33 From se man we i no bilivim ol toktok blong Jon long saed blong mi, i no save bilivim mi, be sapos nomo hem i sakem sin faswan.

47 Mo taem jif blong ol pris mo ol Farisi oli bin harem ol parabol blong hem, oli kasem se Jisas i bin stap tokbaot olgeta.

48 Mo oli talem long olgetawan bakegen: “?Be olsem wanem? ?Man ia i ting se hem hemwan i save spolem gud bigfala kingdom ia?” Mo oli bin kros long hem.

49 Be taem oli bin traem blong holemtaet hem, oli bin fraet long bigfala grup blong ol man we oli stap, from se oli bin save se bigfala grup blong ol man ia oli bin tekem Jisas se hem i profet blong olgeta.

50 Mo nao, ol disaepol blong hem oli kam luk hem, mo Jisas i talem long olgeta: “?Yufala i sapraes long ol toktok blong parabol we mi talem long olgeta?

51 I tru, i tru, mi talem long yufala. Mi mi ston, mo olgeta ia we oli nogud oli sakemaot mi.

52 Mi mi hed blong kona. Ol Jiu bae oli raorao wetem mi, mo bambae mi brekemdaon olgeta.

53 Mo bae mi tekemaot kingdom blong God long olgeta, mo bambae mi givim i go long wan nesen we i karem frut blong hem; (we i minim Ol Jentael.)

54 Taswe, huia we ston ia i foldaon long hem, bae i mekem hem i kam paoda.

55 Mo taswe, taem Masta blong plantesen i kam, bambae hem i prapa spolem gud ol rabis, nogud man ia, mo bae i givim plantesen blong hem long ol narafala man blong wok long plantesen, blong oli yusum, long ol las dei, we bambae oli givimbak long hem ol frut long stret taem blong olgeta.”

56 Mo afta, oli bin andastanem parabol we hem i bin talem long olgeta, se Ol Jentael, bae Lod i prapa spolem gud olgeta tu, taem bae Lod i aot long heven i kamdaon blong rul insaed long plantesen blong hem, we i wol ia mo ol man we oli stap laef insaed long hem.