1 Musap gaed, yibi buch ni gag, Nephi, e guyoer nib gel ngakʼ Somoel ni Got rog, ni bachan e damomuw rokʼ pi walageg.

2 Ya musap gaed, damomuw roraed ngog e ri gel, mar gayed rogon ni ngar feked e pogofan rog.

3 Arragon, ra nonnon gaed nib togopluw ngog, ni yaed be gaʼar: Walagdaed nib bitir e be lemnag ni nge mang gaaʼ rodaed; ma ke yoʼor e gafgow ni kad pirʼeged ni bachan; ere, chiney e ngad liiʼed ngemʼ, ni nge siy kud gafgow gaed ni bachan e thin rokʼ. Ya musap gaed, dabda paged ni nge mang ir e gaaʼ rodaed; ya gadaed e ba milsuwon ngodaed, ni gadaed pi walagen nib ilal, e ngad manged gaaʼ ko pi gidiiʼ ney.

4 Chiney e dab gu yoloey nga dakean e pi plate, gubin e thin ni kar nonnon niged nib togopluw ngog. Machane gub falaenʼ ngay ni nggog, ni kar gayed rogon ni ngar feked e pogofan rog.

5 Me yibi buch ni fare Somoel e kuruf e thin ngog, ni gag, Nephi, e nggu chuw roraed nggu miil nga lan wuruʼ e binaw, nge gubin e piʼin ni yaedra un ngog.

6 Ere, yibi buch ni gag, Nephi, e gu fek e tabinaew rog, nge Zoram nge tabinaew rokʼ, nge Sam, ni walageg nib ilal rog nge tabinaew rokʼ, nge Jacob nge Yosef, ni gal ni walageg ni yow ba wayin, nge ppin ni walageg, nge gubin e piʼin ni yaedra un ngog. Ma gubin e piʼin yaedra un ngog e ireram e piʼin nib michaenʼ ko fapinʼen ni kan taʼmagaran nge fapi yiʼiy rokʼ Got; ere, ra motoyil gaed ko thin rog.

7 Ere gu feked e pi tent romaed nge pinʼen ni rayog ni nggu feked, mug milekag gaed u lan wuruʼ e binaw nib yoʼor e rran. Ma tomuren ni kug milekag gaed nib yoʼor e rran mug nʼufed e pi tent romaed.

8 Ma gidiiʼ rog e yaed baʼadag ni nggu tunguyed fithingan e ginnʼem ni Nephi; ere, gu tunguyed e ginnʼem ni Nephi.

9 Ma gubin e piʼin ni yaed bay rog e ra feked nga dakeanraed ni ngan piningraed ni gidiiʼ ku Nephi.

10 Ere gguyed rogon ni nggu fol gaed ko pi gonop, nge pi yalen, nge fapi motochiyel rokʼ Somoel u fithikʼ gubin banʼen, u rogon fare motochiyel rokʼ Moses.

11 Ma fare Somoel e immoy romaed; ma gamaed monʼog ni rib felʼ rogon; ya gu yunged e awoch, ma gamaed tʼaer waʼamngin bayay nib yoʼor. Ma gamaed tabab i chuguliy e saaf, nge garbaw, nge gamanman ni gubin mit.

12 Me gag, Nephi, e kug fek fapi chep ni kan ker nga dakean fapi plate ni brass; nge fare batʼ, ara compass, nni falʼeg u paʼ fare Somoel ni fan ngakʼ e chitamag, ni boed rogon e pinʼen ni kan yoloey.

13 Me yibi buch nug tabab gaed ko monʼog nib felʼ rogon, ma aram mug yoʼor gaed u lan fare nam.

14 Ere gag, Nephi, e gu fek farengi sayden ku Laban, mug falʼeg boech e sayden nib yoʼor ni aram rogon yaʼan, ya gube rus nag ni richey me yib fapi gidiiʼ ni kan piningraed e chiney ni Lamanites ngomaed ngan liiʼmaed; ya gumnang e fananikan roraed ngog nge bitir rog nge piʼin ni kanoeg ni gidiiʼ rog.

15 Ere gu fil ko gidiiʼ rog rogon ni ngar toeyed e naʼun, mar muruwel gaed ko gubin mite rean, nge iron, nge copper, nge brass, nge wasey, nge gol, nge silber, nge pinʼen ni falelʼ ni yib ko wasey, niʼir e rib yoʼor.

16 Ere gag, Nephi, e gu toey ba temple; ma gu falʼeg ni boed rogon fare temple rokʼ Solomon ma kemus ni dan toey u boʼor banʼen nib falelʼ; ya dariy ni yira pirʼeg u dakean fare nam, ere, dabiyog ni ngar ni toey ni boed rogon fare temple ku Solomon. Machane rogon yalen ni kan toey e boed fare temple rokʼ Solomon; nge muruwel ntay riy e rib mangil.

17 Me yibi buch ni gag, Nephi, e gguy rogon e gidiiʼ rokʼ ni ngar muruwel gaed nib gel, ma ngar muruwel gaed nga paʼaraed.

18 Me yibi buch ni yaed baʼadag ni nggu mang pilung roraed. Machane gag, Nephi, e gu athapeg ni nge dabiyog e pilung ngoraed; machane, gurinʼ ngoraed u rogon ni rayog u gelingig.

19 Ere musap gaed, fapi thin rokʼ Somoel e ke muguʼul ni fan ngakʼ pi walageg, ni yoeg ni morngaʼagraed, ni nggu mang gaaʼ roraed nge tafanow roraed. Ere, kug mang gaaʼ roraed nge tafanow roraed, u rogon e pi motochiyel rokʼ Somoel, nge yaeni madaʼ ko fare ngiyalʼ i nʼen ni ra gayed rogon ni ngar feked e pogofan rog.

20 Ere, fare thin rokʼ Somoel e ke muguʼul ni yoeg ngog, ni gaʼar: Nʼumngin i napʼan ni dabra motoyil gaed ko thin rom ma yira chuwegraed rokʼ Somoel. Ere musap gaed, kan chuwegraed rokʼ.

21 Ma ke gagyeg nag fare wol ni kireb nge aw nga dakeanraed, arragon, rib wol ni kireb, ni bachan e denen roraed. Ya musap gaed, kar ʼelʼel niged e gumʼirchaʼ roraed ngakʼ, ni ke boed bangi pacheʼ; ere, bachan e yaed ba wechwech, ma yaed ba pichoʼay nge pidorang mab mʼaganʼuy ngoraed, ere Somoel ni Got e guy rogon nge aw bangi lumor nga dakeanraed ni nge siyi af pangiraed ko gidiiʼ rog.

22 Ere baʼaray rogon ni yoeg Somoel ni Got: Bay gguy rogon ni ngar fananikayed e gidiiʼ rom, ma kemus ni faʼan yaedra kalngaenʼ ko pi denen roraed.

23 Ma ra buch waʼathan pifak e chaʼ ni ra maʼathuk pifak nga pifakraed; ya taʼab wol ni kireb e ra buch waʼathraed riy. Ma fare Somoel e yoeg, me buch ni aram rogon.

24 Ma bachan waʼathraed ni kireb ni ke aw nga dakeanraed ere ra manged bogi gidiiʼ nib gameed, mab sug ko kireb nge sasaliyeb, mar koeled e gamanman ni malboch u lan wuruʼ e binaw.

25 Me gaʼar fare Somoel ni Got ngog: Yaedra mang ba gafgow ngakʼ pifakam, ni nge yib nag urag ngoraed; ma nʼumngin i napʼan ni dabiyib urag ngoraed, mar motoyil gaed ko thin rog, ma yaedra gafgow nagraed nge madaʼ ko ngiyalʼ ni kar liiʼed raed.

26 Me yibi buch ni gag, Nephi, e gu yibliy Jacob nge Yosef, ni ngar mangew priest nge sensey u dakean e nam ko gidiiʼ rog.

27 Ere yibi buch ni arame gu pired ni gamaed ba falfalaenʼ.

28 Ma ke yaeni mʼay guyey e duw u napʼan nug chuw gaed u Jerusalem.

29 Ma gag, Nephi, e kug chaʼariy fapi chep ko gidiiʼ rog u dakean yungi rog e plate, nug falʼeg, ke yibi madaʼ ko chiney.

30 Me yibi buch ni fare Somoel ni Got e gaʼar ngog: Kum falʼeg boech e plate; ma ngam ker bogi banʼen nib yoʼor nga dakean nib mangil u oewcheg, ni nge felʼ rogon e gidiiʼ rom riy.

31 Ere, gag, Nephi, ni nggu fol ko pi motochiyel rokʼ Somoel, e guwaen gufalʼeg e pi plate ney niʼir e kug ker e pinnʼey nga dakean.

32 Ere gu ker nga dakean e pinʼen nib mʼagaenʼ Got ngay. Ma faʼanra gidiiʼ e ba mʼagaenʼraed ko tirokʼ Got ma ra mʼagaenʼraed ko tin ni kug ker ni bay u dakean e yungney e plate.

33 Ma faʼanra baʼadag e gidiiʼ rog ni nga ri tamilang laniyaenʼraed ko chipin e gidiiʼ rog me ere thingar ra biʼeged e yungin ni kubay e plate rog.

34 Ma ba puluw u wunʼug ni nggog ni bin aningeg i ragag e duw e ke mʼay, ma kug mael gaed, ma kug togopluw gaed pi walagmaed.