« ជំពូកទី ៣ ៖ ការអញ្ជើញឲ្យទទួលពិធីបុណ្យជ្រមុជទឹក និងពិធីបញ្ជាក់ » ប្រកាសដំណឹងល្អរបស់យើង ៖ មគ្គុទេសន៍ចែកចាយដំណឹងល្អនៃព្រះយេស៊ូវគ្រីស្ទ ( ឆ្នាំ ២០២៣ )
« ការអញ្ជើញឲ្យទទួលពិធីបុណ្យជ្រមុជទឹក និងពិធីបញ្ជាក់ » ប្រកាសដំណឹងល្អរបស់យើង
ជំពូកទី ៣
ការអញ្ជើញឲ្យទទួលពិធីបុណ្យជ្រមុជទឹក និងពិធីបញ្ជាក់
មូលដ្ឋានគ្រឹះនៃគោលលទ្ធិ
យើងទាំងអស់គ្នាគឺជាបុត្រាបុត្រីរបស់ព្រះវរបិតាសួគ៌ ។ យើងមកកាន់ផែនដីនេះ ដើម្បីមានឱកាសរៀនសូត្រ រីកចម្រើន ហើយប្រែក្លាយកាន់តែដូចជាទ្រង់ ដើម្បីយើងអាចត្រឡប់ទៅវត្តមានរបស់ទ្រង់វិញ ( សូមមើល ម៉ូសេ ១:៣៩ ) ។ យើងមិនអាចប្រែក្លាយដូចជាទ្រង់ ឬត្រឡប់ទៅរកទ្រង់វិញ ដោយគ្មានជំនួយដ៍ទេវភាពបានឡើយ ។ ព្រះវបិតាសួគ៌របស់យើងបានចាត់ព្រះរាជបុត្រារបស់ទ្រង់គឺព្រះយេស៊ូវគ្រីស្ទ ដើម្បីធ្វើឲ្យធួនសម្រាប់យើង ហើយផ្ដាច់ចំណងនៃសេចក្ដីស្លាប់ ( សូមមើល នីហ្វៃទី៣ ២៧:១៣–២២ ) ។
យើងទទួលបានព្រះចេស្ដាប្រោសលោះរបស់ព្រះគ្រីស្ទតាមរយៈការអនុវត្តសេចក្ដីជំនឿទៅលើទ្រង់ដើម្បីមានការប្រែចិត្ត ការទទួលពិធីបុណ្យជ្រមុជទឹក ការទទួលបានអំណោយទាននៃព្រះវិញ្ញាណបរិសុទ្ធតាមរយៈការបញ្ជាក់ និងការកាន់ខ្ជាប់ដរាបដល់ចុងបំផុត ។ ការរក្សាសេចក្ដីសញ្ញានៃពិធីបុណ្យជ្រមុជទឹកគឺជាជំហានដំបូងក្នុងការចងភ្ជាប់ខ្លួនយើងទៅនឹងព្រះ ដើម្បីឲ្យព្រះវិញ្ញាណបរិសុទ្ធអាចលាងសម្អាត ពង្រឹង ហើយផ្លាស់ប្ដូរនិស្ស័យរបស់យើងឲ្យកាន់តែប្រសើរឡើង ។ ការដកពិសោធន៍នូវឥទ្ធិពលនៃការញែកចេញឲ្យបរិសុទ្ធនេះត្រូវបានហៅថា ការកើតជាថ្មីខាងវិញ្ញាណ ។ ( សូមមើល នីហ្វៃទី ២ ៣១:៧, ១៣–១៤, ២០–២១, ម៉ូសាយ ៥:១–៧, ១៨, ២៧:២៤, នីហ្វៃទី ៣ ២៧:២០, យ៉ូហាន ៣:៥ ) ។
ការកើតជាថ្មីខាងវិញ្ញាណចាប់ផ្ដើមពេលយើងទទួលពិធីបុណ្យជ្រមុជទឹកដោយទឹក និងដោយព្រះវិញ្ញាណ ។ ពិធីបុណ្យជ្រមុជទឹកគឺជាពិធីបរិសុទ្ធដ៏មានអំណរ និងពោរពេញដោយសេចក្ដីសង្ឃឹម ។ ពេលយើងទទួលពិធីបុណ្យជ្រមុជទឹកដោយចិត្តសង្រេង និងវិញ្ញាណទន់ទាប យើងចាប់ផ្ដើមជីវិតថ្មីដោយមានអំណាចគាំទ្ររបស់ព្រះ ។ បន្ទាប់ពីយើងបានទទួលពិធីបុណ្យជ្រមុជទឹក ហើយបានទទួលពិធីបញ្ជាក់ នោះយើងអាចបន្តទទួលបានការពង្រឹងតាមរយៈការទទួលទានសាក្រាម៉ង់ដោយស័ក្ដិសម ។ ( សូមមើល នីហ្វៃទី ២ ៣១:១៣, ម៉ូសាយ ១៨:៧–១៦, មរ៉ូណៃ ៦:២, គោលលទ្ធិ និង សេចក្តីសញ្ញា ២០:៣៧ ) ។
ការផ្ដល់ការអញ្ជើញ
នៅពេលអ្នកមានអារម្មណ៍ថា បានទទួលការដឹកនាំពីព្រះវិញ្ញាណ សូមអញ្ជើញមនុស្សទូទៅឲ្យទទួលពិធីបុណ្យជ្រមុជទឹក និងពិធីបញ្ជាក់ ។ ការណ៍នេះអាចនឹងកើតឡើងអំឡុងមេរៀនណាមួយ ។
សូមបង្រៀនអំពីគោលលទ្ធិនៃពិធីបុណ្យជ្រមុជទឹក ហើយជួយមនុស្សទូទៅឲ្យយល់ពីគោលលទ្ធិនៃព្រះគ្រីស្ទ ( សូមមើល មេរៀនទី ៣ ) ។ សូមបង្រៀនអំពីសារៈសំខាន់ និងអំណរនៃសេចក្ដីសញ្ញាពិធីបុណ្យជ្រមុជទឹក ការទទួលការផ្ដាច់បាប និងការទទួលអំណោយទាននៃព្រះវិញ្ញាណបរិសុទ្ធតាមរយៈពិធីបញ្ជាក់ ។
សូមរៀបចំមនុស្សសម្រាប់ការអញ្ជើញឲ្យទទួលពិធីបុណ្យជ្រមុជទឹក ដោយប្រាកដថា ពួកគេយល់ពីអ្វីដែលអ្នកបានបង្រៀន និងសេចក្ដីសញ្ញាដែលពួកគេនឹងធ្វើ ។ សេចក្ដីសញ្ញានៃពិធីបុណ្យជ្រមុជទឹកមានដូចតទៅ ៖
-
មានឆន្ទៈលើកដាក់មកលើខ្លួនយើងនូវព្រះនាមរបស់ព្រះយេស៊ូវគ្រីស្ទ ។
-
គោរពព្រះបញ្ញត្តិទាំងឡាយរបស់ព្រះ ។
-
បម្រើព្រះ និងអ្នកដទៃ ។
-
កាន់ខ្ជាប់ដរាបដល់ចុងបំផុត ។ ( សូមមើល មេរៀនទី ៤ ) ។
អ្នកអាចចែកចាយដូចតទៅ ៖
« នៅពេលយើងទទួលពិធីបុណ្យជ្រមុជទឹក នោះយើង‹ ធ្វើជាសាក្សីចំពោះ[ ព្រះ ]ថា [ យើង ] បានចូលទៅក្នុងសេចក្ដីសញ្ញាជាមួយនឹងទ្រង់ ថា [ យើង ] នឹងបម្រើទ្រង់ ហើយគោរពព្រះបញ្ញត្តិទាំងឡាយរបស់ទ្រង់ › ។ នៅពេលយើងធ្វើសេចក្ដីសញ្ញានេះ នោះទ្រង់សន្យាថា ទ្រង់នឹង ‹ ស្រោចព្រះវិញ្ញាណទ្រង់ មកលើ [ យើង ] យ៉ាងបរិបូរណ៍ ? › ( ម៉ូសាយ ១៨:១០ ) » ។
ការអញ្ជើញឲ្យទទួលពិធីបុណ្យជ្រមុជទឹករបស់អ្នកគួរតែមានភាពជាក់លាក់ និងត្រង់ៗ ។ អ្នកអាចនឹងនិយាយ ៖
« តើអ្នកនឹងធ្វើតាមគំរូរបស់ព្រះយេស៊ូវគ្រីស្ទ ដោយការទទួលពិធីទទួលបុណ្យជ្រមុជទឹក ពីបុគ្គលម្នាក់ដែលបានតែងតាំងឲ្យធ្វើពិធីបរិសុទ្ធនេះដែរឬទេ ? ពួកយើងនឹងជួយអ្នករៀបចំខ្លួនទទួលបុណ្យជ្រមុជទឹក ។ ពួកយើងជឿថា អ្នកអាចត្រៀមខ្លួនរួចរាល់នៅ [ កាលបរិច្ឆេទ ] ។ តើអ្នកនឹងរៀបចំខ្លួនទទួលពិធីបុណ្យជ្រមុជទឹកតាមកាលបរិច្ឆេទនោះដែរឬទេ ? »
ពេលអ្នកផ្ដល់ការអញ្ជើញណាមួយ សូមសន្យាពរជ័យដ៏ធំដែលមនុស្សនឹងទទួលបាន ពេលពួកគេទទួលយកការអញ្ជើញឲ្យទទួលពិធីបុណ្យជ្រមុជទឹក និងរក្សាសេចក្ដីសញ្ញាដែលជាប់ទាក់ទងនានា ។ សូមចែកចាយទីបន្ទាល់របស់អ្នកអំពីពរជ័យទាំងនេះ ។
សូមបង្រៀនថា ពិធីបុណ្យជ្រមុជទឹក និងពិធីបញ្ជាក់ពុំមែនជាគោលដៅចុងបញ្ចប់នោះទេ ។ ផ្ទុយទៅវិញ វាគឺជាចំណុចមួយនៅលើផ្លូវនៃការប្រែចិត្តជឿដែលនាំមកនូវសេចក្ដីសង្ឃឹម អំណរ និងព្រះចេស្ដានៃព្រះកាន់តែពេញលេញមកក្នុងជីវិតរបស់បុគ្គលម្នាក់ ( សូមមើល ម៉ូសាយ ២៧:២៥–២៦ ) ។ បន្ទាប់ពីមនុស្សបានទទួលពិធីបុណ្យជ្រមុជទឹក និងពិធីបញ្ជាក់រួច នោះពួកគេអាចទន្ទឹងចាំដល់ការញែកជាបរិសុទ្ធដោយព្រះវិញ្ញាណ នៅពេលពួកគេរីកចម្រើននៅលើផ្លូវនៃសេចក្ដីសញ្ញា ។
ប្រសិនបើអាចធ្វើបាន សូមអញ្ជើញមនុស្សដែលអ្នកកំពុងបង្រៀនឲ្យចូលរួមកម្មវិធីបុណ្យជ្រមុជទឹកមួយ និងការប្រជុំសាក្រាម៉ង់មួយអំឡុងពេលដែលមានមនុស្សម្នាក់បានទទួលពិធីបញ្ជាក់ ។
គំនិតសម្រាប់ការអញ្ជើញឲ្យទទួលពិធីបុណ្យជ្រមុជទឹក
សូមពិចារណាអានដំណើររឿងក្នុងបទគម្ពីរអំពីព្រះយេស៊ូវទទួលពិធីបុណ្យជ្រមុជទឹក ( សូមមើល ម៉ាថាយ ៣:១៣–១៧ ) ។ អ្នកក៏អាចបង្ហាញ វីដេអូព្រះគម្ពីរប៊ីប ដែលពិពណ៌នាអំពីពិធីបុណ្យជ្រមុជទឹករបស់ព្រះអង្គសង្គ្រោះ ឬ វីដេអូព្រះគម្ពីរមរមន អំពីពួកសិស្សរបស់ព្រះអង្គសង្គ្រោះកំពុងជ្រមុជទឹក ។
អ្នកក៏អាចអានដំណើររឿងរបស់នីហ្វៃអំពីពិធីបុណ្យជ្រមុជទឹករបស់ព្រះយេស៊ូវផងដែរ ( សូមមើល នីហ្វៃទី២ ៣១:៤–១២ ) ។ ការអានដំណើររឿងអំពីពិធីបុណ្យជ្រមុជទឹករបស់ព្រះយេស៊ូវគ្រីស្ទអាចពង្រឹង ដល់អ្នកទាំងឡាយដែលទទួលការបង្រៀន ។
ការសិក្សាព្រះគម្ពីរ
សូមសិក្សាបទគម្ពីរខាងក្រោមនេះ ៖
សូមសរសេរសេចក្ដីសង្ខេបមួយអំពីអ្វីដែលអ្នកបានរៀន ។