JST, Matiu 6:14. Komperem long Matiu 6:13; oli bin mekem ol semmak jenis long Luk 11:4
Lod i no stap lidim yumi blong foldaon long temtesen.
14 Mo yu no letem mifala blong devel i lidim mifala i foldaon long temtesen, be yu mekem mifala i fri long devel.
JST, Matiu 6:22. Komperem long Matiu 6:22
Sapos ae blong yumi i lukluk nomo long glori blong God, ful bodi blong yumi bambae i fulap long laet.
22 Laet blong bodi hem i ae; taswe, sapos ae blong yu i stap lukluk nomo long glori blong God, ful bodi blong yu bambae i fulap long laet.
JST, Matiu 6:25–27. Komperem long Matiu 6:25; 10:10
Jisas i givim woning long ol disaepol blong hem se wok blong olgeta bae i had, be i promesem olgeta se bae Hem i mekem wan rod i rere, mo se bae Papa long Heven bae i givim evri samting we oli nidim.
25 Mo bakegen, mi talem long yufala: “Yufala i go long ful wol, mo yufala i no kea long wol ia; from wol bae i no laekem yufala nating, mo bae i agensem yufala, mo bae i ronemaot yufala aot long haos blong prea blong olgeta.”
26 Be, bambae yufala i mas go long wan haos i go long narafala haos, yufala i stap tijim ol pipol; mo bambae mi go fastaem long yufala.
27 Mo Papa blong yufala we i stap long heven bambae i givim evri samting we yufala i nidim, eni samting we yufala i nidim blong kakae, wanem bae yufala i kakae; mo klos blong yufala i werem, o kavremap bodi blong yufala long hem.
JST, Matiu 6:38. Komperem long Matiu 6:33
Yumi mas lukaotem faswan blong bildimap kingdom blong God.
38 Taswe, yufala i no lukaotem ol samting blong wol ia, be yufala i lukaotem faswan blong bildimap kingdom blong God, mo blong stanemap stret mo gud fasin blong hem, nao biaen bambae hem i givim evri samting ia long yufala.