1 Mo i bin hapen se long nambaleven yia blong rul blong ol jaj ova long ol pipol blong Nifae, long nambafaef dei blong nambatu manis, afta we i bin gat plante pis long graon blong Sarahemla, afta we i no gat plante faet o plante rao blong plante yia, i go kasem nambafaef dei blong nambatu manis long nambaleven yia, i bin gat wan nius blong faet we ol pipol oli harem long evri ples long graon.

2 From luk, ol ami blong Ol Man blong Leman oli bin kam insaed long saed blong waelples, i go long ol boda blong kantri, go kasem bigtaon blong ^aAmonaeha, mo oli bin stat blong kilimded ol pipol mo prapa spolem gud bigtaon ia.

3 Mo nao i bin hapen se, bifo Ol Man blong Nifae oli save pulum tugeta wan ami we i inaf blong ronemaot olgeta long graon, oli ^aprapa spolem gud finis ol pipol we oli stap long bigtaon blong Amonaeha, mo tu, sam long ol boda blong Noa, mo oli holem samfala oli kam prisena, oli stap long waelples.

4 Nao i bin hapen se, Ol Man blong Nifae oli wantem tekemaot olgeta ia we oli holem olgeta oli prisena mo oli stap long waelples.

5 From hemia, man ia we oli bin mekem hem i kam jif kapten blong ol ami blong Ol Man blong Nifae (mo nem blong hem i Soram, mo hem i bin gat tu boe, Lihae mo Aha)—nao Soram mo tufala boe blong hem, oli save se Alma i hae pris ova long jos, mo from oli harem se hem i gat spirit blong profesi, nao oli go long hem mo oli askem hem weaples Lod i wantem olgeta blong go, long waelples, blong lukaotem ol brata blong olgeta ia we Ol Man blong Leman oli mekem olgeta oli kam prisena.

6 Mo i bin hapen se Alma i ^aaskem Lod long saed blong samting ia. Mo Alma i gobak mo i talem long olgeta: “Luk, Ol Man blong Leman bae oli krosem reva Saedon long Saot long waelples, longwe antap bitim ol boda blong graon blong Mantae. Mo luk, bae yufala i mitim olgeta long ples ia, long Is blong reva Saedon, mo long ples ia nao Lod bae i putum long han blong yufala blong oli kam fri, ol brata ia blong yufala we oli kam prisena blong Ol Man blong Leman.”

7 Mo i bin hapen se Soram mo ol boe blong hem oli krosem reva Saedon, wetem ol ami blong olgeta, mo oli maj longwe i bitim ol boda blong Mantae i go long Saot blong waelples, we i stap long Is saed blong reva Saedon.

8 Mo oli atakem ol ami blong Ol Man blong Leman, mo Ol Man blong Leman oli seraot i go olbaot mo oli ronemaot olgeta i go insaed long waelples; mo oli tekem ol brata blong olgeta we Ol Man blong Leman i holem olgeta oli prisena blong olgeta, mo i no bin gat wan sol we i prisena, we i bin lus. Mo ol brata blong olgeta oli tekem olgeta oli kambak blong oli tekem ol graon blong olgeta bakegen.

9 Mo olsem ia nao nambaleven yia blong ol jaj i bin finis, oli ronem Ol Man blong Leman oli aot long graon, mo ol pipol blong Amonaeha oli ^aded; yes, evri sol blong Ol Man blong Amonaeha we oli bin stap laef, oli ^bded; mo tu, bigtaon blong olgeta we oli talem se God i no save prapa spolem, i smas, from hem i bigfala tumas.

10 Be luk, long ^awan dei nomo, ples ia i bin emti; mo ol dog mo ol wael animol blong waelples, oli terem nogud ol ded bodi blong ol pipol ia.

11 Be, afta plante dei, oli bin hivimap ol ded bodi blong olgeta long fes blong graon, mo oli kavremap olgeta wetem smol graon nomo. Mo nao smel blong olgeta i strong tumas, mekem se ol pipol oli no go blong stap long graon blong Amonaeha blong plante yia. Mo oli bin singaotem ples ia Emti Graon blong Ol Nehor; from bilif blong olgeta i bin olsem ^aNehor, we i bin ded; mo graon blong olgeta i bin stap emti.

12 Mo Ol Man blong Leman oli no bin kam blong faet bakegen agensem Ol Man blong Nifae kasem nambafotin yia blong rul blong ol jaj long ol pipol blong Nifae. Mo olsem ia nao, blong tri yia, ol pipol blong Nifae oli bin gohed blong gat pis long evri graon.

13 Mo Alma mo Amulek, tufala i go blong prijim fasin blong sakem sin long ol pipol insaed long ol ^atempol blong olgeta, mo insaed long ples blong wosip blong olgeta, mo tu, insaed long ol ^bhaos blong prea blong olgeta, we oli bin bildim folem fasin blong Ol Jiu.

14 Mo long olgeta we oli bin lisin long toktok blong tufala, tufala i bin talemaot ol toktok blong God long olgeta, mo oli mekem ^asemmak long eni kaen man oltaem.

15 Mo olsem ia nao Alma mo Amulek tufala i bin go aot, mo tu, plante moa we oli jusum olgeta blong mekem wok, blong prijim toktok long evri ples long evri graon. Mo fasin ia blong stanemap jos i stap long evri ples long graon, long evri eria raonabaot, long medel blong ol pipol blong Ol Man blong Nifae.

16 Mo i ^ano bin gat fasin ia blong no stap semmak long medel blong olgeta; Lod i bin kapsaetem Spirit blong hem long ful fes blong graon blong mekem rere ol tingting blong ol pikinini blong ol man, o blong mekem rere ^bhat blong olgeta blong kasem toktok we Lod bae i tijim olgeta, long taem we bae hem i kam.

17 Blong oli no mekem olgeta oli kam strong agensem trutok, blong oli no save gat fasin blong no gat bilif, mo go long fasin blong prapa spolem gud olgeta, be blong oli save kasem trutok wetem glad, mo olsem wan ^abranj we oli joenembak i go long prapa ^brop, blong oli save go insaed long ^dkingdom blong Lod, God blong olgeta.

18 Nao ol ^apris ia we oli bin go aot, i go long medel blong ol pipol, oli prij agensem evri giaman toktok, mo ^btoktok blong trikim man, mo tingting blong ^dwantem samting blong narafala man, mo ol rao, mo tingting blong mekem nogud long man, mo toktok agensem man, mo stil, mo stilim mane, tekem samting blong nara man, kilim man i ded, mekem adaltri, mo evri kaen fasin blong gat rabis tingting long man o woman, nao oli stap talem strong se ol samting ia oli no mas hapen—

19 Oli talemaot ol samting we bae oli mas hapen i no longtaem; yes, oli talemaot se bae Pikinini blong God i stap ^akam, ol safaring blong hem mo ded blong hem, mo tu, taem we bae ol dedman oli laef bakegen long ded.

20 Mo plante long ol pipol oli askem long saed blong ples we Pikinini blong God bae i kam long hem; mo ol pris oli tijim olgeta se bae hem i ^akamaot long olgeta ^bafta we hem i laef bakegen long ded; mo ol pipol oli harem samting ia wetem wan bigfala hapi mo glad.

21 Mo nao, afta we jos i bin stanap long evri ples long graon—afta we i ^awinim devel, mo ol lida blong Jos oli prijim toktok blong God we i tru evriwan long ful graon, mo Lod i kapsaetem ol blesing blong hem long ol pipol—olsem ia nao nambafotin yia blong rul blong ol jaj long ol pipol blong Nifae i bin finis.