1 Munasqa wawáy, watejmanta escribimuyki yachanaykipaj kawsasqaytaraj. Chaywampis escribini phutikuymanta.

2 Imaraykuchus lamanitakunawan atipachikorqayku millay maqanakupi. Arcanteotataj wañucherqanku espadawan, Luramtapis, Emrontapis; arí, ashkha allin runasniykuta wañucherqanku.

3 Kunantaj wawáy, manchachikuni lamanitakuna kayu runasta wañuchinankumanta, mana Diosman kutirikusqankurayku. Satanastaj ujmanta ujta phiñanachin.

4 Ñoqataj paykunaman parlaspalla kani; Diospa palabranta k’amispalla willajtiytaj, paykuna kharkatitinku, ñoqapaj phiñakunkutaj; mana k’amispa parlajtiyrí, paykuna sonqosninkuta rumiyachinku. Chayrayku manachachikuni Diospa Espiritun manaña paykunawan churanakusqanta.

5 Imaraykuchus, anchata phiñayasqankurayku, ñoqa yuyani manaña wañuymanta manchachikusqankuta; paykunapurapitaj munakuyninkuta chinkacherqanku; astawanraj yawarta juch’ayta, aynipi kutichiytawampuni mask’anku.

6 Kunantaj munasqa wawáy, rumi sonqoyoj kajtinkupis, sinchista llank’asunchis, imaraykuchus manañachus llank’asunmanchu chayqa, juchachasqa kasunman. Llank’ayninchis kan kay t’urumanta cuerpoyoj kajtinchis allin ruwaypa enemigonta atipananchispaj, Diospa reinompi samarinanchispajtaj.

7 Kunantaj escribini kay llajtaj muchusqasninmanta. Amorompa willasqanman jina, yachani lamanitas Sherriza torremanta runasta presochasqankuta; paykuna kanku qharis, warmis, wawaswan.

8 Chay warmispa qosasninkuta, wawaspa tatasninkutawan wañucherqanku. Warmisman mikhuchinku qosasninkoj aychankuta, wawasman mikhuchillankutaj tatasninkoj aychankuta; manataj pisi yakullatapis jaywankuchu.

9 Kay lamanitakunaj ruwasqan ancha millay kajtimpis, Moriantum llajtapi runasninchis aswan millay ruwajkuna kanku. Paykuna ashkha lamanitakunaj warmi wawasninkuta presochaytawan, paykunamanta qhechunku imatachus tukuy manta astawan allin, astawan munasqa, paykunaqa warmi wawasninkuta qhenchachachinku.

10 Chayta ruwaytawan chay warmi wawasta millaymanta wañuchinku, cuerposninkuta ñak’arichispa wañuchinankukama. Wañuchiytawantaj aychankuta mikhunku sajra animales jina, rumi sonqoyoj kasqankurayku. Chaykunata ruwanku kallpayoj kasqankuta qhawachinankupaj.

11 O munasqa wawáy, imaynata atinkuman kay jina runas, animal jina kajkuna —

12 (Pisi watallaraj, paykuna allin, k’acha runas karqanku)

13 Jinapis wawáy, imaynataj atinku kay jina runas, millay ruwaypi kusikojkuna —

14 ¿Imaynata suyasunman Dios makinta mana oqharinanta juchachanawanchispaj?

15 Sonqoy waqan: ¡Ay kay llajtamanta. Juzqaypi jamullay, o Dios, juchasninkuta, sajra ruwasqankuta, millay ruwasqankutawan ñawpaqeykimanta pakay!

16 Watejmanta wawáy ashkha viudas, warmi wawasninkuwan Sherrizapiraj kanku. Imatachus lamanitas mana chaymanta aparqankuchu, chayta Zenefij soldadosnin apakorqankul Chayrayku viudasqa, warmi wawasninkuwan puriykachanku mikhunata mask’aspa; ashkha abuelasña warmistaj ñannejpi urmanku, wañupunkutaj.

17 Ñoqawan maqanakoj runastaja manaña kallpayojchu kanku; lamanita maqanakoj runastaj Sherrizaman rinapi khuskampi kanku. Mayqenkunachus Aarompa maqanakoj runasman ayqerqanku, paykunata millayta ñak’aricherqanku.

18 ¡O llajtaypa sajra ruwasqan! Paykuna mana leyniyojchu kanku, manataj khuyayniyojchu. Ñoqataj runalla kani, runa kallpayojlla kani, manañataj kamachisqasniyta junt’achiyta atinichu.

19 Kallpayojtaj kanku sajra ruwayninkupi; kikillantaj animal jina kanku mana pitapis saqespa, ni machutapis, ni joventapis; tukuy imapi kusikunku mana allin kajkunapi. Warmisninchispa, wawasninchispawan jallp’a patantimpi muchusqankutaj tukuy imamanta aswan jatun; arí, simi mana willayta atinmanchu, manataj escribiy atikunmanchu.

20 Kunantaj wawáy, manaña kay millay ruwasqasmanta willanichu. Qanqa yachankiña kay llajtaj juchallikusqanta; yachanki mana yachachiyniyojchu kasqankuta, mana sonqoyojña kasqankutawan; lamanitakunaj jachallikusqanmanta nisqaqa, astawanraj juchallikunku.

21 Wawáy, manaña paykunapaj Diosmanta mañapunichu mana jasut’inawampaj.

22 Chaywampis wawáy, qampaj Diosmanta mañapuni, Cristopi feniyoj kani salvakunaykipaj. Diosmanta mañakuni qampa kawsayniykita waqaychanampaj kay runas Diosman kutirikojta qhawanaykipaj, mana chayqa kay runas tukuchisqas kajta qhawanaykipaj. Imaraykuchus ñoqa yachani tukuchisqa kanankuta mana Diosman kutirikunkuchu chayqa.

23 Tukuchisqa kajtinkoqa, jareditakuna jina tukuchisqa kanqanku, sonqonkoj munasqanrayku, yawarta, aynipi kutichiytawan mask’aspa.

24 Tukuchisqa kanku chayqa, yachachis ashkha hermanosninchis lamanitakunaman ripusqankuta, ashkharaj paykunaman ripunankutawan; chayrayku qanchus kawsanki, ñoqataj wañusaj mana qanta rikususpa chayqa, uj chhikallatapis escribiy. Chaywampis ñoqa yuyani pisimantawan rikunakunanchista; santa escriturasta qanman qosunayrayku.

25 Wawáy, Cristopi feniyoj kay; amataj escribisqasniy phutichisuchunchu, wañuchisunankama; astawanqa Cristo oqharisuchun, paypa ñak’arisqan, wañusqan, tatasninchiswan rikuchikusqan, khuyasqan, unayta muchuyniyoj kasqan, paypa k’anchaynin, wiñay kaysayta suyakuywan qampa yuyayniykipi wiñaypaj quedakuchunku.

26 Dios Tataj gracian, pejpa trononchus janaj pachapi, Señorninchistaj, Jesucristo, pichus atiynimpa paña makimpi tiyakun, tukuy ima paypa munaynimpi kanankama, qanwan kachunku, wiñaypajtaj qampi tiyachunku. Amen.