Yufala I Nomo Stap Ol Strenja

Plante long yumi, long wan taem, i bin stap long wan situesen we i niu long yumi, we yumi filim i defren mo i no stret. Situesen ia i hapen long famle blong mifala samples faef yia i pas afta we Presiden Tomas S. Monson i givim koling long mi blong stap olsem wan Jeneral Atoriti blong Jos. Koling ia, i minim se famle blong mifala i mas muvaot long naesfala ples we mifala i stap long hem blong moa long 20 yia. Waef blong mi, mo mi, i tingbaot yet toktok blong ol pikinini taem oli lanem long jenis ia. 16 yia boe blong mi i se: “!I no wan problem nating. Yutufala i save go; bae mi stap!”

Kwiktaem, hem i akseptem blong kam wetem mitufala mo i fetful blong akseptem niufala janis ia long laef blong hem. Blong stap long ol niufala ples ova long ol las yia i kam olsem wan eksperiens blong lanem samting wetem glad mo i gud long famle blong mifala, speseli from naes welkam mo gud fasin blong ol Lata-dei Sent. Taem mifala i laef long ol defren kantri, mifala i kam blong stap glad se yuniti blong ol pipol blong God raon long wol i samting we i ril mo yumi save tajem.

Koling blong mi i lidim mi blong travel i go long plante kantri, mo i givim mi spesel janis blong prisaed long plante miting. Taem mi lukluk i go long ol defren kongregesen, plante taem mi luk ol memba oli ripresentem plante kantri, lanwis, mo kalja. Wan gudfala saed blong gospel dispensesen blong yumi, hem i we, i no stop long wan ples, o long wan grup blong ol nesen. Hem i blong ful wol mo blong evriwan. Hem i mekem man i rere from kambak blong Pikinini blong God taem yumi karem tugeta “ol pikinini blong hem long ol fo pat blong wol i kam tugeta.”¹

Nomata membasip blong Jos i stap kam antap mo oli kam evri ples, tabu samting we yumi gat i bitim ol samting we i defren long yumi. Olsem ol memba blong Jos, yumi kam insaed long haos blong Isrel. Yumi kam ol brata mo sista, we yumi gat semmak raet long semfala tabu famle laen long saed blong spirit. God i promesem Ebraham se hamas long olgeta we bae oli akseptem Gospel ia, bae [hem i] singaotem olgeta folem nem blong [hem], mo bae [Hem i] kaontem olgeta olsem laen blong [hem], mo bambae oli girap mo blesem [hem], olsem papa blong olgeta.²

Wan promes i go long evriwan we i kam memba blong Jos: “From samting ya, yufala ya we bifo yufala i no laen blong Isrel, yufala i no moa stap olsem we yufala i strenja, no yufala i man blong narafala ples. Naoia, yufala i gat raet insaed long ples blong God, olsem ol narafala man blong God nomo. Yufala i insaed long famle blong God finis.”³

Toktok ia, strenja i kamaot long Latin toktok ia, extraneus, we i minim “aotsaed” o “I kam long aotsaed.” Plante taem, i tokbaot wan man we i wan man “aotsaed” from plante risen, ating from ples blong hem, kalja, tingting, o relijin. Olsem ol disaepol blong Jisas Kraes, we yumi traehad blong stap insaed long wol, be i no blong wol, samtaem, yumi filim se yumi man aotsaed. Yumi, bitim sam narafalawan, i save se sam doa i save klos long olgeta we man i luk olgeta olsem ol man we i defren.

Truaot ol taem, ol pipol blong God oli kasem komanmen blong kea long evri man mo woman we oli ol strenja, we oli luk olgeta se oli defren. Long taem bifo, wan strenja i kasem semfala kea olsem wan wido o wan pikinini we i no gat papa mo mama. Semmak long olgeta, stenja ia i stap long wan situesen blong denja, mo bae laef blong hem i dipen long proteksen we hem i kasem long lokol populesen. Ol pipol blong Isrel oli kasem stret toktok long saed blong poen ia: “Yufala i mas tingbaot taem ya we yufala i stap long Ijip, we yufala i strenja nomo long ples ya. Nao from samting ya, yufala i mas lavem ol narafala man olsem we yufala i stap lavem yufala, mo yufala i mas lukaot gud long olgeta, sem mak olsem we yufala i stap lukaot gud long ol laen blong yufala nomo.”⁴

Long taem blong seves blong Hem long wol ia, Jisas i wan eksampol blong wan we i go bitim wok blong hem blong lukaotgud long man mo akseptem olgeta. Olgeta we oli no stap long sosaeti, olgeta we oli sakemaot olgeta mo olgeta we oli tekem se oli nomo klin gud, oli bin kasem lav mo sore mo respek. Oli kasem wan ikwol pat long ol tijing mo seves blong Hem.

Eksampol, Sevya i bin go agensem kastom we i stap long taem blong Hem, blong toktok long wan woman Sameria, mo askem wota long hem. Hem i sidaon blong kakae wetem ol man nogud mo ol man blong takis. Hem i no fraet blong go kolosap long man we i gat leprosi, blong tajem hem mo hilim hem. Taem Hem i glad long strong paoa long tingting blong soldia blong Rom, Hem i talem long ol grup blong ol man: “Nating we ol laen blong Isrel, be mi mi no faenem wan long olgeta nating we bilif blong hem i strong olsem bilif blong man ya.”⁵

Jisas i askem yumi blong folem loa blong gat stret lav, we i wan presen blong evriwan mo i no gat kondisen long hem. Hem i talem:

“?Yufala i ting se sipos yufala i stap lavem olgeta ya nomo we oli stap lavem yufala, God bambae i givim pei long yufala from? !Ol man blong tekem mane blong takis, olgeta tu oli stap mekem fasin ya!

“Sipos yufala i stap toktok wetem ol fren blong yufala nomo, hemia yufala i no mekem wan samting we i gud moa i winim ol narafala man. Ol hiten man tu oli stap mekem fasin ya.

“Be fasin blong yufala i mas stret gud, olsem fasin blong Papa blong yufala long heven.”⁶

Long Jos ia, i no gat strenja, o man aotsaed. I gat ol brata mo ol sista nomo. Save ia, se yumi gat wan Papa we I No Save Finis, i helpem yumi moa blong gat fasin ia blong stap brata mo sista we i mas stap long medel blong evri man mo woman long wol.

Wan ples long buk ia, Les Miserables i soemaot olsem wanem ol man blong prishud oli save tritim wanwan we oli luk olsem ol strenja. Jean Valjean i jes rilis olsem prisena. I taed from longfala trip mo i hanggri mo tosta, hem i kasem wan smol taon mo lukaot long wan ples blong faenem kakae mo ples blong slip long naet. Taem nius blong hem i go olbaot, wan afta wan, ol man we oli blong ples ia oli sarem doa long hem. Hotel, o ges haos, o iven kalabus i no wantem invaetem hem i kam insaed. Oli sakemaot hem, oli ronemaot hem, oli blokem hem. Long en, we hem i nomo gat paoa, hem i foldaon long fored blong doa blong wan bisop blong taon.

Gudfala wokman ia blong God i savegud histri blong Valjean, be hem i invaetem stilman ia insaed long haos blong hem wetem ol gudfala toktok ia:

“‘Hemia i no haos blong mi; hem i haos blong Jisas Kraes. Doa ia i no askem man we i kam insaed sapos hem i gat wan nem, be sapos hem i gat wan nid. Yu safa, yu hanggri mo tosta; yu welkam. … ?From wanem bae mi askem nem blong yu? Antap long hem, bifo yu talem [nem blong yu], yu gat wan finis we mi bin save long hem.

“[Valjean] i openem ae blong hem wetem sapraes.

“‘“?Tru? ?Yu save finis oli singaotem mi wanem?’

“‘Yes,’ Bisop i ansa, ‘oli singaotem yu brata blong mi.’”⁷

Long Jos ia, ol wod mo ol kworom blong yumi oli no blong yumi. Oli blong Jisas Kraes. Huia i kam insaed long ol mitinghaos blong yumi, i mas filim long hom. Responsabiliti blong welkamem evriwan i impoten bigwan. Wol we yumi stap long hem i stap gotru wan taem we i muvmuv. From se transpot i stap, komunikesen i stap, mo wol ekonomi i kam wan, wol i kam olsem wan bigfala vilej we ol pipol mo ol nesen oli mit, oli konek, mo oli miks bitim bifo.

Ol jenis we i hapen raon long wol i helpem ol plan blong God we I Gat Olgeta Paoa. Kam tugeta blong olgeta we Hem i jusum raon long ol fo pat blong wol i no stap tekem ples nomo taem yumi sendem ol misinari long ol kantri longlongwe, be tu, taem ol narafala pipol blong narafala eria oli kam long taon blong yumi mo ples we yumi stap long hem. Plante, we oli no save, Lod i lidim olgeta long ol ples we oli save harem gospel mo kam joen grup blong Hem.

Ating bae nekiswan we bae i jenisem laef blong hem i go long gospel long wod blong yu, bae i wan we i no kamaot long grup blong ol fren o narafala man we yu save olgeta. Bae yu luksave long lukluk, lanwis mo fasin blong hem blong dresap, o kala blong skin blong hem. Man o woman ia, ating i groap long wan narafala relijin, wetem wan defren histri o wan defren laefstael.

Blong felosip i wan impoten prishud responsabiliti. Ol kworom blong Aronik mo Melkesedek Prishud oli mas tekem aksen semtaem wetem ol sista anda long daereksen blong bisop, blong mekemsua se wanwan man o woman i gat welkam wetem lav mo kaen fasin. Ol hom tija mo visiting tija bae oli luklukgud blong mekemsua se oli no fogetem wan, o no wantem save long wan.

Yumi evriwan i nid blong wok tugeta blong bildimap yuniti long saed blong spirit insaed long ol wod mo branj blong yumi. Wan eksampol blong stret yuniti i bin stap long medel blong ol pipol blong God afta we Kraes i bin visitim Ol Amerika. Rekod i talem se: “mo tu i no bin gat ol man blong Leman, o eni kaen pipol we oli singaotem long nem blong eni man; be oli bin stap wan, ol pikinini blong Kraes, mo oli kasem kingdom blong God.”⁸

Yumi no kasem yuniti taem yumi no wantem save, o putum long saed ol memba we oli luk defren, o oli no strong, mo stap nomo wetem ol pipol we oli olsem yumi. I no olsem. Yumi kasem yuniti taem yumi welkamem mo givim seves long olgeta we oli niu, mo, oli gat ol spesel nid. Ol memba ia oli wan blesing long Jos mo oli givim janis long yumi blong givim seves long ol neiba blong yumi, mo olsem ia, yumi mekem hat blong yumi i kam klin gud.

So. Ol brata blong mi. Hem i diuti blong yu blong go aot long eniwan we i kamaot long ol doa blong ol bilding blong Jos. Welkamem olgeta wetem glad mo gud tingting. Sapos ol pipol we yu no save, oli wokbaot i kam long miting blong yu, gritim olgeta wetem gud hat mo invaetem olgeta blong sidaon wetem yu. Plis mekem fas muv blong helpem olgeta blong filim welkam mo lav, be i no blong wet blong oli kam long yu.

Afta long fas welkam blong yu, lukaotem sam rod we yu save gohed blong givhan long olgeta. Wan taem mi bin harem abaot wan wod, we afta long baptaes blong 2 sista we sora i fas, tufala gud sista blong Rilif Sosaeti i disaed blong lanem saen lanwis blong oli save toktok gud wetem tufala niu konvet ia. !Hemia wan gudfala eksampol blong lav long ol brata mo sista long gospel!

Mi testifae se i no gat wan i wan strenja long Papa blong yumi long Heven. I no gat wan we sol blong hem i no impoten long God. Wetem Pita, mi testifae se “God i stap mekem i sem mak long olgeta man; Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.”⁹

Mi prea se taem Lod i karem tugeta ol sipsip blong Hem long las dei, bae Hem i save talem long wanwan long yumi: “Taem we mi mi strenja, yufala i tekem mi mi go long haos blong yufala.”

Afta bae yumi talem long Hem: “?Mifala i luk yu wetaem we yu yu strenja, nao mifala i tekem yu yu kam long haos blong mifala?”

Mo bae Hem i ansa long yumi: “Tru, mi talem long yufala, taem we yufala i mekem olsem long wan brata blong mi we i daon moa long ol narafala brata blong mi, be hemia i olsem we yufala i mekem long mi nomo.”¹⁰

Long nem blong Jisas Kraes, amen.