21. Walog sa Jesreel

Magtan-aw paingon sa kasadpan gikan sa ibabaw sa Bungtod sa Tabor ngadto sa usa ka bahin sa Walog sa Jesreel. Bisan kon ang Walog sa Jesreel sa kasagaran gihunahuna isip usa ka dako nga walog, sa pagkatinuod usa kini ka nagsunodsunod nga mga walog nga nagsumpay sa Kapatagan sa Acco uban sa Walog sa Jordan ug sa rehiyon sa Dagat sa Galilea. Ang walog sa Megiddo, sama pananglit, anaa sa kasadpang bahin niini nga walog. Ang Walog sa Jesreel mao ang labing mahinungdanon nga agianan tabok sa Balaan nga Yuta taliwala sa Dagat sa Mediterania sa kasadpan ug sa Walog sa Jordan sa silangan.

Mahinungdanon nga mga Hitabo: Ang labing dako nga karsada nga nagsumpay sa Ehipto ug Mesopotamia nag-agi niini nga walog, ug daghan nga mga gubat ang giaway dinhi (Mag. 1:22–27; 5:19; 2 Hari 23:29–30). Ang dako kaayo nga katapusang panagbangi niini nga yuta magsugod uban sa gubat sa Armageddon, diin paga-awayon dili madugay sa dili pa ang Ikaduhang Pag-anhi sa Manluluwas; nagkuha kini sa iyang ngalan gikan sa Har Megiddon, o Bungtod sa Megiddo (Ezeq. 38; Joel 3:9–14; Zac. 14:2–5; Pin. 16:14–16).