9. Wol long Taem blong OlTesteman

Hil Ararat Ples ia nao we oli stap talem se Sip blong Noa i kam so long hem (Jen 8:4). Stret ples ia we hemia i hapen, oli no save gud yet.

Uru Fas ples we Ebraham i stap long hem, we i kolosap long maot blong Yufretes reva, ples ia we kolosap hem i mas sakrifaesem wan man, i bin luk wan enjel blong Jehova, mo i kasem Yurim mo Tumim (Jen 11:28–12:1; Ebr 1; 3:1). (Tekem not tu se i gat wan nara ples tu we nem blong hem Uru we i stap long Not Mesopotemia.)

Babilon, Babel (Jina) Kus, we i boe blong Ham i faswan blong kam stap long ples ia, mo afta, Nimrod. Hem i eria we Ol Man blong Jared oli kamaot long hem long taem blong Taoa blong Babel long ol levelples blong Jina. Afta long hemia, i kam kapitol provins blong Babilonia mo i ples we ol king blong Ol Man Babilonia oli bin stap long hem; wan long olgeta i Nebukadnesa we i bin tekem plante Jiu prisena oli kam long taon ia afta we Jerusalem i lus evriwan (yia 587 B.K.B.). Ol Jiu oli bin stap nomo olsem prisena long Babilon blong 70 yia kasem taem blong King Sirus, we i bin letem Ol Man Jiu oli gobak long Jerusalem blong oli bildimbak tempol. Profet Daniel tu i bin stap long ples ia anda long rul blong Nebukadnesa, Beltesasa, mo Darias Ⅰ (Jen 10:10; 11:1–9; 2 King 24–25; Jerem 27:1–29:10; Esik 1:1; Dan 1–12; Omnae 1:22; Ita 1:33–43).

Susa Kapitol siti blong Ol Ples we Ol Man Pesia Oli Rul long Olgeta anda long rul blong Darias Ⅰ (Haeman Darias), Sekses (Arajuveros) mo Ataksekses. Ples we Kwin Esta i stap long hem; kwin ia, fet mo strong paoa blong tingting blong hem i bin sevem Ol Man Jiu. Daniel, mo afta Nehemaea, tufala i bin wok long ples ia (Neh 1:1; 2:1; Esta 1:1; Dan 8:2).

Levelples ia Dura Oli bin sakem Sadrak, Mesak, mo Abednego i go long wan ples blong faea we faea i laet strong from se oli no bin wantem wosipim wan gol aedol we Nebukadnesa i bin mekem; Pikinini blong God i bin sevem olgeta tru, mo oli bin wokbaot mo kamaot long ples blong faea ia we faea i no bonem olgeta nating (Dan 3).

Asiria Asuru i bin fas kapitol blong Asiria, mo afta i hemia blong Nineve. Ol rula blong Asiria, Salmanesa Ⅴ mo Sagon Ⅱ oli bin winim ol ples long Not Kingdom blong Isrel, mo oli tekem i go ol tenfala traeb oli prisena long yia 721 B.K.B. (2 King 14–15; 17–19). Asiria i bin wan denja long Juda kasem yia 612 B.K.B., taem Babilon i tekova long Asiria.

Nineve Kapitol blong Asiria. Asiria i faet i go long graon blong Juda long taem blong rul blong Hesekia mo long taem blong seves blong profet Aesea. Jerusalem, we i kapitol siti blong Juda, long wan merikel, wan enjel i bin sevem mo i kilimded 185,000 soldia blong Asiria (2 King 19:32–37). Lod i talem long profet Jona blong talem long ol man blong siti ia blong oli sakem sin (Jona 1:2; 3:1–4).

Haran Ebraham i bin stap long ples ia blong samtaem bifo hem i go long Kenan. Papa mo brata blong Ebraham oli gohed tu blong stap long ples ia. Rebeka (waef blong Aesak), mo Rejel, Lea, Bilba, mo Silpa (ol waef blong Jekob) oli kamaot long ples ia (Jen 11:31–32; 24:10; 29:4–6; Ebr 2:4–5).

Kakemis Nebukadnesa i bin winim King Neko long ples ia; mo hemia i putum en long paoa blong Ijip long Kenan (2 Kron 35:20–36:6).

Saedon Taon ia, Saedon i bin stanemap; Saedon i wan bigfala apuboe blong Ham, mo i siti blong ol man Kenan we i stap antap evriwan long Not (Jen 10:15–20). Hem i bin hom blong Jesebel we i bin soem fasin blong wosip long Bal long Isrel (1 King 16:30–33).

Taea Hem i bin wan impoten siti blong mekem bisnis mo waf blong ol sip long Siria. Hiram blong Taea i bin sendem sida mo gol mo sam wokman blong helpem Solomon blong bildim tempol blong hem (1 King 5:1–10, 18; 9:11).

Damaskes Ebraham i bin sevem Lot kolosap long ples ia. Hem i jif siti blong Siria. Long taem blong rul blong King Deved, Ol Man Isrel oli tekova long siti ia. Elaeja i anaoentem Hasael blong i kam king ova long Damaskes (Jen 14:14–15; 2 Saml 8:5–6; 1 King 19:15).

Kenan Ebraham, Aesak, Jekob mo ol pikinini we oli kamaot long laen blong olgeta, oli bin kasem graon ia blong i blong olgeta kasem taem we i no gat en (Jen 17:8; 28).

Hil Sinae (Horeb) Lod i toktok long Moses taem Hem i stap long wan smol tri we faea i laet long hem (Eks 3:1–2). God i givim Loa mo Ol Ten Komanmen long Moses (Eks 19–20). Lod i toktok long Elaeja long wan kwaet, smol voes (1 King 19:8–12).

Ejionkeba King Solomon i bildim fulap sip long Ejionkeba (1 King 9:26). Ating long ples ia nao kwin Siba, i kam so long hem afta we hem i harem gudfala nem blong Solomon (1 King 10:1–13).

Ijip Ebraham i travel i go ia from i bin gat wan bigfala nogud taem we kaekae i bin sot long Uru (Ebr 2:1, 21). Lod i bin talem long Ebraham blong tijim wanem we Hem i bin talemaot long hem long Ol Man Ijip (Ebr 3:15). Afta we ol brata blong Josef oli bin salem hem olsem wan slef (Jen 37:28), Josef i bin kam wan man blong rul insaed long haos blong Potifa. Oli sakem hem long kalabus. Hem i talemaot mining blong drim blong King mo hem i kasem wan posisen we hem i gat atoriti insaed long Ijip. Josef mo ol brata blong hem oli bin groap tugeta long ples ia. Jekob mo famli blong hem oli bin muv i go long ples ia (Jen 39–46). Ol pikinini blong Isrel oli bin stap long Gosen long taem blong wokbaot long Ijip (Jen 47:6).

Ol Man Isrel oli bin kam plante mo oli bin kam strong tumas; afta, Ol Man Ijip oli bin mekem olgeta oli kam prisena (Eks 1:7–14). Afta we plante defren kaen sik oli kasem Isrel, King i bin letem Isrel blong oli aot long Ijip (Eks 12:31–41). Oli tekem Jeremaea i go long Ijip (Jerem 43:4–7).

Kafto (Krit) Bifo, hem i graon blong Ol Man Maenoa.