1 Mo i bin hapen long stat blong teti mo sikis yia blong rul blong ol jaj ova long ol pipol blong Nifae, se ^aSiblon i tekem ol ^btabu histri ia we Alma i bin givim long Hileman.

2 Mo hem i wan man we i stret, mo hem i wokbaot long stret laef long fored blong God; mo hem i traehad blong mekem gud fasin oltaem, blong obei ol komanmen blong Lod, God blong hem; mo brata blong hem tu i mekem semmak.

3 Mo i bin hapen se Moronae i ded tu. Mo olsem ia nao teti mo sikis yia blong rul blong ol jaj i bin finis.

4 Mo i bin hapen se long teti mo seven yia blong rul blong ol jaj, i bin gat wan bigfala grup blong ol man, i go kasem faef taosen mo fo handred man, wetem ol waef blong olgeta mo ol pikinini blong olgeta, oli bin aot long graon blong Sarahemla i go insaed long graon we i stap long ^aNot.

5 Mo i bin hapen se Hagot, from we hem i bin wan man we i wantem faenemaot samting tumas, from hemia, hem i bin go aot mo i bin bildim wan sip blong hem we i bigfala tumas, long ol boda blong graon Plante, kolosap long graon Emti, mo i bin putum hem long solwota blong Wes, kolosap long ^asmolfala graon we i bin go long graon long Not.

6 Mo luk, i gat plante long Ol Man blong Nifae we oli go insaed long sip ia mo oli sel i go aot wetem plante kaekae, mo tu, wetem plante woman mo ol pikinini; mo oli tekem rod blong olgeta i go long Not. Mo olsem ia nao teti mo seven yia i en.

7 Mo long teti mo eit yia, man ia i bildim ol narafala sip. Mo fas sip i kambak tu, mo plante moa pipol i go insaed long hem; mo olgeta tu i tekem plante kaekae, mo oli go aot bakegen long graon long Not.

8 Mo i bin hapen se Ol Man blong Nifae oli neva harem moa nius blong olgeta ia. Mo mifala i ting se oli draon long ol dip ples blong solwota. Mo i bin hapen se wan narafala sip tu i sel i go; mo weaples hem i go long hem, mifala i no save.

9 Mo i bin hapen se long yia ia i gat plante pipol we oli aot i go long graon we i go long ^aNot. Mo olsem ia nao teti mo eit yia i en.

10 Mo i bin hapen long teti mo naen yia blong rul blong ol jaj, Siblon i ded tu, mo Korianton i go aot long graon we i go long Not long wan sip, blong karem ol kaekae i go long ol pipol ia we oli go long graon ia.

11 From hemia, i kam impoten blong Siblon i givimaot ol tabu samting ia, bifo long ded blong hem, long boe blong hem ^aHileman, we oli singaotem hem Hileman, from oli singaotem hem long nem blong papa blong hem.

12 Nao luk, ol ^araeting ia we Hileman i holem, oli bin raetem olgeta mo sendem i go long ol pikinini blong ol man raon long evri graon, be i no long ol pat ia we Alma i givim oda se bae oli ^bno mas go.

13 Be, ol samting ia oli mas holem oli tabu, mo oli pasem i ^akam daon stat long wan jeneresen i go long narafalawan; from hemia, long yia ia, oli bin pasem i go long Hileman, bifo ded blong Siblon.

14 Mo i bin hapen tu se long yia ia, i gat sam long olgeta we oli pulaot, we oli go long Ol Man blong Leman; mo oli stat bakegen blong tanem tingting blong olgeta blong oli kros long Ol Man blong Nifae.

15 Mo tu, long semfala yia ia oli bin kam daon wetem wan bigfala namba blong ami blong faet agensem ol pipol blong ^aMoronaeha, o agensem ami blong Moronaeha; long faet ia, Ol Man blong Nifae oli winim olgeta mo oli ronem olgeta i gobak bakegen long ol graon blong olgeta bakegen, mo oli lusum fulap man.

16 Mo olsem ia nao teti mo naen yia blong rul blong ol jaj ova long ol pipol blong Nifae i bin en.

17 Mo olsem ia nao histri blong Alma i bin en, mo Hileman boe blong hem, mo tu, Siblon, we i boe blong hem.