1 Nao i bin hapen long namba teti yia blong rul blong ol jaj ova long ol pipol blong Nifae, afta we Moronae i bin kasem mo ridim ^aleta blong Hileman, hem i glad tumas from gudfala laef, yes, bigfala sakses we Hileman i kasem, long saed blong tekem ol graon ia we oli bin lus.

2 Yes, mo hem i mekem evri pipol blong hem oli save long hem, long evri graon raonabaot long pat ia we hem i stap long hem, blong oli save glad tu.

3 Mo i bin hapen se hem i sendem ^awan leta long ^bPahoran kwiktaem, hem i wantem se hem i mekem ol man oli kam tugeta blong mekem Hileman i kam strong, o ol ami blong Hileman, inaf blong mekem se hem i isi blong lukaot gud long pat blong graon ia we, olsem wan merikel, God i bin mekem hem i karembak.

4 Mo i bin hapen se taem we Moronae i sendem leta ia i go long graon blong Sarahemla, hem i stat bakegen blong mekem wan plan blong mekem se hem i save tekem ol narafala samting ia mo ol bigtaon we Ol Man blong Leman i bin tekemaot long olgeta.

5 Mo i bin hapen se taem we Moronae i stap mekem rere olsem ia blong go agensem Ol Man blong Leman blong faet, luk, ol pipol blong Nifaeha, we oli bin kam tugeta aot long bigtaon blong Moronae, mo bigtaon blong Lihae, mo bigtaon blong Morianton, Ol Man blong Leman oli bin atakem olgeta.

6 Yes, olgeta tu we Ol Man blong Nifae oli bin fosem olgeta blong ronwe long graon blong Mantae, mo long graon raonabaot, oli kam mo joenem Ol Man blong Leman long pat ia blong graon.

7 Mo olsem ia nao from we oli plante tumas, yes, mo from we oli kasem paoa evri dei, tru long oda blong Amoron oli bin kam aot agensem ol pipol blong Nifaeha, mo oli stat blong kilimded olgeta, oli smasem gud olgeta oli ded.

8 Mo ol ami blong olgeta oli plante tumas mekem se ol pipol blong Nifaeha we oli laef yet oli mas ronwe, oli aot long fes blong olgeta; mo oli kam mo joenem ami blong Moronae.

9 Mo nao from Moronae i bin ting se bae oli sendem ol man blong go long bigtaon blong Nifaeha, blong helpem ol pipol blong holemtaet bigtaon ia, mo hem i save se i moa isi blong holemtaet bigtaon blong i no foldaon long ol han blong Ol Man blong Leman, bitim blong tekemaot long olgeta, hem i ting se bae oli save holemtaet bigtaon ia isi nomo.

10 From hemia, hem i bin holemtaet ol fos blong hem blong holemtaet ol ples ia we hem i bin tekembak.

11 Mo nao, taem we Moronae i luk se bigtaon blong Nifaeha i lus, hem i harem nogud tumas, mo hem i stat blong gat tu tingting se, from ol fasin nogud blong ol pipol, bae oli mas foldaon long ol han blong ol brata blong olgeta.

12 Nao hem i sem samting wetem evri jif kapten blong hem. Oli bin gat tu tingting mo oli bin sapraes tu from ol fasin nogud blong ol pipol, mo hemia from sakses blong Ol Man blong Leman ova long olgeta.

13 Mo i bin hapen se Moronae i kros long gavman, from fasin ia blong olgeta blong oli ^ano lukaot gud long fridom blong kantri blong olgeta.