13. Ol Wokbaot blong Aposol Pol Taem i Mekem Misinari Wok

Gasa Filip i bin prij long saed blong Kraes mo taem hem i stap wokbaot i go long Gasa, hem i bin baptaesem wan haeman blong lukaot mane blong kwin (Wok 8:26–39).

Jerusalem Luk long map 12 blong luk ol samting we oli bin hapen long Jerusalem.

Jopa Pita i kasem wan visen se God i stap givim presen blong fasin blong sakem sin i go long Ol Jentael (Wok 10; 11:5–18). Pita i mekem Tabita i girap long ded (Wok 9:36–42).

Sameria Filip i bin prij long Sameria (Wok 8:5–13), mo afta, Pita mo Jon oli bin tij long ples ia (Wok 8:14–25). Afta we tufala i bin givim presen we i Tabu Spirit, Saemon we i wan kleva man i bin traem blong pem presen ia long tufala (Wok 8:9–24).

Sisaria Long ples ia nao, afta we wan enjel i bin prij long wan kapten we nem blong hem Konilias, Pita i bin letem hem blong kasem baptaes (Wok 10). Long ples ia nao Pol i bin mekem toktok blong hem blong difendem hem long fored blong Agripa (Wok 25–26; luk tu long JS—H 1:24–25).

Damaskes Jisas i kamaot long Sol (Wok 9:1–7). Afta we Ananaeas i mekem Sol i save luk bakegen, Sol i kasem baptaes mo i statem seves blong hem (Wok 9:10–27).

Antiok (long Siria) Long ples ia oli bin singaotem ol disaepol se oli ol Kristin man (Wok 11:26). Agabus i bin talem profesi blong taem blong hanggri (Wok 11:27–28). Bigfala fasin blong agens i bin girap long Antiok long saed blong sakomsaes (Wok 14:26–28; 15:1–9). Long Antiok, Pol i statem nambatu misin blong hem wetem Saelas, Banabas, mo Judas Barabas (Wok 15:22, 30, 35).

Tasas Homples blong Pol; Ol Lida oli sendem Pol i go long ples ia blong protektem laef blong hem (Wok 9:29–30).

Saepras Afta we oli kasem ol hadtaem, samfala Sent oli ronwe i go long aelan ia (Wok 11:19). Pol i travel i go long Saepras long fasfala misinari wokbaot blong hem (Wok 13:4–5), semmak olsem Banabas mo Mak i bin mekem afta (Wok 15:39).

Pafos Pol i sakem wan strong tok i go long wan kleva long ples ia (Wok 13:6–11).

Debe Pol mo Banabas i prijim gospel long siti ia (Wok 14:6–7, 20–21).

Listra Taem Pol i bin mekem wan man we i no save wokbaot i wokbaot bakegen, oli bin singaotem hem mo Banabas olsem ol god. Oli stonem Pol mo oli ting se i ded, be hem i laef nomo mo i bin gohed blong prij (Wok 14:6–21). Homples blong Timoti (Wok 16:1–3).

Ikoniam Long fas misin blong olgeta, Pol mo Banabas tufala i bin prij long ples ia mo ol man oli talem se bae oli stonem tufala (Wok 13:51–14:7).

Laodisia mo Kolosi Laodisia i wan long ol branj blong Jos we Pol i bin visitim mo olgeta ia oli bin kasem ol leta we oli kam long Pol (Kol 4:16). Mo tu, hem i wan long ol seven taon o siti we oli tokbaot long buk blong Revelesen (olgeta narawan oli blong Efesas, Smana, Pegamom, Tuatira, Sadis, mo Filadelfia; luk long Rev 1:11). Kolosi i stap 18 kilometa long Is blong Laodisia. Pol i bin raet i go long olgeta Sent we oli bin stap long ples ia.

Antiok (long Pisidia) Long fasfala misin blong olgeta, Pol mo Banabas oli bin tijim Ol Jiu se Kraes i bin kamaot long laen blong Deved. Pol i bin givim gospel long Isrel, mo afta, long Ol Jentael. Pol mo Banabas i bin kasem hadtaem mo oli bin sakemaot tufala (Wok 13:14–50).

Maelitas Taem hem i bin stap long ples ia long nambatri misin blong hem, Pol i bin wonem ol elda blong Jos se “ol wael dog” bae oli kam joenem jos (Wok 20:29–31).

Patmos Jon i bin wan prisena long aelan ia taem hem i bin kasem ol visen we oli stap naoia long buk blong Revelesen (Rev 1:9).

Efesas Apolos i bin prij long ples ia wetem paoa (Wok 18:24–28). Pol, long nambatri misin blong hem i bin tij long Efesas blong tu yia, mo hem i bin jenisim laef blong ol pipol (Wok 19:10, 18). Long ples ia nao hem i bin givim presen we i Tabu Spirit tru long fasin blong putum han antap long hed (Wok 19:1–7) mo hem i bin mekem plante merikel, olsem blong sakemaot ol devel spirit (Wok 19:8–21). Long ples ia, olgeta we oli bin stap wosipim Daeana (Atemis) oli mekem toktok agensem Pol (Wok 19:22–41). Pat blong buk blong Ol Revelesen i go long Jos long Efesas (Rev 1:11).

Troas Taem Pol i bin stap long ples ia long nambatu misinari wokbaot blong hem, hem i bin luk wan visen blong wan man long Masedonia we i stap askem help (Wok 16:9–12). Taem hem i bin stap long ples ia long nambatri misin blong hem, Pol i bin mekem Yutikas i girap long ded (Wok 20:6–12).

Filipae Pol, Saelas, mo Timoti i jenisim laef blong wan woman, Lidia, i kam long Kraes; oli sakemaot wan devel spirit, mo oli bin kilim nogud olgeta (Wok 16:11–23). Oli bin kasem help we i kam long heven blong save ronwe long kalabus (Wok 16:23–26).

Atens Taem hem i bin stap long nambatu misin blong hem long Atens, Pol i bin prij long Hil Mars (Areopagus) long saed blong “god ia we oli no save long hem” (Wok 17:22–34).

Korin Pol i bin go long Korin long nambatu misin blong hem, mo hem i bin stap long ples ia wetem Akwila mo Prisila. Hem i bin prij long ples ia mo i bin baptaesem plante pipol (Wok 18:1–18). Taem hem i bin stap long Korin, Pol i bin raetem leta blong hem long Ol Man Rom.

Tesalonaeka Pol i bin prij long ples ia long taem blong nambatu misinari wokbaot blong hem. Misinari grup blong hem i bin aot blong go long Berea afta we Ol Man Jiu oli bin talem se bae oli kilim olgeta i ded (Wok 17:1–10).

Berea Pol, Saelas mo Timoti oli faenem ol gudfala sol blong tij long taem blong nambatu misinari wokbaot blong Pol. Ol Jiu we oli stap long Tesalonaeka oli bin folem mo givim hadtaem long olgeta (Wok 17:10–13).

Masedonia Pol i bin tij long ples ia long nambatu mo nambatri wokbaot blong hem (Wok 16:9–40; 19:21). Pol i bin presem gud hat blong Ol Sent blong Masedonia we oli givim samting long hem mo long olgeta pua Sent long Jerusalem (Rom 15:26; 2 Kor 8:1–5; 11:9).

Melita Pol i bin go long sip we i rek long aelan ia taem hem i bin stap go long Rom (Wok 26:32; 27:1, 41–44). Hem i no kasem kil taem snek i kakae han blong hem mo plante we oli bin sik long Melita oli bin kam oraet bakegen (Wok 28:1–9).

Rom Pol i mas stap long wan haos we man i gad long hem, mo hem i bin prij long ples ia blong tu yia (Wok 28:16–31). Hem i bin raetem tu ol leta i go long ol man long Efesas, Ol Man Filipae, mo ol man long Kolosi mo long Timoti mo Filimon we tufala i stap long kalabus long Rom. Pita i bin raetem fas leta taem hem i stap long “Babilon” we maet i Rom, i no longtaem afta we Nira i stap givim hadtaem long ol Kristin man long 64 A.K.B. Plante taem oli biliv se oli bin kilimded Pita mo Pol long ples ia from bilif blong tufala.