Ang Canaan sa mga Panahon sa Daang Tugon

Dan (Lais) Si Jeroboam mibutang og bulawan nga nati nga baka alang sa Amihanang Gingharian aron simbahon (1 Hari 12:26–33). Ang Dan mao ang amihanang utlanan sa karaang Israel.

Bungtod sa Carmel Si Elijah mihagit sa mga pari ni Baal ug miabli sa mga langit aron moulan (1 Hari 18:17–40).

Megiddo Usa ka dapit sa daghang mga gubat (Mag. 4:13–16; 5:19; 2 Cron. 35:20–23; 2 Hari 23:29). Si Solomon mitigum og mga tawo aron pagtukod sa Megiddo (1 Hari 9:15). Si Haring Josias sa Juda maayo nga pagkasamad diha sa gubat batok ni Paraon Nechao sa Ehipto (2 Hari 23:29–30). Sa Ikaduhang Pag-anhi sa Ginoo, usa ka dako ug katapusang panagbangi mahitabo diha sa Walog sa Jesreel isip kabahin sa gubat sa Armagedon (Joel 3:14; Pin. 16:16; 19:11–21). Ang ngalan nga Armagedon usa ka Griyego nga paghubad gikan sa Hebreohanon nga Har Megiddon, o Bungtod sa Megiddo.

Jesreel Ang ngalan sa usa ka dakbayan diha sa labing dako ug labing tabunok nga walog sa Israel sa sama nga ngalan. Ang mga hari sa Amihanang Gingharian mitukod og usa ka palasyo dinhi (2 Sam. 2:8–9; 1 Hari 21:1–2). Ang dautan nga Rayna Jezabel mipuyo ug namatay dinhi (1 Hari 21; 2 Hari 9:30).

Beth-shan Dinhi ang Israel miatubang sa mga taga-Canaan (Jos. 17:12–16). Ang lawas ni Saul gigaid sa mga bongbong niini nga kota (1 Sam. 31:10–13).

Dothan Si Jose gibaligya ngadto sa pagkaulipon sa iyang igsoon nga mga lalaki (Gen. 37:17, 28; 45:4). Si Eliseo adunay panan-awon sa bukid nga puno og mga kabayo ug mga karwahe (2 Hari 6:12–17).

Samaria Ang ulohan sa Amihanang Gingharian (1 Hari 16:24–29). Si Haring Achab mitukod og templo ni Baal (1 Hari 16:32–33). Sila si Elijah ug Eliseo nangalagad (1 Hari 18:2; 2 Hari 6:19–20). Sa 721 B.C. ang mga taga-Asiria mibuntog niini, ug mihingpit sa pagbihag sa 10 ka mga tribo (2 Hari 18:9–10).

Sichem Si Abraham mitukod og usa ka altar (Gen. 12:6–7). Si Jacob mipuyo duol dinhi. Sila si Simeon ug Levi mipatay sa tanang mga lalaki niini nga dakbayan (Gen. 34:25). Ang pag-awhag ni Josue sa “pagpili…niining adlawa” aron moalagad sa Dios miabut sa Sichem (Jos. 24:15). Dinhi si Jeroboam mitukod sa unang ulohan sa Amihanang Gingharian (1 Hari 12).

Bungtod sa Ebal ug Bungtod sa Gerisim Si Josue mibahin sa Israel pinaagi niining duha ka mga bungtod—ang mga panalangin sa balaod gipahayag gikan sa Bungtod sa Gerisim, samtang ang mga tunglo nagagikan sa Bungtod sa Ebal (Jos. 8:33). Ang mga Samarianhon sa kaulahian mitukod og templo sa Gerisim (2 Hari 17:32–33).

Penuel (Peniel) Dinhi si Jacob nakigbisog sa tibuok gabii uban sa sulugoon sa Ginoo (Gen. 32:24–32). Si Gideon milaglag sa kota sa taga-Midian (Mag. 8:5, 8–9).

Joppe Si Jonas milawig gikan dinhi paingon sa Tarsis aron paglikay sa iyang misyon ngadto sa Nineve (Jon. 1:1–3).

Silo Sulod sa panahon sa Mga Maghuhukom, ang ulohan sa Israel ug ang tabernakulo nahimutang dinhi (1 Sam. 4:3–4).

Bethel (Luz) Dinhi si Abraham mibulag gikan ni Lot (Gen. 13:1–11) ug adunay panan-awon (Gen. 13; Abr. 2:19–20). Si Jacob adunay panan-awon sa usa ka hagdanan nga miabut ngadto sa langit (Gen. 28:10–22). Ang tabernakulo nahimutang dinhi sulod sa dugay nga panahon (Mag. 20:26–28). Si Jeroboam mibutang og bulawan nga nati nga baka alang sa Amihanang Gingharian aron simbahon (1 Hari 12:26–33).

Gabaon Ang Hebehanon nga mga katawhan gikan dinhi milansis ni Josue ngadto sa pagpakigsabut (Jos. 9). Ang adlaw mihunong samtang si Josue midaog sa gubat (Jos. 10:2–13). Kini usab temporaryo nga nahimutangan sa tabernakulo (1 Cron. 16:39).

Gaza, Asdod, Ascalon, Ekron, Gath (ang lima ka mga dakbayan sa mga Filistehanon) Gikan niining mga dakbayan ang mga Filistehanon sa kasagaran makiggubat sa Israel.

Bethlehem Si Raquel gilubong sa dili layo (Gen. 35:19). Sila si Ruth ug Booz nakapuyo dinhi (Ruth 1:1–2; 2:1, 4). Kini gitawag og dakbayan ni David (Luc. 2:4).

Hebron Sila si Abraham (Gen. 13:18), Isaac, Jacob (Gen. 35:27), David (2 Sam. 2:1–4), ug Absalom (2 Sam. 15:10) mipuyo dinhi. Kini mao ang unang ulohan sa Juda ubos ni Haring David (2 Sam. 2:11). Kini gituohan nga sila si Abraham, Sarah, Isaac, Rebekah, Jacob, ug Lea gilubong dinhi sa langub sa Macpela (Gen. 23:17–20; 49:31, 33).

Engedi Si David mitago gikan ni Saul ug gipasagdahan nga mabuhi si Saul (1 Sam. 23:29; 24:1–22).

Gerar Sila si Abraham ug Isaac mipuyo dinhi sa usa ka higayon (Gen. 20–22; 26).

Beer-sheba Si Abraham mikalot og atabay dinhi ug mipakigsaad uban ni Abimelech (Gen. 21:31). Si Isaac nakakita sa Ginoo (Gen. 26:17, 23–24), ug si Jacob mipuyo dinhi (Gen. 35:10; 46:1).

Sodoma ug Gomorra Si Lot mipili sa pagpuyo sa Sodoma (Gen. 13:11–12; 14:12). Ang Dios milaglag sa Sodoma ug Gomorra tungod sa pagkadautan (Gen. 19:24–26). Sa kaulahian si Jesus migamit niining mga dakbayan isip mga simbolo sa pagkadautan (Mat. 10:15).