Te mana o te haerera’a i mua i te pae vārua

E tō’u mau taea’e ’e te mau tuahine ē, tē here nei au ia ’outou. Tē māuruuru nei au nō teie taime ’ia paraparau atu ia ’outou i teie mahana. Tē pure nei au i te mau mahana ato’a ’ia pāruruhia ’outou i te ’arora’a ’ū’ana a te ’enemi ’e ’ia roa’a ia ’outou te pūai ’ia pāto’i atu i te mau tāmatara’a tā ’outou e fa’aruru nei.

Te tahi mau tāmatara’a e mau hōpoi’a tumu ïa nā te ta’ata iho, ’aita e ti’a i te tahi atu ta’ata ’ia ’ite. E ’itehia te tahi atu mau tāmatara’a nā te ao nei. Te tāma’i i Europa hiti’a o te rā te tahi ïa o te reira mau tāmatara’a. ’Ua haere au i Ukaraina ’e i Rutia e rave rahi taime. ’Ua here au i te reira mau fenua, ’e tō rātou reo. Tē ’oto nei au ’e tē pure nei au nō te mau ta’ata ato’a e fa’aruru nei i teie pe’ape’a. ’Ei ’Ēkālesia, tē ’imi nei mātou i te mau rāve’a ato’a nō te tauturu i te mau ta’ata e māuiui nei ’e ’o tē ’aro nei ’ia ora rātou. Tē ani nei mātou i te mau ta’ata ato’a ’ia tāmau noa i te ha’apae i te mā’a ’e ’ia pure nō te mau ta’ata ato’a e pēpē nei nā roto i teie ’ati rahi. ’Ua riro te mau huru tāma’i ato’a ’ei ’ōfatira’a ri’ari’a i te mau mea ato’a tā te Fatu ’o Iesu Mesia e riro nei ’e e ha’api’i nei.

’Aita hō’ē o tātou e nehenehe e ha’avī i te mau nūna’a, ’aore rā i te mau ’ohipa a vetahi ’ē, ’aore rā tae noa atu i te mau melo o tō tātou iho ’utuāfare. Terā rā, e nehenehe tātou e ha’avī ia tātou iho. Tā’u pi’ira’a i teie mahana, e te mau taea’e ’e te mau tuahine here, ’ia fa’a’ore i te mau pe’ape’a e ’ū’ana nei i roto i tō ’outou ’ā’au, tō ’outou fare, ’e tō ’outou orara’a. ’A tanu i te mau hina’aro ato’a ’ia ha’apēpē ia vetahi ’ē—e mau hina’aro ānei nō te huru ta’ata, nō te arero fa’a’ino ’aore rā nō te ’ino’ino i te hō’ē ta’ata tei ha’apēpē ia ’outou. ’Ua fa’aue mai te Fa’aora ia tātou ’ia hōro’a atu i te tahi pāpāri’a,¹ ’ia here i tō tātou mau ’enemi, ’e ’ia pure nō te feiā e hāmani ’ino mai ia tātou.²

E nehenehe e riro ’ei ’ohipa ’oto rahi ’e te fifi ’ia fa’aru’e i te hō’ē riri, tei riro ho’i mai te mea ra e mea ti’a. E riro te fa’a’orera’a i te hapa a te feiā hāmani ’ino i te feiā hara ’ore, ’ei mea fifi roa. Noa atu rā i te reira, ’ua a’o mai te Fa’aora ia tātou ’ia « fa’a’ore i te hapa a te mau ta’ata ato’a ».³

E mau pipi tātou nō te Ari’i o te hau. I teienei, hau atu i mūta’a iho ra, e hina’aro tātou i te hau tāna ana’e e nehenehe e hōro’a mai. Nāhea e ti’a ai ia tātou ’ia tītau ’ia vai te hau i te ao nei, ’aita ho’i tātou iho e ’imi nei i te hau ’e te au māite ? Te mau taea’e ’e te mau tuahine, ’ua ’ite au ē, e ’ere i te mea ’ōhie te mea tā’u e parau nei. Terā rā, e ti’a i te mau pipi a Iesu Mesia ’ia fa’a’ite i tō te ao ato’a nei i te hi’ora’a ’ia pe’e. Tē tāparu nei au ia ’outou ’ia ’imi i te mau rāve’a ato’a ’ia fa’a’ore i tō ’outou iho mau pe’ape’a e ’ū’ana nei i roto i tō ’outou ’ā’au ’e tō ’outou orara’a.

Tē hina’aro nei au e ha’apāpū atu i teie pi’ira’a ’ohipa nā roto i te paraparaura’a i te hō’ē ha’api’ira’a tei puta mai i roto i tō’u ferurira’a, ’a māta’ita’i ai au i te hō’ē ha’utira’a tāorara’a pōpō i roto i te ’ete.

I roto i teie ha’utira’a, ’ua riro te tuha’a mātāmua ’ei ’arora’a mai te tara ’e’e te huru, i muri i mua. ’E, i roto i nā tetoni hope’a e pae o te tuha’a mātāmua, ’ua ti’a i te hō’ē ta’ata ha’uti nō muri nō te hō’ē pupu, ’ia fa’aō i te hō’ē pānie nehenehe roa e toru tai’o. E i roto i te tetoni hope’a, ’ua haru mai tōna hoa ha’uti i te hō’ē pōpō e ha’amata ra i te ō ’e ’ua fa’aō fa’ahou i te hō’ē pānie i roto i te tetoni hope’a. Nō reira, ’ua ho’i taua pupu ra i roto i te piha tauira’a ’ahu, e maha tai’o hau, ’e ma te mana’o pūai ’ia haere i mua. ’Ua ti’a ia rātou ’ia tāpe’a noa i te reira haerera’a i mua i roto i te tuha’a piti ’e ’ua upo’oti’a rātou.

Te haerera’a i mua e fa’aotira’a pūai ïa. ’Ua ’ite pā’āto’a tātou i te reira i roto i te mau huru e rave rahi—’ei hi’ora’a, i roto i te hō’ē pere’o’o e ha’amata ra i te tere pūai ’aore rā te hō’ē ’aimārōra’a tei riro ’oi’oi roa ’ei tātāma’ira’a.

Nō reira tē ui nei au, « e aha te mea e fa’a’ama i te haerera’a i mua i te pae vārua ? ’Ua ’ite tātou i te mau hi’ora’a nō te haerera’a maita’i i mua ’e te haerera’a ’ino i mua. ’Ua ’ite tātou i te mau pipi a Iesu Mesia tei fa’afāriuhia ’e ’ua tupu i te rahi i roto i tō rātou fa’aro’o. ’Ua ’ite ato’a rā tātou i te mau ta’ata fa’afāriuhia i mūta’a ra tei hi’a. E nehenehe te haerera’a i mua e taui fa’a’arori te tahi pae ’e te tahi pae.

’Aita ā tātou i hina’aro a’e nei i te haerera’a maita’i i mua i te pae vārua, hau atu i tō tātou hina’aro i te reira i teie mahana, nō te pāto’i i te tupura’a vitiviti rahi o te ’ino ’e te mau tāpa’o pōuri o te mau tau e pūai rahi nei. Nā te haerera’a maita’i i mua i te pae vārua e fa’ahaere ia tātou i mua i rōpū i te mata’u ’e te pāpū ’ore tei fa’atupuhia e te mau ma’i pe’e, te miti fa’a’ī, te mau pa’a’inara’a mou’a auahi, ’e te mau ’arora’a ’e te mauha’a. E nehenehe te haerera’a i mua i te pae vārua e tauturu ia tātou ’ia pāto’i i te mau ’arora’a ’ū’ana ’e te ’ino a te ’enemi ’e e pāto’i ho’i i tāna mau tauto’ora’a nō te fa’a’ino i tō tātou iho niu pae vārua.

E rave rahi mau ’ohipa e nehenehe e fa’a’ama i te haerera’a maita’i i mua i te pae vārua. Te ha’apa’ora’a, te here, te ha’eha’a, te tāvinira’a ’e te ’ā’au mehara⁴ tē tahi ri’i noa te reira.

I teie mahana, tē hina’aro nei au e hōro’a atu e pae ’ohipa pāpū tā tātou e nehenehe e rave nō te tauturu ia tātou ’ia tāpe’a noa i te haerera’a maita’i i mua i te pae vārua.

’A tahi : ’A ti’a i ni’a i te ’ē’a nō te fafaura’a ’e ’a fa’aea noa i reira.

’Aita i maoro a’enei, ’ua fāri’i au i te hō’ē moemoeā māramarama maita’i, tē fārerei ra vau i te hō’ē pupu ta’ata rahi. ’Ua uiui mai rātou iā’u e rave rahi uira’a, ’e te uira’a pinepine, nō ni’a ïa i te ’ē’a o te fafaura’a ’e nō te aha e mea faufa’a roa te reira.

I roto i tō’u moemoeā, ’ua fa’ata’a atu vau ē, e tomo tātou i ni’a i te ’ē’a o te fafaura’a nā roto i te fāri’ira’a i te bāpetizora’a ’e te ravera’a i tā tātou fafaura’a mātāmua ’e te Atua.⁵ I te mau taime ato’a e rave tātou i te ’ōro’a mo’a, tē fafau fa’ahou ra ïa tātou e rave i te i’oa o te Fa’aora i ni’a ia tātou, e ha’amana’o iāna, ’e e ha’apa’o i tāna mau fa’auera’a.⁶ ’Ei fa’aho’ira’a, e ha’apāpū mai te Atua ia tātou ē, e vai noa te Vārua o te Fatu i roto ia tātou.

I muri a’e, e rave tātou i te tahi atu ā mau fafaura’a i roto i te hiero, i reira ho’i tātou e fāri’i ai i te mau parau fafau rahi atu ā. E hōro’a mai te mau ’ōro’a ’e te mau fafaura’a ia tātou i te ti’ara’a ’ia fāri’i i te mana atua. Te ’ē’a nō te fafaura’a o te ’ē’a hō’ē roa ïa e tae atu ai i te fa’ateiteira’a ’e te ora mure.

I roto i tā’u moemoeā ’ua u’i mai ra te hō’ē vahine nāhea te hō’ē ta’ata tei ’ōfati i tāna mau fafaura’a e nehenehe ai e ho’i fa’ahou mai i ni’a i te reira ’ē’a. E arata’i tā’u pāhonora’a i tāna uira’a i te piti o tō’u mana’o :

’A ’ite mai i te ’oa’oa o te tātarahapa i te mau mahana ato’a.

E aha te faufa’a o te tātarahapa ? ’Ua ha’api’i Alama ē, ’eiaha tātou « e a’o i te hō’ē mea, maori rā te tātarahapa ’e te fa’aro’o i te Fatu ».⁷ E tītauhia te tātarahapa i te mau ta’ata mana’o pa’ari ato’a e hina’aro ra i te hanahana mure ’ore.⁸ ’Aita hō’ē ta’a-’ē-ra’a. I roto i te hō’ē heheura’a i te peropheta Iosepha Semita, ’ua fa’ahapa te Fatu i te feiā fa’atere mātāmua o te ’Ēkālesia nō te ’orera’a e ha’api’i i te ’evanelia i tā rātou mau tamari’i.⁹ Te tātarahapara’a ’o te tāviri ïa nō te haerera’a i mua. Nā te fa’aro’o mau e tāpe’a noa ia tātou ’ia haere nā ni’a i te ’ē’a nō te fafaura’a.

’Eiaha nā e mata’u ’aore rā e fa’atāere i te tātarahapara’a. E ’oa’oa Sātane i tō ’outou ’ati. ’A ha’apoto noa. ’A ti’avaru i tāna fa’aurura’a i rāpae’au i tō ’outou orara’a. ’A ha’amata i teie mahana ’ia ’ite i te ’oa’oa o te ti’avarura’a i te ta’ata tino.¹⁰ Tē here tāmau nei te Fa’aora ia tātou ’ia tātarahapa ana’e iho ā rā tātou. ’Ua fafau mai ’oia ē, noa atu « e ta’a ’ē ho’i te mau mou’a, e huritumuhia ho’i te mau ’āivi … e ’ore rā tā’u hāmani maita’i ia ’oe e ta’a ’ē ».¹¹

Mai te mea tē mana’o ra ’outou ē, ’ua ātea roa ’outou ’aore rā ’ua maoro roa ’outou i rāpae i te ’ē’a nō te fafaura’a ’e ’aita e rāve’a nō te ho’i mai, e ’ere roa atu ïa i te parau mau.¹² ’A fārerei atu i tō ’outou ’episekōpo ’aore rā te peresideni ’āma’a. ’O ’oia te ti’a o te Fatu ’e e tauturu ’oia ia ’outou ’ia ’ite i te ’oa’oa ’e te tāmarūra’a o te tātarahapa.

Te hō’ē parau fa’aarara’a i teienei : Te ho’ira’a i ni’a i te ’ē’a nō te fafaura’a, tōna aura’a, e ’ere ïa ē, e ’ōhie te orara’a. E mea ’eta’eta teie ’ē’a ’e i te tahi taime mai te huru ra ē, e mea pāteitei ri’i ’ia pa’i’uma.¹³ Terā rā, ’ua fa’ata’ahia teie pa’i’umara’a nō te tāmata ’e nō te ha’api’i ia tātou, nō te ha’amaita’i i tō tātou huru, ’e nō te tauturu ia tātou ’ia riro mai ’ei feiā mo’a. ’O te reira ana’e te ’ē’a e tae atu ai i te fa’ateiteira’a. ’Ua fa’ata’a te hō’ē peropheta¹⁴ i « te huru ha’amaita’ihia ’e te ’oa’oa o te feiā e ha’apa’o i te mau fa’auera’a a te Atua. Inaha ho’i, ’ua ha’amaita’ihia rātou i roto i te mau mea ato’a, i te pae tino ’e te pae vārua ato’a ho’i ; ’e mai te mea e ha’apa’o maita’i noa rātou ē tae noa atu i te hope’a ra, e fāri’ihia ïa rātou i te ao ra, ’e e pārahi rātou i pīha’i iho i te Atua i roto i te ’oa’oa hope ’ore ra ».¹⁵

Te haerera’a nā ni’a i te ’ē’a nō te fafaura’a, ’āpitihia i te tātarahapa i te mau mahana ato’a, nā te reira e fa’a’amu i te haerera’a maita’i i mua i te pae vārua.

Te toru o tō’u mana’o : ’Ia ’ite hau atu nō ni’a i te Atua ’e e mea nāhea ’oia ’ia rave i te ’ohipa.

Hō’ē o tā tātou mau tāmatara’a rahi a’e i teie mahana ’o te fa’ata’ara’a ïa i te mau parau mau a te Atua ’e te mau fa’ahuru-’ē-ra’a a Sātane. Nō reira te Fatu i fa’aara mai ai ia tātou ’ia « pure noa i te mau taime ato’a […] ’ia upo’oti’a ’oe nā ni’a a’e ia Sātani, ’e […] ’ia ora atu ’oe i te rima o te mau tāvini o Sātani ’o tē fa’ati’a i tāna ra ’ohipa ».¹⁶

’Ua hōro’a mai Mose i te hō’ē hi’ora’a nō te ha’api’i ’ia ’ite i rotopū i te Atua ’e ’ia Sātane. I tō Sātane haerera’a e fa’ahema ia Mose, ’ite a’era ’oia i te ha’avarera’a nō te mea, nō fārerei noa atu ra ’oia i te Atua, mata ’e mata. ’Ite ’oi’oi a’era Mose ’o vai ’o Sātane ’e ’ua fa’aue atu ra iāna ’ia haere ’ē.¹⁷ ’A onoono ai Sātane, ’ua ’ite a’era Mose nāhea ’ia ti’aoro i te tauturu rahi a te Atua. ’Ua fāri’i Mose i te pūai nō te ra’i mai ’e ’ua pāto’i fa’ahou i te ’ino ma te parau ē, « ’a haere ’ē atu iā’u nei, e Sātane, ’o teie Atua hō’ē roa ra tā’u e ha’amori, ’oia ’o te Atua hanahana ».¹⁸

’Ia pe’e tātou i te reira hi’ora’a e ti’a ai. ’A ti’avaru i te fa’aurura’a a Sātane i rāpae i tō ’outou orara’a ! ’Eiaha e pe’e iāna i roto i tōna « abuso, ’a mamae ai i te ’oto mure ’ore ra ».¹⁹

E nehenehe te hō’ē ’itera’a pāpū ’aita e fa’a’amuhia i te mau mahana ato’a « i te parau maita’i a te Atua ra »²⁰ e farara i raro ma te vitiviti rahi ri’ari’a. Nō reira, e mea māramarama roa te rā’au nō te fa’a’ore i te fa’anahora’a a Sātane : E hina’aro tātou i te mau mahana ato’a i te mau ’itera’a rau nō te ha’amori i te Fatu ’e nō te tuatāpapa i tāna ’evanelia. Tē tāparu nei au ia ’outou ’ia vaiiho i te Atua ’ia upo’oti’a i roto i tō ’outou orara’a. ’A hōro’a iāna i te hō’ē tuha’a ti’a o tō ’outou taime. Mai te mea e nā reira ’outou, ’a hi’o i te ’ohipa e tupu i ni’a i tō ’outou haerera’a maita’i i mua i te pae vārua.

Te maha o te mana’o : ’A ’imi ’e ’a tīa’i i te mau temeio.

’Ua ha’apāpū mai Moroni ia tātou ē, « tē vai noa ra te Atua ’ei Atua e rave i te temeio ».²¹ Tē fa’a’ite nei te mau buka pāpa’ira’a mo’a ato’a i te hina’aro rahi o te Fatu ’ia tomo mai i roto i te orara’a o te feiā e ti’aturi iāna.²² ’Ua fa’ata’a ’ē ’oia i te miti ’ute’ute nō Mose, ’ua tauturu ia Nephi ’ia rave mai i te mau ’api veo, ’e ’ua fa’aho’i fa’ahou mai i tāna ’Ēkālesia nā roto i te peropheta Iosepha Semita. ’Ua tītau teie mau temeio tāta’itahi i te taime, ’e e ’ere paha te reira roa tā teie mau ta’ata i ani i te Fatu i te ha’amatara’a.

I taua taime ato’a ra, e ha’amaita’i te Fatu ia ’outou i te temeio tā ’outou e tītau mai te mea e ti’aturi ’outou iāna, « ’aore e fē’a’a e hō’ē iti noa a’e ».²³ ’A rave i te ’ohipa pae vārua nō te ’imi i te mau temeio. ’A ani i te Atua nā roto i te pure ’ia tauturu mai ia ’outou ’ia fa’a’ohipa i te reira huru fa’aro’o. Tē fafau atu nei au ia ’outou ē, e nehenehe ’outou iho e ’ite ē, « tē hōro’a nei ’oia i te itoito nō te matapōuri ; ’e tē fa’arahi nei ’oia i te ’eta’eta nō tei paruparu ra ».²⁴ E mea iti roa te mau mea e ha’ape’epe’e i tō ’outou haerera’a i mua i te pae vārua hau atu i te ’itera’a ē, tē tauturu nei te Fatu ia ’outou ’ia tūra’i i te hō’ē mou’a i roto i tō ’outou orara’a.

Te pae o te mana’o : ’A fa’a’ore i te tama’i i roto i tō ’outou iho orara’a.

Tē fa’ahiti fa’ahou nei au i tā’u pi’ira’a ’ia fa’a’ore i te mau tāma’i i roto i ’outou orara’a. ’A fa’a’ohipa i te ha’eha’a, te itoito, ’e te pūai e tītauhia nō te fa’a’ore i te hapa ’e nō te ani ’ia fa’a’orehia te hapa. ’Ua fafau mai te Fa’aora ē, « ’ia fa’a’ore ho’i [tātou] i tā vetahi ’ē ra hapa, e fa’a’ore ato’a mai tō [tātou] Metua i te ao ra i tā [tātou] ».²⁵

E piti hepetoma i muri nei, e fa’ahanahana tātou i te Pāsa. Mai teie atu taime, tē ani manihini atu nei au ia ’outou ’ia fa’a’ore i te hō’ē tāma’i ’o tē fa’ateimaha nei ia ’outou. Tē vai ra ānei te hō’ē ’ohipa ’ā’au mēhara tano maita’i roa a’e nō Iesu Mesia nō tōna tāra’ehara ? Mai te mea e’ita e haere te fa’a’orera’a hapa i teie taime, ’a tāparu i te mana nā roto i te toto tāra’ehara o Iesu Mesia nō te tauturu ia ’outou. ’A nā reira ai ’outou, tē fafau atu nei au i te hau nō te ta’ata hō’ē ’e te haerera’a i mua i te pae vārua.

’A fa’atusia ai te Fa’aora nō te mau ta’ata ato’a, ’ua ’īriti ’oia i te hō’ē haere’a e ti’a i te feiā e pe’e iāna ’ia fāri’i i tōna mana fa’aorara’a, tōna mana ha’apūai ’e tōna mana tāra’ehara. E roa’a teie mau maita’i pae vārua i te mau ta’ata ato’a e ’imi ’ia fa’aro’o iāna ’e ’ia pe’e iāna.

E au mau taea’e ’e e au mau tuahine here, ma te tāparura’a ato’a o tō’u ’ā’au, tē fa’aitoito atu nei au ia ’outou ’ia haere i ni’a i te ’ē’a nō te fafaura’a ’e ’ia fa’aea noa i reira. ’A ora i te ’oa’oa o te tātarahapara’a i te mau mahana ato’a. ’A ha’api’i mai nō ni’a i te Atua ’e e mea nāhea ’oia ’ia ’ohipa ’A ’imi ’e ’a tīa’i i te mau temeio. ’A rohi nō te fa’a’ore i te mau tāma’ira’a i roto i tō ’outou orara’a.

Mai te mea e ’ohipa ’outou i ni’a i teie mau peu, tē fafau atu nei au ia ’outou i te ’aravihi ’ia haere i mua i ni’a i te ’ē’a o te fafaura’a, ma te haerera’a i mua tāmau noa, noa atu te mau fifi tā ’outou e fa’aruru. ’E tē fafau atu nei au ia ’outou i te pūai rahi a’e nō te pāto’i i te fa’ahemara’a, te hau rahi a’e o te ferurira’a ’e te mata’u ’ore, ’e te tāhō’ēra’a rahi a’e i roto i tō ’outou ’utuāfare.

Tē ora nei te Atua ! ’O Iesu te Mesia ! Tē ora nei ’oia ! ’Ua here ’oia ia tātou ’e e tauturu ’oia ia tātou. Tē fa’a’ite pāpū nei au i te reira nā roto i te i’oa mo’a o tō tātou Fatu ’e Fa’aora ’o Iesu Mesia, ’āmene.