1 Tatay, Mormompa, cartan, mayqen cartatachus ñoqa, Moroniman, escribimuwarqa. Kamachisqa kasqaytawan yachachinaypaj, kayta escribimuwarqa nispa:

2 Munasqa wawáy, Moroni, anchata kusikuni Señorniyki Jesucristo yuyarisusqanmanta, qanta kamachisusqanmanta paypa yachachiyninkunata yachachinaykipaj, paypa llimphu ruwayninta ruwanaykipaj.

3 Qampaj Diosmanta mañapuni, Diosmanta mañakuni paypa llimphu Wawan, Jesucristoj, sutimpi qanta waqaychasunanta tukukuykama paypa sutimpi feniykirayku, wiñay graciannejta, k’acha kasqannejtataj.

4 Kunantaj wawáy, parlasqayki imamantachus anchata phutikuni, chaymanta. Imaraykuchus anchata phutikuni qankuna ukhupi phiñanakuykuna rikhurisqanmanta.

5 Cheqa kajkunata yachajtiypis, qankuna ukhupi churanakunkcihis juch’uy wawas bautizakunankumanta.

6 Kunantaj wawáy, ñoqa munani sinchita llank’anaykita kay millay pantay qankunamanta qhechusqa kanampaj; chayrayku kay cartata escribini.

7 Churanakusqaykichista yachaytawampacha, ñoqaqa kaymanta Señorta taporqani. Señortaj kutichiwarqa Santo Espiritoj atiyninnejta nispa:

8 Uyariy Cristoj nisqasninta, qampa Kacharichejniyki, Señorniyki, Siosniykitaj. Uyariy, kay pachaman jamorqani juchasapa runasta Diosman kutirichej, mana allin ruwajkunatachus. Onqosqakunalla jampinata necesitakunku manataj sano runasqa; chayrayku juch’uy wawasqa llimphus kanku, mana juchallikuyta atisqankurayku. Ñoqarayku Adampa maldicionnin paykunamanta qhechusqa, mana paykunata atipanampaj; ñoqaraykutaj circuncicion ruwana ley tukuchisqa.

9 Kay jinata Santo Espiritu willawarqa Diospa nisqanta; chayrayku munasqa wawáy, ñoqa yachani Diosmanta burlakuy kasqanta juch’uy wawasta bautizanaykchispaj.

10 Niyki, kayta yachachinki — pikunachus juchallikuyta atinku, yachaspa imatachus ruwasqankuta, paykunalla Diosman kutirikunanku tiyan, bautizakunankutaj tiyan. Arí, Tatasman yachachiy diosman kutirinankuta, bautizakunankuta, juch’uy wawasninku jina k’umuykunankuta, juch’uy wawasninkuwantaj salvakonqanku.

11 Juch’uy wawasninkutaj mana Diosman kutirikuyta necesitankuchu, manataj bautizakunankuchus tiyan. Imaraykuchus bautizakuy Diosman kutirikunapaj, kamachisqasninta junt’anapaj, juchas pampachasqas kanankupaj.

12 Chaywampis juch’uy wawasqa Cristopi kawsanku, kay pacha ruwakusqanmantapacha. Mana jina kajtenqa, Diosqa astawan ujkunata munakun wajkunataj mana, Diostaj waj jinaman kutin. Diosqa wakin runasta aswan allinta rikun uj runasmanta. Imaraykuchus ¿Mayk’a wawas wañunkuña manaraj bautizakuspa?

13 Juch’uy wawaschus mana salvakunkumanchu karqa mana bautizakuspa chayqa, paykuna mana tukukuyniyoj ukhu pachaman ripunanku kanman karqa.

14 Uyariychis, imaraykuchus ñoqa niykichis, pichus yuyan juch’uy wawas bautizakunanku kasqanta, payqa k’allku kajniyoj, juchawan presochasqataj, imaraykuchus payqa mana feniyojchu, nitaj suyayniyojchu, nitaj munakuyniyojchu. Chayrayku kayta yuyaspa wañun chayqa, payqa ukhu pachaman ripunan tiyan.

15 Imaraykuchus ancha jatun jucha kayta yuyay, Dios salvan uj wawata bautizakusqanrayku, ujnin kajtaj tukuchisqa kanan tiyan mana bautizakusqanrayku.

16 Ay pikunamantachus Diospa ñanninta kay jinata uj jinayachinku, imaraykuchus paykuna tukuchisqa kanqanku mana Diosman kutirispa. Uyarichis, mana manchachikuspa parlani, Diospa atiyniyoj kasqayrayku. Manataj manchachikunichu imatachus runas ruwankuman; imaraykuchus cabal munakoyqa tukuy manchachikuykunasta jark’an.

17 Munakuywan junt’asqa kani, wiñay munakuywampis; chayrayku tukuy wawasqa kikimpura kanku ñoqapaj; chayrayku juch’uy wawasta munakuni cabal munakuywan. Paykunataj kikillan kanku, salvacionta jap’ejkuna.

18 Ñoqa yachani Dios tukuy runasta kikinta munakusqanta, manataj waj jinaman kutiyta atisqanta; astawanqa payqa wiñaypaj wiñayninkama kikillan kashan.

19 Juch’uy wawasqa mana Diosman kutirikuyta atinkuchu; chayrayku ancha sajra kanman paykunamanta jark’ay Diospa llimphu khuyayninta, imaraykuchus paypi kawsanku khuyayninrayku.

20 Pitajchus nin juch’uy wawas bautizakunanku kasqanta, payqa negan Cristoj khuyayninkunata. Cristoj allinyachisqanta, kacharichiy atiynintawan negallantaj.

21 Ay paykunamanta, imaraykuchus wañoj jina kanku, ukhu pachaman rej jina kanku, wiñaypaj muchoj jinataj kanku. Mana manchachikuspa parlani; Dios kamachiwarqa. Kaykuna nisqasniyta uyariychis, kasuychistaj; mana chayqa, kaykunaqa qampa contraykita sayqrenqanku Cristoj juzgana tiyanampa ñawpaqempi.

22 Tukuy juch’uy wawasqa Cristopi kawsanku, mana leyniyoj kajkunapis. Imaraykuchus kacharichiy ateyqa chayamun mana leyniyojkunaman; chayrayku pichus mana juchachasqachu, manataj juchachayniyojchu, payqa mana Diosman kutirikuyta atinchu; paypajtaj bautismo qhasilla.

23 Astawanqa Diospa ñawpaqempi burla, Cristoj khuyayninta, paypa Danto Espirituntawan negan, wañusqa ruwaykunapi feniyoj kaspa.

24 Uyariy wawáy, mana kay jina kananchu tiyan; juchachasqa kajkunapaj, p’akisqa leypa maldicionnin urapi kajkunapajwan Diosman kutiriy.

25 Diosman kutirikuypa ñawpaj kaj poqoynintaj bautismo; bautismotaj jamun fenejta Diospa kamachisqasninta junt’anapaj; kamachisqasta junbt’aynejtataj juchata pampachay jamun.

26 Juchata pampachaytaj llamp’u sonqoyoj kayta, k’umuykusqa sonqoyoj kaytawan apamun. Llamp’u sonqoyoj kayrayku, k’umuykusqa sonqoyoj kayraykutaj Santo Espiritoj visitaynin jamun, mayqen sonqochaj junt’achin suyaywan, cabal munakuywantaj, mayqen munakuy waqaychakun Diosmanta mañakuynejta, tukukuy jamunankama, tukuy allinkaswajkuna Dioswan tiyakunankukama.

27 Wawáy, mana usqhayta lamanitakunaj contranman llojsimuspaqa ujtawan escribimusqayki. Qhawariy, kay llajtaj, nefitakunaj, orgulloyoj sonqonqa tukuchiyta paykunaman apamun mana Diosman kutirikunkuchu, chayqa.

28 Paykunapaj Diosmanta mañapuy wawáy, Diosman kutirikuy paykunaman jamunampaj. Ñoqataj manchachikuni, ichapis Espiritu manaña paykunawan churanakusqanta. Kay jallp’api paykuna munanku tukuy Diosmanta jamoj atiyta, pusaytawan tukuchiyta; paykunataj Santo Espirituta negashanku.

29 Wawáy, chay jina jatun yachaykunata negasqankutawan, pisimantawan wañupunanku tiyan, profetaspa sut’inchasqasninku junt’akunankupaj, Salvadorninchispa willasqasnimpis.

30 Kacharpariyki wawáy, watejmanta escribisunaykama, mana chayqa qanwan tinkunaykama. Amen.