1 Mo nao i bin hapen long stat blong twante mo faef yia blong rul blong ol jaj ova long ol pipol blong Nifae, afta we oli stanemap pis bitwin ol pipol blong Lihae mo ol pipol blong Morianton long saed blong ol graon blong olgeta, mo afta we oli statem twante mo faef yia long pis;

2 Be, oli no holemtaet longtaem pis we i stap long evri ples long graon, from we wan rao i stat long medel blong ol pipol long saed blong jif jaj Pahoran; from luk, i gat sam long ol pipol we oli wantem se samfala pat blong loa oli mas jenis.

3 Be luk, Pahoran, bae i no jenisim o letem se loa bae i jenis; from hemia, hem i no lisin long olgeta ia we oli sendem ol tingting blong olgeta long ol leta blong olgeta we oli raetem long saed blong jenisim loa.

4 From hemia, olgeta we oli wantem se loa i mas jenis oli kros long hem, mo oli wantem se bae hem i nomo stap olsem jif jaj long graon; from hemia, wan strong rao i hapen long saed blong samting ia, be blad i no bin ron.

5 Mo i bin hapen se olgeta we oli wantem se Pahoran i mas aot long wok blong jea blong jajmen, oli singaotem olgeta ol king-man, from oli wantem se loa i mas jenis long wan fasin blong sakemaot fri gavman, mo blong stanemap wan king ova long graon.

6 Mo olgeta we oli wantem se Pahoran i mas stap olsem jif jaj ova long graon oli putum long olgeta nem blong ol friman; mo olsem ia nao fasin blong split i hapen long medel blong olgeta, from we ol friman oli promes o mekem kavenan blong holemtaet ol raet mo ol janis blong fasin blong wosipim God blong olgeta tru long wan fri gavman.

7 Mo i bin hapen se rao ia blong olgeta oli stretem tru long voes blong ol pipol. Mo i hapen se voes blong ol pipol i sapotem ol friman, mo Pahoran i holemtaet jea blong jajmen, we samting ia i givim fulap glad long ol brata blong Pahoran, mo tu, plante long ol pipol blong fridom, we olgeta ia tu i mekem ol king-man oli stap kwaet, blong mekem se oli no save agensem be oli mas holemtaet stamba tingting blong fridom.

8 Nao olgeta we oli sapotem ol king oli olgeta we oli ^abon long laen blong ol haeman, mo oli wantem kam ol king; mo olgeta we oli lukaotem blong kasem paoa mo raet ova long ol pipol, oli sapotem olgeta.

9 Be luk, hemia i wan taem we i nogud tumas blong gat ol rao olsem i hapen long medel blong ol pipol blong Nifae; from luk, Amalekaea i tanem bakegen hat blong Ol Man blong Leman agensem Ol Man blong Nifae, mo hem i stap tekem ol soldia long evri ples long graon blong hem oli kam tugeta, mo i stap givim ol tul blong faet long olgeta, mo i stap rere blong faet wetem strong tingting mo paoa, from we hem i bin ^apromes blong dring blad blong Moronae.

10 Be luk, bae yumi luk se promes blong hem we hem i bin mekem, hem i hariap nomo long hem; be, hem i mekem hemwan mo ol ami blong hem i rere blong kam blong faet agensem Ol Man blong Nifae.

11 Nao ol ami blong hem oli no plante tumas olsem we oli bin stap bifo, from we plante taosen long olgeta, Ol Man blong Nifae oli bin kilimded olgeta; be i nomata long bigfala lus blong olgeta, Amalekaea i pulum wan gudfala mo bigfala ami i kam tugeta, inaf we i mekem se hem i no fraet blong kam daon long graon blong Sarahemla.

12 Yes, tu Amalekaea, hemwan i kam daon, hem i lidim Ol Man blong Leman. Mo hem i long nambatwante mo faef yia blong rul blong ol jaj; mo i hapen long sem taem we oli stat blong stretem ol wok blong ol raorao blong olgeta abaot jif jaj blong olgeta, Pahoran.

13 Mo i bin hapen se taem we ol man, we oli singaotem olgeta ol king-man, oli bin harem se Ol Man blong Leman oli stap kam daon blong faet agensem olgeta, oli glad insaed long hat blong olgeta; mo oli no wantem blong tekem ol tul blong faet, from we oli kros tumas long jif jaj, mo tu, wetem ol ^apipol blong fridom, mekem se bae oli no tekem ol tul blong faet blong difendem kantri blong olgeta.

14 Mo i bin hapen se taem we Moronae i luk samting ia, mo tu, i luk we Ol Man blong Leman oli stap kam long ol boda blong graon, hem i kros tumas from stronghed blong ol pipol ia we hem i bin hadwok plante blong sevem olgeta; yes, hem i kros tumas; sol blong hem i fulap long kros agensem olgeta.

15 Mo i bin hapen se, hem i sendem wan toktok blong askem, we i gat tingting blong ol pipol long hem, i go long gavna blong graon, hem i wantem se gavna i ridim samting ia, mo givim long hem (Moronae) paoa blong fosem ol pipol ia we oli bin pulaot long Ol Man blong Nifae, blong oli difendem kantri blong olgeta o bae oli ded.

16 From i bin fasfala tingting blong hem blong putum wan en long ol rao mo fasin blong pulaot olsem ia long medel blong ol pipol; from luk, bifo, hemia i wan stamba tingting blong prapa spolem gud olgeta. Mo i bin hapen se gavna i agri folem tingting blong ol pipol.

17 Mo i bin hapen se Moronae i givim oda se ami blong hem i go agensem ol king-man ia, blong pulum daon fasin blong hae tingting blong olgeta mo tingting blong olgeta se oli haeman, mo levelem olgeta long graon, o bae oli mas tekem ol tul blong faet mo sapotem stamba tingting blong fridom.

18 Mo i bin hapen se ol ami oli maj i go agensem olgeta; mo oli pulum daon hae tingting blong olgeta mo haeman tingting blong olgeta, inaf blong mekem se taem oli leftemap ol tul blong faet agensem ol man blong Moronae, ol man blong Moronae oli kilimded olgeta mo levelem olgeta i go long graon.

19 Mo i bin hapen se, i gat fo taosen long olgeta we oli bin ^apulaot long Ol Man blong Nifae we oli kilimded olgeta wetem naef blong faet; mo olgeta we oli ol lida blong olgeta we oli no bin kasem ded long faet, oli putum olgeta long kalabus, from we i no bin gat taem blong pas long kot long tetaem ia.

20 Mo olgeta we oli laef we oli pulaot long Ol Man blong Nifae, oli no wantem blong ded tru long naef blong faet, be oli sarenda long flag blong fridom, mo Moronae i fosem olgeta blong leftemap ^ataetol blong fridom antap long ol taoa blong olgeta, mo long ol bigtaon blong olgeta, mo blong tekem ol tul blong faet blong difendem kantri blong olgeta.

21 Mo olsem ia nao Moronae i putum wan en long olgeta king-man ia, blong mekem se i no gat eniwan long olgeta we oli singaotem hem king-man; mo olsem ia nao hem i putum wan en long fasin blong stronghed mo hae tingting blong ol pipol ia we oli klem se oli laen blong ol haeman; be oli putum daon olgeta blong mekem se tingting blong olgeta i stap daon olsem ol brata blong olgeta, mo blong oli faet strong blong oli fri aot long fasin blong stap slef.

22 Luk, i bin hapen se, taem we ^aMoronae i stap mekem olsem ia nao, blong stopem ol faet mo ol rao long medel blong ol pipol blong hem, mo mekem olgeta blong oli gat pis mo gat standet blong hae laef, mo stap mekem ol rul blong mekem rere blong faet agensem Ol Man blong Leman, luk, Ol Man blong Leman oli kam insaed long graon blong Moronae, we i stap long ol boda kolosap long so blong solwota.

23 Mo i hapen se Ol Man blong Nifae oli no strong inaf long bigtaon blong Moronae; from hemia, Amalekaea i ronem olgeta, mo hem i kilimded plante. Mo i bin hapen se, Amalekaea i tekem bigtaon, yes, hem i tekem evri strong bigtaon blong olgeta.

24 Mo olgeta we oli bin ronwe aot long bigtaon blong Moronae oli kam long bigtaon blong Nifaeha; mo tu, ol pipol blong bigtaon blong Lihae oli kam tugeta, mo oli mekem olgeta oli rere mo oli rere blong mitim Ol Man blong Leman blong faet.

25 Be i bin hapen se, Amalekaea i no wantem letem Ol Man blong Leman blong go agensem bigtaon blong Nifaeha blong faet, be hem i holem olgeta daon kolosap long so blong solwota, hem i livim ol man long evri bigtaon blong holemtaet mo difendem ol taon.

26 Mo olsem ia nao hem i bin gohed, hem i tekem plante bigtaon, bigtaon blong Nifaeha, mo bigtaon blong Lihae, mo bigtaon blong Morianton, mo bigtaon blong Omna, mo bigtaon blong Gid, mo bigtaon blong Myulek, olgeta ia oli stap long ol Is boda kolosap long so blong solwota.

27 Mo olsem ia nao Ol Man blong Leman oli kasem, tru long ol trik blong Amalekaea, plante bigtaon wetem ol ami blong olgeta we oli plante tumas blong save kaontem, olgeta bigtaon ia oli wokem strong, folem fasin blong wokem ol ^astrong wol blong Moronae; olgeta bigtaon ia oli kam ol strong sapot blong Ol Man blong Leman.

28 Mo i bin hapen se oli maj i go long ol boda blong graon Plante, oli ronemaot Ol Man blong Nifae long fored blong olgeta mo oli kilimded plante.

29 Be i hapen se, oli mitim Tiankum, man we i bin ^akilimded Morianton mo i go long fored blong ol man blong hem taem hem i ronwe.

30 Mo i bin hapen se, hem i go long fored blong Amalekaea tu, taem we hem i stap maj i go fored wetem plante namba blong ami blong hem blong hem i save tekem graon Plante, mo tu, graon we i stap long Not.

31 Be luk hem i kasem wan harem nogud taem Tiankum mo ol man blong hem oli agensem hem, from oli ol strong man blong faet; from evri man blong Tiankum oli strong bitim Ol Man blong Leman long paoa blong olgeta mo long skil blong olgeta blong faet, inaf blong mekem se oli gat paoa ova long Ol Man blong Leman.

32 Mo i bin hapen se oli atakem olgeta, inaf blong mekem se oli kilimded olgeta go kasem taem we hem i tudak. Mo i bin hapen se Tiankum mo ol man blong hem oli pulum ol tenet blong olgeta long ol boda blong graon Plante; mo Amalekaea i pulum ol tenet blong hem long ol boda long sanbij kolosap long so blong solwota, mo folem fasin ia nao oli ronemaot olgeta.

33 Mo i bin hapen se taem we naet i kam, Tiankum mo wokman blong hem i go antap sloslo mo tufala i go aot long naet, mo tufala i go insaed long kamp blong Amalekaea; mo luk, slip i kilim olgeta from we oli taed tumas from ol hadwok mo hotsan blong dei.

34 Mo i bin hapen se Tiankum i muv sloslo i go long sikret insaed long tenet blong king, mo i putum wan spia long hat blong king; mo hem i mekem ded blong king i hapen wantaem nomo mekem se hem i no wekemap ol wokman blong hem.

35 Mo hem i gobak bakegen long sikret long kamp blong hem, mo luk, ol man blong hem oli stap slip, mo hem i wekemap olgeta mo talemaot long olgeta evri samting we hem i bin mekem.

36 Mo hem i mekem se ol ami blong hem bae oli stap rere nomo, from hem i fraet se Ol Man blong Leman oli wekap mo bae oli save kam atakem olgeta.

37 Mo olsem ia nao twante mo faef yia blong rul blong ol jaj ova long ol pipol blong Nifae i bin finis; mo olsem ia nao ol dei blong Amalekaea i bin finis.