’O tātou Te ’Ēkālesia a Iesu Mesia i te Feiā Mo’a i te mau Mahana Hope’a nei

I muri a’e i tō’u tītau-manihini-ra’a-hia i te fa’anahora’a « haere mai ’e e hi’o »,¹ ’ua ’āmui mai au i Te ’Ēkālesia a Iesu Mesia i te Feiā Mo’a i te mau Mahana Hope’a nei, nō te taime mātāmua i te 26ra’a o tō’u matahiti. Nō fa’ata’a-’ē-noa-hia iho nei au i tā’u tāne mātāmua. E tamaiti toru matahiti tā’u ’E ’ua fāri’i i roto iā’u te faufa’a ’ore ’e te ri’ari’a. I tō’u tomora’a mai i roto i te ti’ahapa, ’ua ’ī au i te mahanahana ’a ’ite ai au i te fa’aro’o ’e te ’oa’oa o te fēia e hā’ati ra iā’u. Tei reira mau « te ha’apūra’a ’ia tupu ana’e te vero ».² Toru hepetoma i muri mai, ’ua rave au i te fafaura’a nō te bāpetizora’a ’e tō’u Metua i te ao ra ’e ’ua ha’amata vau i tō’u tere ’ei pipi nā te Mesia, noa atu ē e ’ere tō’u orara’a i te mea maita’i roa i te roara’a o teie tere.

Nō’u nei, nō te fāri’i i taua mau ha’amaita’ira’a mure ’ore ra, e rave rahi tuha’a i te pae tino ’e i te pae vārua e ti’a ’ia fa’anahohia. ’Ua fa’aho’i-fa’ahou-hia mai ’e ’ua porohia te ’Evanelia a Iesu Mesia ; ’ua patuhia teie fare purera’a ’e ’ua ha’apa’o-maite-hia ; tē vai nei hō’ē fa’aterera’a nō te ’Ēkālesia, mai te peropheta e tae noa atu i te feiā fa’atere o te fenua iho ; ’e te hō’ē ’āma’a tei ’ī i te mau melo nō te fafaura’a tei ineine i te tauahi mai iā’u ’e i tā’u tamaiti, ’a arata’ihia ai māua i te Fa’aora, « ’e tē fa’a’amuhia nei te ta’ata tāta’itahi i te parau maita’i a te Atua »,³ ’e tē hōro’ahia nei te mau rāve’a nō te tāvini.⁴

Mai te ha’amatara’a mai ā, ’ua ’imi te Atua i te ha’aputuputu ’e i te fa’anaho i tāna mau tamari’i⁵ nō te « fa’atupu i [tō tātou] tāhuti ’ore ’e te ora mure ’ore ».⁶ Ma te reira fā, ’ua fa’aue mai ’oia ia tātou ’ia patu i te mau vāhi ha’amorira’a⁷ i reira tātou e fāri’i ai i te ’ite ’e te mau ’ōro’a nō te fa’aorara’a ’e te fa’ateiteira’a ; e rave ai ’e e ha’apa’o ai i te mau fafaura’a ’o tē tā’amu ia tātou ia Iesu Mesia ;⁸ e fa’a’ahuhia ai i te « mana nō te atuara’a » ;⁹ ’e e putuputu pinepine ai nō te ha’amana’o ia Iesu ’e nō te ha’apūai i te tahi ’e te tahi i roto iāna.¹⁰ Tē vai nei te fa’anahonahora’a a te ’Ēkālesia ’e tōna mau ti’ahapa nō tō tātou maita’i i te pae vārua. « Te ’Ēkālesia, […] ’o te pa’epa’e ïa i reira tātou e patu ai i te mau ’utuāfare mure ’ore ».¹¹

’A paraparau ai au i te hō’ē hoa e fa’aruru nei i te fifi i roto i tōna orara’a, ’ua ani atu vau e aha tōna huru i te pae nō te moni. Ma te roimata, pāhono mai ra ’oia ē, tē tauturu nei tōna ’episekōpo iāna nā roto i te moni ha’apaera’a mā’a. ’Ua nā ’ō fa’ahou mai nei ’oia, « ’aita vau i ’ite i hea ra mātou i teie mahana, ’āhiri ’aita te ’Ēkālesia ». Pāhono atu ra vau, « Te ’Ēkālesia ’o te mau melo ïa. ’O rātou tē hōro’a nei ma te ’ā’au tae ’e te ’oao’a i te mau ō ha’apaera’a mā’a, nō te tauturu i te feiā i rotopū ia tātou tei roto i te hepohepo. Tē fāri’i nei ’outou i te mau hotu o tō rātou fa’aro’o ’e tō rātou onoono ’ia pe’e ia Iesu Mesia.

Tō’u mau hoa pipi nā te Mesia, ’eiaha na tātou e ha’afaufa’a ’ore i te ’ohipa ’ūmerehia tā te Fatu e fa’atupu nei nā roto ia tātou, tāna ’Ēkālesia, noa atu tō tātou mau hapehape. I te tahi taime e feiā hōro’a tātou ’e i te tahi atu taime e feiā fāri’i tātou, ’ua riro rā tātou pā’ātoa ’ei ’utuāfare hō’ē i roto i te Mesia. Tāna ’Ēkālesia ’o te fa’aterera’a ïa, tāna i hōro’a mai nō te arata’i ’e nō te ha’amaita’i ia tātou, ’ia ha’amori ana’e tātou iāna ’e ’ia tāvini ana’e tātou i te tahi ’e te tahi.

’Ua tātarahapa mai te tahi mau tuahine i mua iā’u, i te mana’ora’a ē e ’ere rātou i te melo itoito i roto i te Sōtaiete Tauturu, nō te mea tē tāvini nei rātou i roto i te Paraimere ’aore rā i te Feiā ’Āpī Tamāhine. Tei roto teie mau tuahine i te mau melo itoito roa a’e nō te Sōtaiete Tauturu, nō te mea tē tauturu nei rātou i tā tātou mau tamari’i ’e i te feiā ’āpī tao’a rahi i te ha’apūaira’a i tō rātou fa’aro’o ia Iesu Mesia.

’Aita te Sōtaiete Tauturu i tā’oti’ahia i te hō’ē piha i roto i te hō’ē ti’ahapa, i te hō’ē ha’api’ira’a i te sābati, i te hō’ē ’ātivite, ’aore rā i te hō’ē peresidenira’a i roto i te fenua iho ’aore rā i te peresidenira’a rahi. Te Sōtaiete Tauturu ’o te mau vahine ïa nō te fafaura’a o te ’Ēkālesia ; ’o tātou ïa—tātou tāta’itahi ’e ’o tātou pā’āto’a. ’O tā tātou « ’āmuira’a nā te ao nei nō te aroha ’e nō te tāvinira’a ».¹² Nā te vāhi ato’a ’e i te mau vāhi ato’a e haerehia e tātou, e riro noa tātou ’ei tuha’a nō te Sōtaiete Tauturu, ’a fa’aitoito ai tātou i te fa’atupu i tāna fā hanahana, ’oia ho’i, ’ia rave fa’aoti te mau vahine i te ’ohipa a te Atua ma te ta’ata hō’ē ’e ma te ’āmui¹³ i te hōro’ara’a i te tauturu : « te tauturura’a i tei veve, te tauturura’a i tei ma’i ; te tauturura’a i tei fea’a, te tauturura’a i tei ’ite ’ore—te tauturura’a i te mau mea atoa e ha’amarirau nei i te […] ’oa’oa ’e te haerera’a i mua ».¹⁴

Tē vai ato’a nei te reira huru melora’a i roto i te mau pupu peresibutero ’e i te fa’anahora’a o te ’Ēkālesia, nō te mau fāito matahiti ato’a, ’oia ato’a tā tātou mau tamari’i ’e te feiā ’āpī. ’Ua hau atu te ’Ēkālesia i te mau fare purera’a ’e i te fa’aterera’a nō te ha’apa’ora’a fa’aro’o ; te ’Ēkālesia, ’o tātou ïa, te mau melo. ’O tātou Te ’Ēkālesia a Iesu Mesia i te Feiā Mo’a i te mau Mahana Hope’a nei, ’o te Mesia te upo’o ’e te peropheta ’ei ’auvaha nōna. ’Ua parau mai te Fatu ē :

« Inaha, ’o teie tā’u nei mau ha’api’ira’a tumu—’o rātou ato’a ’o tē tātarahapa ’e ’o tē haere mai iā’u nei, ’o rātou ïa tā’u nei ’ēkālesia […]

’E i teienei, […] ’o ’oia nō tā’u nei ’ēkālesia, ’e ’o tē vai pāpū noa i roto i tā’u nei ’ēkālesia ē tae noa atu i te hope’a ra, ’o ’oia ïa tā’u e fa’atumu i ni’a i tā’u nei papa ».¹⁵

Te mau tuahine ’e te mau taea’e, e mata na tātou ’ia ’ite ē, e ha’amaita’ira’a mau te rirora’a ’ei melo nō te ’Ēkālesia a Iesu Mesia, i reira tātou e tāhō’ē ai i tō tātou fa’aro’o, te ’ā’au, te pūai, te mana’o ’e te rima nō te fa’atupu i tāna mau temeio pūai rahi. « E ’ere ho’i te tino [nō te ’Ēkālesia a te Mesia] nei i te melo hō’ē, e rave rahi rā ».¹⁶

’Ua parau te hō’ē feiā ’āpī tamāroa i tōna metua vahine, « i tō’u na’ina’ira’a, i te mau taime ato’a e hōro’a vau hō’ē tara marite nō te tuha’a ’ahuru, tē mana’o nei au ē nā roto i teie hō’ē tara marite e oti te hō’ē fare purera’a tā’āto’a i te patuhia. E ’ere ānei i te mea ma’ama’a ? »

’Ua putapū ’oia ’ua pāhono atu, « e mea fa’ahiahia roa ! Tē ’ite ra ’oe te reira i roto i tō ’oe ferurira’a ? »

’Ua parau ’oia, « ’Ē !». « E mea nehenehe roa rātou ’e e rave rahi mirioni ! ¹⁷

E au mau hoa here, ’ei fa’aro’o tō tātou mai tō te hō’ē tamari’i ’e ’ia ’oa’oa i te ’itera’a ē, noa atu te iti o tā tātou mau tauto’ora’a e fa’atupu te reira i te ta’a-’ē-ra’a rahi i roto i te bāsileia o te Atua.

Tā tātou fā i roto i tōna bāsileia e ti’a ’ia riro te ’āfa’ira’a mai i te tahi ’e te tahi i te Mesia ra. Mai tā tātou e tai’o nei i roto i te mau pāpa’ira’a mo’a, ’ua hōro’a te Fa’aora i teie anira’a i tō te ’āti Nephi :

« Tē vai ra ānei te feiā ma’i i rotopū ia ’outou ? ’A hopoi mai ia rātou i’ō nei. « E feiā ro’ohia ānei i te tahi atu mau huru ’ati ? ’A hōpoi mai ia rātou i’ō nei, ’e e fa’aora vau ia rātou, e aroha ho’i tō’u ia ’outou na ; ’ua ’ī ho’i tō’u ’ā’au i te aroha.

« … Tē ’ite nei ho’i au ē, ’ua nava’i tō ’outou fa’aro’o ’ia fa’aora vau ia ’outou ».¹⁸

’Aita ānei tō tātou pā’āto’a e mau ’ati ’o te au ’ia hōpoihia i te pae ’āvae o te Fa’aora ? ’A fa’aruru ai te tahi pae o tātou i te mau tamatara’a pae tino nei, e rave rahi atu e aro nei i te pae o te ’āehuehura’a, vetahi tē fifi nei i te pae tū’atira’a tōtiare, ’e te ’imi nei tātou pā’āto’a i te hau ’ia tāmata-ana’e-hia tō tātou vairua. Tē ro’ohia nei tātou pā’āto’a i te mau ’ati nā roto te mau huru ato’a.

Tē tai’o nei tātou, « ’haere mai ra te mau ta’ata ato’a, ma te ’ā’au hō’ē, i te hōpoira’a mai i tō rātou feiā ma’i […] ’e te mau ta’ata ato’a i ro’ohia i te mau huru ’ati ato’a ; ’e te feiā i fa’aorahia ’e te mau ta’ata e rave rahi ’a hōpoihia mai ai rātou iāna ra ».

« ’E ’ua nā reira rātou pā’āto’a, ’e te feiā tino maita’i, i te pi’ora’a ia rātou iho i raro i tōna pae ’āvae, ’e ’ua ha’amori atu ra iāna ».¹⁹

Mai te hō’ē tamaiti iti tei ’aufau i te tuha’a ’ahuru ma te fa’aro’o, te hō’ē metua vahine ’ōtahi e hina’aro nei i te aroha hōro’a o te Fatu, te hō’ē metua tāne e tauto’o nei nō te aupuru i tōna ’utuāfare, i tō tātou mau tupuna e hina’aro nei i te mau ’ōro’a nō te fa’aorara’a ’e te fa’ateiteira’a, ia tātou tāta’itahi ’o tē fa’a’āpī nei i te mau fafaura’a ’e te Atua i te mau hepetoma ato’a, tē hinaaro nei tātou i te tahi ’e te tahi, ’e e nehenehe tātou e ’āfa’i i te tahi ’e te tahi i te fa’aorara’a ora a te Fa’aora.

E au mau tuahine ’e mau taea’e here ē, e pe’e ana’e i te anira’a a Iesu Mesia ’ia hōro’a ia tātou iho ’e i tō tātou mau ’ati iāna ra. ’Ia haere ana’e tātou iāna ra ’e ’ia ’āfa’i atu tātou i te feiā tā tātou i here iāna ra, e ’ite ’oia i tō tātou fa’aro’o. E fa’aora ’oia ia rātou ’e e fa’aora ’oia ia tātou.

’Ei « mau ta’ata pe’e i te Mesia ma te hau »,²⁰ tē tūtave nei tātou ’ia riro ’ei « hō’ē ā tō rātou ’ā’au ’e [’ia] hō’ē ā tō rātou ferurira’a »²¹ ’e ’ia riro ’ei ta’ata ha’eha’a ; te auraro ; te marū ; ’ōhie ’ia tāparu atu ; tei ’ī i te fa’a’oroma’i ’e te hitahita ’ore ; te au maita’i i te mau mea ato’a ; te itoito i te ha’apa’ora’a i te mau fa’auera’a a te Atua i te mau taime ato’a ; tei ’ī i te fa’aro’o, te ti’aturi, ’e te here, ’e i reira e rahi ai te mau ’ohipa maita’i ».²² Tē tūtava nei tātou ’ia riro mai ia Iesu Mesia ra.

Tē fa’a’ite papū nei au ē, ’ei ’Ēkālesia nā te Mesia, ’e mai tā te peresideni Russell M. Nelson i ha’api’i, ’o tātou te mau rāve’a « e rave [ai] tō tātou Fa’aora ’e te Tāra’ehara, ’o Iesu Mesia, i tāna mau ’ohipa rahi roa a’e mai teienei [atu] ē [tae atu i] te taime e ho’i fa’ahou mai ai ’oia ».²³

’Ua parau te Fatu ē :

« Inaha, e rave ’oi’oi au i tā’u ’ohipa i te tau mau nō te reira ».

« ’E tē hōro’a atu nei au ia ’outou … te fa’auera’a ’ia ha’aputuputu ’āmui mai ’outou ia ’outou iho, ’e ’ia fa’anahonaho ia ’outou iho, ’e ’ia fa’aineine ia ’outou iho, ’e ’ia ha’amo’a ia ’outou iho ; ’oia ïa, ’ia tāmā i tō ’outou ’ā’au, ’e ’ia horoi tāmā ho’i i tō ’outou mau rima ’e tō ’outou mau ’āvae i mua iā’u nei, ’ia ti’a iā’u nei ’ia tāmā atu ia ’outou na ».²⁴

’A pāhono ana’e i teie anira’a a te Atua, ma te ’ī i te ’oa’oa, nō te ha’aputuputu ’āmui, te fa’anahonaho, te fa’aineine ’e te ha’amo’a ia tātou iho, ’o tā’u ïa pure ha’eha’a, i te i’oa o Iesu Mesia ra, ’āmene.