Stap Tij wetem Paoa mo Atoriti blong God

Mifala i glad i bitim wanem mifala i save talem, from ol tija raon long Jos. Mifala i lavem yufala mo gat bigfala tras long yufala. Yufala i wan long ol bigfala merikel blong gospel we i bin kambak.

I gat wan sikret blong kam wan gudgudfala tija blong gospel, blong stap tij wetem paoa mo atoriti blong God. Mi yusum toktok ia, sikret, from ol prinsipol we sakses blong wan tija i stanap long hem, olgeta we oli save andastan, oli olgeta nomo we oli gat wan testemoni long wanem i bin tekem ples long moning blong naes klia dei, eli long spring blong yia 1820.

Blong ansa long prea blong wan boe blong 14 yia we hem i givim wetem tingting we i stap daon, ol heven oli bin open. God, Papa we i No Save Finis, mo Pikinini blong Hem, Jisas Kraes, Tufala i bin kamaot mo toktok long Profet Josef Smit. Longfala taem blong stap wet blong evri samting i kambak, wetem prinsipol blong revelesen tu wetem, i stanap bakegen long dispensesen blong yumi. Mesej blong Josef, mo mesej blong yumi long wol, oli save putum long fofala toktok ia nomo: “God i stap toktok.” Hem i bin toktok bifo, Hem i bin toktok long Josef, mo bae Hem i toktok long yu. Hemia i wanem i mekem yu defren, yu spesel aot long evri nara tija blong wol ia. From hemia nao, yu gat sakses nomo.

Oli singaotem yu tru long spirit blong profesi mo revelesen, mo oli bin setem yu apat tru long atoriti blong prishud. ?I minim wanem?

Faswan, i minim se yu stap mekem wok blong Lod. Yu wan wokman blong Hem, mo yu gat raet ia mo wok ia blong ripresentem Hem, mo blong mekem samting long bihaf blong Hem. Olsem wokman blong Hem, yu gat raet long help blong Hem. Yu mas askem yuwan: “?Bae Sevya i talem wanem sapos Hem nao i stap tij long klas blong mi tedei, mo bae i talem olsem wanem?” Afta, yu mas mekem semmak.

Responsabiliti ia, sam oli save filim se oli no naf, o oli fraet long hem. Rod ia i no had. Lod i bin putum wan rod blong evri Lata-dei Sent we i klin inaf blong tij long wei blong Sevya.

Nambatu. Oli singaotem yu blong prijim gospel blong Jisas Kraes. Yu no mas tijim tingting blong yuwan o sam bigfala tingting, iven we i miks wetem skripja. Gospel hem i “paoa blong God blong sevem man,”¹ mo hem i tru long gospel nomo we God i save sevem yumi.

Nambatri. Lod i givim komanmen long yu blong tijim ol prinsipol blong gospel olsem we oli stap long ol standet tabu wok blong Jos, blong tijim ol toktok blong ol aposol mo ol profet blong tedei, mo blong tijim wanem we Tabu Spirit i tijim yu.

?So yumi stat wea?

Our first and foremost responsibility is to live so that we can have the Holy Ghost as our guide and companion. When Hyrum Smith sought to become engaged in this latter-day work, the Lord said, “Behold, this is your work, to keep my commandments, yea, with all your might, mind and strength.” This is the starting point. The counsel, provided by the Lord to Hyrum, is the same counsel He has provided to the Saints in every age. Fas, mo bigfala responsabiliti blong yumi, i blong laef long wan wei we Tabu Spirit i stap olsem gaed mo kompanion blong yumi. Taem Haeram Smit i wantem wok long lata-dei wok ia, Lod i talem se hemia nao wok blong hem, blong hem i stap obei long ol komanmen blong Lod, yes, wetem ful paoa blong tingting, maen, mo paoa blong hem.² Ples ia nao blong stat wetem. Kaonsel, we Lod i givim long Haeram, i semfala kaonsel we Hem i stap givim long Ol Sent long eni taem.

Taem oli tokbaot ol tija tedei, Fas Presidensi i talem: “Pat blong seves blong yu we i moa impoten, bae i taem yu rere long spirit evri dei, wetem prea, skripja stadi, mo fasin blong obei long ol komanmen. Mifala i leftemap tingting blong yu blong putum ful tingting blong yu blong laef folem gospel wetem moa stamba tingting bitim bifo.”³

Hem i impoten blong luk se Fas Presidensi i no talem se pat blong seves blong yu we i moa impoten i blong rere gud long lesen blong yu, o blong lanem gud ol defren teknik blong tij. Yes i tru, yu mas gat ful tingting blong rere long wanwan lesen, mo traehad blong lanem olsem wanem yu save tij blong helpem ol studen oli praktisim fridom blong joes blong olgeta, mo letem gospel i go insaed long hat blong olgeta; be faswan mo moa impoten pat blong seves blong yu, i olsem wanem nao yu rere yuwan long saed blong spirit. Taem yu folem kaonsel ia, Fas Presidensi i promesem: “Tabu Spirit bae i helpem yu blong save wanem blong mekem. Testemoni blong yu bae i gro, fasin blong yu bae i jenis bigwan, mo bae yu kam strong moa blong fesem ol jalenj blong laef.”⁴

?Wanem bigfala blesing moa wan tija i wantem?

Nekiswan. Lod i givim komanmen se bifo yumi lukaot blong talemaot toktok blong Hem, yumi mas luklukgud blong kasem ol toktok ia.⁵ Yufala i mas kam ol man mo ol woman we i wantem lanem samting, taem yufala i stap putum ful tingting blong luklukgud ol skripja, mo stap holemtaet gud olgeta long hat blong yufala. Afta, taem yu askem help blong Lod, bae Hem i blesem yu wetem Spirit blong Hem, mo toktok blong Hem. Bae yu gat paoa blong God blong winim tingting blong ol man.

Pol i tokbaot se gospel i go long man long tufala rod, long toktok mo long paoa.⁶ Toktok blong gospel, oli raetemdaon long ol skripja, mo yumi save kasem toktok taem yumi luklukgud olbaot. Paoa blong gospel i kam long laef blong olgeta we oli laef long wei we Tabu Spirit i kompanion blong olgeta, mo oli folem kwaet toktok we oli kasem. Sam oli lukluk nomo blong kasem toktok mo kam top man blong talemaot infomesen. Sam, oli no rere, mo oli hop se Lod, wetem gud fasin blong Hem, bae i helpem olgeta blong gotru kasem en blong klas. Yu no save ting se bae Spirit i helpem yu blong tingbaot ol skripja mo ol prinsipol we yu no bin stadi o tingting long olgeta. Blong save tijim gud gospel, yu mas gat tugeta, toktok mo paoa blong gospel long laef blong yu.

Alma i bin andastanem ol prinsipol ia taem hem i tokbaot gud ol boe blong Mosaea mo olsem wanem oli bin tij wetem paoa mo atoriti blong God. Hem i talem se:

“Oli ol man blong wan stret haremsave mo oli bin stadi long ol skripja wetem strong tinging, blong oli save toktok blong God.

“Be i no hemia nomo; oli bin mekem plante prea, mo livim kakae; taswe oli bin gat … spirit blong revelesen.”⁷

Nekiswan, yu mas lan blong lisin. Elda Jefri R. Holan i bin tijim prinsipol ia long ol misinari. Bae mi kwotem toktok blong Elda Holan, be mi riplesem ol toktok, misinari mo investigeta, wetem toktok ia, tija mo studen: “Nambatu responsabiliti blong ol tija, afta responsabiliti blong lisin long Spirit, i responsabiliti blong lisin long studen. … !Sapos oli lisin wetem sora blong spirit …, [ol studen blong yumi] bae oli talem long yumi wanem lesen oli nidim blong harem!”

Elda Holan i gohed: “Wanem i stap, i we, ol tija oli lukluk tumas blong givim wan naes lesen we i ripitim samting long buk, be i no blong lukluk long studen blong olgeta olsem wanwan man mo woman.”⁸

Afta we yu rere, mo rere long lesen blong yu long bes we yu save mekem, yu mas rere blong lego evri samting ia. Taem ol kwaet toktok blong Tabu Spirit oli kam, yu mas gat strong paoa long tinting blong livim ol plan mo not blong lesen blong yu, mo go long ples we kwaet toktok i tekem yu i go long hem. Taem yu mekem hemia, lesen we yu stap givim i nomo lesen blong yu, be i kam lesen blong Sevya.

Taem yu putum ful tingting blong yu blong laef folem gospel wetem bigfala stamba tingting bitim bifo, mo luklukgud long ol skripja, mo holemtaet olgeta long hat blong yu, semfala Tabu Spirit ia, we i talemaot ol toktok ia long ol aposol mo ol profet bifo, bae oli testifae long yu se oli tru. Wanem i stap, bae Tabu Spirit i talemaot long yu bakegen. Taem hemia i hapen, ol toktok we yu bin ridim oli no ol toktok blong Nifae, o Pol, o Alma nomo, be oli kam ol toktok blong yu. Afta, taem yu tij, Tabu Spirit bae i save tijim yu evri samting, mo mekem yu tingbaot evri samting. I tru, “bae [Lod i] givim yu long stret aoa, yes long stret taem, wanem we bae yu talem.”⁹ Taem hemia i hapen, bae yu luk se yu talem samting we yu no plan blong talem. Afta, sapos yu lukaot gud, bae yu lanem wan samting aot long ol samting we yu stap talem taem yu tij. Presiden Marion G. Romni i talem: “Oltaem mi save taem mi stap toktok folem insperesen blong Tabu Spirit, from se oltaem mi lanem wan samting aot long wanem mi talem.”¹⁰ Tingbaot. Wan tija hem i wan studen tu.

Laswan. Yu mas stanap olsem wan independen witnes blong ol samting we hem i tijim, mo i no blong talemaot bakegen ol toktok long lesenbuk o tingting blong ol narawan. Taem yu stap kakae long ol toktok blong Kraes mo traehad blong laef folem gospel wetem bigfala stamba tingting moa bitim bifo, Tabu Spirit bae i soemaot long yu se ol samting we yu stap tijim oli tru. Hemia spirit blong revelesen, mo semfala spirit ia bae i tekem mesej blong yu long hat blong olgeta we oli wantem mo wantem blong kasem.

Bae yumi finis long ples we yumi stat long hem—long Tabu Bus. From samting we i bin tekem ples long naesfala spring moning ia, i no longtaem i pas, yu gat raet blong tij wetem paoa mo atoriti blong God. Abaot hemia, mi talem tabu mo independen witnes blong mi, long nem blong Jisas Kraes, amen.