Blong Holemtaet Strong Oltaem

Papa blong mi i save tingbaot stret dei, iven aoa we famle blong hem—papa, mama, mo fo pikinini—oli aot long Jos, mo plante oli no kambak bakegen long laef ia. Hem i gat 13 yia i stap, i wan dikon, mo long tetaem ia, ol famle oli go long Sandei Skul long moning, mo afta long sakramen miting long aftenun. Long wan naes hot dei, afta we oli kambak long Sandei moning wosip seves, mo oli kakae long dina tugeta, mama blong hem i lukluk papa blong hem mo i askem nomo: “Hey, daling, ?yu ting se yumi go long sakramen miting long aftenun ia o yumi tekem famle i go ronron smol long trak?”

Tingting ia se i gat wan narafala joes bitim sakramen miting, i neva kam long tingting blong papa blong mi, be hem mo ol tri yangfala ia, oli sidaon gud mo oli lisin gud. Ating ronron long trak long Sandei aftenun ia, i bin wan naeswan mo gud famle aktiviti, be smol desisen ia i kam stat blong wan niu daereksen, we long en, i bin lidim famle blong hem longwe long Jos, mo sefti, sekiuriti mo ol blesing, mo oli go long wan narafala rod.

Olsem wan lesen long olgeta long yumi tedei, we oli gat temtesen blong jusum wan defren rod, profet blong Buk blong Momon, Lihae, i serem wan visen wetem famle blong hem, we hem i luk “plante grup blong ol pipol we i had tumas blong kaontem evriwan, plante long olgeta oli bin gohed strong, blong oli save kasem rod ia we i go long tri we hem i bin stanap kolosap long hem.

“Mo … oli bin kam fored, mo stat blong wokbaot long rod ia we i go long tri.

“Mo … wan klaod blong tudak i bin girap, …  we i mekem se olgeta we oli bin stat blong wokbaot long rod, oli bin lusum rod blong olgeta, mekem se oli bin wokbaot longwe aotsaed long rod mo oli bin lus.”¹

Afta, Lihae i bin luk wan seken grup we i stap “gohed strong, mo oli bin kam fored mo oli bin holem en blong rel blong aean; mo oli bin go fored tru long ol klaod blong tudak, oli holem strong long rel blong aean, i go kasem taem we oli bin kam kamaot mo kakae frut blong tri.” Sore tumas, “afta oli bin kakae frut blong tri, oli bin sakem ol ae blong olgeta olbaot, olsem se oli sem” from olgeta we oli stap long “bigfala haos we i gat fulap spes” we oli “stap olsem se oli stap jikim ol man mo poenem ol fingga blong olgeta long olgeta we i bin kam kamaot, mo oli bin stap kakae frut.” Ol pipol ia, afta oli “foldaon i go long ol rod we i no blong folem, mo oli bin lus.”² Oli no bin save, o ating oli no bin wantem blong stap strong kasem en.

Be, i gat wan nambatri grup, we oli bin kasem tri blong laef ia, be afta, oli no bin foldaon. Long saed blong olgeta ia, ol skripja oli talem se oli “bin gohed stret fored, oli stap holemtaet rel blong aean oltaem, kasem taem we oli bin kam kamaot, mo oli bin foldaon, mo oli bin kakae frut blong tri.”³ Rel blong aean i ripresentem, long grup ia, wan sefti mo wan sekiuriti ia nomo we oli save faenem, mo oli bin holemtaet oltaem; oli no wantem lego rel ia iven from wan samting simpol olsem blong ronron long trak long wan Sandei aftenun.

Abaot grup blong pipol ia, Elda Deved A. Bedna i tijim: “Ki toktok long ves ia, hem i ‘holemtaet oltaem’ long rel blong aean. … Ating nambatri grup blong pipol ia oli bin stap ridim mo stadi, mo luklukgud oltaem long ol toktok blong Kraes. … Grup ia nao we yu mo mi i mas traehad blong joenem.”⁴

Olgeta long yumi we yumi ol memba blong Jos blong God tedei, yumi mekem ol kavenan blong folem Jisas Kraes mo blong obei long ol komanmen blong God. Long baptaes, yumi mekem kavenan blong stanap olsem wan witnes blong Sevya,⁵ blong givhan long olgeta we oli no strong mo olgeta long nid,⁶ blong obei long ol komanmen blong God, mo blong sakem sin taem i nid, from se, olsem we Aposol Pol i bin tijim: “evriwan oli mekem nogud finis, mo oli stap afsaed olgeta long ol gudgudfala fasin blong God.”⁷

Evri wik, yumi gat janis blong kam long sakramen miting, mo riniu ol kavenan ia taem yumi tekem bred mo wota blong odinens blong sakramen. Simpol aksen ia i letem yumi komitim yumi bakegen blong folem Jisas Kraes, mo blong sakem sin taem yumi stap aotsaed olgeta. Promes blong God long yumi, hem Spirit blong Hem olsem wan gaed mo proteksen.

Long Prijim Gospel blong Mi, ol misinari blong yumi oli tijim se revelesen mo testemoni oli kam taem yumi go long ol miting blong Jos long Sandei: “Taem yumi stap atendem ol Jos seves mo stap wosip tugeta, yumi mekem wanwan long yumi i kam strong moa. Yumi joen tugeta bakegen wetem ol fren mo ol famle. Fet blong yumi i kam strong moa taem yumi stap stadi long ol skripja mo yumi stap lanem moa abaot gospel ia we i kambak.”⁸

Wan i save askem from wanem yumi gat tri seperet miting long Sandei, mo from wanem nid blong gat wanwan long olgeta. Bae yumi lukluk smol long ol trifala miting ia:

• Sakramen miting i givim janis blong tekpat long odinens blong sakramen. Yumi riniu ol kavenan blong yumi, kasem wan nara mak blong Spirit, mo kasem sam moa blesing blong kasem tijing mo kam antap tru long Tabu Spirit.

• Sandei Skul i letem yumi “tijim long wanwan long [yumi] bakegen, doktrin blong kingdom”⁹ blong evriwan “i kam antap mo stap glad tugeta.”¹⁰ Bigfala paoa mo pis blong yuwan i kam taem yumi andastanem ol doktrin blong gospel we i kambak.

• Prishud miting i taem blong ol man mo ol yang man oli “lanem diuti blong olgeta”¹¹ mo  “ “oli tijim [olgeta] stret moa,”¹² mo Rilif Sosaeti miting i givim, long ol woman blong Jos, wan janis blong “mekem fet blong olgeta i kam antap, mekem ol famle mo hom oli kam strong moa, mo helpem olgeta we oli stap long nid.”¹³

Semmak, ol yang woman blong yumi mo ol pikinini oli gat ol miting mo ol klas blong olgetawan. Oli kasem tijing blong gospel taem oli stap rere from ol impoten responsabiliti we bae oli kasem. Long wanwan long ol spesel miting ia, yumi lanem doktrin, filim Spirit, mo wok blong wanwan long yumi. Samtaem, rul i no semmak from ples i longwe, bas i sas, o from helt, be yumi mas traehad blong go long evriwan long ol miting blong yumi long Sandei. Mi promes se ol blesing blong bigfala glad mo pis bae i kam long wosip blong tri aoa long Sandei miting.

Famle blong mifala, i bin gat komitmen blong oltaem go long evriwan long ol miting long Sandei. Mifala i bin faenem se hemia i mekem fet blong mifala i kam strong moa, mo i mekem mifala i andastanem gospel gud moa. Mifala i bin lavem se mifala i filim gud abaot desisen blong go long ol miting blong Jos, speseli taem mifala i stap gobak hom mo gohed blong folem Sabat. Mifala i stap go tu long Jos long Sandei taem mifala i stap go holidei o stap travel. Wan long ol gel blong mitufala i bin raet i no longtaem blong talem se hem i bin go long Jos long wan taon we hem i travel i go long hem, mo i se: “Yes Papa. Mi bin go long trifala miting blong Sandei.” Mifala i save hem i kasem blesing blong stret mo gud desisen blong hem.

Wanwan i gat plante joes blong mekem long hao yumi respektem Sabat dei. Oltaem bae i gat sam gud aktiviti we yu save mo yu mas sakrifaesem from wan joes we i gud moa we i blong go long Jos. Hemia i wan long ol wei we enemi i “giaman long ol sol blong [yumi], mo i lidim [yumi] i gowe sloslo daon long hel.”¹⁴ Hem i yusum ol gud aktiviti mo riplesem olgeta wetem ol aktiviti we oli “gud moa”, o oli “bes.”¹⁵

Blong holemtaet strong oltaem long rel blong aean, i minim se, taem i posibol, yumi go long evriwan long ol miting long Sandei: sakramen miting, Sandei Skul, mo prishud mo Rilif Sosaeti miting. Ol pikinini mo ol yut blong yumi oli go long ol miting blong olgeta long Praemeri, Yang Man, mo Yang Woman. Yumi neva mas jusum wijwan miting blong go long hem. Yumi holemtaet strong nomo long toktok blong God taem yumi wosipim mo go long evriwan long ol Sabat miting blong yumi.

Blong holemtaet strong rel blong aean oltaem, i minim se yumi traehad blong obei evriwan long ol komanmen blong God, blong gat prea blong yumiwan, mo wetem famle evri dei, mo blong stadi long ol skripja evri dei.

Blong holemtaet strong oltaem, i pat blong doktrin blong Kraes olsem we oli tijim insaed long Buk blong Momon. Yumi praktisim fet long Jisas Kraes, sakem ol sin blong yumi, mo jenisim hat blong yumi, mo afta, folem Hem insaed long ol wota blong baptaes, mo kasem konfemesen blong presen we i Tabu Spirit, we i stap olsem wan gaed mo spirit blong givhan. Mo afta, olsem Nifae i tijim, yumi “gohed strong, [mo] kakae gud long toktok blong Kraes” kasem en blong ol laef blong yumi.¹⁶

Ol brata mo sista blong mi. Yumi wan kavenan pipol. Yumi glad blong mekem mo kipim ol kavenan, mo blesing blong promes i we bae yumi kasem evri samting we Papa i gat.¹⁷ Taem yumi stap holemtaet strong oltaem long rel blong aean taem yumi kipim ol kavenan blong yumi, bae yumi kam strong moa blong stanap agensem ol temtesen mo ol denja blong wol. Bae yumi save stap long laef long wol ia wetem evriwan long ol jalenj blong hem kasem yumi kasem tri ia we frut blong hem i moa gudgudfala mo ol man i wantem moa bitim ol narafala frut.¹⁸

Papa blong mi i laki tumas blong maredem wan gudfala woman we i bin leftemap tingting blong hem blong kambak long Jos blong yangfala taem blong hem, mo statem bakegen blong wokbaot fored long rod ia. Ol fetful laef blong tufala i bin blesem evriwan long ol pikinini blong tufala, nekis jeneresen blong ol apu, mo naoia ol smol apu pikinini.

Simpol desisen ia nomo blong go o no go long wan long Sabat dei wosip miting i mekem bigfala defren samting long laef blong famle blong ol bubu blong mi; evri desisen blong yumi bae i tajem laef blong yumi long ol bigfala wei. Wan smol desisen ia nomo blong go o no go long sakramen miting i save gat ol risal we i go nogud blong longtaem, i save go kasem taem we i no save finis.

Bae yumi jusum blong wok strong mo kasem ol bigfala blesing mo proteksen we oli kam taem yumi kam tugeta wanples mo stap kipim ol kavenan. Bae yumi gohed blong holemtaet strong oltaem rel blong aean we i lidim yumi long ples blong Papa blong yumi long Heven, hemia i prea blong mi, long tabu nem blong Jisas Kraes, amen.