10. Kenan long Taem blong OlTesteman

Dan (Laes) Jeroboam i putumap wan yang buluk se oli mekem long gol blong olgeta long Not Kingdom oli wosipim (1 King 12:26–33). Dan nao i baondri blong Isrel bifo, hemia long Not saed.

Hil Kamel Elaeja i givim jalenj long ol profet blong Bal, mo i openem ol heven blong ren i foldaon (1 King 18:17–46).

Megido Wan ples we plante faet i bin hapen long hem (Jajes 4:13–16; 5:19; 2 King 23:29; 2 Kron 35:20–23). Solomon i putum wan takis blong save bildimap Megido (1 King 9:15). King Josaea blong Juda i kasem bigfala kil we i kilim hem i ded long wan faet agensem King Neko blong Ijip (2 King 23:29–30). Long Seken Kaming blong Lod, bae wan bigfala mo lasfala faet bae i tekples long Vale blong Jisrehel olsem pat blong faet blong Amagedon (Joel 3:14; Rev 16:16; 19:11–21). Nem ia, Amagedon, i wan translesen blong toktok ia, Har Megiddon, o Bigfala Hil ia Megido, long lanwis Gris i kam long lanwis Hibru.

Jisrehel Nem blong wan siti long ples we i moa bigwan mo graon i gud moa long vale blong Isrel, we i tekem semfala nem ia. Ol king blong Not Kingdom ia oli bin bildim wan haos blong king long ples ia (2 Saml 2:8–9; 1 King 21:1–2). Nogud Kwin ia, Jesebel, i bin laef mo i bin ded long ples ia (1 King 21; 2 King 9:30).

Betsan Isrel i bin fesem ol man Kenan long ples ia (Jos 17:12–16). Oli bin fasem bodi blong Sol long ol wol blong bigfala haos blong haed blong hem (1 Saml 31:10–13).

Dotan Ol brata blong Josef oli bin salem hem olsem wan slef (Jen 37:17, 28; 45:4). Elisa i bin gat wan visen we hem i luk wan hil i fulap long ol hos mo ol hos kat (2 King 6:12–17).

Sameria Hem i kapitol blong Not Kingdom (1 King 16:24–29). King Ahab i bildim wan tempol blong wosipim Bal (1 King 16:32–33). Elaeja mo Elisa oli bin givim seves (1 King 18:2; 2 King 6:19–20). Long yia 721 B.K.B., Ol Man Asiria oli bin tekova long ples ia, mo oli mekem ol tenfala traeb oli kam prisena (2 King 18:9–10).

Sekem Ebraham i bildim wan olta (Jen 12:6–7). Jekob i bin laef kolosap long ples ia. Saemon mo Livae, tufala i kilimded evriwan we i man long siti ia (Jen 34:25). Gudfala toktok blong Josua blong leftemap tingting blong man blong “jusum naoia” blong wok blong God, i kam long Sekem (Jos 24:15). Long ples ia nao, Jeroboam i stanemap fas kapitol blong Not Kingdom (1 King 12).

Hil Ebal mo Hil Girisim Josua i seraotem Isrel folem tufala hil ia—oli talemaot ol blesing blong loa long Hil Gerisim, be ol nogud strong toktok oli kam long Hil Ebal (Jos 8:33). Ol Man Sameria oli bin bildim wan tempol afta antap long Gerisim (2 King 17:32–33).

Peniel Long ples ia Jekob i resling ful naet wetem wan mesenja blong Lod (Jen 32:24–32). Gideon i prapa spolem gud wan bigfala haos blong haed blong wan man Midian (Jajes 8:5, 8–9).

Jopa Jona i bin sel aot long ples ia i go long Tarsis blong mekem se bae hem i no go long misin blong hem long Nineve (Jona 1:1–3).

Silo Long taem blong Ol Jaj, kapitol blong Isrel mo tabenakol oli bin stap ia (1 Saml 4:3–4).

Betel (Lus) Long ples ia nao Ebraham i bin seperet long Lot (Jen 13:1–11) mo i bin gat wan visen (Jen 13; Ebr 2:19–20). Jekob i bin gat wan visen blong wan lada we i go antap long heven (Jen 28:10–22). Tabenakol i bin stap long ples ia blong smol taem (Jajes 20:26–28). Jeroboam i putumap wan yang buluk se oli mekem long gol blong olgeta long Not Kingdom oli wosipim (1 King 12:26–33).

Gibeon Ol pipol blong laen blong Hivi we oli stap long ples ia oli bin giaman long Josua mo mekem Josua i mekem wan promes long olgeta (Jos 9). San i no muv kasem taem Josua i winim faet (Jos 10:2–13). Ples ia i bin wan ples we tabenakol i bin stap long hem blong smol taem (1 Kron 16:39).

Gasa, Asdod, Askelon, Ekron, Gat (olgeta faef siti blong Ol Man Filistia) Aot long ol siti ia nao Ol Man Filistia oli bin stap mekem wo long Isrel plante taem.

Betlehem Oli bin berem Rejel kolosap long ples ia (Jen 35:19) Rut mo Boas, tufala i bin stap long ples ia (Rut 1:1–2; 2:1, 4). Oli bin singaotem ples ia se, siti blong Deved (Luk 2:4).

Hebron Ebraham (Jen 13:18), Aesak, Jekob (Jen 35:27), Deved (2 Saml 2:1–4), mo Absalom (2 Saml 15:10) oli bin stap long ples ia. Hebron i bin fas kapitol blong Juda anda long King Deved (2 Saml 2:11). Oli stap bilivim se oli bin berem Ebraham, Sera, Aesak, Rebeka, Jekob mo Lea insaed long hol blong ston blong Makpela (Jen 23:17–20; 49:31, 33).

Enkedi Deved i bin haed long Sol mo i no bin kilimded Sol (1 Saml 23:29–24:22).

Gerara Ebraham mo Aesak oli bin stap long ples ia blong smol taem (Jen 20–22; 26).

Bereseba Ebraham i digim wan wel long ples ia mo i bin mekem wan kavenan wetem Abimelek (Jen 21:31). Aesak i bin luk Lod (Jen 26:17, 23–24), mo Jekob i bin stap long ples ia (Jen 35:10; 46:1).

Sodom mo Gomora Lot i jusum blong stap long Sodom (Jen 13:11–12; 14:12). God i prapa spolem gud Sodom mo Gomora from fasin nogud blong ol pipol we oli stap long tufala taon ia (Jen 19:24–26). Samtaem afta, Jisas i bin yusum tufala siti ia olsem ol simbol blong fasin nogud (Mat 10:15).