Te ’ē’a o te fa’aro’o

E aha te mau hope’ara’a o te mau tāmatara’a o te orara’a i ni’a i tō tātou fa’aro’o ia Iesu Mesia ? ’E eaha te fa’ahope’ara’a o tō tātou fa’aro’o i ni’a i te ’oa’oa ’e te hau tā tātou e ora nei i roto i teie orara’a ?

Tei te matahiti 1977 ra. ’Ua ta’i mai te niuniu ’e ’ua ’oto roa mātou i te fa’aro’ora’a i te poro’i. Tē haere ra Carolyn ’e ’o Doug Tebbs i roto i tō rāua fare ’āpī i te hopera’a tā rāua ha’api’ira’a teitei. ’Ua haere mai te pupu peresibutero e fa’atomo i te pere’o’o uta tauiha’a. Hou ’oia ’a ’ōtohe ai, ’ua hi’o maita’i Doug ē ’ua ateatea maita’i te ’ē’a. ’Aita rā ’oia i ’ite i tāna tamāhine iti ’o Jennie, i te horora’a i muri i te pere’o’o i te taime ti’a ’ore. I te taime poto, ’ua fa’aru’e mai tā rāua Jennie here.

E aha ïa te mea e tupu mai i muri iho ? E fa’atupu ānei te māuiui tā rāua i fāri’i hōhonu ’e te mana’o mo’emo’e e ’ore e ti’a ’ia feruri, i te hō’ē ’āputo hau ’ore i rotopū ia Carolyn ’e ia Doug, ’aore rā e ru’uru’u ānei te reira i tō rāua ’ā’au ’e e ha’apūai i tō rāua fa’aro’o i te fa’anahora’a a te Metua i te ao ra ?

E mea roa ’e te māuiui te ’ē’a o tō rāua mau ’ati, terā rā mai te hō’ē vāhi ’ē atu ’ua tae mai te mau ha’apu’era’a pae vārua, ’eiaha ’ia mo’e te tīa’ira’a, ’ia « ti’a māite rā i tō [rāua] haere’a ».¹ E au ra ē, ’ua riro mai teie nā ta’ata fa’aipoipo māere mau mai te Mesia ra te huru. Rahi atu ā te tūtavara’a. Rahi atu ā te aroha. ’Ua ti’aturi rāua ē, i tōna taime, e ha’amo’a te Atua i tō rāua mau ’ati ’ei maita’i nō rāua.²

Noa atu e’ita te māuiui ’e te mo’emo’era’a e ’ore e vai mai ’e e nehenehe e mo’e roa, ’ua tāmāhanahanahia ’o Carolyn ’e o Doug nā roto i te ha’apāpūra’a ē, nā roto i te fa’aea-pāpū-ra’a i ni’a i te ’ē’a nō te fafaura’a, e riro mai tā rāua Jennie here nā rāua iho ē a muri noa atu.³

’Ua ha’apūai tō rāua hi’ora’a maita’i i tō’u fa’aro’o i roto i te fa’anahora’a a te Fatu. ’Aita tātou e ’ite nei i te mau mea ato’a. ’Ōna, ’oia. ’Ua parau te Fatu ia Iosepha Semita i roto i te fare tāpe’ara’a nō Liberty ē « e noa’a ia ’oe te ’ite i te ’ohipa nā roto i teie mau mea ato’a nei, ’e e riro ho’i ’ei maita’i nō ’oe na. ’Ua haere roa atu te Tamaiti a te Ta’ata i raro a’e i teie mau mea ato’a ra. ’Ua hau ānei ’oe iāna ra ? »⁴

Mai te mea e fāri’i tātou i te hina’aro o te Fatu, e ha’api’i ’oia ia tātou nāhea ’ia haere nā muri iāna.⁵ ’A tāvini ai au ’ei misiōnare ’āpī i Tahiti, ’ua anihia iā’u ’ia ha’amaita’i i te hō’ē ’āiu ma’i. ’Ua tu’u mātou i tō mātou mau rima i ni’a i tōna upo’o ’e ’ua ha’amaita’i ’ia maita’i mai ’oia. ’Ua ha’amata tōna ea i te maita’i mai, terā rā i muri iho ’ua ma’i-fa’ahou-hia ’oia. ’Ua ha’amaita’i mātou iāna i te pitira’a o te taime, terā rā noa ā te hope’ara’a. ’Ua tae fa’ahou mai te toru o te anira’a. ’Ua tāparu mātou i te Fatu ’ia ti’a tōna hina’aro. Tau taime poto i muri mai, ’ua ho’i teie vārua iti i tōna fare i te ao ra.

’Ua tupu rā te hau i rotopū ia mātou. ’Ua hina’aro mātou ’ia ora mai teie ’aiū, e ’ōpuara’a ’ē atu rā tā te Fatu. Te fāri’ira’a i tōna hina’aro ’eiaha i tō tātou, ’o te tāviri ïa nō te ’itera’a i te ’oa’oa ta’a ’ē noa atu tō tātou huru orara’a.

Te fa’aro’o ’ōhie ia Iesu Mesia e vai ra i roto ia tātou, ’a ha’amata ai tātou i te ha’api’i nō ni’a iāna e vai noa ïa te reira i roto i tō tātou ’ā’au, ’a fa’aruru ai tātou i te mau tāmatara’a o te orara’a. E nehenehe ’e e arata’i tō tātou fa’aro’o iāna ia tātou nā roto i te mau fifi o te orara’a. ’Oia mau, e ’ite mai tātou ē, tē vai nei te ’ōhiera’a i te tahi atu pae o te mau fifi nō te orara’a⁶ mai te mea e « [ti’a māite] tātou i roto i te Mesia, ma te tīa’i pāpū roa ».⁷

Te hō’ē tuha’a o te ’ōpuara’a nō te orara’a nei, ’o te fa’ati’ara’a ïa i teie mau ’ōfa’i tūrorira’a ’ia riro mai ’ei mau ’ōfa’i ta’ahira’a, ’a ta’uma ai tātou i te mea tā’u e pi’i nei te « ’ē’a o te fa’aro’o »—te ’ē’a nō te mea tē parau nei te reira e ’ere te fa’aro’o e mea vai noa. E nehenehe te reira e haere i ni’a ’aore rā i raro ’ia au i te mau mā’itira’a tā tātou e rave.

’A tūtava ai tātou i te patu i te fa’aro’o i te Fa’aora, e’ita paha tātou e māramarama hope roa i te here o te Atua nō tātou ’e ’ia ha’apa’o i tāna mau ture ma te fa’ahepo ’ore. E nehenehe ato’a te mana’o fa’ahapa e riro ’ei tumu mātāmua nō tā tātou fa’aitoitora’a ’eiaha rā te here. ’Aita ā paha te hō’ē tū’atira’a pāpū iāna i tupu a’enei.

’A ’imi ai tātou i te fa’arahi i tō tātou fa’aro’o, e nehenehe tātou e fē’a’a i te mea tā Iakobo i ha’api’i. ’Ua fa’aha’amana’o mai ’oia ia tātou ē « te fa’aro’o ’aore e ’ohipa ra, e mea pohe ïa ».⁸ E hi’a paha tātou mai te peu e mana’o tātou ē, tei ’ia tātou te fa’aotira’a o te mau mea ato’a. E nehenehe te fa’atītīra’a rahi ia tātou iho e ha’afifi i tō tātou ’aravihi ’ia noa’a te mau mana o te ra’i.

Terā ra ’a haere noa ai tātou i mua i te fa’aro’o mau ia Iesu Mesia, e ha’amata tō tātou huru ferurira’a i te taui. E ’ite tātou ē, e fa’ati’a te ha’apa’ora’a ’e te fa’aro’o i te Fa’aora ia tātou ’ia fāri’i tāmau noa i tōna Vārua i pīha’i iho ia tātou.⁹ E’ita te ha’apa’ora’a e riro fa’ahou ’ei fifi, e riro mai rā ’ei mā’imira’a.¹⁰ E ’ite mai tātou ē, e fa’ati’a te ha’apa’ora’a i te mau fa’auera’a a te Atua ia tātou ’ia ti’aturi iāna. Ma tōna ti’aturira’a e tae mai te māramarama rahi. E arata’i teie māramarama i tō tātou tere ’e e fa’ati’a ia tātou ’ia ’ite maita’i atu i te ’ē’a e ti’a ia tātou ’ia rave.

Tē vai atu ā rā. ’A rahi noa atu ā tō tātou fa’aro’o i te Fa’aora, e ’ite mai tātou i te hō’ē tauira’a na’ina’i e ō ato’a mai te hō’ē māramaramara’a hanahana nō ni’a i tō tātou aura’a ’e te Atua, te hō’ē tūra’ira’a rahi e fa’aātea atu i te « e aha tā’u e hina’aro ? » i te « e aha tā te Atua e hina’aro ? » Mai te Fa’aora, e hina’aro tātou e ’ohipa « ’eiaha ’ia au i tō’u hina’aro, i tō ’oe rā hinaʼaro »¹¹ Tē hina’aro nei tātou e rave i te ’ohipa a te Atua ’e ’ia riro ’ei mauiha’a i roto i tōna rima.¹²

E mea mure ’ore tō tātou haerera’a i mua. ’Ua ha’api’i te peresideni Russell M. Nelson ē, e rave rahi atu ā mau mea tā te Metua i te ao ra e hina’aro ’ia ’ite tātou.¹³ ’A haere ai tātou i mua, e māramarama atu ā tātou i te mea i tā te Fatu i ha’api’i ia Iosepha Semita : « Nō te mea ’ia ha’apa’o ’outou i tā’u mau fa’auera’a e fāri’i ïa ’outou i tōna ra ’īra’a, ’e e fa’ahanahanahia ho’i i roto iā’u mai iā’u nei ho’i i roto i te Metua; nō reira, tē parau atu nei au ia ’outou, e fāri’i ’outou i te maita’i i muri a’e i te maita’i ».¹⁴

Nā tātou e fa’aoti e aha te teiteira’a tā tātou e ta’uma i ni’a i te ’ē’a o te fa’aro’o. ’Ua ha’api’i Elder Neil L. Andersen, « e ’ere te fa’aro’o e mea topa noa mai, e mā’itira’a rā ».¹⁵ E nehenehe tātou e mā’iti ’ia rave i te mau fa’aotira’a tano nō te fa’arahi i tō tātou fa’aro’o i te Fa’aora.

’A feruri i te ’ohipa i tupu i roto i te fa’aotira’a Lamana ’e ’o Lemuela ’ia pou i raro i te ’ē’a o te fa’aro’o, ’a pa’i’uma atu ā ai Nephi i ni’a. Tē vai ra ānei te hō’ē fa’ahōho’ara’a māramarama atu ā i te ta’a-’ē-ra’a i rotopū i te pāhonora’a a Nephi « e haere au ’e e rave »¹⁶ i tā Lamana ’e o Lemuela, i muri a’e i tō rāua ’itera’a i te hō’ē melahi, i te pāhonora’a atu « nāhea e ti’a ai i te Fatu ’ia fa’aora ? »¹⁷

E ’ōpani te fa’aro’o ’ore i tō tātou ’aravihi ’ia hi’o i te mau temeio, ’āre’a rā te hō’ē vārua fa’aro’o i te Fa’aora e ’īriti ïa te reira i te mau mana o te ra’i.

Noa atu e paruparu tō tātou fa’aro’o, e toro noa mai iho ā te rima o te Fatu nō te fa’ati’a ia tātou.¹⁸ I te mau matahiti i ma’iri, ’ua fāri’i au i te tītaura’a ’ia fa’anaho fa’ahou i te titi i Nigeria. I te minuti hope’a, ’ua tauihia te tai’o mahana. ’Ua fa’aoti te hō’ē ta’ata i roto i te titi e haere ’ē i te ’oire nō te tai’o mahana mātāmua nō te ’āmuira’a. ’Aita ’oia i hina’aro ’ia pi’ihia ’oia ’ei peresideni titi.

I tōna haerera’a, ’ua fāri’i ’oia i te hō’ē ’ati purūmu ri’ari’a, ’aita rā ’oia i pēpē. Uiui atu ra ’oia ē, nō te aha ’oia i fa’aorahia ai. ’Ua ho’i fa’ahou mai ’oia i ni’a i te fa’aotira’a tāna i rave. ’Ua tātarahapa ’oia ’e ’ua ’āmui mai ma te ha’eha’a i te tai’o mahana ’āpī nō te ’āmuira’a. ’E ’oia mau, ’ua pi’ihia ’oia ’ia riro ’ei peresideni titi ’āpī.

’Ua ha’api’i Elder Neal A. Maxwell : « E mea nā roto i te fa’a’āfarora’a i tō tātou hina’aro i ni’a i tō te Atua e nehenehe ai te ’īra’a o te ’oa’oa e ’itehia mai. ’Aita atu e mea e hōro’a mai i te hō’ē tuha’a iti ».¹⁹

I muri a’e i tō tātou « ravera’a i te mau mea ato’a ma tō tātou pūai », i reira ’ua tae i te taime ’ia « ti’a pāpū nō te ’ite i te fa’aorara’a a te Atua ».²⁰ ’Ua ’ite au i te reira ’a tāvini ai au ’ei taea’e aupuru nō te ’utuāfare McCormick. Fa’aipoipohia a 21 matahiti i teienei, ’ua tāvini o Mary Kay ma te fa’aro’o i roto i tōna mau pi’ira’a. E ’ere o Ken i te melo nō te ’Ēkālesia ’e ’aita ’oia i ’ana’anatae nō te riro mai ’ei melo, nō tōna rā here i tāna vahine, ’ua mā’iti ’oia e haere i te purera’a ’e ’ōna.

Te hō’ē sābati, ’ua fa’auruhia vau e faʼaʼite i tōʼu ʼiteraʼa pāpū ia Ken. ’Ua ani au iāna e nehenehe ānei au e rave i te reira. E mea ’ōhie ’e te māramarama tāna pāhonora’a : « ’Aita, māuruuru ».

ʼUa māere roa vau. ’Ua fāri’i au i te muhumuhu ’e ’ua tāmata vau i te pe’e i te reira. ’Ua fa’ahemahia vau i te fa’aotira’a ē ’ua rave au i tā’u tuha’a. Terā rā i muri mai i te pure ’e te ferurira’a, ’ua ti’a iā’u ’ia ’ite ē noa atu ’ua tano tō’u mau mana’o, ’ua tai’o rahi a’e rā vau i ni’a iā’u iho ’e e mea iti roa i ni’a i te Fatu.

I muri a’e, ’ua ho’i fa’ahou vau, terā rā ma te hō’ē huru vārua ta’a ’ē. E haere noa vau mai te hō’ē mauiha’a i roto i te rima o te Fatu, ’aita atu e hia’aira’a maori rā te pe’era’a i te Vārua. Māua tō’u hoa fa’aro’o rahi ’o Gerald Cardon, ’ua tomo atu māua i roto i te fare o McCormick ma.

I muri iho, ’ua fāri’i au i te muhumuhu e ani ia Gerald e hīmene « ’Ua ’ite au tē ora nei tō’u Fa’aora ».²¹ ’Ua hi’o mai ’oia iā’u ma te mata uiui, nō tōna rā fa’aro’o i tō’u fa’aro’o, ’ua nā reira ’oia. ’Ua fa’a’ī te hō’ē vārua nehenehe i te piha. ’Ua tae mai te muhumuhu e ani ia Mary Kay ’e ia Kristin, tā rāua tamāhine, ’ia fa’a’ite mai i tō rātou ’itera’a pāpū. ’A nā reira ai rāua, ’ua pūai atu ā te Vārua. ’Oia ho’i, i muri a’e i te ’itera’a pāpū o Kristin, ’ua tahe te roimata i ni’a i te pāpāri’a o Ken.²²

’Ua upo’oti’a te Atua. ’Aita te mau ’ā’au i putapū noa, ’ua taui roa rā te reira e a muri noa atu. ’Ua hōpoi-’ē-hia nā piti ’ahuru ma hō’ē matahiti ti’aturi-’ore-ra’a e te mana o te Vārua Maita’i. Hō’ē hepetoma i muri mai, ’ua bāpetizohia ’o Ken. Hō’ē matahiti i muri mai, ’ua tā’atihia ’o Ken ’e ’o Mary Kay i roto i te fare o te Fatu nō te tau ’e nō te tau a muri atu.

’Ua ’ite ’āmui mātou i te aura’a ’ia mono i tō mātou hina’aro i te hina’aro o te Fatu, ’e ’ua rahi atu tō mātou fa’aro’o iāna.

E mata na tātou i te feruri i te mau anira’a i uihia e te mau peropheta a te Atua, ’a tūtava ai ’outou i te pa’i’uma i ni’a i tō ’outou ’ē’a o te fa’aro’o :

’Ua tātarahia ānei au i te te’ote’o ?²²

E vaiiho ānei au i te vāhi i roto i tō’u ’ā’au nō te parau a te Atua ?²³

E fāri’i ānei au i tō’u mau ’ati ’ia ha’amo’ahia nō tō’u maita’i ?²⁴

’Ua ineine ānei au nō te vaiiho i tō’u hina’aro ’ia horomi’ihia i roto i te hina’aro o te Metua ?²⁵

Mai te mea ’ua fāri’i au i te hia’ai ’ia hīmene i te hīmene nō te aroha fa’aora, e nehenehe ānei au e fāri’i i te reira i teienei ?²⁶

E vaiiho ānei au i te Atua ’ia upo’oti’a i roto i tō’u orara’a ?²⁷

Mai te mea tē ’ite ra ’outou ē, tē fifi ra tō ’outou haere’a ’e tō ’outou fa’aro’o i te Fa’aora, ’a ’imi i te ’ē’a nō te ho’i iāna ra. Tō ’outou fa’ateiteira’a ’e tō tō ’outou hua’ai e mea nā roto ïa i te reira.

E mata na tātou i te tanu i te mau hūero o te fa’aro’o i roto i te hōhonura’a o tō tātou ’ā’au. E mata na tātou i te ’atu’atu i teie mau hūero ’a ru’uru’uhia ai tātou i te Fa’aora, ma te ha’apa’ora’a i te mau fafaura’a tā tātou i rave ’e ’ōna. I te i’oa o Iesu Mesia, ’āmene.