Na Yalo Tabu kei na iVakatakila ni Tamata Yadua

Na Yalo Tabu e dua vei iratou na ituvaki vakatamata ni Lewetolu Vakalou. Na Kalou na Tamada kei na Kalou na Luvena erau vakayago [na lewe kei na sui], na Kalou vakataki koya e a bulia na tamata me ucui Koya; ia na Yalo Tabu sa ituvaki vakatamata, ka vakadinadinataka na Tamana kei na Luvena vei ira na luve ni tamata [raica V&V 130:22].⁵

Na cava na ivakadinadina cecere duadua e taukena tu e dua na tagane se yalewa me vakakina oqo na cakacaka ni Kalou? Au na tukuna vei kemuni na ivakadinadina cecere duadua au se bau taukena, na ivakadinadina e vakadeitaki, o ya na ivakadinadina ni Yalo Tabu, na ivakadinadina ni Tamada kei na Luvena.⁶

Ena rawa ni vakacalai na matada kei na daligada mai na ivadi lawaki ca ni tamata; ia na Yalo Tabu ena sega ni lawakitaka e dua na tamata.⁷

Na ivolanikalou e tukuna vei keda ni sa tiko vua na tamata e dua na yalo ka sa dau vakavukuya o koya sa Cecere Sara ena Nona veivakauqeti [raica Jope 32:8]. Ena ivakavuvuli oqo eda sa mai kila kina na veika dina, kei na kaukauwa ni kosipeli eda sa ciqoma. Na ivakavuvuli ni bula tawamudu sa vakatakilaitaki mai vei keda ena veivakauqeti ni Yalo Tabu, ni sa dau tiko vata kei keda na Yalotabu o ya, e dau vakauqeta na noda vakasama, kevaka eda vakarorogo ki na ivakavuvuli oqori, ka rawata ena noda loma vinaka, eda na kila vakamatata sara na kedra ituvaki.⁸

O ira yadua sa veivutunitaka na nona ivalavala ca, ka sa papitaisotaki me bokoci na nodra ivalavala ca, ni sa mai vua na Kalou, ka me vakataki Jisu Karisito, ka a dromuci e wai me vakataka na nona mate, ka sa vakataki koya talega ena nona tucaketale, ka sa vakadonui vua na Yalo Tabu; sa yalataki tu, ka sa nona; sa nodra dodonu na tamata taucoko me ra taukena, kei na nodra ciqoma na Yalo Tabu kei na Nona isolisoli sa yaco me ra vakauqeti, rarama kei na dina; ena rai na matadra, rogo na daligadra ka kila vakavinaka na lomadra.⁹

Ia oqo, kevaka sa tiko vei iko na Yalo Tabu—ka dodonu me vakakina vua na tamata yadua—au sa rawa ni kaya vei kemuni ni sa sega ni tiko e dua tale na isolisoli e cecere cake, na veivakalougatataki e cecere cake, se ivakadinadina cecere cake e sa soli vua e dua na tamata e vuravura. E rawa beka ni tu vei iko na vuku ni agilosi; e rawa beka mo raica e vuqa na ka mana; e rawa beka mo raica e vuqa na ka veivakurabuitaki e vuravura; ia au sa vakadeitaka eke ni isolisoli cecere duadua e rawa ni vakatikori vua e dua na tamata o ya na isolisoli ni Yalo Tabu. Na kaukauwa gona oqo eda sa vakayacora kina na veika sa tu vei keda. Sai koya oqo e taqomaki keda ena gauna taucoko ni veivakacacani, veivakatovolei kei na veika dredre e dau yaco vei keda.¹⁰

Na tagane kei na yalewa yadua e sa bau mai curuma na lotu ni Kalou ka sa papitaisotaki ena vakabokoci ni ivalavala ca sa vakadonui vua na ivakatakila, vakadonui ki na Yalo ni Kalou, me vukei ira ena nodra cakacaka, ena nodra qaravi ira na luvedra, ena vakasalataki ni luvedra kei ira sa kacivi me ra vakatulewa kina. Na Yalo Tabu e sega ni vakatarai walega vei ira na tagane se iapositolo se parofita; era taukena talega vakayadua na tagane kei na yalewa yalodina, kei ira na gone yadua era sa qase cake me ra ciqoma na kosipeli i Karisito.¹¹

E tiko e dua na kena sala dodonu … na kena ciqomi na ivakatakila ni kena qaravi na nona Lotu mai vua na Turaga. E tiko e dua ga na tamata e vuravura, e yadua ga ena dua na gauna, ena taura tu na kaukauwa oqo. Ia na lewenilotu yadua sa nona madigi me ciqoma na ivakatakila mai vua na Turaga me dusimaki koya sara ga ena nona bula, ka me vakadinadinataki vua na veika dodonu ni veivakavulici vei ira na tamata kei na cakacaka ni veioga e yaga.¹²

Na cava sara mada na ivakatakila? Sai koya na veivakauqeti ni Yalo Tabu vua na tamata. Ena nona gauna a kaya kina o Josefa Simici vei Baraca John Taylor: “Baraca Taylor, mo dau kidava na veivakauqeti ni Yalo ni Kalou; mo kidava na domo lailai ni Yalotabu vei iko; mo vakayacora ena nomu bula na ka e tukuna, sa na yaco me ivakavuvuli ni ivakatakila vei iko, ko na qai kila ka matata kina vei iko na Yalotabu kei na kaukauwa oqo.” Oqo na kena idola, na vatuivakadei ni ivakatakila taucoko. … Ena noqu kila au a saga meu veikilai vakavinaka kei na Yalotabu, ka vulica na nona cakacaka.¹³

E lewe vica vei kemuni sa yaco vua na ivakatakila? E lewe vica vei kemuni sa bau vosa malua vua na Yalo ni Kalou—na domo lailai? … Sa vuqa sara na noqu ivakadinadina mai na imatai ni gauna au a kila kina na Lotu kei na matanitu oqo. Au sa vakalougatataki vakalevu ena vuqa na gauna ena isolisoli kei na loloma veivueti, na ivakatakila eso kei na noqu vakavukui; ia ni keimami vakasoqoni vata au sega ni kunea rawa e dua na ka meu vakararavi vakatabakidua vakalevu kina me vakataka na domo ni Yalo Tabu.¹⁴

Sa dau matau vei ira na tamata me ra dau raica ka namaka tu ga na veika e cecere sara ka dau vakavuqa me ra sega ni kila kina na Yalo ni Kalou kei na nona veivakauqeti o koya sa Cecere Sara. Me da kakua ni vakasaqara na Yalo ni Kalou ena kurukuru se covulaca ia ena domo lailai ga [raica 1 Tui 19:11–12].¹⁵

Sa rawa me saumaki e dua na tagane se yalewa ena iyau kei na lagilagi taucoko e rawa ni vakasamataki me rawata, ia era sa kune vakacegu beka? E sega. E se tikoga na tawa vakacegu. Ena dua tale na yasana, vakaraitaka mai vei au e dua na daukerekere e gaunisala ka tiko vua na Yalo Tabu, ka vakasinaiti na nona vakasama ena kaukauwa ni Yalotabu, o koya oqori na tamata e vakacegu tu na nona vakasama, ka taukena na iyau dina, kei na marau ka sega ni rawa vua e dua na tamata me taura mai na dua tale na ivurevure.¹⁶

Ni da marautaka na Yalo Tabu, ni da sasagataka me da bulataka na noda vakabauta vakalotu e vuravura, eda sa tamata mamarau vakalevu sara e vuravura, se cava ga na veika eda sotava. E sega ni dua na ka kevaka me da vutuniyau se dravudravua, se da marau se rarawa kevaka e dua na tamata e bulataka tiko na nona vakabauta vakalotu ka marautaka tiko na vinaka kei na Yalo ni Kalou, ena sega sara ni vakayavalati ena veika e dau yaco e vuravura. Ena yaco beka na uneune, ivalu, kama se veivakarusai ena vanua, ia ena sega ni dua na ka vua. Sa vaka tu oqori na noqu bula.¹⁷

O ira na tamata yadua era ciqoma na Yalotabu sa tu e lomana na dauveivakacegui—o koya na iliuliu me vakasalataki ka dusimaki koya. Na Yalotabu sa dau vakatakila ena veisiga yadua vei ira yadua na tamata vakabauta, na veika e yaga ki na nona bula. Sa ikoya na veivakauqeti oqo ni Kalou vei ira na luvena ena yabaki ni bula kei vuravura sai koya e dua vei ira na isolisoli yaga me tokoni ira na tamata ka vukei koya me lako ena vakabauta, ka kakavaki yani ki liu ka vakamuria na ivakasala kei na ivakaro kei na ivakatakila sa solia na Kalou vei ira na luvena me dusimaki ka vakadodonutaki ira ena bula oqo.¹⁸

E dodonu vei ira na tamata yadua me ra rawata na Yalo ni Kalou ka vakamuria na veika e tukuna. Oqo na ivakatakila. E sega ni dua na kena duidui ena veika ena tukuna na Yalotabu vei kemuni mo ni vakayacora, ka na sega vakadua ni na tukuna vei kemuni na ka cala mo ni na cakava.¹⁹

Eda vakawavoliti tu … mai vei ira na yalo velavela ka ra valuta tiko na Kalou kei na veika kece sara e qarava na taraicake ni matanitu ni Kalou; ka da gadreva na Yalo Tabu me da vorata rawa kina na veika velavela oqo …

… Oqo na Yalotabu e dodonu me tiko kei keda me rawa ni da vakayacora rawa kina na inaki ni Kalou e vuravura. Eda gadreva vakalevu cake oqori mai na dua tale na isolisoli. … Eda sa bula veimalaiwai kei ira na meca, ena loma ni butobuto kei na veitemaki, ka sa gadrevi me da dusimaki mai vua na Yalo ni Turaga. Sa dodonu sara me da dau masuta na Turaga me yacova ni da sa rawata na Dauveivakacegui. Sai koya oqo na veika sa yalataki tu vei keda ni da sa papitaiso. Oqo na yalo ni rarama, ni dodonu, kei na ivakatakila, ka rawa ni tiko vei keda taucoko ena dua vata ga na gauna.²⁰

Ko ni na raica ni kevaka eda na saga me da vakayacora e dua na ka ka sega ni vakayacora na veika e tukuna na Yalo Tabu, eda na tadrava na kabu ka curuma yani na butobuto kei na leqa, ka yaco sara me da bula veilecayaki. Na veisiga yadua ni noda bula eda gadreva na kaukauwa ni Turaga—me tiko vata kei keda na kaukauwa ni nona Yalo Tabu kei na kaukauwa ni matabete me da kila kina na veika me da vakayacora. O koya gona kevaka me da bula vakakina e mata ni Turaga, ena vakatakila vei keda na Yalotabu ena veisiga na cava na noda ilesilesi; e sega ni dua na ka vei au na cakacaka cava eda na vakaitavi kina, e dodonu me da kunea taumada na lewa ni Turaga ka vakayacora sara, ka sa na yaco me vakayacori vakavinaka na noda cakacaka ka me vinaka vua na Turaga.²¹

Ena noqu bula taucoko kei na cakacaka, au sa raica rawa ni sa ka vinaka meu vakayacora na veika ga e tukuna vei au na Yalo ni Turaga. Au sa dau taqomaki voli ena kaukauwa o ya. Mo ni veitokani kei na yalo ni ivakatakila. Na gauna ko ni na rawata kina ko ni na bula, ko ni na qai vakayacora sara vakadodonu na veika e vinakata na Turaga mo ni cakava.²²

Na vakasama ni noda rawa ni vakamuria ka vakatabui mai na kosipeli, ka vakarautaki vakakina me da taukena na bula tawamudu, sa dua dina na ivakavuvuli lagilagi duadua e se bau vakatakilai vua na tamata. … Sa tu vei keda e dua na inuinui ka lecaika kina ko vuravura, ka sega ni rawa ni curuma rawa na nodra vakasama. Vakavo ga ke ra vakasucumi ena Yalo ni Kalou era na sega ni raica rawa ga na matanitu ni Kalou, ka ra sega ni rawa ni ra curuma vakavo ga ke ra sucu ena wai kei na Yalo Tabu [raica Joni 3:5], o koya gona era na sega ni votai ena nanamaki kei na vakanuinui rekitaki eda taukena tu. Era sega ni dolava na matadra, daligadra kei na lomadra me ra raica ka rogoca ka vakila na kaukauwa ni kosipeli i Karisito.²³

Sa noda madigi me da vakamuria na ivakasala ni Yalo ni Turaga, ka me sa noda idusidusi ka itokani, kei na noda vakayacora rawa ena dolavi kina vei keda na noda ciqoma na veivakalougatataki vakalomalagi ena kena totolo duadua.²⁴

Au dau taleitaka … na noda vakayacora na tamata na noda itavi, na noda bulataka na noda vakabauta vakalotu, na noda vakabauta tiko, ka bula e mata ni Turaga me rawa kina ni noda itokani wasoma na Yalo Tabu me liutaki keda ena veisiga sa tu e matada. Sa noqu masu oqo ka sa noqu gagadre.²⁵

Au kila ni gadrevi na sasaga, cakacaka kei na yalodina e mata ni Turaga me rawa kina me da veiwekani tikoga kei na Yalo Tabu, ka bula voli ena dua na itovo me da taura rawa kina na veivakalougatataki oqo.²⁶

E sega tale ni dua na ka me da cakacaka vakaukauwa kina me da rawata ena bula oqo ia na Yalo ga ni Kalou, na Yalo Tabu, na Dauveivakacegui, ka da sa vakadonui me da taukena ena vuku ga ni noda vakayacora na veika e gadrevi ena Kosipeli.²⁷

Na yalayala cecere duadua ka salavata tiko kei na vunautaki ni Kosipeli, ka sa vakatakilaitaki mai lomalagi ena noda gauna oqo, ni na vakatikori na Yalo Tabu vei ira era sa veivutunitaka vakaidina na nodra caka cala ka ra sa vakamuria na nona cakacaka tabu. Sa dau vakatakilai mai vua na Yalo Tabu na veika sa vakayacori oti, edaidai kei na veika sa roro tiko mai ka sa vakaraitaki mai kina na vakasama kei na lewa ni Tamada. Ena sala oqo sa dau vakatakila mai kina o koya sa Cecere Sara na Nona inaki vei ira era vakamuria na Nona ivakaro ka sa savasava tu na nodra bula ka vinakati mai Vua, ka ra vakarautaki kina ena sotavi ni draki kecega kei na veivakatovolei ena nodra ilakolako oqo.

Kevaka era tiko eso na lewe ni Lotu ka ra se bera ni kila rawa ni dina na ka oqo mai na veika era sa sotava, e sa vakadeitaki vei ira ni ra sega ni yacova rawa tiko na nodra rawa ni kaukauwa cake. Sa dodonu vei ira na Yalododonu taucoko me ra veiyaloni kei na Yalo Tabu ka duavata yani ki vua na Tamada, se na rawa ni ra vakaleqai ena veirawai ni vu ni ca ka gole tani.

O koya keimami sa kaya kina vei ira na Yalododonu Edaidai: Ena sega ni dau tiko na Yalo Tabu ena vanua tawa savasava. Kevaka o gadreva mo bula marautaka na kaukauwa kei na isolisoli taucoko ni nomu vakabauta vakalotu, e dodonu mo tiko savasava. Kevaka o sa vakadinadinataka na nomu malumalumu, itovo lialia kei na ivalavala ca, mo na veivutunitaka; e kena ibalebale, mo biuti ira tani vakadua. Sa sega tale ni dua na sala mo vakalomavinakataka kina na Kalou. “O koya na yalosavasava” na yacana [raica Mosese 6:57], ka sa ka taleitaki Vua na nodra sasagataka o ira na luvena me ra tiko savasava.²⁸

Kevaka e sega vei keda na ivakatakila, sa baleta ga na noda sega tiko ni bulataka na bula e dodonu me da bulataka tiko, sa baleta na noda sega ni gumatuataka na noda ilesilesi ena matabete me vaka na kena dodonu; kevaka me da a vakayacora ena sega beka ni yali mai vei keda na ivakatakila ena sega beka ni dua me a tawayaga se sega vua.²⁹

Me da biuta tani na itovo butobuto taucoko, na ivakarau kece ena vakalatilati ki na noda veiyaloni kei na Kalou … kevaka era dau vakatatao o ira na ka lalai vakaoqo ki na noda bula marau ka vakatorosobutaki keda ena mata ni Turaga, sa vinakati oqo me da biuti ira tani ka vakaraitaka e dua na yalodina me da cakava na lewa ni Tamada mai Lomalagi, ka vakacavara taucoko na cakacaka ka sa vakacolati vei keda me da vakayacora. … Na gauna au vakayacora kina e dua na ka ena vakalatilati ki na noqu bula marautaka na Yalo ni Turaga, kei na gauna ga au sa kidava rawa kina, au sa biuti ira tani sara.³⁰

Eda sa saga tiko me da vakamuria na lawa vakasilesitieli ni Kalou; eda sa vunautaka tiko na kosipeli i Jisu Karisito ka saga me da vakayacora na kena ivakavuvuli. Oqo na taro ena saumi keda tiko beka ni da vakayacora na ka oqo? Ena saumi keda beka me da yalodina? Ena saumi keda beka me da lako ka curuma yani na veimataqali veivakatovolei se veivakararawataki, se veivakacacani, se yacova sara na mate, me baleta na matanitu ni Kalou, me baleta na veivakabulai kei na bula tawamudu, na isolisoli cecere duadua e rawa ni vakatikora na Kalou vei ira na luve ni tamata? Au kaya ni na yaco vakakina, kau sa nuitaka ni ko ira na Yalododonu Edaidai, o ira na tagane taucoko era vakailesilesi—me da yalodina vua na Turaga, ka nanuma noda masu, cakacakataka na Yalo Tabu, cakacaka me kilai kina na loma kei na lewa ni Kalou ka me da kila na salatu me da lako kina, ka rawata na Yalo ni Turaga kei na Yalo Tabu, ka me da vorata rawa na vuravura ka gumatuataka na noda ilesilesi me yacova na noda vakacavara sara na bula vakatovotovo oqo.³¹