JST, Matiu 4:1, 5–6, 8–9. Komperem long Matiu 4:1, 5–6, 8–9; oli bin mekem ol semmak jenis long Luk 4:2, 5–11
Spirit i stap lidim Jisas, i no Setan.
1 Afta, Spirit i bin lidim Jisas i go long waelples, blong hem i stap wetem God.
5 Afta, oli tekem Jisas i go long tabu siti, mo Spirit i putum hem long haeples evriwan antap long tempol.
6 Afta devel i kam luk hem mo talem se: “Sapos yu yu Pikinini blong God, yu jiam i go daon: from se oli raetem long Baebol se God bae i sendem ol enjel blong hem blong lukaot long yu: nao bambae oli holem yu antap blong yu no bangem leg blong yu long wan ston.”
8 Mo bakegen, Jisas i stap anda long Spirit, mo i tekem hem i go long wan bigfala hil we i hae we i hae, mo i soemaot long hem evri kingdom blong wol mo glori blong olgeta.
9 Mo devel i kam luk hem bakegen, mo talem: “Evri samting ia, bambae mi mi givim long yu sapos yu bodaon mo yu wosip long mi.”
JST, Matiu 4:11. Komperem long Matiu 4:11
Jisas i sendem ol enjel blong oli givhan long Jon Baptaes.
11 Mo nao, Jisas i bin save se oli putum Jon long kalabus, mo hem i bin sendem ol enjel; mo luk, oli bin kam kolosap blong givhan long hem.
JST, Matiu 4:18. Komperem long Matiu 4:19
Ol profet blong OlTesteman oli tokbaot Jisas.
18 Mo hem i bin talem long olgeta: “Mi, mi man ia nao we ol profet oli bin raet abaot mi; kam folem mi, mo bambae mi mekem yutufala i kam ol man blong pulum man.”
JST, Matiu 4:22. Komperem Matiu 4:23
Jisas i mekem sam pipol long medel blong olgeta we oli bin biliv long nem blong Hem, oli kam oraet bakegen.
22 Mo Jisas i bin go raon long ful Galili, i stap tijim man insaed long haos blong prea blong olgeta, mo i bin stap prijim gospel blong kingdom; mo hem i bin stap hilim eni kaen sik, mo eni kaen rabis sik long medel blong ol pipol we oli bin biliv long nem blong hem.