1 Me yibi buch u lan e pi rran rokʼ Ahaz ni fare pagael ni fak Jotham, ni beeʼ nib pagael ni fak Uzziah, ni fare pilung nu Judah, me Rezin, ni fare pilung nu Syria, nge Pekah ni beeʼ nib pagael ni fak Remaliah, ni pilung nu Israel, e ranow iyaen nga Jerusalem ko mael, machane deyog ni ngar gelgow.

2 Ma noeg ni fare tabinaew rokʼ David, nni gaʼar: Yu Syria e ba un ngakʼ yu Ephraim. Ma gumʼirchaʼ rokʼ e oeb ni murus, nge gumʼirchaʼen e gidiiʼ rokʼ, ni boed e gakʼiy u mapan ni ma mithmitheg e nifeng.

3 Me gaʼar fare Somoel ngakʼ Isaiah: Mman e chiney ngam madaʼ gow Ahaz, gur nge Shearjashub ni fare pagael ni fakam, nga enggin e yubuʼ u lan e rad rokʼ e tamalukmad;

4 Me gaʼar ngakʼ: Ngam kolchiyaʼ, mag thʼaeb gulngam; dab murus ara moʼowaer laninʼum ni bachan pʼebugul fagal molʼ nibe yaen e ath riy, ni bachan e damomuw rokʼ Rezin nge yu Syria, nge fare pagael ni fak Remaliah.

5 Ya bachan yu Syria, nge yu Ephraim, nge fare pagael ni fak Remaliah, e kar puruyʼ niged e kireb ngom, ni yibe gaʼar:

6 Nga daroed ngad togopluw gaed ngakʼ yu Judah ma gaed magawon nag, ma gaed buthug nga butʼ ni fan ngodaed, ma gaed melʼeg e pilung ni nge paer riy, arragon, fare pagael ni fak Tabeal.

7 Ere baʼaray rogon ni yoeg fare Somoel ni Got: Dabi paer nib sakʼiy, ara yog ni nge yibi buch.

8 Ya loelugen yu Syria e yu Damascus, ma loelugen yu Damascus, e Rezin; ma lan dalip riliwʼ nge lal e duw make garar yu Ephraim ke paer ni dakuriy e gidiiʼ riy.

9 Ma loelugen yu Ephraim e yu Samaria, ma loelugen yu Samaria e fare pagael ni fak Remaliah. Faʼanra dabi mich u wunʼmed ma rriyulʼ ni dabiyog ni ngam ayliyed e lung riy.

10 Nge ku boech, fare Somoel e non bayay ngakʼ Ahaz, ni gaʼar:

11 Mu ning ba pow ngakʼ fare Somoel ni Got rom; mu ning ni demutrug ko nge yib u aer, ara lan e lang.

12 Machane me gaʼar Ahaz: Dab guning, ara gu sikeng nag Somoel.

13 Ma ki gaʼar: Mmotoyil gaed e chiney, O gimed e gidiiʼ ku David; gul baʼachig ni ngam moʼowaer niged e gumʼaenʼ ko gidiiʼ, ma ngkum moʼowaer nag e gumʼaenʼ ko Got rog?

14 Ere, fare Somoel e irrokʼ e ra piiʼ ba pow ngomed—Musap gaed, beeʼ nib rugod ni dawori nang e pumoʼon e ra diyen, me gargeleg beeʼ nib pagael, me pining fithingan ni Immanuel.

15 Pada nge honey e bay i kay, ni nge yog ni nang ni nge siyeg e tin nib kireb, me melʼeg e tin nib felʼ.

16 Ya musap gaed, fare tir e ranang ni nge siyeg e tin nib kireb me melʼeg e tin nib felʼ, fare nam ni gimed be fananikay e ra chuw fagal pilung riy.

17 Fare Somoel e ra fek iyib nga dakeanmed, ngo dakean e gidiiʼ romed, ngo dakean e pi gidiiʼ rokʼ e pi chitamangmed, e pi rran ni dawori yib ko fare rran ni Efraim e ra chuw u Judah, ni pilung nu Assyria.

18 Ma ra yibi buch u lan e re rran nem ni fare Somoel e ra pining e lal ni bay u gaʼangin yang yu Egypt, nge ngul ni bay u lan fare nam nu Assyria.

19 Ma bay rabaed, ngar toffan gaed ni yaed gubin nga langgin e pi loway ni kanpag, ngo lan e pi loew ko war, ngo dakean gubin e rachangal, ngo dakean gubin yuwan e garger.

20 Ma ku lan e re rran nem e fare Somoel e ra fek e resa, ni fa piʼin ni bay u barbaʼ e lulʼ, ni fare pilung nu Assyria, nge puy e piy u loelugey, nge piy u ayiy; ngo robey ngay.

21 Me bay yibi buch u lan e re rran nem, ni bay beeʼ nib moʼon nra chathowoliy ba garbaw nib bitir nge lʼagruw i saaf;

22 Ma bay yibi buch, nra yoʼor e milik mar piiʼed e pada ngakʼ nge kay; ya pada nge honey e ire ra kay e piʼin ni ke magaey u lan fare nam.

23 Ma bay yibi buch u lan e re rran nem, ni gubin yang, ni bay bbiyuʼi milaeyʼ ni vine riy ni reb e biyuʼ e silber pulwon, e bayi tharey e garger ni bay e rachangal riy.

24 Ma bay yib e gidiiʼ ngaram ni bay e gane gatʼing nge gatʼing roraed, ni bachan e gaʼangin yang e re nam nem ma bayi sug dakean ko garger nib rachangal.

25 Ma gubin e falang e bay ni ker ko kuwa, ma dabi yib e murus ko garger nib rachangal ngaram; machane bayi paer nib tagilʼ e garbaw, nge saaf nge kaming.