1 Bin migid, e fare thin rokʼ Somoel ni gaʼar ngog: Mu fek ngom bangi babyor ni kan bichiy, ngam yol ngay ko pen, ni morngaʼagen Maher-shalal-hash-baz.

2 Mug fek ngog ruwniiʼ nib yulʼyulʼ ni ngar manged mich ko chep ni ngam yoloey, ni Uriah ni fare priest, nge Zechariah ni fare pagael ni fak Jeberechiah.

3 Mug waen nggu pirew leʼengig; me diyen nge gargeleg nib pagael. Me gaʼar fare Somoel ngog: Mu pining fithingan, ni Maher-shalal-hash-baz.

4 Ya musap, fare tir e dawori nang ni nge gaʼar, Papaʼ rog nge ninaʼ rog, u mʼon ni ngan fek nge chuw e pi machaf nu Damascus nge pi chugum nu Samaria u mʼon ko fare pilung nu Assyria.

5 Fare Somoel e ki non ngog bayay, ni gaʼar:

6 Bachan e pi gidiiʼ ney e kar dubuyed raen e lulʼ nu Shiloah ni be yaen nib sowath, ma yaed be falfalaenʼ ngakʼ i Rezin nge beeʼ nib pagael ni fak Remaliah;

7 Ere chiney, musap gaed, fare Somoel e bayi fek nga dakeanraed e raen ko fare lulʼ, nib gel mab yoʼor, ni boed fare pilung nu Assyria nge gubin e rir rokʼ; ni bay yib ngalang nge tharey gubin wolʼ e lulʼ nge gubin yang e butʼ.

8 Ma bay yib nge yaen u dakean yu Judah; ma ra suguy me tharey gaʼangin yang, me yib nge madaʼ nga kʼangay; ma poen ni ke pithig radan e bayi upnguy dakean e nam rom, O Immanuel.

9 Mu peth gaed nga taʼabang, O gimed e gidiiʼ, min tʼetʼaer med; mmotoyil gaed gimed gubin e piʼin bay ko pi nam ni palog; mu falʼeged rogmed, ma yira tʼetʼaer med; mu falʼeged rogmed, ma yira tʼetʼaer med.

10 Mu puruyʼ gaed nga taʼabang, ma ra yaeni aw nib mʼayfan; moeged e thin, ma dabi buch; ya bay Got romaed.

11 Ya fare Somoel e non ngog nib gel, ni chiyliy ngog ni dab guwaen u woʼen e pi gidiiʼ ney, ni gaʼar:

12 Dab moeged, Ba ulung, ngakʼ gubin e piʼin nra yoeg e pi gidiiʼ ney ngoraed e, Ba ulung; ara murus gaed ngoraed, ara mu tamdag gaed.

13 Mu liyoer gaed ngakʼ fare Somoel ko Yoʼor, mi gimed pag nge mang ir e mang murus romed nge, tamdag romed.

14 Ma ire ra mang bangi gilʼ e meybil; machane ra mang ba malang ni nge tun ayiy ngay, nge ba war ni nge magawon nag e gidiiʼ ku Israel, nge ba wup nge tafich ngakʼ e gidiiʼ nu Jerusalem.

15 Ma bayoʼor u fithikʼraed e piʼin nra tun ay nge aw nga butʼ, mar waer gaed, min koelraed, ngan fekraed.

16 Mu mʼag fare mich, mag ning fare motochiyel u fithikʼ i pi gachalpeg.

17 Ma bay gu soen nag fare Somoel, nibe mithaeg oewchen rokʼ fapi gidiiʼ ku Jacob, ma bay gu sap nag.

18 Musap gaed, gag nge pi bitir ni ke piiʼ Somoel ngog e bogi pow nge ʼangʼang u lan yu Israel ni ke yib rokʼ fare Somoel ko Yoʼor, niʼir e be paer ko Burey ni Zion.

19 Ma napʼan ni yaedra gaʼar ngomed: Mu gayed rokʼ e piʼin ni ku aram rogon e yaʼel roraed, nge pi tamanbey nibe sononnon—ma gathi gidiiʼ e yaed e ngar gayed rokʼ e Got roraed, ni fan ngakʼ e piʼin nib fos, ni ngar rungʼaged laman e piʼin ni kar mʼaed?

20 Mu gayed ko fare motochiyel nge fare mich; ma faʼanra dab roeged e re bogi thin ney, ma bachan e dariy e tamilang roraed.

21 Ma bay ranoed u fithikʼ e gafgow ni ubchiyaʼ nge bilig; ma bay yibi buch u napʼan ni bay ramʼaed ko bilig, mar damomuw gaed, mar gerniged e pilung roraed nge Got roraed, mar sap gaed ngalang.

22 Ma bay ra sap gaed nga butʼ mar guyed e gafgow, nge lumor, nge amith, mar pired riy nga milmor.