Guruy Ni 22
U lan fare biyuʼ e duw ma gubin e gidiiʼ ma yaedra liyoer ngakʼ fare Somoel—Ire ra paer u fithikʼraed—Mu taʼareb ko Isaiah 12. Napʼan 559–545 M.K.
1 Ma lan e re rran nem e gara gaʼar riy: O Somoel, gura liyoer ngom; gur e um puwaenʼ ngog ma kam chefeg e damomuw rom rog nga orel, ma gur e kam gapaseg laninʼug.
2 Musap, Got e tathap rog; gu ra paganʼug ngakʼ, ma dab gu rus; ya fare Somoel i Jehovah e ir gelingig nge tang rog; ma ku ire kemang tathap rog.
3 Ere, fithikʼ e falfalaenʼ e gara lʼing e raen riy u luwed ni yima thap riy.
4 Ma lan e re rran nem e gimed ra gaʼar riy: Soerokʼ fare Somoel, pininged fithingan, mu weliyed e ngongol rokʼ u fithikʼ e gidiiʼ, mi gimed yoeg ni ngan liyoer nga fithingan.
5 Mu tang gaed ngakʼ fare Somoel: ya ke rinʼ bogi banʼen ni rib felʼ; ni biney e yimnang u fayleng ni poloʼ.
6 Mu yoer gaed mi gimed tolul, nag e falfalaenʼ, gimed e gidiiʼ nu Zion; ya rib yargael Fachaʼ nib Thothup ku Israel u fithikʼmed.