox, ug, sa ilang katingala, adunay sulat sa Box B gikan sa Siyudad sa Salt Lake—usa ka calling nga mag-misyon. Walay nangutana kon sila ba andam, o makahimo. Ang bishop unta nasayud, ug ang bishop mao si Grandfather George T. Benson, ang amahan sa akong papa.

“Samtang si Mama ug Papa nagpadulong sa nataran, silang duha naghilak—usa ka butang nga wala pa namo makita sukad sa among pamilya. Kami nagpundok sa may karwahe—pito mi kabuok niadtong higayona—ug nangutana kanila kon unsa ang nahitabo.

“Sila miingon, ‘Ok ra ang tanan.’

“‘Nganong naghilak man mo?’ nangutana mi.

“‘Adto ta sa sala ug among ipasabut.’

“Nagpundok mi sa daang sofa sa sala, ug giingnan mi ni Papa kabahin sa iyang calling nga mag-misyon. Dayon miingon si Mama, ‘Mapasigarbuhon mi nga si Papa gikonsiderar nga takus nga mag-misyon. Nakahilak mi kay kini nagpasabut og duha ka tuig nga malayo. Kahibalo mo, ang inyong amahan ug ako wala pa gyud magkabulag og sobra sa duha ka gabii sukad mi naminyo—ug kana nahitabo sa dihang si Papa miadto sa kanyon aron pagkuha og mga kahoy, poste, ug sugnod.’”³

Tungod kay ang iyang amahan nag-misyon, giabaga ni Ezra ang dakong responsibilidad sa pagdumala sa umahan sa pamilya. Siya “nagtrabaho sama sa dakong tawo, bisan tuod bata pa siya,” ang iyang igsoon nga si Margaret misaysay. “Siya ang mipuli sa responsibilidad ni papa sa hapit duha ka tuig.”⁴ Ubos sa pagpangulo ni Sarah, si Ezra ug ang iyang mga igsoon nagtinabangay, dungang nag-ampo, ug dungang nagbasa sa mga sulat gikan sa ilang amahan. Syetenta y singko ka tuig ang milabay, namalandong si Presidente Benson sa mga panalangin nga nadawat sa iyang pamilya gumikan sa pag-misyon sa iyang amahan:

“Nagtuo ko nga ang mga kalibutanon moingon nga ang iyang pagdawat niadto nga calling usa ka ebidensya nga wala niya higugmaa ang iyang pamilya. Biyaan og duha ka tuig sa balay ang pito ka anak ug mabdos nga asawa sa unsang paagi kini usa ka tinuorayng gugma?

“Apan ang akong amahan nasayud sa mas dakong panglantaw sa gugma. Siya nasayud nga ‘sa matag usa ka butang ang Dios nagabuhat og maayo uban kanila nga mga nahigugma Kaniya’ (Mga Taga-Roma 8:28). Siya nasayud nga ang pinakamaayo niyang buhaton para sa iyang pamilya mao ang pagsunod sa Dios.

“Samtang gimingaw mi niya pag-ayo niadtong mga tuiga, ug ang iyang pagkawala nakahimo og daghang hagit sa among pamilya, ang iyang pagdawat sa calling napamatud-an nga gasa sa gugmang putli. Nag-misyon si Papa, gibiyaan si Mama sa balay uban sa pito ka anak. (Ang ikawalo natawo mga upat ka bulan ang milabay sa iyang pag-abut sa field.) Apan mabati sa panimalay ang diwa sa misyonaryo nga buhat nga dili gayud mawala. Dili kini mahitabo nga walay pagsakripisyo. Kinahanglang ibaligya ni Papa ang among karaang uga nga umahan aron igasto sa iyang misyon. Iyang gipabalhin ang usa ka magtiayon sa usa ka bahin sa among balay aron moatiman sa among mga tanom, ug gibilin diha sa iyang mga anak ug asawa ang responsibilidad sa hay land, sa tugwayanan, ug gamayng pundok sa mga baka nga gatasan.

“Ang mga sulat ni Papa sa tinuoray panalangin sa among pamilya. Para namong mga anak, kini daw gikan sa pikas nga bahin sa kalibutan, apan gikan lang kini sa Springfield, Massachusetts; ug Chicago, Illinois; ug Cedar Rapids ug Marshalltown, Iowa. Oo, mabati sa among panimalay, isip resulta sa misyon ni Papa, ang diwa sa misyonaryo nga buhat nga wala na gayud mawala.

“Sa wala madugay ang pamilya onse na ka magsoon—pito ka lalaki ug upat ka babaye. Tanang pito ka lalaki nag-misyon, pipila kanila dunay duha o tulo ka misyon. Sa wala madugay, duha ka anak nga babaye ug ilang bana nagmisyon og full-time. Ang duha ka igsoong babaye, pareho nga biyuda—ang usa inahan sa walo ka bata ug ang lain inahan sa napulo ka anak—nagserbisyo isip managkompanyon sa Birmingham, England.

“Kini usa ka panulundon nga nagpadayon sa pagpanalangin sa pamilyang Benson ngadto sa ikatulo ug ikaupat nga mga henerasyon. Dili ba kini tinuoray nga gasa sa gugma?”⁵

Nadasig sa ehemplo sa iyang mga ginikanan ug sa iyang tinguha sa pagtabang og tukod sa gingharian sa Ginoo dinhi sa yuta, aktibong gidawat ni Ezra Taft Benson ang calling sa pagserbisyo. Sa dihang siya 19 anyos, ang iyang bishop, nga iya usab nga apohan, mihangyo kaniya sa pagserbisyo isip hamtong nga lider ngadto sa 24 ka batan-ong lalaki sa ward. Ang batan-ong mga lalaki miapil sa Boy Scouts of America, ug si Ezra nagserbisyo isip assistant Scoutmaster.

Niini nga calling, usa sa mga responsibilidad ni Ezra mao ang pagtabang sa mga batan-ong lalaki nga manganta sa choir. Ubos sa iyang pagpangulo, ang mga batan-ong lalaki nakadaug sa kompetisyon sa choir uban sa ubang mga ward sa ilang stake, sa ingon mikwalipay sila sa kompetisyon sa rehiyon. Aron pagdasig nila nga magpraktis ug manganta kutob sa ilang mahimo, si Ezra misaad kanila nga kon sila makadaug sa kompetisyon sa rehiyon, iya silang dalhon sa 35-ka milya nga hike latas sa kabukiran ngadto sa usa ka linaw. Ang plano nagmalampuson—nakadaug ang mga batan-ong lalaki gikan sa Whitney.

“Gisugdan namo og plano ang among hiking,” misaysay si Presidente Benson, “ug atol sa miting usa ka 12 anyos miisa sa iyang kamot ug pormal kaayong miingon, ‘… Ganahan kong mosugyot.’ … miingon ko, ‘Sige, unsa man?’ Miingon siya, ‘Mosugyot ko, aron dili ta masamok og dala og mga sudlay ug brush niini nga biyahe, magpatupi ta.’”

Sa katapusan ang tanang batan-ong lalaki miuyon nga pamub-an ang ilang buhok isip pagpangandam sa ilang hiking. Sila mas madasigon sa ideya sa dihang ang usa kanila misugyot nga ang mga Scoutmaster magpatupi usab sa ilang buhok. Si Presidente Benson mipadayon:

“Duha ka Scoutmasters milingkod sa lingkuranan sa barbero samtang ang barbero malipayong nagtupi sa ilang buhok gamit ang clippers. Sa dihang hapit na siyang mahuman, siya miingon, ‘Karon, kon inyong paupawan ang inyong mga ulo, librehon ko kini.’ Ug busa among gisugdan kini nga hike—24 ka gitupihang batan-ong lalaki ug duha ka giupawan nga mga Scoutmaster.”

Namalandong sa iyang mga kasinatian uban sa batan-ong mga lalaki sa ward, si Presidente Benson miingon: “Usa nga makalipay sa pakigtrabaho uban sa mga lalaki mao ang reyalidad nga inyong madawat ang inyong ganti samtang naghimo niini. Kamo adunay kahigayunan nga maobserbahan ang mga resulta sa inyong pagpangulo matag adlaw samtang nakigtrabaho uban nila sulod sa katuigan ug makita sila nga nagtubo sa pagkahamtong, naghinam-hinam nga modawat sa mga hagit ug responsibilidad niini. Ang ingon nga katagbawan dili mapalit og bisan pila; kini maangkon pinaagi sa pagserbisyo ug debosyon. Nindot kaayo nga mahimong kabahin bisan gamay lang sa pagtabang sa paghulma sa mga batan-ong lalaki ngadto sa pagkahamtong nga lalaki.”⁶

Wala gayud kalimti ni Presidente Benson kadtong batan-ong mga lalaki, ug siya naningkamot nga makig-kontak nila. Mga tuig ang milabay human niadtong 35-ka milya nga hike, iyang gibisita ang Whitney Ward isip sakop sa Korum sa Napulog Duha ka mga Apostoles ug nakig-istorya sa pipila kanila. Ila siyang gisultihan nga 22 sa 24 nagpabiling matinud-anon sa Simbahan. Wala na nila makontak ang duha. Sa katapusan nakit-an ni Presidente Benson kining duha ka lalaki, gitabangan sila nga maaktibo pagbalik sa Simbahan, ug gipahigayon ang ilang mga sealing sa templo.⁷

Sa tinglarag niadtong 1920, si Ezra miadto sa Logan, Utah, mga 25 ka milya (40 km) gikan sa Whitney, aron magpa-enrol sa Utah Agricultural College (karon Utah State University). Kauban niya ang pipila ka higala sa dihang usa ka batan-ong babaye nakadani sa iyang atensyon. Sa kaulahian iyang gisaysay:

“Anaa mi sa duol sa dairy barns sa dihang usa ka batan-ong babaye—madanihon kaayo ug maanyag—nag-drayb sa iyang gamayng sakyanan padulong sa dairy barn aron magkuha og gatas. Samtang ang mga lalaki mowara-wara kaniya, motimbaya usab siya. Miingon ko, ‘Si kinsa siya?’ Sila miingon ‘Kana si Flora Amussen.’

“Giingnan nako sila, ‘Kabalo mo, aduna lang koy impresyon nga minyoan nako siya.’”

Gikataw-an sa mga higala ni Ezra sa iyang gisulti, nag-ingon, “Sikat ra kaayo siya para sa usa ka bata nga nagtubo sa umahan.” Apan determinado siya. “Kana mas nakadasig pa gani,” mitubag siya.

Imahe

Flora Smith Amussen at college graduation Mrs. Ezra Taft Benson

Wala madugay human niadtong panag-istoryahanay, si Flora ug Ezra nagkahimamat sa unang higayon sa Whitney, diin si Flora gidapit nga mobisita sa balay sa usa sa ig-agaw ni Ezra. Ug wala madugay human niadto, gidapit siya ni Ezra sa usa ka sayawan. Misugot si Flora, ug ang uban pang mga date mipaingon sa ilang gitawag nga “talagsaong pangpangulitawo.” Apan naputol ang ilang relasyon—ug, sa daghang paagi, milambo—sa dihang si Ezra gi-call nga magserbisyo isip full-time nga misyonaryo sa British Mission.

Isip pangpangandam sa misyon ni Ezra, siya ug si Flora nag-istoryahanay kabahin sa ilang relasyon. Gusto nila nga ang ilang panaghigalaay magpadayon, apan ila usab nga giila nga panginahanglan ni Ezra nga mahimong mapahinunguron nga misyonaryo. “Sa wala pa ko molarga, si Flora ug ako nagsabut nga magsinulatay kausa sa usa ka bulan,” miingon siya. “Nagsabut usab mi nga among isulat ang butang nga makapadasig, makapasalig, ug mga balita. Kini among gibuhat.”⁸

Ang British Mission, nga mabungahon panahon sa nag-unang mga misyonaryo nga mga Santos sa Ulahing mga Adlaw, lahi para kang Elder Benson ug sa iyang mga kompanyon. Ang mga mikontra sa Simbahan sa British Isles, lakip sa pipila ka kaparian, nagpasiugda og dakong kasamok batok sa mga Santos sa Ulahing mga Adlaw, nagmantala og mga artikulo, mga nobela, mga drama-drama, ug mga salida batok sa Mormon. Si Elder Benson siguradong naguol sa dili maayong pagbati sa mga tawo kabahin sa gipahiuli nga ebanghelyo, apan wala niya tuguti nga kining mga pagsulay mopahuyang sa iyang pagtuo. Gani, iyang gisulat sa iyang journal ang kabahin sa lokal nga mga batan-on nga namubugal-bugal kaniya ug sa iyang kompanyon pinaagi sa pag-syagit og “Mormons!” Ang iyang hilom nga tubag mao kini “Salamat sa Ginoo nga usa ko ka Mormon.”⁹

Dugang sa pagsangyaw sa ebanghelyo ngadto sa mga tawo nga dili miyembro sa Simbahan, si Elder Benson miserbisyo isip lider sa priesthood ug klerk sa mga Santos sa Ulahing mga Adlaw sa Great Britain. Kining lain-laing mga oportunidad sa pagserbisyo nakamugna og nindot nga mga kasinatian, sukwahi gayud sa mga kalisud nga iyang giatubang. Si Elder Benson nakabunyag ug nakakumpirmar og pipila ka tawo, ug siya nakatabang og daghang tawo nga mas maduol sa Ginoo. Sama pananglit, iyang gihisgutan ang usa ka higayon, atol sa espesyal nga miting nga giorganisar sa matinud-anong mga miyembro sa Simbahan, siya gigiyahan sa Espiritu nga mamulong sa paagi nga nakatabang sa mga higala sa miyembro nga makadawat og saksi nga si Joseph Smith propeta sa Dios.¹⁰ Iyang girekord nga siya ug ang iyang kompanyon kausa mihatag og priesthood nga panalangin ngadto sa masakiton kaayo nga babaye kinsa naayo paglabay sa 10 ka minutos.¹¹ Nalipay siya, isip klerk, sa dihang iyang nakit-an ang mga ngalan sa Santos nga anaa sa rekord sa Simbahan apan wala mailhi sa lokal nga mga lider.¹² Nakadawat siya og bililhong mga pagbansay sa pagpangulo, nagserbisyo ubos sa direksyon sa duha ka presidente sa misyon nga mga sakop usab sa Korum sa Napulog Duha ka mga Apostoles: Sila si Elder Orson F. Whitney ug David O. McKay.

Si Elder Benson mapasalamaton sa proteksyon sa Ginoo samtang nagsangyaw siya sa ebanghelyo. Usa ka gabii siya ug ang iyang kompanyon gilibutan sa mga mangugubot kinsa mihulga kanila nga ilabay sila sa sapa. Hilom siyang nag-ampo og panabang. Dayon, sa wala madugay iyang gi-report, “usa ka dakong estranghero kalit nga miwakli sa mga manggubot paingon sa akong kiliran. Direkta ko niyang gitan-aw sa akong mata ug miingon sa kusog, klaro nga tingog, ‘Batan-on, mituo ko sa matag pulong nga imong gipangsulti karon.’ Samtang nagsulti siya nangawala ang mga bugoy sa palibut. Para nako kini direkta nga tubag sa akong pag-ampo. Dayon miabut ang usa ka British nga pulis.”¹³

Kon si Elder Benson wala magkapuliki sa pagserbisyo sa uban, “padayon siyang naglambo pinaagi sa ‘pagtuon sa Basahon ni Mormon,’ ilabi na sa misyonaryo nga mga kasinatian sa mga anak ni Mosiah.”¹⁴ Nakadawat usab siya og kahupayan ug suporta pinaagi sa mga sulat gikan sa iyang panimalay, nga iyang giingon nga “balik-balikon niya kini og basa.” Naghinumdon sa iyang misyon, siya mikomentaryo: “Ipabati ni Mama ug Papa ang ilang gugma nako diha sa mga sulat, ug sa tinuoray kalig-on kini para nako isip batan-ong lalaki. Ang [mga sulat ni] Flora puno sa espiritu ug pagdasig, walay sentimental nga mensahe. Sa akong hunahuna nakapadugang kadto sa akong gugma ug pagdayeg kaniya kaysa uban pang butang.”¹⁵

Na-release si Elder Benson sa iyang pagserbisyo isip full-time nga misyonaryo niadtong Nobyembre 2, 1923. Nagpanuko siya sa pagbiya, nag-ingon nga ang pagpanamilit sa “buotang mga Santos” sa Great Britain mao “ang pinakalisud nga bahin sa [iyang] misyon.”¹⁶ Sa gihapon, nalipay siya nga makauban niya ang iyang pamilya ug mahinamon nga makita si Flora.

Mahinamon usab si Flora nga makita si Ezra. Apan mas sobra pa ang iyang gibuhat kaysa magpaabut nga makauban si Ezra. Sa tinuoray naglantaw siya sa umaabut—sa kaugmaon ug potensyal ni Ezra. Sukad tin-edyer pa siya, gusto niya nga “makigminyo og usa ka mag-uuma,”¹⁷ ug siya nalipay sa dakong tinguha ni Ezra nga mopuyo sa umahan sa pamilya sa Whitney, Idaho. Apan, mibati si Flora nga kinahanglang humanon una ni Ezra ang iyang pag-eskwela. Sa wala madugay siya miingon, “Nag-ampo ug nagpuasa [ko] sa Ginoo aron tabangan ako nga masayud kon unsaon nako nga matabangan siya nga makaserbisyo og maayo sa iyang isigkatawo. Nakahunahuna ko nga kon ang Bishop naghunahuna nga takus ako, [iya] kong i-call nga mag-misyon. Giuna ni Ezra ang Simbahan, busa nasayud ko nga dili ko niya babagan.”¹⁸

Natingala si Ezra sa dihang, nangulitawo siya pagbalik ni Flora, giingan siya ni Flora nga gidawat niya ang call nga mag-misyon sa Hawaiian Islands. Gi-set apart siya niadtong Agosto 25, 1924, ug mibiya pagkasunod adlaw. Sa iyang pagbiya, si Ezra misulat sa iyang journal: “Malipayon ming duha tungod kay mibati mi nga maayo ra ang among kaugmaon ug sa dili madugay kining panagbulag makaayo kanamo. Lisud kini, bisan tuod, makita nga ang paglaum sa tawo mawala. Apan bisan og usahay hilakan namo kini, kami makadawat og kasiguroan gikan Niya nga kining tanan para sa among kaayohan.”¹⁹

Sa tinuoray kini para gayud sa among kaayuhan. Si Flora, sama sa giingon sa iyang presidente sa misyon, “maayo kaayo, abtik nga misyonaryo”²⁰ kinsa mitrabaho diin ang “iyang kasingkasing ug kalag, panahon, ug mga talento para sa buhat sa Ginoo.”²¹ Iyang gidumala ang organisasyon sa Primary sa pipila ka dapit sa iyang misyon, mitudlo sa mga bata sa elementarya, miserbisyo sa templo, ug miapil sa paningkamot sa paglig-on sa lokal nga mga Santos sa Ulahing mga Adlaw. Gani miserbisyo siya og kadiyot isip kompanyon sa iyang nabiyuda nga inahan, si Barbara Amussen, kinsa gitawag og short-term mission. Sa ilang pagkakompanyon, nakahimamat sila og tawo nga namiyembro sa unang katuigan sa Simbahan sa Estados Unidos tungod sa paningkamot sa amahan ni Flora, si Carl Amussen. Ang kinabig dili na aktibo sa Simbahan, apan gi-fellowship ug gitabangan siya ni Flora ug sa iyang inahan aron makabalik sa Simbahan.²²

Samtang wala si Flora, busy kanunay si Ezra. Siya ug iyang igsoon nga si Orval mipalit og umahan para sa pamilya ug nagpadayon sa ilang edukasyon. Sa mubong panahon, si Ezra mieskwela sa Brigham Young University sa Provo, Utah, samtang si Orval nagpabilin sa Whitney aron pag-atiman sa umahan. Nagsabut sila nga kon makagradwar na si Ezra, mobalik siya sa umahan samtang si Orval mag-misyon ug humanon ang iyang pag-eskwela. Determinado nga daling makagradwar sa BYU, gipuno ni Ezra ang iyang eskedyul sa pag-eskwela. Miapil usab siya sa mga sosyal nga kalihokan sa unibersidad, lakip sa mga sayaw, salo-salo, ug mga drama-drama.

Imahe

President Ezra Taft Benson in cap and gown, graduation

Bisan tuod si Ezra gibutaran nga “Pinakasikat nga Tawo sa BYU” sa iyang katapusang tuig sa pag-eskwela, walay laing babaye ang nakadani sa iyang atensyon puli kang Flora. Sa wala madugay siya miingon nga dihang nahuman og misyon si Flora niadtong Hunyo 1926, siya “naghinam-hinam gayud” nga makita si Flora, bisan tuod iyang giinsister nga wala siya “magpaabut” sa pag-uli ni Flora.²³ Migradwar siya nga adunay honor mga pipila lang ka bulan sa wala pa moabut si Flora.

Usa ka bulan human sa pag-abut ni Flora gikan sa misyon, gipahibalo niya ug ni Ezra ang ilang plano nga magpakasal. Pipila ka tawo padayon nga nagduhaduha sa desisyon ni Flora. Wala sila kasabut ngano nga ang usa ka babaye nga daghan og kalampusan, datu, ug sikat makigminyo sa usa ka mag-uuma. Apan padayon siya sa pagsulti nga “gusto niyang makigminyo og usa ka mag-uuma.”²⁴ Si Ezra “praktikal, kamao ug lig-on,” miingon siya. Ug, siya nakaobserbar nga, “Si Ezra mapinanggaon sa iyang ginikanan, ug ako nasayud nga kon siya motahud kanila, siya motahud nako.”²⁵ Giila ni Flora nga si Ezra “dyamante nga sagansangon pa,” ug siya miingon, “Himoon nako ang tanan kutob sa akong mahimo aron pagtabang kaniya nga maila ug makita nga maayo, dili lang niining gamayng komunidad apan mailhan siya sa tibuok kalibutan.”²⁶

Sila si Flora ug Ezra na-sealed niadtong Septyembre 10, 1926, sa Salt Lake Temple ni Elder Orson F. Whitney sa Korum sa Napulog Duha ka mga Apostoles. Ang bugtong salo-salo human sa kasal mao ang pamahaw para sa pamilya ug mga higala. Human sa pamahaw, ang bag-ong magtiayon mibiya dayon sakay sa ilang Model T Ford pick-up truck padulong sa Ames, Iowa, diin si Ezra nadawat sa master of science program sa agricultural economics sa Iowa State College of Agriculture and Mechanical Arts (karon Iowa State University of Science and Technology).

Kasagaran sa ilang giagian mao ang libaungon nga mga dalan ug nasud nga wala kaayoy lumulupyo. Padulong didto, migahin sila og walo ka gabii sa usa ka busluton nga tolda. Sa ilang pag-abut sa Ames, miabang sila og apartment usa ka eskina gikan sa eskwelahan. Ang apartment gamay, ug dunay daghang ok-ok, apan si Ezra miingon “sa wala madugay kini ang pinakakomportable nga gamayng balay nga mahunahuna sa usa ka tawo.”²⁷ Gipahinungod pag-usab ni Ezra ang iyang kaugalingon sa edukasyon. Wala kaabut og usa ka tuig, human sa daghang oras sa pagtuon, lektyur, ug pagsulat, migradwar siya sa master’s degree. Ang magtiayon, karon nagpaabut sa ilang unang anak, mibalik sa umahan sa mga Benson sa Whitney.

Sa dihang ang mga Benson mibalik na sa Whitney, si Ezra nagtrabaho sa matag-adlaw nga pagpadagan sa umahan, nga naglakip sa pagpagatas sa mga baka, pag-amuma og mga baboy ug manok, pagpanom og sugar beets, lugas, alfalfa, ug uban pang pananom. Si Orval gi-call nga mag-misyon sa Denmark.

Wala kaabut og duha ka tuig ang milabay, ang lokal nga mga lider sa gobyerno mitanyag og trabaho ni Ezra isip county agricultural agent. Uban sa pagdasig ni Flora, gidawat ni Ezra ang posisyon, bisan kini nagpasabut nga biyaan ang umahan ug mobalhin sa duol ra nga siyudad sa Preston. Nag-hire siya og usa ka lokal nga mag-uuma hangtud makauli si Orval.

Ang bag-ong responsibilidad ni Ezra naglakip sa pagpanambag sa lokal nga mga mag-uuma sa mga problema nga nakaapekto sa ilang produksyon. Labaw sa tanan, mibati siya nga ang mga mag-uuma nagkinahanglan og mas epektibong kahanas sa pagpamaligya—butang nga nahimong importante human sa Grabing Kalisud [Great Depression], ug butang kini diin, tungod sa iyang edukasyon sa agricultural economics, siya takus sa pagsangkap kanila. Iyang giawhag ang mga mag-uuma nga moapil sa farmers’ cooperative associations, diin makatabang kanila nga mas makabarato sa gasto ug makakuha sa pinakamaayong presyo para sa suholan.²⁸

Ang abilidad ni Ezra isip lider sa agrikultura nagdala og laing oportunidad sa pagpanarbaho. Gikan 1930 hangtud 1939, nagtrabaho siya isip agricultural economist ug specialist sa University of Idaho Extension Division sa Boise, ang capital sa estado sa Idaho. Kini nga mga responsibilidad nahunong tunga-tunga sa Agosto 1936 ug Hunyo 1937, sa dihang ang mga Benson mibalhin sa California aron makatuon si Ezra og agricultural economics sa University of California sa Berkeley.

Bisan pa sa mahinungdanong mga responsibilidad sa trabaho ug sa panimalay, sila si Ezra ug Flora Benson migahin og panahon sa pagserbisyo sa Simbahan. Sa Whitney, Preston, ug Boise, sila gi-call sa pagtudlo ug paggiya sa mga batan-on.²⁹ Ilang gidawat kining mga calling uban sa kahinam, nagtuo nga “ang mga batan-on mao ang atong kaugmaon.”³⁰ Si Ezra adunay kahigayunan usab nga motabang sa lokal nga misyonaryo nga buhat.³¹ Sa Boise, si Ezra gi-call sa pagserbisyo isip magtatambag sa kapangulohan sa stake. Gani nagpadayon siya niana nga posisyon sa panahon nga siya ug ang iyang pamilya nagpuyo sa California. Ang Boise Stake paspas nga mitubo, ug niadtong Nobyembre 1938, si Elder Melvin J. Ballard sa Korum sa Napulog Duha ka mga Apostoles mibahin sa stake ngadto sa tulo ka stake. Gi-call si Ezra Taft Benson sa pagserbisyo isip usa sa mga presidente sa stake.

Niadtong Enero 1939, si Ezra nasurprisa nga gitanyagan sa posisyon isip executive secretary sa National Council of Farmer Cooperatives sa Washington, D.C. Nakigtambag siya ni Flora kabahin niining oportunidad. Tungod kay gi-set apart siya isip presidente sa stake duha pa lang ka bulan, gikontak usab niya ang Unang Kapangulohan aron mangayo sa ilang tambag. Giawhag siya nga dawaton ang posisyon, busa siya ug ang iyang pamilya nanamilit sa ilang mga higala sa Boise niadtong Marso 1939 ug mibalhin sa Bethesda, Maryland, duol sa Washington, D.C. Niadtong Hunyo 1940 gi-call siya sa pagserbisyo isip presidente sa stake pag-usab, karong higayona sa bag-ong giorganisar nga Washington Stake sa Washington, D.C.

Sila si Ezra ug Flora Benson kanunay nakahinumdom sa mahangturong importansya sa ilang relasyon sa usag usa ug sa ilang mga anak, ngadto sa nagkatigulang nilang ginikanan, ug sa ilang mga igsoon. Ang ilang paghatag og gibug-aton para sa nagkahiusang pamilya sobra pa sa usa ka buluhaton; sila tinuorayng naghigugmaay, ug gusto nilang magkauban—niining kinabuhia ug hangtud sa kahangturan.

Ang daghang responsibilidad ni Ezra sa Simbahan ug sa propesyonal nga pagpanarbaho kanunay makapahilayo niya sa panimalay. Usahay ang ekspresyon sa mga bata naghatag og gibug-aton sa katinuod niini. Sama pananglit, sa iyang pagpadulong para sa miting sa Simbahan sa usa ka Dominggo, ang iyang anak nga babaye nga si Barbara miingon, “Good-bye, pa. Ug balik-balik ug bisitaha mi sa sunod.”³² Dako nga hagit para kang Flora ang pagpadako sa ilang unom ka anak nga wala kanunay ang iyang bana, ug iyang giangkon nga panagsa mobati siya og “kamingaw ug mawad-an og kadasig.”³³ Gihapon, niining tanan, iyang giamuma ang iyang tahas isip asawa ug inahan, ug siya nalipay sa kamapahinunguron sa iyang bana ngadto sa Ginoo ug sa pamilya. Sa iyang sulat para kang Ezra, siya misulat: “Sama sa una ang mga adlaw daw bulan sukad sa imong pagbiya. … [Apan] kon ang tanang lalaki … nahigugma ug nagsunod sa ilang relihiyon sama sa imong gibuhat, adunay gamay lang nga kasubo [ug] pag-antus. … Kanunay kang mapahinunguron sa imong pamilya ug andam kanunay sa pagtabang sa uban nga nanginahanglan.”³⁴

Ipakita ni Ezra kini nga debosyon kon siya anaa sa panimalay. Migahin siya og panahon sa pagpakatawa ug pakigdula sa iyang unom ka anak, sa pagpaminaw kanila, sa pagpangutana sa ilang opinyon kabahin sa importante nga mga isyu, sa pagtudlo sa ebanghelyo, sa pagtabang sa buluhaton sa balay, ug sa paggahin og panahon kanila tagsa-tagsa. Ang mga bata nakakaplag og kahupayan ug kalig-on sa nagkahiusang gugma sa ilang ginikanan para kanila. (Tungod kay ang pamilya importante kaayo para kang Ezra Taft Benson, kining libro adunay duha ka kapitulo sa iyang pagtulun-an kabahin niining hilisgutan. Kadtong mga kapitulo, giulohan og “Kaminyoon ug Pamilya—Gi-orden sa Dios” ug “Ang Sagradong mga Calling sa mga Amahan ug mga Inahan,” naglakip og mga panumduman sa ilang mga anak kabahin sa mahigugmaong panimalay sa ilang pagkabata.)

Sa ting-init niadtong 1943, si Ezra mibiya sa Maryland kuyog sa iyang anak nga si Reed aron mobisita sa pipila ka mga kooperatiba sa mga mag-uuma sa California isip kabahin sa iyang responsibilidad sa National Council of Farmer Cooperatives. Nagplano usab siya nga makighimamat sa mga lider sa Simbahan sa Siyudad sa Salt Lake ug mobisita sa mga sakop sa pamilya sa Idaho.

Niadtong Hulyo 26, human nahimo ang ilang mga tumong sa biyahe, mibalik sila sa Siyudad sa Salt Lake sa wala pa manguli. Ilang nahibaloan nga si Presidente David O. McKay, kinsa nahimamat ni Ezra wala pay duha ka semana ang milabay, nangita kaniya. Gitawagan ni Ezra si Presidente McKay, kinsa miingon kaniya nga si Presidente Heber J. Grant, Presidente sa Simbahan niadtong higayuna, gustong makigkita niya. Sila si Ezra ug Reed gidala ngadto sa balay bakasyunan ni Presidente Grant mga pipila lang ka minuto gikan sa downtown sa Siyudad sa Salt Lake. Sa ilang pag-abut, “gidala dayon si Ezra ngadto sa kwarto ni Presidente Grant, diin nagpahulay ang tigulang na nga propeta. Sa hangyo sa Presidente, gisiradoan ni Ezra ang pultahan ug miduol kaniya, naglingkod sa lingkuranan tupad sa higdaanan. Gikuptan sa duha ka kamot ni Presidente Grant ang tuong kamot ni Ezra ug, nakahilak, yanong misulti, ‘Brother Benson, kinasingkasing ko ikaw nga pahalipayan ug nag-ampo nga ang panalangin sa Ginoo maanaa kanimo. Gipili ka nga mahimong kinabataan nga sakop sa Konseho sa Napulog Duha ka mga Apostoles.’”³⁵

Sa iyang journal, gisaysay ni Ezra ang kasinatian:

“Ang pagpahibalo daw dili katuohan ug ang pagbati dili masabut. … Sa pipila ka minuto nakaingon [ko], ‘O, Presidente Grant, imposible kana!’ nga akong nabalik-balik kadaghan sa wala pa ko makahunahuna og tarung aron makaamgo sa hitabo. … Dugay niyang gikuptan ang akong kamot samtang naghinilakay kami. … Sobra sa usa ka oras nagkauban kami, nianang panahona mainitong nagkinuptanay sa among mga kamot. Bisan tuod [siya] masakiton, ang iyang hunahuna klaro ug alerto, ug nadasig gyud ko sa iyang buotan, mabination, ug mapainubsanong espiritu samtang iyang gitan-aw ang akong kalag.

“Mibati ko nga huyang ug dili angay, hinungdan nga ang sunod niyang mga pulong sa paghupay ug pagpaniguro nakatabang kaayo. Ang pinakaimportante niyang gisulti mao, ‘Ang Ginoo adunay paagi sa pagpalambo sa mga tawo nga gi-call sa mga posisyon sa pagpangulo.’ Sa akong mga kahuyang makasulti ko nga gihigugma nako ang Simbahan miingon siya, ‘Kita nasayud, ug ang Ginoo gusto og mga tawo nga mohatag sa tanan para sa Iyang buhat.’”³⁶

Human niini nga interbyu, sila si Ezra ug Reed gidala ngadto sa panimalay ni Presidente McKay. Sa pagpadulong didto, walay gisulti si Ezra kabahin niining kasinatian uban ni Presidente Grant, ug si Reed wala mangutana. Sa ilang pag-abut sa panimalay ni Presidente McKay, gisultihan ni Presidente McKay si Reed unsa ang nahitabo. Dayon naggakos sila si Ezra ug Reed.

Wala makatulog si Ezra niadtong gabhiuna samtang siya ug si Reed misugod sa biyahe pauli. Pagkasunod adlaw, iyang gitawagan si Flora ug gisultian kabahin sa iyang calling sa Pagka-Apostol. “Miingon si Flora nga nindot kaayo ang iyang gibati ug mipahayag sa iyang hingpit nga pagsalig nga kini akong mahimo,” misaysay siya. “Mibati ko og kasiguradoan sa pakig-istorya kaniya. Kanunay siyang mopakita og dagkong pagtuo ngari kanako kaysa ako mismo sa akong kaugalingon.”³⁷

Sa sunod nga pipila ka semana, si Ezra ug Flora nangandam aron mobalhin sa Utah, ug gipaningkamutan ni Ezra nga makahatag og maayong transisyon ngadto sa mosunod kaniya sa National Council of Farmer Cooperatives. Siya ug si Spencer W. Kimball gipaluyohan isip sakop sa Korum sa Napulog Duha ka mga Apostoles niadtong Oktubre 1, 1943, ug gi-orden isip Apostol niadtong Oktubre 7, nga si Elder Kimball ang giordinahan og una.

Sa ingon nagsugod ang pagpanglagad ni Elder Ezra Taft Benson isip usa sa “talagsaon nga mga saksi sa ngalan ni Kristo sa tibuok kalibutan” (D&P 107:23).

Imahe

Quorum of the Twelve ca. 1950 [Back Row Left to Right: Delbert L. Stapley, Henry D. Moyle, Matthew Cowley, Mark E. Petersen, Harold B. Lee, Ezra Taft Benson, Spencer W. Kimball; Front Row Left to Right: John A. Widtsoe, Stephen L. Richards, David O. McKay, Joseph Fielding Smith, Joseph F. Merrill, A.E. Bowen.

Niadtong Disyembre 22, 1945, si Presidente George Albert Smith, ang Presidente sa Simbahan niadtong higayuna, mitawag og espesyal nga miting sa Unang Kapangulohan ug sa Korum sa Napulog Duha ka mga Apostoles. Iyang gipahibalo nga ang Unang Kapangulohan nadasig sa pagpadala og Apostol nga mangulo sa European Mission ug modumala sa mga paningkamot sa Simbahan didto. Bag-ohay lang nahuman ang Ikaduhang Gubat sa Kalibutan nianang tuiga, ug daghang nasud sa Europe bag-ohay lang nagsugod sa pagbangon gikan sa malukpanon, grabe kaayong kadaut sa gubat. Gibati sa Unang Kapangulohan nga si Elder Ezra Taft Benson, mao ang hustong tawo nga mohimo sa buluhaton.

Kini nga balita naghimo og “dakong katingala” para kang Elder Benson, kinsa maoy pinakabag-o ug pinakabata nga sakop sa korum. Sama sa misyon sa iyang amahan mga 34 ka tuig na ang milabay, kini nga buluhaton makapahilayo kaniya sa iyang pamilya. Ang Unang Kapangulohan dili makasulti kon unsa kadugay siya didto. Apan, iyang gisiguro kanila nga ang iyang asawa ug mga anak mosuporta kaniya, ug siya mipahayag og hingpit nga kaandam sa pagserbisyo.³⁸ Sa wala madugay iyang gihulagway ang buluhaton nga iyang gidawat:

“Ang kadako sa buluhaton daw bug-at gayud. Sila [ang Unang Kapangulohan] mihatag namo og upat ka sugo: Una, sa pag-atiman sa espiritwal nga mga kalihokan sa Simbahan sa Europe; ikaduha, sa pagpangita og paagi aron adunay pagkaon, sinina, ug mga gamit nga pangkatulog para sa nag-antos nga mga Santos sa tibuok Europe; ikatulo, sa pagdumala sa pag-organisar og usab sa lain-laing mga misyon sa Europe; ug, ikaupat, sa pag-andam alang sa pagbalik sa mga misyonaryo adto nga mga nasud.³⁹ Apan gihatagan siya ni Presidente Smith og makahupay nga saad: “Wala ra kaayo ko mabalaka nimo. Luwas ra ka sama sa bisan asa nga dapit sa kalibutan kon imong ampingan ang imong kaugalingon, ug imo ra nga mabuhat kining talagsaon nga buluhaton.”⁴⁰

Si Elder Benson mihulagway sa kasinatian sa dihang iyang gipakigbahin ang balita sa iyang asawa ug pamilya: “Sa maanindot nga pakig-istoryahanay uban sa akong asawa, nabalaan pinaagi sa mga luha, si Flora mipahayag sa iyang mahigugmaong pasalamat ug misiguro kanako sa iyang tibuok kasingkasing nga suporta. Sa panihapon giingnan nako ang mga bata, kinsa nasurprisa, naminaw pag-ayo, ug hingpit nga misuporta.”⁴¹

Sa dihang si Elder Benson ug ang iyang kompanyon, si Frederick W. Babbel, miabut sa Europe, sila nagguol tungod sa mga sakit, kalisud, ug kalamidad nga ilang nakita sa palibut. Sama pananglit, sa usa ka sulat para kang Flora, gihisgutan ni Elder Benson ang bahin sa mga inahan nga mapasalamaton nga sila nakadawat og sabon, mga dagum ug hilo, ug orange. Wala na nila kini makita sulod sa daghang katuigan. Nakita ni Elder Benson, nga tungod sa gamayng rasyon nga gihatag kanila kaniadto, sila “gipanggutom kay ilang gipalabi ang ilang mga anak uban sa tinuod nga diwa sa pagkainahan.”⁴² Gihisgutan niya ang bahin sa gipahigayon nga mga miting sa Simbahan sa “naguba sa bomba nga [mga] building” ug sa “daw hingpit nga kangitngit.”⁴³ Gihisgutan niya ang bahin sa mga namakwit—“kabus, mga tawo nga wala kaloy-i, … napalayas gikan sa malipayong panimalay ngadto sa wala masayri nga padulngan.”⁴⁴ Gihisgutan sab niya ang mga milagro diha sa makahahadlok nga mga resulta sa gubat.

Usa ka milagro nga makita sa kinabuhi sa mga Santos sa Ulahing mga Adlaw sa tibuok Europe. Sa pagpadulong didto, si Elder Benson naghunahuna kon unsa kaha ang pagdawat sa mga Santos kaniya. “Mapuno ba sa kayugot ang ilang mga kasingkasing? Masuko ba kaha sila? Magmahay ba sila sa Simbahan?” Nadasig siya sa iyang nakita:

“Samtang nagtan-aw ko sa ilang nagkagidlay nga hitsura, luspad, daut, daghan niining mga Santos nagsul-ob og daw trapo, pipila kanila nagtiniil, nakita nako ang kahayag sa pagtuo sa ilang mga mata samtang nagpamatuod sila sa kabalaan niining talagsaong buhat sa ulahing mga adlaw, ug mipahayag og pasalamat sa mga panalangin sa Ginoo. …

“Among nakita nga ang atong mga miyembro nagpadayon sa talagsaong paagi. Ang ilang pagtuo lig-on, mas midako ang ilang debosyon, ug dili matupngan ang ilang pagkamatinud-anon. Among nakita nga may gamay, kon aduna man, kasubo o kawalay paglaum. Adunay diwa sa panagdait ug panag-igsoonay nga mabati gikan sa usa ka misyon ngadto sa pikas misyon, ug samtang kami nagbiyahe, ang mga Santos mihangyo kanamo nga ipangumusta sila sa ilang mga kaigsoonan sa ubang mga nasud bisan ang ilang nasud nakipaggubat mga pipila pa lang ka bulan ang milabay.” Gani ang mga namakwit “nanganta og mga awit sa Zion … nga kinasingkasing” ug “dungan nga nag-ampo sa gabii ug buntag ug nagpamatuod … kabahin sa mga panalangin sa ebanghelyo.”⁴⁵

Laing milagro mao ang kalig-on sa programa sa welfare sa Simbahan. Kini nga paningkamot, nga gisugdan wala pa kaabut og 10 ka tuig, nakaluwas sa kinabuhi sa daghang mga Santos sa Ulahing mga Adlaw sa Europe. Ang mga Santos napanalanginan tungod kay ila gyud nga gisunod ang mga baruganan sa welfare. Sila nagtinabangay pagtubag sa ilang panginahanglan, nagbinahinay og pagkaon, sinina, ug uban pang mga supply, ug sila nananom sa binombohan nga mga building. Sila napanalanginan tungod kay ang mga Santos sa Ulahing mga Adlaw gikan sa ubang bahin sa kalibutan midonar og mga butang aron pagtabang nila—mikabat og 2,000 ka tonelada nga mga supply. Gihisgutan ni Elder Benson ang kabahin sa mga lider sa Simbahan nga nakahilak sa pagkakita sa nag-unang pagkaon nga ilang maapud-apud ngadto sa lokal nga mga miyembro, ug siya miingon nga siya nagbarug sa kongregasyon diin mga 80 porsyento kanila nagsul-ob sa sinina nga gipadala pinaagi sa programa sa welfare.⁴⁶ Sa iyang pagpamulong sa kinatibuk-ang komperensya human siya mipauli, siya miingon: “Akong mga kaigsoonan, kamo ba nangita pa og dugang ebidensya sa panginahanglan niining programa ug sa inspirasyon nga nagpaluyo niini? … Sulti-an ko kamo ang Dios nagdumala niining programaha. Dinasig kini!”⁴⁷

Imahe

Ezra Taft Benson in Bergen, Norway. Caption: "Inspecting welfare supplies with Pres. Petersen in mission office basement." Collection Summary: Black-and-white views taken during Benson's February-December 1946 mission to postwar Europe to meet with Latter-day Saints, direct distribution of welfare supplies, and arrange for resumption of missionary work.

Si Elder Benson ug si Brother Babbel nakasinati og laing milagro samtang ang Ginoo miandam og paagi aron sila makabiyahe sa mga nasud sa Europe nga nagun-ob sa gubat. Balik-balik, nga si Elder Benson mihangyo sa mga opisyales sa militar aron tugutan nga makasulod sa ubang dapit sa rehiyon aron makighimamat sa mga Santos ug mag-apud-apud og hinabang. Balik-balik usab, ang tubag sa mga lider ug sa uban ngadto kaniya: “Wala ba mo kakita nga adunay gubat dinhi? Walay sibilyan ang tugutan sa pagsulod.” Ug balik-balik, dihang gitan-aw nila ang mga mata sa mga lider ug kalmadong mipasabut sa iyang misyon, siya ug si Brother Babbel gitugutan nga mobiyahe ug tumanon ang ilang buluhaton nga gisangun sa Ginoo kanila.⁴⁸

Mga 11 ka bulan ang milabay, gipulihan si Elder Benson ni Elder Alma Sonne, usa ka Assistant sa Napulog Duha, kinsa miserbisyo sa Europe uban sa iyang asawa, si Leona. Si Brother Babbel nagpabalin aron tabangan ang mga Sonne. Sukad sa pagbiya ni Elder Benson sa Siyudad sa Salt Lake niadtong Enero 29, 1946, hangtud sa iyang pag-uli niadtong Disyembre 13, 1946, siya nakabiyahe og mga 61,236 ka milya (mga 98,550 ka kilometro). Si Elder Benson mibati nga ang misyon nagmalampuson, apan dali nga misulti: “Nasayud ko sa tinubdan sa kalamboan nga nakatabang sa among mga paningkamot. Sukad-sukad wala nako mabati nga mahimong posible para nako o sa akong mga kauban nga matuman ang misyon nga gisangun kanamo kon walay paggiya sa gahum sa Makagagahum.”⁴⁹ Ang kalampusan sa misyon makita sa kalig-on sa Simbahan sa mga nasud sa Europe, bag-ong naorganisar ug naglambo. Ang kalampusan makita usab sa kinabuhi sa indibidwal nga mga Santos—mga indibidwal sama niadtong tawo nga miduol ni Presidente Thomas S. Monson daghang tuig nang milabay diha sa miting sa Zwickau, Germany. Iyang gihangyo si Presidente Monson nga ipangumusta siya ni Ezra Taft Benson. Dayon siya miingon: “Iyang giluwas akong kinabuhi. Iya kong gihatagan og pagkaon ug sinina nga sul-ubon. Iya kong gihatagan og paglaum. Panalanginan siya sa Dios!”⁵⁰

Samtang si Elder Benson layo sa panimalay, napahinumduman siya sa usa ka butang nga iyang giamuma sukad pa sa iyang pagkabatan-on: sa iyang pagkanasudnon sa Tinipong Bansa sa Amerika. Gikan sa iyang amahan, si George Taft Benson Jr., nahigugma sa iyang yuta nga natawhan ug sa mga baruganan diin kini natukod. Iyang nakat-unan nga ang Konstitusyon sa Tinipong Bansa sa Amerika—ang dokumento nga nagdumala sa mga balaod sa nasud—giandam sa dinasig nga mga tawo. Gikalipay kaayo niya ang katungod sa pagbutar, ug kanunay niyang mahinumduman ang panag-istoryahanay niya uban sa iyang amahan human sa eleksyon. Nasayran sa publiko nga si George misuporta og usa ka kandidato, ug gani mag-ampo siya para niining tawhana diha sa mga pag-ampo sa pamilya. Human nga nahibaloan ni George nga napilde ang iyang kandidato sa eleksyon, nakadungog si Ezra nga siya nag-ampo para sa tawo nga nakadaug. Si Ezra nangutana sa iyang amahan nganong nag-ampo siya para sa kandidato nga dili niya gusto. “Anak,” mitubag si George, “Sa akong hunahuna mas gikinahanglan niya ang atong pag-ampo kaysa kadtong kandidato nga akong gusto.”⁵¹

Niadtong Abril 1948, si Elder Benson namulong sa una sa daghan niyang pakigpulong sa kinatibuk-ang komperensya nga nag-focus sa “propetikanhong misyon” sa Tinipong Bansa sa Amerika ug sa kaimportante sa kagawasan. Siya mipamatuod nga giandam sa Ginoo ang Estados Unidos isip “sinugdanan sa kalingkawasan” aron ang ebanghelyo mapahiuli didto.⁵² “Kita mga sumusunod sa Prinsipe sa Kalinaw,” gitudlo niya sa dapit sa katapusan sa iyang pagpamulong “ug kinahanglan natong ipahinungod og usab ang atong kinabuhi aron isangyaw ang kamatuoran ug pagkamatarung ug pagpreserbar sa … kalingkawasan ug kagawasan.”⁵³ Sa iyang sunod nga mga pagpamulong, iyang gihisgutan nga ang Tinipong Bansa sa Amerika mao ang “sentro sa mga buluhaton sa Ginoo niining ulahing mga adlaw.”⁵⁴

Si Elder Benson mipasidaan sa mga hulga sa kagawasan sa Estados Unidos ug sa tibuok kalibutan. Kanunay niyang gipanghingusgan ang pagsupak sa “mga sistema nga pugson ang tawo” diha sa gobyerno, “nga sukwahi sa mahangturong mga baruganan.”⁵⁵ Mipasidaan usab siya sa ubang mga impluwensya nga naghulga sa kagawasan, lakip sa binastos nga kalingawan, kakulang og pagtahud sa adlaw nga Igpapahulay, pagkadili seryuso, ug sayop nga mga pagtulun-an.⁵⁶ Iyang giawhag ang mga Santos sa Ulahing mga Adlaw sa tibuok kalibutan sa paggamit sa ilang impluwensiya aron pagsiguro nga ang maalamon ug buotang mga tawo ang mapili sa gobyerno.⁵⁷ Siya mipahayag: “Ang epektibong pagsangyaw sa ebanghelyo molambo lang sa palibut nga anaa ang kagawasan. Oo, kitang tanan, ganahan sa kagawasan. Apan dili kana paigo. Kinahanglan natong proteksyunan ug ampingan kon unsa man ang atong ganahan. Kinahanglan natong ipreserbar ang kagawasan.”⁵⁸

Niadtong Nobyembre 24, 1952, ang madasigong mga pulong ni Elder Benson kabahin sa patriotismo nasulayan sa dihang nakadawat siya og imbitasyon nga moserbisyo sa iyang nasud. Mibiyahe siya ngadto sa Siyudad sa New York tungod sa imbitasyon ni Dwight D. Eisenhower, nga bag-ohay lang napili isip presidente sa Estados Unidos. Si Presidente Eisenhower mikonsiderar kang Elder Benson nga paserbisyuhon sa iyang kabinete—buot ipasabut, usa sa iyang eksperto nga tigtambag—sa posisyon nga secretary sa agrikultura sa tibuok nasud. Si Elder Benson mibati nga napasidunggan niini. “Apan,” sa wala madugay siya miingon, “Dili nako gusto ang trabaho. … Walay tawo sa iyang eksaktong hunahuna, miingon ko sa akong kaugalingon, magtinguha nga mahimong Secretary sa Agrikultura niining panahona. … Nasayud ko unsay problema nianang posisyona: dako nga panagsumpaki, grabe nga pagpamugos, komplikadong mga problema. …

“Apan dili ra ang mga problema ug pagpamugos ang akong gikabalak-an. Kitang tanan anaa niini. Sama sa daghang mga Amerikano, nagduha-duha sab ko nga aktibong moapil sa politika. Tinuod, ganahan kong makighimamat og mga tawo nga maayo og mga ideya ug buotan nga mapili ug matudlo sa pagpadagan sa gobyerno, apan kana lahi ra nga ako mismo ang moapil. …

“Labaw sa tanan, hinoon, mas kontento ra ko sa akong buhat isip usa sa sakop sa Konseho sa Napulog Duha. … wala koy tinguha o may intensyon nga mohimo og kausaban.”⁵⁹

Sa wala pa makigkita sa Napiling Presidente nga si Eisenhower, nagpatambag si Elder Benson ni Presidente David O. McKay, ang Presidente sa Simbahan niadtong panahona. Giingnan siya ni Presidente McKay: “Brother Benson, wala koy pagduhaduha niining butanga. Kon ang oportunidad moabut sa hustong diwa nan sa akong hunahuna imo gyud ning dawaton.”⁶⁰ Kining direkta nga tambag, inubanan sa dakong tinguha ni Elder Benson nga “epektibo niyang mapanglimbasugan ang [iyang] mga pagtuo isip Amerikano,” misangput sa gitawag niya og usa ka “pagpamalandong.”⁶¹

Sa dihang si Mr. Eisenhower ug si Elder Benson nagkahimamat sa unang higayon, wala maglangay-langay ang napiling presidente sa pagtanyag ni Elder Benson sa posisyon isip secretary sa agrikultura. Diha-diha dayon misulti si Elder Benson sa mga rason nganong dili siya ang husto nga tawo sa trabaho, apan wala mohunong ang Napiling Presidente nga si Eisenhower. Siya miingon: “Kita adunay buhatunon. Prangka lang, dili nako gusto nga mahimong Presidente, sa dihang nagsugod na ang pagpamugos. Apan dili ka makatalikod sa pagserbisyo sa Amerika. Gusto ko nga apil ka sa akong grupo, ug ayaw balibari.”⁶²

“Mao na kadto,” misaysay si Elder Benson. “Ang mga kondisyon sa tambag ni Presidente McKay natagamtam. Bisan tuod mibati ko nga nadawat na nako sa Simbahan ang pasidungog nga mas dako pa kaysa mahimo sa gobyerno, ug giingnan nako siya, gidawat nako ang responsibilidad nga mahimong Secretary sa Agrikultura nga moserbisyo og dili moubos sa duha ka tuig—kon gusto niya ang ingon niana kadugayon.”⁶³

Diha-diha dayon human og dawat sa posisyon, giubanan ni Elder Benson ang Napiling Presidente nga si Eisenhower sa usa ka news conference, diin ang iyang pagkapili gipahibalo sa nasud. Pagkahuman sa conference, mibalik siya sa iyang hotel. Iyang gitawagan si Flora ug giingnan nga ang Napiling Presidente nga si Eisenhower mihangyo kaniya nga moserbisyo ug iyang gidawat ang tanyag.

Mitubag si Flora: “Nasayud ko nga iya kadtong buhaton. Ug nasayud ko nga imong dawaton.”

Mipasabut si Ezra: “Kini nagpasabut og dako kaayo nga responsibilidad—ug mas daghang problema para natong duha.”

“Kahibalo ko,” miingon siya, “apan kini kabubut-on sa Dios.”⁶⁴

Imahe

President Ezra Taft Benson being sworn in as the Secretary of Agriculture

Sama sa gilauman ni Elder Benson, ang iyang administrasyon isip secretary sa agrikultura gubot nga kasinatian para kaniya ug sa iyang pamilya. Apan miinsister siya nga wala siya “magtinguha nga mosikat”—apan gusto lang siya nga “moserbisyo sa agrikultura ug moserbisyo sa Amerika”⁶⁵—ug iyang gituman ang iyang personal nga panumpa: “Maayo nga estratehiya ang pagbarug sa unsay husto, bisan kon kini dili uyunan sa tanan. Tingali moingon ko, ilabi na kon kini dili uyunan sa tanan.”⁶⁶ Maayo kay wala siya maghunahuna nga mosikat; samtang nagpabilin siyang kalma ug matinud-anon sa iyang konbiksyon, ang iyang popularidad sa mga politiko ug mga lumulupyo mikunhod og maayo. May higayon, nga gusto sa mga tawo nga papahawaon siya sa iyang posisyon isip secretary sa agrikultura.⁶⁷ May higayon, nga miingon ang mga tawo nga siya maayong kandidato sa pagka bise presidente sa Estados Unidos.⁶⁸

Gani sa iyang tahas isip lider sa gobyerno, si Elder Benson bukas sa iyang Kristiyanong mga pagtuo, sa iyang pagpamatuod sa gipahiuli nga ebanghelyo, ug debosyon sa Simbahan ni Jesukristo sa mga Santos sa Ulahing mga Adlaw. Kon siya mopahigayon og miting sa iyang kaubanan sa Departamento sa Agrikultura, ang miting sugdan og pag-ampo.⁶⁹ Iyang padalhan si Presidente Eisenhower og mga bersikulo gikan sa Basahon ni Mormon nga nanagna sa kapaingnan sa Tinipong Bansa sa Amerika, ug sa wala madugay miingon ang presidente nga iya kining gibasa “nga may dakong interes.”⁷⁰ Iyang gihatagan og mga kopya sa Basahon ni Mormon ang mga lider sa ubang nasud usab.⁷¹ Niadtong 1954, si Edward R. Murrow, sikat nga tigbalita sa telebisyon sa Estados Unidos, mihangyo ni Elder Benson nga i-feature ang pamilyang Benson sa ma-Biyernes sa gabii nga programa nga gitawag og “Person to Person.” Sa sinugdanan gibalibaran kini ni Elder ug Sister Benson, apan misugot sila dihang nabasa sa ilang anak nga si Reed ang imbitasyon, kinsa miingon nga kini dakong oportunidad sa misyonaryo nga paningkamot. Niadtong Septyembre 24, 1954, ang mga tawo sa tibuok nasud live nga mitan-aw, sa wala praktisi nga family home evening sa panimalay sa mga Benson. Si Mr. Murrow nakadawat og mas daghang fan mail isip resulta nianang programa kaysa iyang nadawat sukad. Ang mga tawo sa tibuok nasud ug sa lain-laing mga tinuohan misulat aron pasalamatan ang mga Benson sa ilang nindot nga ehemplo.⁷²

Si Elder Benson miserbisyo isip secretary sa agrikultura sulod sa walo ka tuig, sa tibuok panahon nga si Presidente Eisenhower nagdumala sa Estados Unidos. Si Presidente McKay miingon nga ang buhat ni Elder Benson mahimong “timaan sa kasaysayan isip pasidungog sa Simbahan ug sa nasud.”⁷³ Si Elder Benson nahinumdom niadtong katuigan sa nasudnong silaw sa kahayag ug miingon: “Gihiguma ko kining talagsaong yuta. Usa ka pasidungog nga makaserbisyo.”⁷⁴ Mikomentaryo usab siya, “Kon kini akong buhaton pag-usab, mao ra gihapon ang akong buhaton.”⁷⁵ Naglantaw sa unahan sa padayon niyang pagpangalagad isip Apostol, siya miingon, “Karon [akong] igahin ang akong panahon sa bugtong butang nga mas ganahan nako kaysa agrikultura.”⁷⁶

Bisan tuod natapos na ang pagserbisyo ni Elder Benson sa gobyerno niadtong 1961, ang iyang gugma para sa iyang nasud ug sa mga baruganan sa kagawasan nagpadayon. Daghan sa iyang mga pakigpulong sa kinatibuk-ang komperensya, naka-focus niining hilisgutan. Iyang gi-refer ang Tinipong Bansa sa Amerika isip “yuta nga akong gihigugma sa tibuok nakong kasingkasing.”⁷⁷ Mipadayon usab siya, “Gikalipay nako ang pagka-patriotismo ug gugma sa tanang nasud.”⁷⁸ Sa iyang pakigtambag sa tanang mga Santos sa Ulahing mga Adlaw sa paghigugma sa ilang nasud, siya mitudlo: “Ang pagka-patriotismo labaw pa kaysa pagwara-wara sa bandila ug makapadasig nga mga pulong. Kini ang paagi kon giunsa nato pagtubag ang mga problema sa publiko. Ipahinungod nato pag-usab ang atong kaugalingon isip tinuod nga bayani.”⁷⁹ “Dili sama sa mga oportunista sa politika, ang tinuod nga kabatid sa pangagamhanan naghatag og bili sa mga baruganan labaw pa kaysa kasikat ug magtrabaho aron mahibaloan sa tanan kining maalamon ug patas nga mga baruganan sa politika.”⁸⁰

Isip Apostol ni Ginoong Jesukristo, si Elder Ezra Taft Benson misunod sa sugo nga “panglakaw … sa tibuok kalibutan, ug iwali ninyo ang [ebanghelyo] ngadto sa tibuok nga kabuhatan” (Marcos 16:15) ug sa “pag-abli sa pultahan pinaagi sa pagpahayag sa ebanghelyo ni Jesukristo” (D&P 107:35). Siya miserbisyo sa daghang bahin sa kalibutan, nag-tour og mga misyon ug nagtudlo sa mga tawo.

Iyang gikalipay ang kahigayunan nga makig-uban sa mga Santos sa Ulahing mga Adlaw. Sa kinatibuk-ang komperensya siya mikomentaryo: “Usahay sultian nako ang akong asawa, sa akong pag-uli gikan sa pagbisita sa mga stake, wala ko masayud unsa gyud ang langit, apan wala koy lain nga pangayoon didto gawas nga mabatyagan ang kanindot ug kalipay nga makauban ang matang sa mga tawo nga akong nahimamat sa pagpangulo diha sa mga stake ug ward sa Zion ug sa mga misyon sa yuta. Sa tinuoray napanalanginan mi pag-ayo.”⁸¹ Sa laing pakigpulong siya miingon: “Adunay tinuoray nga diwa sa panag-igsoonay ug panagdait sa Simbahan. Kini gamhanan, daw dili mahikap, apan tinuod gayud. Kini akong gibati, ingon man sa akong mga kaubanan, samtang kami mobisita sa mga stake ug ward sa Zion ug sa tibuok misyon sa yuta. … Kanunay anaa ang pagbati sa panagdait ug panag-igsoonay. Kini usa sa nindot nga mga butang kabahin sa pagkamiyembro sa Simbahan ug gingharian sa Dios.”⁸²

Ganahan usab kaayo si Elder Benson nga mopakigbahin sa iyang pagsaksi sa Manluluwas ngadto sa ubang tinuohan. Sama pananglit, niadtong 1959 kuyog niya si Sister Benson ug upat ka sakop sa Departamento sa Agrikultura sa Estados Unidos aron mobisita sa pito ka nasud, lakip ang Soviet Union. Bisan tuod miadto siya didto tungod sa iyang posisyon isip secretary sa agrikultura, ang iyang apostolikanhong pagpamatuod nakatandog sa daghang kasingkasing. Iyang gisaysay:

“Padulong sa airport sa [among] katapusang gabii sa Moscow, gihisgutan nako … sa usa sa among tiggiya ang akong kasagmuyo nga wala mi oportunidad nga makabisita sa usa ka simbahan sa Russia. Misulti siya og pipila ka pulong sa drayber, ang sakyanan miliko sa tunga-tunga sa dalan ug dayon mihunong mi sa atubangan sa karaang stucco nga building sa ngitngit, taas, hapsay nga dalan nga dili layo sa Red Square. Kini ang Central Baptist Church.

“Nag-ulan kadto, dili maayo ang panahon niadtong Oktubre sa gabii nga bugnaw ang kahanginan. Apan sa among pagsulod sa simbahan, kini puno; may mga tawo nga nanagbarug sa hawanan, sa agianan, gani sa dalan. Kada Dominggo, Martes, ug Huwebes, among nasayran, parehas nga pundok sa mga tawo.

“Gitan-aw nako ang nawong sa mga tawo. Kadaghanan mga hamtong apan adunay ubay-ubay nga mga batan-on. Siguro mga upat sa lima ka tawo mga babaye, kadaghanan nila nagsul-ob og scarf [tabon] sa ilang ulo. Gigiyahan kami sa dapit nga duol sa pulpito. …

“Ang ministro namulong og gamay, ug dayon gipatugtog ang organ ug nagsugod og kanta og himno diin ang tibuok kongregasyon nagkahiusa sa pagkanta. Nakadungog sa usa ka libo ngadto sa 1500 ka mga tingog didto nahimong usa sa makatandog nga kasinatian sa akong tibuok kinabuhi. Sa atong komon nga pagtuo isip Kristiyano, natandog kami sa ilang mensahe sa pag-abi-abi nga nagsumpay sa tanang kalainan sa pinulongan, panggobyerno, sa kasaysayan. Ug samtang naningkamot ko nga maulian gumikan sa pagka-emosyonal, ang ministro mihangyo nako, pinaagi sa usa ka tighubad nga nagbarug didto, sa pagpamulong sa kongregasyon.

“Nataud-tauran una aron makontrolar nako ang akong pagbati aron mosugot. Dayon miingon ko, sa pagsugod, ‘Kabuotan gyud ninyo nga makapamulong ko ninyo.

“‘Dala nako ang pagtimbaya gikan sa minilyong simbahan sa mga tawo sa Amerika ug sa tibuok kalibutan.’ Ug sa kalit lang ingon og natural lang nga makig-istorya niining mga Kristiyano kabahin sa labing sagradong mga kamatuoran nga nasayran sa tawo.

“‘Ang atong Langitnong Amahan dili layo. Siya mahimong duol kaayo nato. Ang Dios buhi, nasayud ko nga Siya buhi. Siya ang atong Amahan. Si Jesukristo, ang Manunubos sa Kalibutan, nagbantay niining kalibutan. Siya ang modumala sa tanang butang. Ayaw kahadlok, sunda ang Iyang mga sugo, paghigugmaay sa usag usa, pag-ampo alang sa kalinaw ug ang tanan mamaayo ra.’

“Samtang ang kada sentence gihubad para sa kongregasyon, nakakita ko og usa ka babaye mikuha sa iyang panyo ug sama sa pahayag sa nakaobserbar niini misugod sa ‘pagwara-wara niini sama sa inahan nga nanamilit sa iyang bugtong anak.’ Ang ilang ulo miduko samtang hinay nilang gisulti ja, ja, ja! (o, o, o!). Dayon nakamatikod ko sa unang higayon nga bisan ang galeriya napuno ug daghang tawo nagbarug nga nagsandig sa mga bong-bong. Gitan-aw nako ang usa ka tigulang babaye sa akong atubangan, gitabunan ang iyang nawong sa simpleng karaan nga scarf, usa ka shawl sa iyang abaga, ang iyang tigulang, kunot-kunot nga nawong napuno sa pagtuo. Direkta kong namulong kaniya.

“‘Kini nga kinabuhi usa lamang ka bahin sa kahangturan. Buhi na kita sa wala pa kita mianhi isip espiritu nga anak sa Dios. Kita mabuhi pag-usab inigbiya nato niining kinabuhia. Gibugto ni Kristo ang bugkos sa kamatayon ug nabanhaw. Kitang tanan mabanhaw.

“‘Mituo gayud ako sa pag-ampo. Nasayud ko nga posible ang pagpangamuyo nianang Dili Makita nga Gahum nga makahatag nato og kalig-on ug mopalig-on nato panahon sa kalisud.’ Sa kada sentence nga akong gisulti, ang tigulang miuyon. Ug tigulang man, huyang, kunot-kunot ang iyang nawong, kadto nga babaye maanyag sa iyang debosyon.

“Dili ko kahinumdom sa tanan nakong gisulti, apan nakahinumdom ko sa pagbati nga gibayaw, nadasig sa naka-focus nga atensyon niining mga tawhana kinsa dili matarug sa ilang pagtuo sa Dios nga ilang giserbisyuhan ug gihigugma.

“Sa pagtapos miingon ko, ‘Ibilin ko kaninyo ang akong pagsaksi isip sulugoon sa Simbahan sa daghang katuigan nga ang kamatuoran molahutay. Ang panahon nahiuyon sa kamatuoran. Ang Dios mopanalangin kaninyo sa tibuok ninyong kinabuhi, akong pag-ampo sa ngalan ni Jesukristo, Amen.’

“Niana natapos ang wala andama nga mubong pakigpulong, tungod kay wala na koy masulti, ug milingkod ko. Ang kongregasyon mikanta dayon sa akong paborito nga himno sa dihang bata pa ko, ‘God Be with You Till We Meet Again.’ Mibiya mi sa simbahan samtang nanganta sila ug samtang naglakaw mi sa agianan, ilang giwara-wara ang ilang mga panyo sa pagpanamalit—ingon og ang tanang 1500 nanamilit sa among pagbiya.

“Daghan ko og pribelihiyo nga mamulong sa daghang simbahan sa tibuok kalibutan, ang epekto niadtong kasinatian lisud gayud nga ihulagway. Dili gyud nako kalimtan kadtong gabhiuna samtang buhi pa ko.

“Panagsa ra, kon duna man, nga mibati ko sa panaghiusa sa katawhan ug sa dako kaayong tinguha sa kasingkasing sa tawo para sa kaluwasan nianang higayona. …

“Miuli ko [sa balay] gihukman nga isugilon kini nga istorya kanunay—tungod kay kini nagpakita kon sa unsang paagi ang diwa sa kagawasan, ang diwa sa panag-igsoonay, ug ang diwa sa relihiyon nagpadayon bisan pa sa tanang paningkamot nga gun-ubon kini.”⁸³

Niadtong Disyembre 26, 1973, si Elder Benson nakadawat og wala damhang balita nga ang Presidente sa Simbahan, si Presidente Harold B. Lee, kalit nga namatay. Tungod sa pagkamatay ni Presidente Lee, ang mga magtatambag sa Unang Kapangulohan mibalik sa ilang dapit diha sa Korum sa Napulog Duha. Upat ka adlaw ang milabay, si Spencer W. Kimball gi-set apart isip Presidente sa Simbahan, ug si Ezra Taft Benson gi-set apart isip Presidente sa Korum sa Napulog Duha ka mga Apostoles. Tungod niining responsibilidad, nadugangan ang administratibang buluhaton ni Presidente Benson. Siya ang modumala sa sinemanang miting sa korum ug mohan-ay sa buhat sa iyang mga kauban sa korum, lakip sa ilang buluhaton sa pagdumala sa mga komperensya sa stake ug mga tour sa misyon ug pag-call og mga patriyarka sa stake. Aduna usab siyay pipila ka responsibilidad sa pagdumala sa ubang mga General Authority. Usa ka kawani ang mohimo sa klerikal nga mga buluhaton aron pagtabang kaniya ug sa iyang kaubanan sa pag-organisar sa buluhaton.⁸⁴

Sa miting sa Korum sa Napulog Duha, gipakigbahin ni Presidente Benson ang iyang mga hunahuna kabahin sa pagserbisyo isip ilang Presidente: “Nabalaka kaayo ko niining dakong responsibilidad—dili pagbati sa kahadlok, tungod kay nasayud ko nga dili nato mapakyas kini nga buhat … kon buhaton lang nato ang atong pinakamaayo. Nasayud ko nga ang Ginoo mopaluyo kanato, apan nabalaka ko nga ma-call niining pagpangulo sa grupo sa mga lalaki sama kaninyo—linain nga mga saksi ni Ginoong Jesukristo.”⁸⁵

Gihiusa ni Presidente Benson ang pagkamapainubsanon ug ang kinaiya sa pagkamaisugon ug pagkamakanunayon nga kakugi sa trabaho. Kanunay niyang idelegar ang mga responsibilidad sa uban aron sila adunay oportunidad nga makaserbisyo. Siya naglaum nga buhaton sa mga nangulo ang pinakamaayo, sama sa iyang gilauman sa Iyang kaugalingon. Bisan tuod daghan siya og ipabuhat, apan mabination siya. Maminaw siya sa mga ideya sa iyang kaubanan, mopasiugda og bukas nga diskusyon sa mga miting sa korum. Sila si Elder Boyd K. Packer, Russell M. Nelson, ug Dallin H. Oaks, kinsa mga junior nga sakop sa Korum sa Napulog Duha ubos sa iyang pagpangulo, miingon nga sila kanunay niyang dasigon sa pagpakigbahin sa ilang mga ideya, bisan ang ilang ideya lahi sa iyang ideya.⁸⁶

Ang mga sakop sa Korum sa Napulog Duha nakakat-on nga ang pagpangulo ni Presidente Benson nakabase sa wala mausab nga mga baruganan. Sama pananglit, balik-balikon niya sa pagsulti, “Hinumdumi, mga kaigsoonan, niini nga buhat ang Espiritu mao ang labing mahinungdanon.”⁸⁷ Ug aduna siyay usa ka sumbanan nga basihan sa tanang desisyon sa korum: siya mangutana, “Unsa ang labing ikaayo sa Gingharian?” Si Elder Mark E. Petersen, kinsa miserbisyo niya sa Korum sa Napulog Duha, miingon, “Ang tubag nianang pangutanaha mao ang butang nga basihan sa matag importanting desisyon nga gibuhat ni Presidente Ezra Taft Benson sa iyang tibuok kinabuhi.”⁸⁸

Si Presidente Spencer W. Kimball namatay niadtong Nobyembre 5, 1985, tungod sa grabing sakit. Ang pagpangulo sa Simbahan anaa na sa Korum sa Napulog Duha ka mga Apostoles, uban ni Presidente Ezra Taft Benson isip ilang Presidente ug senior nga sakop. Lima ka adlaw ang milabay, sa balaan ug sagradong miting sa Korum sa Napulog Duha sa Salt Lake Temple, si Presidente Benson gi-set apart isip Presidente sa Simbahan. Nadasig siya sa pag-call ni Presidente Gordon B. Hinckley nga moserbisyo isip iyang Unang Magtatambag sa Unang Kapangulohan ug Presidente Thomas S. Monson sa pagserbisyo isip iyang Ikaduhang Magtatambag.

Imahe

Portrait of President Ezra Taft Benson, President Gordon B. Hinckley, and President Thomas S. Monson

Si Presidente Benson nasayud nga nagkasakit si Presidente Kimball, ug siya nagtinguha nga mabaskog pag-usab ang iyang higala. “Kini ang adlaw nga wala nako damhang moabut,” miingon si Presidente Benson sa usa ka press conference human siya gi-set apart isip Presidente sa Simbahan. “Ang akong asawa, si Flora, ug ako kanunayng nag-ampo nga motaas pa ang kinabuhi ni Presidente Kimball dinhi sa kalibutan, ug laing milagro ang nahitabo diha kaniya. Karon nga ang Ginoo namulong, himoon namo ang among pinakamaayo, ubos sa Iyang paggiya, sa pagpadayon sa buhat dinhi sa yuta.”⁸⁹

Sa iyang unang kinatibuk-ang komperensya isip Presidente sa Simbahan, si Presidente Benson mipakigbahin sa nag-una niyang focus alang sa pagpadayon sa buhat sa Ginoo. “Sa atong panahon,” siya mipahayag, “ang Ginoo mipadayag sa panginahanglan nga hatagan pag-usab og gibug-aton ang Basahon ni Mormon.”⁹⁰

Isip sakop sa Korum sa Napulog Duha, kanunay nga nagsangyaw si Presidente Benson kabahin sa kaimportante sa Basahon ni Mormon.⁹¹ Isip Presidente sa Simbahan, mas gihatagan niya og pagtagad kini nga hilisgutan. Siya mipahayag nga “ang tibuok Simbahan gitunglo” tungod kay ang mga Santos sa Ulahing mga Adlaw wala kaayo magtuon sa Basahon ni Mormon o wala kaayo magsunod sa mga pagtulun-an niini. Siya miingon: “Ang Basahon ni Mormon wala sukad, o wala pa, nahimong sentro sa atong personal nga pagtuon, pagtudlo sa pamilya, pagsangyaw, ug misyonaryo nga buhat. Kinahanglan nato kining hinulsulan.”⁹² Balik-balikon niya sa pagkutlo ang pamahayag ni Propetang Joseph Smith nga ang mga tawo “labi nga maduol sa Dios pinaagi sa pagsunod sa iyang mga lagda, kay sa bisan hain nga basahon,”⁹³ ug iyang ipasabut kana nga saad. “Adunay gahum niana nga basahon,” siya miingon, “nga mosugod sa pagdagayday sa inyong mga kinabuhi sa higayon nga sugdan ninyo ang tinuoray nga pagtuon sa basahon.”⁹⁴ Iyang giawhag ang mga Santos sa Ulahing mga Adlaw nga “lukupon ang kalibutan ug [ang ilang] kinabuhi sa Basahon ni Mormon.”⁹⁵

Sa tibuok kalibutan, ang mga Santos sa Ulahing mga Adlaw misunod niining tambag gikan sa ilang propeta. Isip resulta, sila nalig-on, tinagsa-tagsa ug sa kinatibuk-an.⁹⁶ Si Presidente Howard W. Hunter miingon: “Aduna ba kahay henerasyon, lakip niadtong wala pa matawo, nga mohinumdom sa administrasyon ni Presidente Ezra Taft Benson nga dili dayon makahunahuna sa iyang gugma sa Basahon ni Mormon? Tingali walay laing Presidente sa Simbahan sukad ni Propeta Joseph Smith ang mas nakatudlo sa mga kamatuoran bahin sa Basahon ni Mormon, sa paghimo niini nga inadlawng tun-anan sa tanang miyembro sa Simbahan, ug ‘lukupon ang kalibutan’ sa pag-apud-apud niini.”⁹⁷

Sama usab sa pagpamatuod ni Presidente Benson kabahin sa Basahon ni Mormon mao ang iyang pagpamatuod ni Jesukristo. Sa higayon nga daghang tawo ang dili modawat sa “kabalaan sa Manluluwas,” iyang panghingusgan “nga kining balaanong dinasig nga basahon mao ang sukaranan sa pagpamatuod sa kalibutan nga si Jesus mao ang Kristo.”⁹⁸ Sukad siya gi-orden sa Pagka-Apostol niadtong 1943, si Presidente Benson makugihong nagserbisyo isip saksi sa reyalidad nga buhi ang Manluluwas. Isip Presidente sa Simbahan, siya nagpamatuod uban sa nabag-ong kalagsik ug dinaliang tinguha bahin ni Jesukristo ug sa Iyang Pag-ula. Siya nag-awhag sa mga Santos nga “magiyahan ni Kristo” ug “mag-focus kang Kristo,”⁹⁹ nga “magpakabuhi nga nakasentro kang Kristo.”¹⁰⁰ Namulong kabahin sa Manluluwas, siya miingon, “Sa tibuok nakong kalag, gihigugma nako Siya.”¹⁰¹

Si Presidente Benson mitudlo usab sa ubang hilisgutan uban sa dinaliang tinguha ug gahum. Siya mipasidaan sa kakuyaw sa garbo. Siya mipamatuod sa mahangturong importansya sa pamilya. Siya mitudlo sa mga baruganan sa hugot nga pagtuo ug paghinulsol ug pag-focus sa mapahinungurong misyonaryo nga buhat.

Bisan wala na kaayo siya mamulong kabahin sa Tinipong Bansa sa Amerika kompara sa dihang bag-o pa siya sa pagpangalagad, iyang gisaulog ang ika-200 nga anibersaryo nga pagpirma sa Konstitusyon sa Estados Unidos pinaagi sa pagpamulong niini niadtong Oktubre 1987 nga kinatibuk-ang komperensya sa Simbahan. Ug siya nagpadayon sa paghigugma sa kagawasan ug tinuod nga patriotismo sa tibuok kalibutan. Sa ulahing bahin sa mga 1980 ug sa sayo nga bahinsa tuig 1990, siya nalipay sa balita nga natumpag ang Berlin Wall ug ang mga tawo sa Russia ug eastern Europe nakasinati og mas dakong kagawasan, uban sa gobyerno nga mas bukas ngadto sa mga relihiyon.¹⁰²

Si Presidente Benson sunod-sunod nga namulong ngadto sa mga grupo nga mga miyembro sa Simbahan. Sugod niadtong Abril 1986, siya nag-andam og mga wali nga gidirekta ngadto sa batan-ong mga lalaki, batan-ong mga babaye, mga inahan, mga home teacher, mga amahan, mga lalaki nga single, mga babaye nga single adult, mga bata, ug sa mga tigulang. Sama sa giingon ni Presidente Howard W. Hunter: “Siya namulong sa tanan ug naghunahuna sa tanan. Siya namulong sa mga babaye sa Simbahan ug sa mga lalaki. Siya namulong sa mga tigulang. Siya namulong niadtong mga single, sa kabatan-onan, ug siya ganahang mamulong ngadto sa mga bata sa Simbahan. Siya mihatag og talagsaon, personal nga tambag sa tanang miyembro, bisan unsa pa ang ilang kahimtang. Kadto nga mga wali magpadayon sa pagsuporta ug paggiya kanato samtang kita mamalandong niini sa moabut nga mga katuigan.”¹⁰³

Si Presidente Benson nakahilak sa dihang siya nakadawat og sulat gikan sa pamilya nga naimpluwensyahan sa usa sa iyang pakigpulong. Sa sulat, usa ka batan-ong amahan miingon nga siya ug ang iyang asawa nagtan-aw sa kinatibuk-ang komperensya sa telebisyon. Ang ilang tres anyos nga batang lalaki nagdula sa duol nga kwarto, diin ang komperensya madungog sa radyo. Human sa pagpaminaw sa mensahe ni Presidente Benson para sa mga bata, ang inahan ug amahan milakaw padulong sa kwarto kon asa nagdula ang ilang anak. Ang bata “mahinamon nga miingon, ‘Ang tawo sa radyo miingon nga bisan kon kita masayop, ang atong Langitnong Amahan nahigugma gihapon nato.’ Kana nga yanong pahayag,” miingon ang amahan, “nakahatag og malungtaron ug makahuluganong impresyon sa among anak. Kon mangutana ko niya karon kon unsa ang giingon ni Presidente Benson mao gihapon kana ang mahinamon niya nga itubag. Kini nakahupay nga siya nasayud nga siya adunay mabination ug mahigugmaong Amahan sa Langit.”¹⁰⁴

Sa wala madugay human sa Oktubre 1988 nga kinatibuk-ang komperensya, si Presidente Benson giatake sa kasingkasing nga dili na siya mahimong mamulong sa publiko. Sa mubong panahon, siya mitambong sa kinatibuk-ang komperensya ug ubang mga pundok-pundok sa publiko. Sa 1989 nga mga komperensya, ang iyang mga magtatambag mobasa sa mga wali nga iyang giandam. Sugod sa 1990, ang iyang mga magtatambag mopabati sa iyang gugma para sa mga Santos ug mokutlo sa iyang nanglabay nga mga wali. Ang Abril nga komperensya mao ang katapusan niyang gitambongan. Sukad niadto, sa pisikal nga paagi wala na siyay mahimo gawas sa pagtan-aw sa komperensya diha sa telebisyon.¹⁰⁵

Misaysay si Presidente Gordon B. Hinckley: “Sama sa gilauman, ang iyang lawas nagkahuyang tungod sa katigulangon. Dili na siya makalakaw sama sa una. Dili na siya makasulti sama sa una. Hinay-hinay siyang nagkahuyang, apan siya gihapon ang piniling propeta sa Ginoo kutob nga buhi siya.”¹⁰⁶ Sila si Presidente Hinckley ug Presidente Thomas S. Monson midumala sa Simbahan uban sa awtoridad ni Presidente Benson nga gidelegar ngadto kanila, apan ang Simbahan dili makahimo og bag-ong mga buluhaton nga wala kahibalo ug walay pagtugot ni Presidente Benson.¹⁰⁷

Samtang nagkahuyang si Presidente Benson, nagkasakit usab si Flora, ug siya namatay niadtong Agosto 14, 1992. Wala kaabut og duha ka tuig, pagka- Mayo 30, 1994, si Presidente Benson nakighiusa ni Flora, ug ang iyang patayng lawas gilubong tupad sa lubnganan ni Flora didto sa Whitney. Sa haya ni Presidente Benson, si Presidente Monson misaysay: “Kausa siya misulti nako, ‘Brother Monson, hinumdumi, bisan unsa pa ang isugyot sa uban, gusto nako nga ilubong ko sa Whitney, Idaho.’ Presidente Benson, among gituman ang tinguha nimo karon. Ang iyang lawas dalhon sa Whitney, apan ang iyang mahangturong espiritu mibalik na ngadto sa Dios. Sa walay pagduha-duha nakauban na niya ang iyang pamilya, iyang mga higala, ug iyang pinalanggang si Flora. …

“Ang batang mag-uuma nga nahimong propeta sa Dios mipauli na. Nagpasalamat kita nga siya naa sa atong panumduman.¹⁰⁸