1 დიდი და საოცარი საქმე იწყება ადამიანთა შვილებისთვის.

2 აჰა, მე ვარ ღმერთი; ყური დაუგდეთ ჩემს სიტყვას, რომელიც არის ცოცხალი და ძლიერი, ორპირ ხმალზე ბასრი, ნაკუწებად აქცევს სახსრებსა და ძვლის ტვინს; ამიტომ, ყური დაუგდეთ ჩემს სიტყვას.

3 აჰა, უკვე თეთრია ყანა, მკისთვის მომწიფებული, ამიტომ, ვისაც სურს მოსავლის აღება, დაე, ნამგალი მოიქნიოს ძალ-ღონით, სანამ დღეა, რათა საკუთარი სულისთვის დაიუნჯოს მარადიული ხსნა ღვთის სასუფეველში.

4 დიახ, რომელიც მოიქნევს ნამგალს და მოსავალს მოიმკის, ის იქნება ღვთისგან მოწოდებული.

5 ამიტომ, თუ მთხოვ – მიიღებ; თუ დააკაკუნებ – გაგიღებენ.

6 ეცადე, წინ წაიყვანო და დააფუძნო ჩემი სიონი. ყველაფერში დაიცავი ჩემი მცნებები.

7 და თუ დაიცავ ჩემს მცნებებს და ბოლომდე გაძლებ – მიიღებ მარადიულ სიცოცხლეს, რომელიც არის ღმერთის ყველაზე უდიდესი ძღვენი.

8 და იქნება ასე: თუ მამას ჩემი სახელით სთხოვ, რწმენის იმედით – მიიღებ სულიწმინდას, რომელიც მეტყველებს, მოწმედ დადგე იმაზედ, რასაც მოისმენ და იხილავ, ასევე, რომ აუწყო ამ თაობას მონანიების შესახებ.

9 აჰა, მე ვარ იესო ქრისტე, ძე ცოცხალი ღმერთისა, რომელმაც შექმნა ზეცა და დედამიწა, სინათლე, რომელიც წყვდიადში არ დაიფარება;

10 ამიტომ, უნდა მივიტანო ჩემი სახარების სისრულე წარმართებისგან ისრაელის სახლში.

11 და აჰა, შენ, დევიდ, მოწოდებული ხარ, დაეხმარო; თუ ასე მოიქცევი და იქნები ერთგული – სულიერად და მიწიერად იქნები კურთხეული და დიდი იქნება შენი ჯილდო. ამინ.