1 Gafgow ngakʼ e piʼin ni ma yoeg e tin ni dematʼaw e thin, nge piʼin ni ma yoloey bogi banʼen ni nge gafgow nigey ni kar sunmiyed;

2 Ni ngar chefeged nga orel ko justice e piʼin nib gafgow, ma ngar chuweged matʼawon e piʼin nib gafgow ko gidiiʼ rog, ni nge paer ni piʼin ni kanimʼ roraed e mang kʼoraed, ma nge yog ni ngar moroʼroʼ gaed rokʼ e piʼin ni dakuriy e pi chitamangraed.

3 Ere mang e gimed rarinʼ u lan fare rran ko gechig, ngo lan fare rran ko mogothgoth nra yib u palog? miniiʼ e gimed ra miil iyaen ngakʼ ko ayuw? nge uw e gimed ra tay e falaʼab romed riy?

4 Ra dag moy roraed ma yaedra mʼing nga tan e pi kalbus, ma yaedra maʼathuk nga fithikʼ e piʼin ni kar mʼaed. Gubin e pinnʼey ni yug aray rogon ma dar chefeg e damomuw rokʼ riy nga orel, ya kub kʼiyeg paʼ nge paer.

5 O gur fare pilung nu Assyria, ni gur e sog ko damomuw rog, nge gur fare lay i sog u paʼaraed e ireram e damomuw roraed.

6 Gura lʼoeg nge yaen i togopluw ngakʼ ba nam nib sug ko tadumʼthin, ma gura chiyliy ngakʼ ni nge togopluw ko fapi gidiiʼ ni kug damomuw ngoraed, me fek e chugum roraed, nge kʼoraed, me yitʼraed nga butʼ ni boed e baer u kanawoʼ.

7 Machane dar nomeg ni kemus ni nge togopluw ngoraed, ara kemus nibe lemnag; ya lan gumʼirchaʼen e ke lemnag riy ni nge gatheay me thirif e pi nam u butʼ ni gathib lich.

8 Ya gaʼar: gathi pi fak e pilung rog u taʼabang e bogi pilung?

9 Gathi yu Calno e boed yu Carchemish? Ma gathi yu Hamath e boed yu Arpad? Ma gathi yu Samaria e boed yu Damascus?

10 Boed rogon ni ke sunmiy paʼag fapi gilʼelung ko liyos, nrogon yaʼan ni kan ker e ba felʼ nga rogon ko tin bay u Jerusalem ngu Samaria;

11 Dab gurinʼ, ni boed ni kug rinʼ ngakʼ yu Samaria nge pi liyos rokʼ, nge ku aram rogon ngakʼ yu Jerusalem nge pi liyos rokʼ?

12 Ere bay yibi buch u napʼan ni ke rinʼ fare Somoel gubin e pi muruwel rokʼ u dakean fare Mount Zion ngo dakean yu Jerusalem, ma gura gechig nag fare pilung nu Assyria ni bachan e gaaʼ ngalang rokʼ, nge rir ko changar rokʼ nib tolang.

13 Ya gaʼar: Dakean gelingin paʼag nge gonop rog e kug rinʼ e pinnʼey riy; ya ba tamilang anʼug; ma kug mithmitheg e pi mathil rokʼ fapi gidiiʼ, ma kug iring e pi machaf roraed, ma kug gel ko fapi gidiiʼ ni boed beeʼ nib madangdang;

14 Ma paʼag e ke pirʼeg tafen e fapi falaʼab ko gidiiʼ; ma boed beeʼ ni ma kunuy fak e nimen, e aram rogog ni kug kunuy gubin e gidiiʼ u fayleng; ma dariy beeʼ ni mithmitheg poen, ara bing lʼugun, ara yaen laman.

15 Ra ʼuf bangi tow nib togopluw ngakʼ e chaʼ ni ma muruwel ngay? Gul fare goloyoch e ra lemnag nib felʼ ngakʼ e chaʼ ni bay u paʼ nibe girngiy? Ni boed boechi laey i gakʼiy ni nge rurug ir nge togopluw ngakʼ e chaʼ ni chibiy ngalang, ara woed fare layi sog nibe chibiy ir ngalang ni gowa gathi balaey i gakʼiy!

16 Ere fare Somoel, fare Somoel ko Yoʼor, e ra piiʼ e uyngol nge yib nga fithikʼ e piʼin nib tʼuf rokʼ fare pilung; ma tanggin e rir rokʼ e ra gaelʼ ba dramrom ni boed e dramrom ko nifiy.

17 Ma fare tamilang ku Israel e boed ba nifiy, nge Fachaʼ nib Thothup rokʼ ni boed ba dramrom, ma ra yikʼ me urufiy e rachangal rokʼ nge racholoyʼ rokʼ u lan taʼareb e rran;

18 Me urufiy e rir u magarger rokʼ, nge falang rokʼ nib galwog, ni yaʼel nge dowef; ma yaedra boed e piʼin ni ke awe flak roraed nga butʼ.

19 Ma tin ra magaey ko gakʼiy u loway rokʼ e ke buchʼuw, nra yog ni nge yoloey beeʼ nib bitir oren.

20 Ma bay yibi buch u lan e re rran nem, ni tin ni ke magaey ko gidiiʼ ku Israel, nge piʼin ni kar miil gaed ko gidiiʼ ku Jacob, e dab ki pagaenʼraed bayay ngakʼ e chaʼ ni ke gafgow nagraed, machane ra pagaenʼraed ngakʼ Somoel, ni Fachaʼ nib Thothup ku Israel, u fithikʼ e tin riyulʼ.

21 Fa piʼin ni ke magaey e yaedra sul, arragon, ni boed e piʼin ni ke magaey ko gidiiʼ rokʼ Jacob, ngakʼ fare Got ni gubin ma rayog rokʼ.

22 Ya yug aram rogon ni gidiiʼ rom ku Israel e yaedra boed oren e yanʼ u maday, machane iniyaed e ra sul; fare mogothgoth nra sum e ra mathrow ko tin nib matʼaw banʼen.

23 Ya fare Somoel ni Got ko Yoʼor e ra sunmiy ba mogothgoth nga lan gaʼangin yang fare nam.

24 Ere, baʼaray rogon ni yoeg fare Somoel ni Got ko Yoʼor: O gidiiʼ rog nibe paer u Zion, dab murus gaed ngakʼ piyu Assyria; bayi toeymed nga boechi laey i gakʼiy, me pug e sog rokʼ ngalang nge togopluw ngomed, ni boed ni rinʼ piyu Egypt.

25 Ya rib ngoch napʼan, make mʼay e damomuw rog nga tomuren ni kan gatheayraed.

26 Ma fare Somoel ko Yoʼor e ra kʼaring ba gafgow ngakʼ ni boed rogon nra liiʼed yu Midian ko farengi war nu Oreb; ma rogon ni pug fare laey i gakʼiy rokʼ nga dakean e day e aram rogon nra pug ngalang ni boed ni rinʼ u Egypt.

27 Ma bay yibi buch u lan e re rran nem ni malngin e gafgow e bay ni chuweg u poen, nge matʼ rokʼ u bilelʼugun, ma fare matʼ e ra mogothgoth ni bachan e yira gapgep nag.

28 Me yib nga Aiath, me af nga Migron; me taw nga Michmash me tay e wagon rokʼ u rom.

29 Ma ranoed u dakean e kanawoʼ; mar toffan gaed u Geba; me rus yu Ramath; me miil yu Gibeah nu Saul.

30 Mu tolul, O fare ppin nu Gallim; muguy rogon nge rungʼag Laish, O ke gafgow yu Anathoth.

31 Yu Madmenah e kar chuw gaed; ma gidiiʼen yu Gebim e kar mukun gaed ni ngar miil gaed.

32 Machane ra paer u Nob ko re rran nem; ma ra rurug me chichngeg paʼ ngakʼ e piʼin bay ko fare burey nu Zion, ni pi falang nu Jerusalem.

33 Musap gaed, fare Somoel, fare Somoel ko Yoʼor e ra thʼaeb fare paʼangin u fithikʼ e murus; ma piʼin nib tolang ko liw e yira thirifraed nga butʼ; ma piʼin nib tolngaenʼ e yaedra sobutʼaenʼ.

34 Ma ra thʼethʼaeb nga butʼ ko wasey e garger nib dubʼag, ma yu Lebanon e ra aw nga butʼ u paʼ fachaʼ nib madangdang.