E ha’apūai, e pāruru ’e e fa’aineine te mau fafaura’a ’e te Atua ia tātou nō te hanahana mure ’ore.
’A mā’iti ai tātou e rave i te mau fafaura’a ’e ’ia ha’apa’o i te reira, e ha’amaita’ihia tātou i te ’oa’oa rahi a’e i roto i teie orara’a ’e te hō’ē orara’a hanahana mure ’ore i roto i te ao a muri a’e.
E te mau tuahine, ’auē te ’oa’oa ’ia putuputu i roto i te hō’ē autuahinera’a nā te ao ato’a nei ! ’Ei mau vahine ’o tē rave nei ’e ’o tē ha’apa’o nei i te mau fafaura’a ’e te Atua, tē fa’a’ite nei tātou i te mau natira’a pae vārua ’o tē tauturu nei ia tātou ’ia pāhono i te mau tāmatara’a o tō tātou tau, ’e ’o tē fa’aineine nei ia tātou nō te tae-piti-ra’a mai o Iesu Mesia. ’E te ha’apa’ora’a i te reira mau fafaura’a, e fa’ati’a ia tātou ’ia riro ’ei mau vahine fa’auru, ’o tē nehenehe e huti mai ia vetahi ’ē i te Fa’aora ra.
Rātou tei bāpetizohia, ’ua fafau rātou i taua mahana ra e ’ore roa e mo’ehia, ’ia rave i te i’oa o Iesu Mesia i ni’a iho ia rātou, ’ia ha’amana’o tāmau noa iāna, ’ia ha’apa’o i tāna mau fa’auera’a, ’e ’ia tāvini iāna e tae noa atu i te hope’a. ’Ia rave ana’e tātou i teie mau mea, e fafau mai te Metua i te ao ra ’ia fa’a’ore i tā tātou mau hara ’e e hōro’a mai ia tātou i te auhoara’a o te Vārua Maita’i. E tu’u teie mau ha’amaita’ira’a ia tātou i ni’a i te ’ē’a ē, mai te mea e tāmau noa tātou i te haere i mua ’e tae noa atu i te hope’a, e fa’ati’a te reira ia tātou ’ia ora i pīha’i iho iāna ’e i tāna tamaiti i roto i te bāsileia tīrētiēra. Te ta’ata tāta’itahi tei bāpetizohia e fāri’i ’oia i te parau fafau nō teie mau hōro’ara’a, mai te mea e ha’apa’o ’oia i te fafaura’a tāna i rave i taua mahana ta’a ’ē ra.
Te feiā ’o tei rave i te tahi atu mau fafaura’a i roto i te hiero, e fāri’i rātou i te mau parau fafau pūai ’ia au i tō rātou iho ha’apa’o maita’i. E fafau hanahana tātou ’ia ha’apa’o i te mau fa’auera’a a te Atua, ’ia ora i te ’evanelia a Iesu Mesia, ’ia vai vi’ivi’i ’ore noa, ’e ’ia hōro’a i tō tātou taime ’e tā tātou tārēni i te Fatu. ’E i tōna pae, e fafau mai te Atua i te mau ha’amaita’ira’a i roto i teie orara’a, ’e te rāve’a nō te ho’i e ora i pīha’i iho iāna.1 I roto i teie fa’anahora’a, e hōro’ahia mai ia tātou ’aore rā e tu’uhia mai i ni’a ia tātou te mana nō te ’ite i te parau mau ’e te hape, te maita’i ’e te ’ino, i rōpū i te rahira’a reo fa’atapitapi ’e te pāto’i e fa’aruruhia nei e tātou. ’Auē ïa hōro’a mana rahi ē !
I te fa’aineinera’a vau i tō’u tere mātāmua nō te hiero, ’ua tauturu mai tō’u metua vahine ’e te mau tuahine ’aravihi nō te Sōtaiete Tauturu iā’u, ’ia mā’iti i te mau tauiha’a e tītauhia iā’u, ’oia ato’a te mau ’ahu ’ōro’a nehenehe. Te fa’aineinera’a faufa’a roa a’e rā, ’ua tae mai ïa hou te ’itera’a ē, e aha te ’ahu e ’ō’omo. I muri a’e i tō’u uiuira’ahia nō te ’ite e mea ti’amā ānei au, ’ua fa’ata’a mai tō’u ’episekōpo iā’u i te mau fafaura’a ’o tā’u e rave atu. ’Ua hōro’a mai tāna fa’ata’ara’a pāpū iā’u te rāve’a ’ia feruri i teie mau fafaura’a ’e ’ia ineine nō te rave i te reira.
Te taera’a mai taua mahana ra, ’ua ’āmui atu vau ma te ’ā’au mēhara ’e te hau. Noa atu ē, ’aita vau i māramarama i te tā’āto’ara’a o te aura’a o te mau fafaura’a tā’u i rave, ’ua ’ite au ē ’ua tā’atihia vau i te Atua nā roto i teie mau fafaura’a, ’e ’ua fafauhia mai iā’u te mau ha’amaita’ira’a ’o tā’u i māramarama ri’i noa, mai te mea e ha’apa’o vau i te reira. Mai taua ’ohipa mātāmua i tupu ra, ’ua ha’apāpū-tāmau-hia mai iā’u ē, te ha’apa’ora’a i te mau fafaura’a tā tātou i rave ’e te Atua, e fa’ati’a te reira ia tātou ’ia huti mai i roto i te mana o te Fa’aora, i te mea e ha’apūai ia tātou i roto i tō tātou mau tāmatara’a ’ape ’ore, e pāruru ia tātou i te fa’aurura’a a te ’enemi, ’e e fa’aineine ia tātou nō te hō’ē hanahana mure ’ore.
E nehenehe te mau ’ohipa e tupu o te orara’a e haere atu mai te ’ārearea i te hepohepo rahi, mai te pe’ape’a i te hanahana. E tauturu te ’ite rau tāta’itahi ia tātou ’ia māramarama maita’i a’e i te here rahi o tō tātou Metua, ’e tō tātou ’aravihi ’ia taui maoti te hōro’a o te aroha o te Fa’aora. E fa’ati’a te ha’apa’ora’a i tā tātou mau fafaura’a i te mana o te Fa’aora ’ia tāmā ia tātou, ’a ha’api’i mai ai tātou nā roto i te ’itera’a rau—nō te hō’ē ha’avara’a hape na’ina’i ānei ’aore rā nō te hō’ē fifi rahi. Tei reira tō tātou Tāra’ehara nō te haru mai ia tātou, ’ia topa ana’e tātou mai te mea e fāriu atu tātou i ni’a iāna.
’Ua ti’a a’ena ānei ’outou i ni’a i te hō’ē mato tārere teitei, te manimani ’āvae i te hiti roa ’e tō ’outou tua i fāriuhia i te pae ’ābuso ? ’Ei fa’aha’amana’ora’a, noa atu ’ua ’ite ’outou ’ua tā’amu-maita’i-hia ’outou i ni’a i te mau mātēria pa’ari, ’o tē nehenehe e ’āfa’i ia ’outou i raro i te mato ma te pāruruhia, te ti’ara’a i te hiti roa e fa’a’otu’itu’i iho ā te māfatu. Nō te ’ōtohe atu i rāpae i te mato ’e ’ia tīrare i roto i te ’aore, tītauhia ’ia ti’aturi i te tūtau i tāmauhia i ni’a i te hō’ē ’ohipa pa’ari ’aita e hautiuti. Tītauhia ’ia ti’aturi i te ta’ata e huti i te taura ’a pou ai ’outou i raro. ’E noa atu e hōro’a mai te mātēria ia ’outou i te tahi ti’ara’a ’ia arai i tō ’outou poura’a, e tītauhia ia ’outou ’ia pāpū maita’i ē, e’ita tō ’outou ’āpiti e vaiiho ia ’outou ’ia topa.
Tē ha’amana’o maita’i nei au i te hō’ē ha’apoura’a nā ni’a i te mato ’e te hō’ē pupu feiā ’āpī tamāhine. ’O vau te ta’ata mātāmua o te pupu e haere. ’A ’ōtohe ai au i ni’a i te mato, ’ua ha’amata vau i te topa ma te tāpe’a ’ore. ’Aua’e rā, ’ua ha’amata te taura i te rūrū ’e ’ua fa’aea a’e ra tō’u topa vitiviti roa. ’A tārere noa ai au i te ’āfara’a o te mato teitei, ’ua pure ’ū’ana vau nō te hō’ē ta’ata ’aore rā te hō’ē ’ohipa ’o tē tāpe’a iā’u ’eiaha ’ia topa i ni’a i te mau ’ōfa’i.
I muri a’e, ’ua ’ite mai au ē, ’aita te farero tāmaura’a tūtau i tāmau-pa’ari-hia, ’e i te poura’a mai au na te hiti o te mato, ’ua ruru te tua o te ta’ata e tāpe’a ra iā’u ’e ’ua hutihia mai ’oia i te hiti o te mato. Ma te rāve’a vitiviti, ’ua ha’amau ’oia i tōna nā ’āvae i ni’a i te tahi mau ’ōfa’i. Te mau-maita’i-ra’a i roto i te reira vaira’a, ’ua ti’a iāna ’ia tu’u marū noa iā’u, te tahi rima i muri i te tahi rima nā ni’a i te taura. Noa atu ’aita vau e ’ite ra iāna, ’ua ’ite au tē ha’a nei ’oia ma tōna pūai ato’a nō te fa’a’ora iā’u. Tē vai ra te tahi atu hoa i raro mai i te mato, ’ua ineine nō te haru mai iā’u mai te mea e’ita te taura e mau fa’ahou. ’A fātata atu ai au i pīha’i iho iāna, ’ua haru mai ’oia i tō’u hāneti ’e ’ua tu’u iā’u i ni’a i te repo.
’O Iesu Mesia ana’e tō tātou tūtau ’e te ’āpiti maita’i roa, ’ua pāpū ia tātou i tōna here pūai i roto i te mau taime tāmatara’a ’e o te fa’aorara’a mau nā roto iāna. Mai tā te peresideni M. Russell Ballard i ha’api’i : « Te fa’aro’o i te Atua ’e i tāna tamaiti, te Fatu Iesu Mesia, ’o te […] tūtau ïa e ti’a ’ia vai i roto i tō tātou orara’a nō te tāpe’a ia tātou i roto i te mau taime ’ārepurepura’a tōtiare ’e te ’ino […] E ti’a i tō tātou fa’aro’o […] ’ia fa’atumuhia i ni’a ia Iesu Mesia, i tōna orara’a ’e tāna tāra’ehara, ’e i roto i te fa’aho’ira’ahia mai tāna ’evanelia ».2
Te mātēria pae vārua ’o te pāruru ia tātou ’eiaha ’ia pararī i ni’a i te mau ’ōfa’i o te ’ati, ’o tō tātou ïa ’itera’a pāpū nō Iesu Mesia ’e te mau fafaura’a tā tātou i rave. E nehenehe tātou e ti’aturi i ni’a i teie mau pāturura’a nō te arata’i ’e nō te hōpoi atu ia tātou i te vāhi pāruruhia. ’Ei ’āpiti ’ā’au tae, e’ita te Fa’aora e fa’ati’a ia tātou ’ia topa ma te ’ore e nae’ahia iāna. Noa atu i roto i tō tātou mau taime māuiuira’a ’e te ’oto, tei reira ’oia nō te fa’ateitei ’e nō te fa’aitoito. E tauturu tōna mana ia tātou ’ia ti’a mai, pinepine nō te mau mā’itira’a ha’amoura a vetahi ’ē. Nō reira, tītauhia ia tātou ’ia tāmau i tō tātou hāneti ’e ’ia pāpū maita’i ē, ’ua tā’amu-maita’i-hia te mau natira’a. E ti’a ia tātou ’ia mā’iti ’ia ha’amauhia i ni’a i te Fa’aora, ’ia natihia i ni’a iāna nā roto i tā tātou mau fafaura’a.3
Nāhea tātou ’ia ha’apa’ari i taua ha’amaura’a ra ? E pure tātou ma te ’ā’au ha’eha’a, e tuatāpapa ’e e feruri māite i te mau pāpa’ira’a mo’a, e rave i te ’ōro’a mo’a ma te vārua tātarahapa ’e te fa’atura, e tūtava ’ia ha’apa’o i te mau fa’auera’a ’e e pe’e i te a’ora’a a te peropheta. ’E ’a rave ai tātou i tā tātou mau ’ohipa i te mau mahana ato’a ma te « teitei a’e ’e te mo’a a’e »4, e rahi atu tō tātou natira’a i te Fa’aora ’e i taua taime ato’a ra e tauturu tātou ia vetahi ’ē ’ia haere mai iāna ra.
Mai te aha te huru o te reira haere’a « teitei a’e ’e te mo’a a’e » ? Tē tāmata nei tātou i te ora i te ’evanelia i roto i tā tātou mau ’ohipara’a ato’a. Tē ’atu’atu nei tātou i te feiā e hina’aro i te tauturu nā roto i te aupurura’a mau, te fa’a’itera’a i te here nā roto i te tāvinira’a ’ōhie. Tē fa’a’ite nei tātou i te parau ’āpī maita’i o te ’evanelia i te feiā e hina’aro i te hau ’e i te pūai ’e « ’aore i ’ite i hea e ’imi ai i te reira ».5 Tē ha’a nei tātou nō te tāhō’ē i te mau ’utuāfare nō te ora mure ’ore i nā pae e piti o te pāruru. ’E nō rātou ’o tei rave i te mau fafaura’a i roto i te fare o te Fatu, mai tā peresideni Russell M. Nelson i fa’ata’a, « e ’ō’omo te ta’ata pa’ari haere hiero i te ’ahu mo’a o te autahu’ara’a, [’o tē…] fa’aha’amana’o ia tātou […] ’ia haere nā ni’a i te ’ē’a o te fafaura’a i te mau mahana ato’a ma te teitei a’e ’e ma te mo’a a’e ».6 E ’ere teie mau ’ohipa i te ’ohipa ma’ama’a nō te tahi noa taime, e mea faufa’a rā nō tō tātou ’oa’oa—’e te ’oa’oa mure ’ore.
Nō tō tātou haerera’a mure ’ore i mua, ’aita e mea faufa’a atu ā ’o te ha’apa’ora’a i tā tātou mau fafaura’a ’e te Atua. ’Ia maita’i ana’e tā tātou mau fafaura’a mo’a nō te hiero, e nehenehe tātou e ti’aturi i te hō’ē fārereira’a ’oa’oa ’e te mau ta’ata tei herehia. Terā tamari’i ’aore rā metua, ’aore rā hoa fa’aipoipo tei fa’aru’e a’ena i te tāhuti nei, tē ti’aturi nei ’oia ma tōna ’ā’au ato’a ē, e vai pāpū noa ’outou i tā ’outou mau fafaura’a ’o tē tā’amu ’āmui ia ’outou. Mai te mea e tāu’a ’ore tātou ’aore rā e’ita e ha’apa’o maita’i roa i tā tātou mau fafaura’a ’e te Atua, tē ha’ape’ape’a ra ïa tātou i teie mau natira’a mure ’ore. Teie te taime nō te tātarahapa, nō te tātā’i, ’e nō te tāmata fa’ahou.
E mea mā’a ’ore te ’oa’oa, mai te mea e taui tātou i te mau ha’amaita’ira’a o te ’oa’oa mure ’ore nō te hō’ē orara’a ’ōhie nō te hō’ē taime poto. Noa atu te fāito o tō tātou matahiti, e parau mau hope roa te reira : te tāviri nō te ’oa’oa vai maoro ’o te orara’a ïa i te ’evanelia a Iesu Mesia ’e te ha’apa’ora’a i tā tātou mau fafaura’a. ’Ua fa’a’ite pāpū mai tō tātou peropheta, te peresideni Nelson ē, « tō tātou pārurura’a hope’a roa ’e tō tātou ana’e ’oa’oa vai maoro tei roto ïa i te tāpe’ara’a i te ’āuri o te ’evanelia a Iesu Mesia tei fa’aho’i-fa’ahou-hia mai, ’e tōna mau fafaura’a ’e mau ’ōro’a. Mai te mea e nā reira tātou, e nehenehe tātou e fano nā ni’a i te miti ’ārepurepu, nō te mea e roa’a ia tātou te mana o te Atua »7
E rave rahi ’o tātou tei fa’aruru i te mau miti ’ārepurepu. ’A tūra’ihia ai tātou nā te mau are o te ’āti ’e i te tahi taime ’a ha’amatapōhia ai e te mau pape mata pūai e tahe mai i roto i teie mau fifi, ’aita paha tātou i ’ite ē nā tei hea vāhi tātou e hoe ai i te poti o tō tātou orara’a. E mana’o ato’a paha tātou ē, ’aita tō tātou e pūai nō te tae atu i tahatai. Te ha’amana’ora’a ’o vai ’outou—hō’ē tamari’i herehia nā te Atua—nō te aha tei ni’a ’outou i te fenua nei, ’e tā ’outou fā ’o te orara’a ïa i pīha’i iho i te Atua ’e tei herehia e ’outou, e ha’amāramarama i tō ’outou hi’ora’a ’e e fa’atoro ia ’outou i ni’a i te ’ē’a mau. I rōpū i te vero, tē vai ra hō’ē māramarama ’ana’ana nō te fa’a’ite i te ’ē’a. « ’O vau nei te māramarama ’o tē ’ana’ana nei i roto i te pōuri », ’ua parau Iesu.8 E mea pāpū tō tātou pārurura’a ’ia hi’o ana’e tātou i tōna māramarama ’e ’ia tāpe’a i tā tātou mau fafaura’a ma te parauti’a.
’Ua riro ’ei ha’amaita’ira’a te fārereira’a i te mau vahine nō te mau fāito matahiti e ora nei i roto te raura’a o te huru orara’a, ’o tē ha’apa’o nei i tā rātou mau fafaura’a. I te mau mahana ato’a, tē fāri’u nei rātou i ni’a i te Fatu ’e tāna peropheta ’ia arata’ihia, ’eiaha rā i ni’a i te mau rāve’a tūreiara’a. Noa atu tō rātou mau tāmatara’a ta’ata hō’ē ’e te mau ’ite hōhonu o te ao nei e fa’ahema nei ’eiaha rātou ’ia ha’apa’o i tā rātou mau fafaura’a, ’ua pāpū tō rātou mana’o ’ia fa’aea noa i ni’a i te ’ē’a o te fafaura’a. Tē turu’i nei rātou i ni’a i te parau fafau i « te mau mea ato’a a [te] Metua ra ».9 ’E noa atu te fāito o tō ’outou matahiti, ’outou tāta’itahi te mau vahine tei rave i te mau fafaura’a ’e te Atua, e ti’ara’a tō ’outou ’ia amo i te māramarama o te Fatu ’e ’ia arata’i mai ia vetahi ’ē iāna ra.10 Nā roto i tā ’outou ha’apa’ora’a i te mau fafaura’a, e hōro’a mai ’oia ia ’outou i tōna mana autahu’ara’a, ’e e fa’ati’a ia ’outou ’ia fāri’i i te fa’aurura’a rahi i ni’a i te feiā ato’a tā ’outou e ’ohipa nei. Mai tā te peresideni Nelson i parau, ’o ’outou te mau vahine e fa’atupu i te mau tohura’a i fa’a’ite-ātea-hia !11
E te mau tuahine here ē, hau atu i te mau mea ato’a, ’a fa’aea noa i ni’a i te ’ē’a nō te fafaura’a e tae atu ia Iesu Mesia ra ! ’Ua ha’amaita’ihia tātou ’ia haere mai i te fenua nei, ’a parare ai te mau hiero nā te ao nei. E nehenehe te mau melo ti’amā ato’a o te ’Ēkālesia e rave ’e e ha’apa’o i te mau fafaura’a o te hiero. Te feiā ’āpī pa’ari ē, ’aita ’outou e tītauhia e tīa’i te fa’aipoipora’a ’aore rā te misiōni nō te rave i teie mau fafaura’a mo’a. E nehenehe ’outou e fa’aineine ia ’outou ’ei feiā ’āpī tamāhine nō fāri’i i te pārurura’a ’e te pūai tā te mau fafaura’a o te hiero e hōro’a mai i te 18ra’a o te matahiti, mai te mea ’ua ineine ’outou ’e tē vai ra te hina’aro i roto ia ’outou ’ia fa’atura i teie mau fafaura’a o te hiero.12 ’Outou tei fāri’i a’e na i te mau ha’amaita’ira’a o te hiero, ’eiaha e vaiiho i te feiā fa’anevaneva ’aore rā te mau fa’anevanevara’a, ’ia ruri ’ē ia ’outou i te mau parau mau mure ’ore. ’A tuatāpapa ’e ’a ani i te mau ta’ata ti’aturihia nō te hāro’aro’a maita’i a’e i te aura’a o te mau fafaura’a tā ’outou i rave. ’A haere pinepine i te hiero mai tā ’outou e nehenehe ’e ’a fa’aro’o i te Vārua. E fāri’i ’outou i te ha’apāpūra’a mārū tei ni’a ’outou i te ’ē’a o te Fatu. E ’ite mai ’outou i te itoito ’ia tāmau noa i te arata’i mai ia vetahi ’ē nā muri ia ’outou.
Tē fa’a’ite pāpū nei au ē, mai te mea e mā’iti tātou e rave i te mau fafaura’a ’e tō tātou Metua i te ao ra ’e ’ia roa’a te mana o te Fa’aora nō te ha’apa’ora’a i te reira, e ha’amaita’ihia tātou i te ’oa’oa rahi a’e i roto i teie orara’a, ’o tā tātou e’ita e noa’a ’ia feruri i teienei, ’e te hō’ē orara’a hanahana mure ’ore i roto i te ao a muri a’e.13 I te i’oa o Iesu Mesia, ’āmene.