Cakacaka Vakayago ka Vakayalo, “Cakacaka Ena Duavata”

E dau tukuna vakawasoma vei keda na noda Peresitedi [Brigham Young] ni sega ni rawa me da wasea na ka vakayago mai na ka vakayalo, ia e dodonu me rau veitauri liga ka lako vata voli ga, ka sa vakakina ni sa dodonu me da cakava me vakabalebaletaki ena kena tara cake na lotu kei na matanitu ni Kalou.⁴

E so vei ira na tamata e tu vei ira na vakasama ni Mataveiliutaki ni Lotu oqo kei iratou na iApositolo Le Tinikarua e sega ni dodonu me ra vakaitavi ena veika vakayago. Io, ena rairai ca beka na keda ituvaki kevaka me da sega ni qarava na veika vakayago.⁵

Eda sa tara cake tiko na matanitu vakaivola ni Kalou e vuravura, ka sa tu na noda itavi vakayago me da qarava. Eda vakatawana tiko na yago vakayago, eda kania na kakana vakayago, eda tara vale vakayago, eda susuga na bulumakau vakayago kei na witi vakayago; eda veiletitaka na co ca vakayago, vata kei na meca vakayago ena noda qele, kei na veika kece oqo e vakatubura cake na kena yaga ni qaravi kei na vakayacori ni vuqa na itavi ni dua na ka dredre vakayago, ka ra, matata vinaka tu, era okati tu ena noda vakabauta vakalotu.⁶

E sega ni rawa me da tarai Saioni cake ni da dabeca tiko e dua na kau gaga ka lagasere tiko ena marau tawamudu; e dodonu me da teivaka na vuravura, me vagalalataki na vatu kei na veika tale e so mai na ulunivanua ka vakarautaka na veivaletabu kivua na Kalou sa Cecere Sara; kei na cakacaka vakayago oqo e vakaroti mai vua na Kalou mai lomalagi, me vaka ga na nona gadrevi Karisito, me mate me vueta kina na vuravura, se me vaka na nona gadrevi Pita, Jemesa kei Joni na iVakabula me ratou lako ka vunautaka na kosipeli ki na veiyasai vuravura. Sa ikoya sara ga oqo na itabagauna cecere ka dodonu me tara cake kina na Saioni ni Kalou, ka sa ikeda sara ga na Yalododonu Edaidai me da tara.⁷

Mai na gauna e tekivutaki kina na cakacaka oqo me yacova mai na siga edai e sa dredre cake sara vei ira na dauveiqaravi ni Kalou me ra vakarautaka na lomadra na tamata me rawa vua na Turaga me veiliutaki ka vakatulewa vei ira ena nodra cakacaka vakayago kei na nodra igu me vakatauvatani kei na veika e baleta na nodra vakabulai tawamudu. …

E dua na ka e matalia tiko me baleta na ka oqo, ia au nanuma, e rairai, sa ikoya beka na itutu eda tawana tu. E tiko e dua na ilati ena kedrau maliwa na tamata kei na veika tawamudu; kevaka me a kau tani na ilati o ya ka rawa me da raica na veika tawamudu me vaka na kedra ituvaki e mata ni Turaga e sega ni dua na tamata me na veilewaitaki ena vuku ni koula, siliva se na iyau ni vuravura oqo, ka na sega ni dua na tamata, ena nodra itukutuku, me na sega ni vinakata me lewai koya na Turaga. Ia e tiko kina e dua na noda digidigi eke, ka da tiko oqo ena vakatovolei, ka sa tiko e dua na ilati ena keda maliwa kei na veika tawamudu, ena keda maliwa vata kei na Tamada Vakalomalagi kei na vuravura ni yalo; o koya oqo me baleta na inaki vuku ka dodonu vua na Turaga na noda Kalou, ena ituvaki era a mai biu kina eke me vakadinadinataki se era na muria tiko na nona lawa o ira na luve ni tamata se sega. Era raitayaloyalotaka tu na veika oqo, na Yalododonu Edaidai. Keimami sa lomasoli tu, vata kei na vakanananu yadua ni lomai keimami, ni o Josefa Simici, Peresitedi Young kei ira na iliuliu ni tamata e dodonu me ra dusimaki keda ka liutaki keda me baleta na noda gagadre tawamudu; kei na veivakalougatataki e vauci vei keda mai na nodra lewa yaco ki na yasa ka dua ni ilati ka kaukauwa tu ni oti na mate, ka na tara na noda icavacava ki na bula sega ni vakaiyalayala ka tawamudu.

O ira na tamata, ena gauna i Eparaama, Aisake kei Jekope, kei Jisu kei ira na iApositolo, e vauci vei ira na veivakalougatataki, veimatanitu, veitikotiko vakatui, veiliutaki kei na kaukauwa, vata kei na veivakalougatataki taucoko ni Veiyalayalati Vou ka Tawamudu. Na taro e rawa me tarogi, era na vakamarautaki keda beka na veivakalougatataki tawamudu oqo? Era vakakina, se e dodonu me vakakina. Era tautauvata beka na kedra yaga vata kei na noda iyau vakavuravura na veivakalougatataki oqo, ke tu vei keda e levu se lailai? Na vakabulai, na bula tawamudu e veirauti vata beka kei na dua na ivua ka ra colata na bulumakau, e dua na vale, e dua na drau na eka na qele, se dua ga na ka eda taukena eke ka vakayago? Kevaka e sa vakakina sa dodonu me da vakarau ka vakadonuya na Turaga me veiliutaki ka lewai keda ena noda cakacaka taucoko vakayago me vaka ga ena noda cakacaka vakayalo.

E dua tale, ni sa mate e dua na tamata ena sega ni rawa me kauta na nona bulumakau, ose, vale se qele; e sa lako tiko ki na ibulubulu—na vanua ni vakacegu ni yago kecega. E sega ni dua na tamata me na dro bula mai kina, na lawa ni mate e sa tau vei keda taucoko sara. Ni sa qai mate kecega ena vuku i Atama, ena vakabulai kece talega ena vuku i Karisito [raica 1 Korinica 15:22]. Eda kila kece ni mate e soli vei keda kecega na tamata, ia … e sega ni dua vei keda me kila na kena yaco mai na noda gauna, ia eda kila ni na sega sara ni dede na gauna eda sa na kacivi kina me da muri ira yani na itabatamata era a liu taumada mai vei keda. Ni da raitayaloyalotaka na veika oqo au vakasamataka ni dodonu me da lomasoli kece sara me da laiva na Turaga me dusimaki keda ena veika vakayago.⁸

E tiko e dua na vosa vakaibalebale se ivosavosa kau sa dau rogoca vakavuqa ena noqu bula, kau nanuma ni colata tiko e dua na icolacola vakaitamera, ka sa ikoya “sa rui cecere na dina ka na kaukauwa tikoga.” Au vakasamataka ni oqo e a sa vakaraitaki yadua ena kena levu kece sara e sa vakayagataki kina vakayago se vakayalo na dina; kevaka e vakayagataki ena kena levu ena veivanua se matavuvale se na tamata yadua; se me vakayagataki ki vuravura se ki na Matanitu ni Kalou.⁹

Na kena taraicake na Saioni ni Kalou ena itabagauna oqo e oka kina, meu tukuna mada na ka dina, ena veitabana yadua ni bisinisi, me vakayago ka vakayalo, eda vakaitavitaki keda tu kina. E sega ni rawa me da tara yani e dua ga na iulutaga e vakalawataki ka dodonu vakalawa ena mata ni Kalou kei na tamata ni sega ni ciqomi ena noda vakabauta vakalotu. Na kosipeli i Jisu Karisito eda sa ciqoma, ka da vunautaka, e okati kina na dina taucoko, kei na veikacivi yadudua vakalawa kei na ilesilesi ni tamata.¹⁰

Me ra kakua ni dau vakaweleweletaki tu ga na noda gone; e dodonu me ra dau vakavulici vakavinaka ena veika vakayalo ka vakakina ena veika vakayago. Sa ikoya o ya na ivotavota uasivi duadua e rawa ni ra biuta koto na itubutubu vei ira na luvedra.¹¹

Me vaka na itovo ni veika e rawa me vakatokai na kena vulici na ivola e sa levu cake tikoga, e dodonu me kakua ni vakawaletaki na cakacaka ka qaravi ena liga. E dodonu me rau salavata voli ga na vuli ni vakasama kei na vuli ni yago. E dodonu me rau duavata e dua na mona maqosa kei na dua na liga maqosa. E dodonu me dau dokai na cakacaka ka qarava na liga ena keda maliwa ka me dau dokai tikoga ena veigauna. Na kena irairai, me vaka ni sa kena ivakarau tu ena gauna oqo, me ra vuli me ra maqosa o ira na gonetagane oti me ra qai vakasamataka ni sega ni rawa me ra cakacaka vakamekeniki se so tale na mataqali cakacaka era nanamaki tu kina sa ikoya e dua na ka e sega ni dodonu me tubu ena keda maliwa. … E dodonu ga vei keda vakayadua me da cakava me dua na ka eda cibitaka sa ikoya ni da kenadau ni dua na cakacaka, ka sega ni dua me dau vakayagataka duadua ga. E dodonu me ra vakavulici na luveda me ra rawati ira vakataki ira mai na nodra cakacaka kei na maqosa, ka sega ni o koya walega oqo na ka me caka, ia me ra veivuke ena nodra rawati ira o ira na tani, ia me vakayacori oqo mai na cakacaka ena yalodina sa ikoya e dua na ivurevure dokai e vakarautaka na Kalou kivei ira na Nona isolisoli ena vuravura oqo. Na ulutaga ni nodra vakavulici vakavinaka na itabagone ni Saioni sa ikoya e dua na ka bibi duadua.¹²

Me vaka na noda veika vakayago, e dodonu me da laki cakacaka ka vakarautaka na veika e baleti keda.¹³

Me vaka na iyau kei na sautu, kevaka me ra na vakacacani au, au sega ni vinakati ira. Au na vinakata ga me vakarauta na isulu, ivava ka vakania na noqu [matavuvale], ka vakacegui iratou, kevaka e rawa meu rawata ena yalodina mai vua na Turaga; ia e vinaka cake vei au kei iratou taucoko me keitou dravudravua me vakatauvatani mai na sautu ka qai vakarusai. E dua na ka vakarerevaki na iyau vakavo ga kevaka e rawa me da vakayagataka me kakua kina ni vakarusai keda; kevaka e sega ni rawa ni da vakayagataki ira ki na lagilagi ni Kalou kei na kena taraicake na nona matanitu, ena vinaka cake ga me ra kau tani mai vei keda.¹⁴

Era lewe vuqa sara na tamata era raica na lawa ni ikatini me vaka e dua na mataqali ivakacavacava ka vakacolati vei ira, ia o cei beka e sa baleti koya? Na noda ikatini, na noda cakacaka, kei na veika kece sara eda cakava ena matanitu ni Kalou, sa baleti cei kece beka? … Na noda ikatini, na noda cakacaka, na veika eda cakava e sega ni baleta na bula vakalou nei Koya sa Cecere Sara, ia e sa baleti keda ga. … Me da kila tiko ni sa ikoya sara ga oqo ka me da vakayacora vakavinaka. Ni da sauma tiko na noda ikatini, ena noda muria tiko na lawa yadua e sa soli kina vei keda na bula vakalou ka na vakavinakataki keda, sa ikoya e yaga taucoko sara ga vei keda yadua ka yaga vei ira na luveda, ka sega ni yaga vakatabakidua kivua na Turaga, me vaka walega na nona taleitaka na nodra yalodina na luvena ka gadreva me raica na nodra lakova na gaunisala e gole ki na veivakabulai kei na bula tawamudu.¹⁵

Me da rai wavokiti keda ga me rawa kina ni vakacegui keda … ni o ira era dau lomasoli ena soli ka ki na cakacaka ni Kalou era vakadonui mai vua na Turaga. Sa ikoya oqo na veika era a sotava na Isireli makawa, ka sa ikoya na veika eda sotava tiko. Ia me baleta na soli ka ena vu ni yaloda taucoko e sa rui dau sivia na levu ni vakawelewele, veitalia sara mada ga na yalayala vakamareqeti taucoko sara ka ra sema vata kaya. O ira na Yalododonu e dodonu me ra nanuma lesu na nodra itavi ka ra vakacolati kina. O ira talega na luveda, e dodonu me ra vakavulici ena itavi oqo, ni rawa me yaco me dua na ivakarau tudei me ra dauqarava ena gauna totolo duadua na veika oqo. O ira era sa vakadikeva matua sara tiko na veika e gadrevi oqo e rawa me ra vakadinadinataka na cecere ni kena taleitaki vakalevu na vuqa ni kena isau era ciqoma mai na nodra talairawarawa.

Na lawa ni daulomasoli vakaoqo e rairai me dua vei ira na itataqomaki e vakarautaka na Turaga me kauta tani mai vei ira na tamata oqo na isau ni ivalavala ca ka salamuria mai na taukeni ni iyau. E kaya vei keda ni iyau ni vuravura e Nona me solia; ia e vakasalataki keda o Koya me da qarauna na yaloviavialevu, de na qai yaco vei keda na ka a yaco vei ira na Nifai ena gauna e liu [raica V&V 38:39]. Eda kila ni a vakavuna na nodra vakarusai, ka na dodonu me da qaqarauni sara vakavinaka ka taqomaka na iyau me na kakua ni tarai keda na kena veivakarusai. Era lewe vuqa sara e rawa me ra vosota na dravudravua ka ra yalomalumalumu, ka bula volekata na Turaga, [ia] e sega ni rawa me ra taura na iyau. E yaco me ra laveti cake ena viavialevu ka yaco me ra kocokoco, ka guilecava na nodra Kalou. O ira, ia, era dau nanuma wasoma na ivakavuvuli ni Turaga me baleta na vuravura kei ira na lewena, ka vakaitavi ena kena soli na isolisoli sa solia vei ira na Turaga me vukei ira na dravudravua ka vukea na toso ki liu ni cakacaka ni Kalou, era vakayacora e dua na vakadidike me baleti ira ka solia vei Setani e lailai wale sara na kaukauwa me liutaki ira me ra lakosese.¹⁶

Eda vakila na noda liutaki me da vakasalataka na Yalododonu Edaidai ena saqati ni buli na ivakarau ca ena kena vakayacori na dinau kei na nodra dau vakayagataka wasoma na dinau me vakabibitaka vakalevu cake na icolacola mai na kena era sa colata tu, ka vakavuna na leca ni nodra veivale kei na veika tale e so era taukena. Eda kila ni sa kena ivalavala tudei ena gauna oqo me vakayagataki na dinau ki na kena iyalayala cecere duadua. … Sa ikoya sara ga oqo e dua na ivalavala ca levu ka dua vei ira, me vaka ni dua na matatamata ka vaka me tamata vakayadua ga, e dodonu me da qaqarauni ka vagalalataki keda mai kina. E dodonu me caka na noda bisinisi, na kena levu ga e rawa, me vaka na kena ivakarau ni saumi na veika eda dau volia, e dodonu me dau tikoga ena loma ni noda ivurevure na veika kece eda gadreva. Na ivakarau ni vakanuinui kei na caka ni dua na ka ena doudou ena dua na kena mataqali kei na dua tale e dodonu me sa qarauni vakavinaka sara. … Marautaka na ka e sa rawa, ka kakua ni vakacalai mai na inuinui matewale me rawati kina na sautu. Nanuma na ivosavosa nei koya na tamata vuku: “Ia ko koya sa kusarawa ni vutuniyau ena sega ni donu.” [Raica Ai Vola ni Vakaibalebale 28:20.] Me ra vakavulici talega na luveda ena ivakarau ni veika vakailavo, ka kakua ni galeleta na veika e sega ni rawa me ra taleitaka kevaka ena yaco kina na dinau.¹⁷

E sa dua sara tikoga na gagadre raraba ka tokoni mai vei ira na tamata oqo me ra vutuniyau, ka cakacaka me baleti ira ga ka sega ni baleta na matanitu ni Kalou. Ia na cava na kena vei kemuni se o au me sa kakua na masumasu ka lako yani me da laki cakacakataka na iyau? Ia ka cava na kena yaga vua na tamata, kevaka e rawati vuravura kece, ka vakayalia na yalona? E sega soti ni levu. Na cava ena solia na tamata me isau ni yalona ena gauna e sa na yaco yani kina [ki] na yasa ka dua ni ilati? [Raica Marika 8:36–37.]

Au qoroya vakalevu sara na lailai ni kena kauwaitaki e vakaraitaki mai vei ira na lewe ivuravura raraba ena nodra ituvaki ni gauna sa bera mai. Na tamata vakayadua sara ka tiko eke edaidai ena laki bula ena yasa kadua ni ilati me vaka ga na balavu ni gauna ni nona Dauniveibuli—ki na gauna sega ni vakaiyalayala ni tawamudu, kei na icavacava tawamudu ni tamata yadua ka na vakatau ena ivakarau ni vica na yabaki lekaleka ni bula vakayago e vakayagataki. Meu taroga ena yaca ni Turaga, na cava na kena yaga na taleitaki kivei iko se kivei au? Na cava na koula se siliva, se na iyau ni vuravura oqo ki na dua vei keda, e rawa ni toso me vakarawarawataka na noda rawata na veika eda gadreva me da kania, gunuva ka daramaka, kei na kena tara cake na matanitu ni Kalou. Kei na noda muduka na masumasu kei na vakasinaiti ni noda vakasama me baleta na iyau ni vuravura e sa vakalevutaka sara ga na veivakasewasewani kei na veivakalialiai.

Ni da raica na nodra ivakarau e so na tamata, ena rairai rawa me ra na bula tawamudu eke, kei na nodra icavacava tawamudu ena vakatau ena levu ni ilavo era taukena. Ena so na gauna au dau tarogi ira na Yalododonu Edaidai, e vica sara mada na levu ni ilavo e tu vei keda ena gauna eda lako mai kina ki ke? E vica sara mada eda a kauta mai, ka ra a kau mai vei? … Au sega ni vakabauta me dua vei keda e a sucu ena daku ni ose se ena dua na kareti, se da a kauta vata mai kei keda e dua na ivola tukutuku me baleta na ilavo maroroi kei na bulumakau kei na vale, ia eda a sucu luvaiwale mai me vakataki Jope, kau kila ni da na luvaiwale tale ni da sa na suka ki kea [raica Jope 1:20–21]. Na cava na kedra isoqoni vei keda na iyau vakavuravura oqo, ni dodonu me ra veretaki keda me da vakayalia na veivakabulai me baleti ira? Au kaya ni vinaka cake vei au meu dravudravua tu ena veisiga taucoko sara ni noqu bula, kevaka me ra vakacacani au ka kauti au tani mai na lagilagi au sa rawata mai na noqu vakarokorokotaka tiko na ivakaro ni Kalou, sa noqu masu vua na Kalou meu kakua ni taukena na veika oqori.

Na Kalou e taura tu e ligana na iyau ni vuravura oqo: na koula kei na siliva, e nona na bulumakau kei na vuravura, ka na solia vei koya e via solia kina. Ena nona a tucake tu ena ulunivanua na Karisito, o Lusefa, na tevoro, e a vakaraitaka vua na matanitu kecega e vuravura ka vinakata me solia vua kevaka me cuva sobu ka vakarokoroko vei koya[raica Maciu 4:8–9]. Ia o ni kila tiko li ni tevoro o ya e sega sara ga ni taukena e dua mada ga na fute ni qele ena vuravura taucoko, ka sega mada ga ni dua na yagona, se valecavu? Na vuravura e sa itutu ni yava ni Turaga, kevaka eda taukena e dua vei ira me noda vakataki keda ena solia vei keda na Turaga; ka dodonu me da yalodina ena noda vakabauta vakalotu kevaka me tiko vei keda e tini na milioni na dola me vaka e a sega sara tu mada ga vei keda. Na bula tawamudu sa ikoya e dodonu me da vakasaqara, ni o ya, veitalia se vakacava na ituvaki ni noda bula, e dodonu me imatai ni noda inakinaki. …

… Au tukuna tiko na veika e baleta na vutuniyau. Au sega ni kunea na cala ena vutuniyau. E nona na Turaga na koula kei na siliva. Eda vinakata na veivale me ra [tara] ka dodonu me da vakatorocaketaka na vuravura. E sa rauta vinaka sara ga oqo. Au sega ni kunea e dua na cala vua e dua na tamata a yaco me vutuniyau. Au kunea na cala ena noda volitaka na matanitu ni Kalou, noda itutu ni ulumatua, volitaka na kosipeli ka vakuwai keda mai na bula tawamudu me baleta na kena vakavinavinakataki na gagano ca ni yago, na dokadoka ni bula kei na ivakarau vakavuravura, kei na kena vakarautaki na lomada me baleta na veika oqo.¹⁸

Au kauti keda lesu ki na vosa i Jisu Karisito ena nona a kaya vei ira sa dau muri koya: “Ia dou vakasaqara taumada na matanitu ni Kalou, kei na nona yalododonu: ia ena soli me kena ikuri vei kemudou na ka kecega oqo.” [Raica Maciu 6:33.] Au na tukuna vei kemuni, na taciqu kei na ganequ, e rawa me da tovolea ena veisiga taucoko ni noda bula, e rawa me da tovolea na veigaunisala yadua kei na veivakavuvuli yadua ena vuravura oqo me vaka ni o keda na Yalododonu e sega ni rawa ni da tubu cake ki na dua tale na itovo ni toso ki liu mai na kena vakasaqarai taumada na matanitu vakalomalagi kei na kena yalododonu; ni gauna eda vakayacora kina oqo ena sega ni dua na veivakalougatataki, e sega na vinaka, e sega na bula vakalou, isolisoli, loloma vakalou, gagadre, se e dua ga na ka e rawa ka gadreva e dua na tamata vinaka me yaga vakalevu, ka na vinaka me baleta na gauna oqo ka tawamudu, ia ena qai soli vei keda.

E lewe vuqa sara na tamata era tovolea me ra vakasaqara na marau ka tu vakaikoya ena kena vakasaqarai taumada na matanitu ni lomalagi, … ia era dau raica wasoma ni dua na cakacaka e rewaicake, ka sa vakakina kivei keda kevaka eda tovolea.¹⁹

Me cecere na noda vakanamata. Eda vakanamata tiko ki na dua na vanua ena matanitu vakasilesitieli ni Kalou, me da rawata na bula tawamudu, oqo na isolisoli uasivi duadua ni Kalou kivua na tamata. Na dokai, na lagilagi kei na iyau taucoko ni vuravura oqo e dodonu me luvuci ka ni sega ni yaga ena noda vakasama me vakatauvatani vata kei na ka e taukeni ena mata ni Kalou kei na Lami, kei ira taucoko na parofita, iapositolo kei na yalododonu, okati kina na vale nei tamada. Ni vakusakusa tiko e dua ka sa yali yani vakatotolo, o koya ka dua e vosota tiko ka tawamudu.²⁰