11. Holi Graon long Taem blong Niu Testeman

Taea mo Saedon Jisas i komperem Korasin mo Betsaeda long Taea mo Saedon (Mat 11:20–22). Hem i mekem gel blong wan woman Jentael i kam oraet bakegen (Mat 15:21–28).

Hil we Jisas I Jenis I Kam Narafala Jisas i jenis i kam narafala long fored blong Pita, Jemes, mo Jon, mo oli bin kasem ol ki blong kingdom (Mat 17:1–13). (Sam oli stap biliv se Hil we Jisas I Jenis I Kam Narafala, hem i Hil Hemon, mo sam narafala oli biliv se hem i Hil Taboro.)

Sisaria Filipae Pita i testifae se Jisas, Hem i Kraes mo hem i kasem promes blong kasem ol ki blong kingdom (Mat 16:13–20). Jisas i bin talem finis se bambae Hem i ded, mo bambae Hem i laef bakegen long ded (Mat 16:21–28).

Eria blong Galili Jisas i bin spenem bigfala taem blong laef blong Hem mo seves blong Hem long Galili (Mat 4:23–25). Long ples ia, Hem i bin givim Toktok antap long Hil (Mat 5–7); Hem i bin mekem wan man we i kasem sik leprosi i kam oraet bakegen (Mat 8:1–4); mo Hem i bin jusum, i bin odenem, mo i bin sendem Olgeta Twelef Aposol oli go aot long wol; aot long Olgeta Twelef Aposol ia, i luk se Judas Iskariot nomo i no wan man Galili (Mak 3:13–19). Long Galili, Jisas Kraes we i girap long laef bakegen long ded i bin kamaot long ol Aposol (Mat 28:16–20).

Lagun blong Galili, we afta oli singaotem Lagun blong Taebirias Jisas i bin stap long bot blong Pita mo i tijim ol man (Luk 5:1–3); mo Hem i bin singaotem Pita, Andru, Jemes, mo Jon blong oli kam man blong pulum man (Mat 4:18–22; Luk 5:1–11). Mo tu, Hem i bin mekem strong win i kam daon (Luk 8:22–25), i bin stap long wan bot mo i tijim ol parabol (Mat 13), i bin wokbaot antap long solwota (Mat 14:22–32), mo i bin kamaot long ol disaepol blong Hem afta we Hem i bin laef bakegen long ded (Jon 21).

Betsaeda Pita, Andru, mo Filip oli bon long Betsaeda (Jon 1:44). Jisas i bin go aot kwaet wetem ol Aposol blong Hem kolosap long Betsaeda. Ol grup blong ol man oli bin folem Hem, mo Hem i fidim olgeta 5,000 (Luk 9:10–17; Jon 6:1–14). Long ples ia, Jisas i mekem wan man we i blaen i save luk bakegen (Mak 8:22–26).

Kapaneam Ples ia, i homples blong Pita (Mat 8:5, 14). Long Kapaneam, we Matiu i singaotem se hem i, “stret taon” blong Jisas; Jisas i bin mekem wan man we i paralaes i kam oraet bakegen (Mat 9:1–7; Mak 2:1–12), i bin hilim wokman blong wan kapten soldia, i bin hilim mama blong waef blong Pita (Mat 8:5–15), i bin singaotem Matiu i kam wan long ol Aposol blong Hem (Mat 9:9), i bin mekem olgeta we oli blaen oli save luk bakegen, i bin ronemaot wan devel (Mat 9:27–33), i bin mekem wan man we i no save stretem han blong hem i kam oraet bakegen long wan Sabat dei (Mat 12:9–13), i bin givim toktok ia abaot bred ia we i givim laef (Jon 6:22–65), mo i bin agri blong pem ol takis, mo talem long Pita blong go karem mane long maot blong fid (Mat 17:24–27).

Magdala Ples ia i bin homples blong Meri Magdala (Mak 16:9). Jisas i bin kam long ples ia afta we Hem i bin fidim 4,000 man (Mat 15:32–39), mo ol Farisi mo ol Sadusi oli bin askem Hem blong Hem i mas soem wan saen we i kam long heven (Mat 16:1–4).

Kena Jisas i tanem wota i kam waen (Jon 2:1–11) mo i bin hilim boe blong wan haeman we i bin stap long Kapaneam (Jon 4:46–54). Kena i bin homples tu blong Nataniel (Jon 21:2).

Nasaret Ol toktok we i go long Meri mo Josef oli bin tekem ples long Nasaret (Mat 1:18–25; Luk 1:26–38; 2:4–5). Afta we oli kambak long Ijip, Jisas i bin spenem taem, taem Hem i smol pikinini mo taem i yangfala long ples ia (Mat 2:19–23; Luk 2:51–52); i bin anaonsem se Hem i Mesaea, mo ples ia nao ol stret manples blong Hem oli sakemaot Hem (Luk 4:14–32).

Jeriko Jisas i mekem wan blaen man i luk bakegen (Luk 18:35–43). Hem i bin kakae tu wetem Sakias, “bos blong ol man blong tekem mane blong takis” (Luk 19:1–10).

Betabara Jon Baptaes i bin testifae se hem i “man i stap singaot long draeples” (Jon 1:19–28). Jon i bin baptaesem Jisas long Jodan Reva mo i bin testifae se Jisas i Smol Sipsip blong God (Jon 1:28–34).

Draeples blong Judia Jon Baptaes i bin prij long draeples ia (Mat 3:1–4), i ples we Jisas i bin livim kakae blong 40 dei mo Setan i kam temtem Hem (Mat 4:1–11).

Emeas Kraes we i girap long ded i bin wokbaot long rod ia i go long Emeas wetem tufala disaepol blong Hem (Luk 24:13–32).

Betfas Tufala disaepol i tekem wan dongki i kam long Jisas, mo Hem i sidaon long dongki ia blong statem wokbaot blong Hem i kam insaed long Jerusalem blong soem se hem i King (Mat 21:1–11).

Betani Ples ia i homples blong Meri, Mata, mo Lasaros (Jon 11:1), Meri i bin harem ol toktok blong Jisas, mo Jisas i bin toktok long Mata long saed blong fasin ia blong jusum “gudfala samting” (Luk 10:38–42); Jisas i mekem Lasaros i laef bakegen long ded (Jon 11:1–44); mo Meri i anaoentem ol leg blong Jisas (Mat 26:6–13; Jon 12:1–8).

Betlehem Jisas i bon long ples ia, mo oli bin putum hem long wan bokis blong kaekae blong ol animol (Luk 2:1–7); ol enjel oli bin talemaot long ol man blong lukaot long sipsip se Jisas i bon (Luk 2:8–20); wan sta i bin stap lidim ol waes man oli kam long Jisas (Mat 2:1–12); mo Herod i bin kilimded ol pikinini (Mat 2:16–18).