Galala: Digitaka na Bula se Mate

E sa solia tu na Kalou vei ira kece na luvena ena itabagauna oqo, me vaka e a solia vei ira kece na luvena ena itabagauna sa oti, na digidigi yadua. Na galala ni digidigi oqo e sa nona iyau tu ga na tamata ena ruku ni lewa kei na matanitu ni Kalou. [Eda] a taukena ena lomalagi ni veilomalagi ni bera ni buli na vuravura, ka a qarava ka taqomaka na Turaga mai na kaukauwa i Lusefa kei ira era a tovata kei koya, ena vakamalumalumutaki nei Lusefa kei na dua na ikatolu ni lewe i lomalagi [raica iVakatakila 12:1–9; V&V 29:36–37; Mosese 4:1–4]. Ena kaukauwa ni galala ni digidigi oqo sa yaco kina o kemuni kei au kei na matatamata kece me vakatautaki vei keda na veika, vakatau vei kemuni na gaunisala o ni muria, na bula eda bulataka na veika eda kitaka ena yago.⁶

E tiki ni veika vivinaka vakalou me kakua ni vakasaurarataki e dua na tamata ki lomalagi, me kakua ni vakaukauwataki na vakasama ia me biu ga me galala me cakacaka vakataki koya. Na [Kalou] e sa vakadavora e mata ni Nona tamata na Kosipeli tawamudu, na ivakavuvuli ni bula kei na veivakabulai, ka qai biuti koya me digitaka vakaikoya se besetaka vakaikoya, me tu vua na kila dina ni yaco me vakatautaki Vua na macala ni veika e kitaka.⁷

Eda na rawata kece na veika eda cakacakataka. Na veika eda kaburaka, se vinaka se ca, eda na tamusuka na vuana [raica Kalatia 6:7; V&V 6:33].⁸

E sa vakaroti keda na Turaga, ka sa dodonu me da talairawarawa ki na nona ivakaro kevaka [me da] na rawata na veivakalougatataki ni talairawarawa.⁹

Na noda vakavolekatitaki keda ki na ivakaro ni Kalou, na levu ni noda nuidei ni noda itokani na Kalou ka wanonovi keda tiko mai o Koya kei na Luvena o Jisu e noda mata vua na Tamada, ni tiko o Koya ena kedra maliwa na tamata oqo, ka na valataka na nodra dodonu na Nona Yalododonu, ka na sabaya na iyaragi kecega e vakarautaki me saqati Saioni.¹⁰

Me da vakadreta tiko ena nodra vakasama na luveda na isau ca ni vakayacora na ivalavala ca se voroki ni dua na lawa ni Kalou; me caka me ra kila ni ra vakayacora e dua na cala era na taukena na rarawa kei na dredre ka rawarawa sara me ra drotaka kevaka era a vakayacora na ka dodonu, ka dodonu me ra vulica na ivakavuvuli oqo ena veidusimaki ka sega ni vulica ena rarawa kei na veivakalolomataki ena nodra cakava na veika e sega ni dodonu.¹¹

Au se sega vakadua ni vakayacora e dua na cala ena Lotu oqo kei na matanitu ia au sa sauma e sivia e udolu mai na kena isau dina. E sega ni rawa ni da cala ka sega ni totogitaki, e sega ni rawa ni da vakawalena e dua na ivakasala me sega na itotogi, ia na cava ena kauta mai na rarawa.¹²

Kemuni na taciqu kei na ganequ, vakasaqara na Kalou; masuti Koya ena nomuni veitikina vuni, kakua ni vuki tani mai na bula dodonu kei na dina; e sega ni dua na ka ena rawati ena kena vakayacori oqori, ia ena kau tani mai vei keda na veika kecega.¹³

O ira na tamata ka ra sega ni bulataka na dina e tu vei ira, ena dua na gauna lekaleka ga oqo se mai muri era na taukena na vakaloloma levu; ena sega na nodra marau kei na vakacegu kei na veivakabulai me vakataka na tamata ka talairawarawa ki na ivakaro ni Kalou ka vakayacora tikoga na ka sa dodonu. Era sa dau rere tu ga na tamata ca. E sega ni vakasaurarataki e dua na tagane se yalewa me vakayacora na ca, e sega ni da saumi kina. E vinaka cake me da qarava na Kalou, o ira era qarava na Kalou ena mataka, yakavi kei na bogi era mamarau tu ga veitalia ga se ra vutuniyau se dravudravu.¹⁴

Taroga vua e dua ga na tamata, vanua, matanitu, se itabatamata na taro, era na tukuna vei iko ni ra qara tiko na marau, ia era qara tiko vakacava? Taura mada na iwasewase levu duadua ni matatamata me ivakaraitaki, era qara tiko beka vakacava na marau? Ena nodra qarava tiko na tevoro ena kena totolo era rawata, ka voleka ni iotioti ni ka bula se ka era masuta na luve ni tamata, ka iotioti ni ka bula ka ra via maroroya na nona lawa sai koya na lawa ni Kalou ni lomalagi. Era na sega ni qarava na Kalou se vakarokorokotaka na yacana, se maroroya na nona lawa, ia era vosa vakacacataka na yacana, ena veisiga, ka voleka ni vuravura taucoko [era] qara tiko na marau ena ivalavala ca, voroki ni lawa ni Kalou, ka vosa vakacacataka na yacana ka biuta tani na ivurevure ka drodro duadua mai kina na marau.

Kevaka me da kila sara vakaidina ni na sega ni rawa ni da rawata na marau ena noda muria tiko na sala ki na ca ka voroka tiko na lawa ni Kalou, e dodonu me da raica ekea na kena lialia, na tagane kei na yalewa kece era na raica ni vinakati na marau e dodonu me da vakaitavitaki keda ena cakacakataki ni bula dodonu, ka cakava na loma ni Tamada mai Lomalagi, eda na qai taura kina na marau kece mai ligana, veivakalougatataki, lagilagi, veivakabulai, bula vakalou, kei na bula tawamudu, ka da na taura ena gauna oqo se ena tawamudu.¹⁵

Me da yalodina ka vakaiukuukutaki keda ena savasava ni kosipeli. E sega ni da rawata e dua na ka mai na caka ca. Na lasulasu, butabutako, vosa beca na Kalou, daumateni, vosa vakacacataka e dua, ka cakitaka na Turaga o Jisu Karisito ena kauta mai na rarawa kei na yalobibi; era vakalolovirataka na tamata ka buli me ucuya na Kalou; ia me cakava na vinaka, talairawarawa ki na ivakaro ni Kalou, na yalo ni solisoli kei na yalololoma, e kauta mai na marau kei na vakacegu kei na Yalo Tabu, ka na qai yaco mai na bula vakalou ena matanitu nei Tamada.¹⁶

Me vakalougatataki na yalomuni, na noda bula eke e vica walega na siga na kena dede, ia ena yasa kadua ni ilati eda na bula tawamudu, eda na tiko ka bula me vaka ga na dede ni nona bula na noda Dauniveibuli, kei na noda icavacava tawamudu ena vakatau mai na ivakarau ni noda vakayagataka na noda bula lekaleka vakayago eke.¹⁷

Ni da mai kila vakaidina ni noda icavacava ni mataka—tiko marau ni mataka, bula vakalou kei na lagilagi, se na noda tiko rarawa ena gauna sa bera mai, lolovira kei na vutugu, e vakatau kece sara tikoga ena gauna lekaleka eda vakayagataka ena vuravura oqo, au rawa ni kaya ni sega ni yaga vua e dua na tamata ena ruku ni lomalagi me vakayagataka na nona gauna ena caka ca. … Kevaka me rawata e dua mada ga na veivakalougatataki mai na dua ga na yasana e dua na tamata, ena rawata ga mai vua na Turaga, ni tevoro e sega vua na vakasama me veivakalougatataki kina, ka na sega ni vakalougatataki ira na luve ni tamata; ia e cakacaka sara tiko vakaukauwa me tuberi ira tani mai na sala ni bula dodonu kei na dina.¹⁸

Na Kalou ni lomalagi, o koya ka bulia na vuravura oqo ka biuti ira mai kina na luvena, e a solia vei ira e dua na lawa me rawa kina me ra laveti cake ka vakabulai ena dua na matanitu ni lagilagi. Sa tu na lawa ni veimatanitu kecega, ia na ka kecega sa tu na kena lawa e vuravura taucoko. Ko ira era sa muria na ivunau era sa taqomaki kina, ka na taura na isau cava ga e yalataka vua na lawa o ya [raica V&V 130:20–21]. Sa nona lewa na Kalou ko ira kece na luvena me ra muria na lawa cecere duadua, me ra rawata kina na lagilagi cecere duadua ka sa lesia vei ira kece na tamata sega ni mate rawa. Ia na Kalou e solia vei ira kece na luvena na digidigi, me ra digia na lawa cava ga era na maroroya.¹⁹

E sega ni dua na tamata me na rawata e dua na lagilagi vakasilesitieli vakavo ga ke bulataka na lawa vakasilesitieli; e sega ni dua na tamata me na rawata na lagilagi vakateresitieli vakavo ga ke bulataka na lawa vakateresitieli, ka na sega ni rawata e dua na tamata na lagilagi vakatilesitieli vakavo ga ke bulataka na lawa vakatilesitieli [raica V&V 88:19–33]. E dua na duidui levu e tiko ena kedrau maliwa na rarama ni siga ena sigalevu kei na kataremoremo ni kalokalo ena bogi, ia na duidui o ya e sega ni levu sara me vaka na duidui ni lagilagi ena vuqa na veitikina ena matanitu ni Kalou.²⁰

E sa vakaraitaka mai vei keda na Turaga na lawa vakasilesitieli, o ya, ni sa solia vei keda o Koya na taucoko ni kosipeli i Jisu Karisito, ka sa solia vei keda na kila ni ivakavuvuli ni bula tawamudu. …

Kevaka me da na lako ki na vuravura vakasilesitieli eda na vakayavalati mai na yalo ka vakatulewa tu e kea, ka tomana tikoga vata kei keda na veivakavuvuli ka dodonu me da qaravi kina. Me da taukena na yalo kei na ivakavuvuli vata ga o ya ena vuravura oqo, ka me da bulataka na lawa vakasilesitieli eke, ka duavata ena ivakavuvuli ka vakaduavatataki ira na tamata ni Kalou ka ra tiko ena Nona iserau, me rawa ni da rawata kina na lagilagi vata ga era marautaka.

Oqori na veivakavuvuli ka vakavulici vei keda ena veisiga, ka dodonu me da vulica me da bulataka, ka biuta vakatikitiki na noda nanumi keda ga kei na ivakavuvuli lasu.²¹

E tu na kedra isau ko ira era caka vinaka, ka ra na rarawa na tamata ka veivutunitaka na sala era a taura ena gauna oqo se dua tale na itabagauna me veisaqasaqa kei na Kalou se na nona cakacaka. … Ke dua na tamata e caka dodonu, ka yalodina tikoga ki na ivakadinadina i Jisu Karisito, muria na kosipeli, ka maroroya na nona veiyalayalati, ni sa na curu yani ki na yasa kadua ni ilati e sa tu na nona icurucuru ki na iserau ni Kalou kei na Lami; ena nona maroroya na lawa vakasilesitieli e curu kina ki na lagilagi vakasilesitieli, ka maroroi mai na lawa o ya, ka vakaitavi ena lagilagi tawamudu. Ena saumi vua e dua na tamata ena ruku i lomalagi ke talairawarawa ka yalodina ki na lawa ni Kalou ena vica walega na siga e bula tiko kina vakayago.²²

Me da vaqara ena dui yaloda, ka yalataka sara ni da na kitaka na cakacaka ni yalododonu, doka na Tamada mai Lomalagi, vakayacora na noda itavi vua na Kalou kei na tamata, taura matua ka tara cake na matanitu ni Kalou, eda na qai kila vakaidina kina ni na rawa me da rawata na marau ka vakasinaiti ena yalo tawa mate ena taucoko ni iserau, sa dodonu kina vua na tamata me muria na ivakaro ni matanitu vakasilesitieli ka vakabulai ena dua na ivakatagedegede ni lagilagi vakasilesitieli ni Yalo ni Kalou; ka da na qai kila talega na vakayacori ni ivalavala ca, voroki ni lawa ni Kalou kei na vosa beci ni yacana ena kauta mai na rarawa kei na yalo e vakaloloma ena kauta ruarua mai na mate vakayago ka vakayalo. Kevaka eda lako ena sala ni yalo sega ni dodonu eda na vakararawataka na Yalo Tabu ka vakararawataki ira na tacida ka vakamavoataki keda.²³

Na sala ni bula e sa dusimaki tu kevaka me da sega ni kauwaitaka na muria, e sega ni dua tale na ka na mate ga, eda na sotava. Me da tu mada vakadua ka vakasama mada vakalailai—me da raica mada se cava e vinaka vei keda me da rawata na bula se mate. … Ko ni sa rogoca na dina matata, ka ra sa vakaroti mai na kaukauwa ni Yalo Tabu kei na ivakadinadina i Jisu Karisito, ka sa kena gauna oqo mo ni lewa kina se ko cei ko ni na qarava.²⁴

Na nomuni kalougata ena veisiga ni mataka, na nomuni bula vakalou kei na lagilagi ena veisiga ni mataka, veivuravura sega ni vakaiyalayala, ena vakatau mai na sala ko muria eke. E sa matata tu vei kemuni na sala ka na tuberi kemuni ki na bula tawamudu. … Sa vo ga oqo mo ni lako kina.²⁵

E tu sara ga e ligamuni na veivakabulai, bula tawamudu kei na dua na tiki ni imatai ni tucaketale; meu tukuna, na veivakalougatataki kece e yalataka na Kalou vei ira na tamata ka bula vakayago, sa soli yani vei kemuni ka sa tu vakarau tu me nomuni kevaka ko ni vakayacora na nomuni itavi.²⁶

E soli tu na veicuqeni vei ira kece na Yalododonu Edaidai; na nodra sala e rawarawa ka veisureti tu mai e matadra.²⁷

E dua walega na sala dodonu, ka vakadodonu sara tu ga; kei na ivakavuvuli kei na lawa ka lewai kemuni ena sala o ya e matailelevu ka rawarawa me kilai. Oqo na sala me da muri kina, kau kila ni da sa mai vakalougatataki vakalevu ena noda mai vulica na sala dina.²⁸

Na cava ga e vinakata vei keda na Turaga, e sega ni gadreva vei keda e dua na ka o Koya ka da na sega ni rawa ni vakayacora. E rawa me da muria na nona ivakaro me vakatau mai na itutu eda taukena kei na gaunisala e tu vei keda. E sega ni dua na tagane se yalewa me vakacava sara tu na nona dravudravua me sega ni rawa ni muria na kosipeli; era lako yani ka papitaiso me bokoci na nodra ivalavala ca, ia kevaka era muria na ivakaro ni Turaga ena biuta o Koya ki na ligadra na kaukauwa kei na sala me vakayacora kina na veika sa gadrevi vei ira.²⁹

Au masulaka me da na muria na sala o ya ni gauna eda yaco kina ki na yasa kadua ni ilati eda na taleitaka na keda itukutuku. Eda na kunea na keda itukutuku kei na noda ivolatukutuku ena vale ni wilivola levu ni matanitu vakasilesitieli ni noda Kalou, ka da na qai kila na cava eda a cakava tiko ena bula oqo. Kevaka eda a vakayacora e dua na ka ca eda na rarawataka. E dodonu me da veivutunitaka na cala ka tovolea me da caka vinaka. Au masuta na Yalo ni Kalou me tu kei keda me tuberi keda ka vakasalataki keda ena noda cakacaka me yacova ni da sa oti eke, ni gauna eda sa lako yani kina me da na ciqomi ena matanitu ni Kalou. Eda na mamarau ni da caka dodonu; ni matada e se bera ni raica, daligada e se bera ni rogoca, ka se bera sara ni curu ki na yalodra na luve ni tamata na lagilagi ka koto e matadra na luve i Atama tagane kei na yalewa. E vunitaki mai na matada edaidai, ka na sega sara ni dola vei keda me yacova ni da sa curu ki na iserau ni Kalou kei na Lami.³⁰

E sega ni dua na tagane se yalewa ka bula ena vuravura ka maroroya na ivakaro ni Kalou me na maduataka se rarawataka, ni sa lako ki na iserau ni Kalou.³¹