Jeneral Konfrens: Blong Stap Mekem Fet mo Testemoni I Kam Strong Moa

Tangkyu Presiden Monson, from tijing mo eksampol blong yu blong seves olsem hemia blong Kraes mo wok we yu givim long mifala evriwan blong stap ol misinari. Mifala i stap prea from yu oltaem.

Long dispensesen blong yumi, Sevya Jisas Kraes, i tokbaot wan kam tugeta blong Ol Sent olsem jeneral konfrens blong mi.¹

Nomata ples we yumi stap long wol ia, nomata olsem wanem yumi kasem ol toktok ia, mi testifae we yumi kam tugeta long konfrens blong Hem. Mi testifae tu se bae yumi harem toktok blong Hem, from se Hem i bin talem se nomata oli kamaot tru long voes blong miwan o tru long voes blong ol wokman blong hem, hem i semmak.²

Oltaem, ol konfrens oli bin pat blong tru Jos blong Jisas Kraes. Adam i karem tugeta ol pikinini blong hem mo i profesae long ol samting we bae i kam. Moses i karem tugeta ol pikinini blong Isrel mo tijim olgeta ol komanmen we hem i bin kasem. Sevya i tijim ol bigfala grup we oli kam tugeta long Tabu Graon mo long graon blong Amerika. Pita i karem tugeta ol man we oli biliv long Jerusalem. Fas jeneral konfrens long ol lata dei i bin hapen tu manis afta we oli oganaesem Jos mo i bin gohed kasem tedei.

Ol konfrens ia, oli hapen oltaem anda long daereksen blong Lod, wetem Spirit blong Hem.³ Olsem ol spika, oli no givim ol topik long mifala. Ova ol wik, mo ol manis, mo plante taem truaot ol naet we mifala i no slip, mifala i stap wet long Lod. Tru long fasin blong livim kakae, stap prea, stap stadi, mo tingting hevi, mifala i lanem mesej we Hem i wantem mifala blong givim.

Sam oli save askem: “?From wanem insperesen i no kam isi mo kwiktaem?” Lod i tijim Oliva Kaodri se hem i mas stadi gud long hem insaed long maen blong hem; afta, hem i mas askem long Lod sapos hem i raet.⁴ Ol mesej blong konfrens oli kam long yumi afta we yumi rere wetem prea, tru long Tabu Spirit.

Prinsipol ia i tru long evri memba blong Jos, taem yumi stap rere blong tekpat long wod, stek, mo jeneral konfrens. Yumi stadi gud insaed long maen blong yumi long wanem yumi nidim mo wantem long Papa long Heven, mo yumi prea blong andastanem mo yusum wanem yumi bin tijim. Taem we taem blong konfrens i kam, yumi sakrifaesem ol nara aktiviti, yumi [livim] ol samting blong wol ia oli stap long saed, mo [blong] lukaotem ol samting blong wan wol we i moa gud.⁵ Afta, yumi karem ol famle blong yumi oli kam tugeta blong harem toktok blong Lod, semmak olsem King Benjamin i bin mekem.⁶

Ol pikinini mo ol yut oli laekem blong kam. Yumi mekem bigfala mistek sapos yumi ting se konfrens i bitim waes mo spirit blong olgeta. Long ol yangfala memba blong Jos, mi promes, se sapos yufala i lisin, bae yufala i filim Spirit i solap insaed long yufala. Lod bae i talemaot long yufala wanem we Hem i wantem yu blong mekem wetem laef blong yu.

Long ol konfrens, yumi save karem toktok blong Lod we i stret long yumi. Wan memba i testifae: “Taem mi lisin long toktok blong yu, mi sapraes tumas. … Toktok blong yu i revelesen blong miwan we i kam stret long Lod i go long famle blong mi. Mi neva gotru long wan strong taem olsem we Spirit i toktok long laef blong mi, olsem long ol minit ia we Tabu Spirit i toktok stret long mi.”

Wan narawan i talem: “Mi neva filim i strong olsem bifo, se wan toktok i kam long mi stret.”

Hemia i posibol from se Tabu Spirit i tekem toktok blong Lod i go long hat long wei we yumi save andastanem olgeta.⁷ Taem mi tekem not long konfrens, oltaem mi no raetem daon stret wanem spika i talem; mi raetem stret toktok we Spirit i stap talem long mi.

Wanem oli talem, i no impoten tumas long wanem yumi harem mo wanem yumi filim.⁸ From hemia nao yumi traehad blong gotru long konfrens long wan ples we yumi save harem gud, filim mo andastanem kwaet, smol voes blong Spirit.

!O yes, yumi nidim jeneral konfrens! Tru long ol konfrens, fet blong yumi i kam strong moa mo testemoni i kam bigwan moa. Mo afta, yumi jenisim laef, yumi mekem wanwan i kam strong moa blong stanap strong long medel blong ol spia blong faea blong las dei ia.⁹

Long ol las ten yia, Jos i no fesem ol nogud toktok mo hadtaem we ol fas sent oli gotru long hem. Bae i no olsem oltaem. Wol i stap muvaot long Lod kwiktaem mo longwe moa bitim bifo. Enemi i stap yusum paoa blong hem long wol ia. Yumi stap lukluk, harem, ridim, stadi mo serem ol toktok blong ol profet blong yumi kasem woning mo proteksen. Eksampol: “Famle, Wan Ofisol Toktok i go long Wol” i kamaot longtaem bifo yumi gotru ol jalenj we famle i stap fesem naoia. “Kraes we i Laef: Testemoni blong Olgeta Aposol” i bin rere longtaem bifo taem we yumi nidim moa naoia.

Ating yumi no save ol risen from wanem ol profet mo ol spika blong konfrens oli tokbaot sam topik nomo long yumi long konfrens, be Lod i save. Presiden Harol B. Li i tijim: “Wan sefti nomo we yumi gat olsem ol memba blong jos ia, i blong mekem folem ol toktok mo ol komanmen we Lod bae i givim tru long profet blong Hem. Bae i gat sam samting we i nidim longfala tingting mo fet. Ating bae yu no laekem wanem i kamaot long atoriti blong Jos. Ating i agensem tingting blong yu. Ating i agensem sosol tingting blong yu. Ating i blokem sosol laef blong yu. Be sapos yu lisin long ol samting ia, olsem se oli kamaot long maot blong Lod Hemwan, wetem longfala tingting mo fet, promes hem i we ol get blong hel bae oli no win agensem yu; … mo Lod God bae i ronemaot ol paoa blong tudak long fored blong yufala mo bae i mekem ol heven oli seksek blong gud blong yufala, mo blong glori long nem blong hem. (luk long D&C 21:6). ¹⁰

?Olsem wanem nao Presiden Li i save wanem bae yumi fesem long taem blong yumi? Hem i bin save from se hem i bin wan profet, sia, mo reveleta. Mo sapos yumi lisin mo obei long ol profet naoia, wetem olgeta we bae oli toktok long konfrens ia, bae yumi kam strong moa mo gat proteksen.

Ol bigfala blesing blong jeneral konfrens oli kam long yumi afta we konfrens i finis. Tingbaot paten we oli raetemdaon long skripja: Yumi kam tugeta blong harem ol toktok blong Lod, mo yumi gobak long haos blong laef folem olgeta.

Afta we King Benjamin i tijim ol pipol blong hem, “hem i bin sendem bak grup blong pipol ia mo oli bin gobak, evriwan folem famle blong olgeta, long haos blong olgeta bakegen.” ¹¹ Long taem blong hem, King Limhae i mekem semmak.¹² Afta we hem i tijim mo givhan long ol pipol long tempol long Baontiful, Sevya i talem long ol pipol: “yufala i gobak long haos blong yufala, mo tingting hevi long ol samting we mi bin talem, mo askem long Papa, long nem blong mi, blong yufala i save andastanem, mo mekem rere ol tingting blong yufala blong tumora, mo mi kam long yufala bakegen.”¹³

Yumi akseptem invitesen blong Sevya taem yumi tingting hevi mo prea blong andastanem wanem oli bin tijim yumi, mo afta go fored mo mekem tingting blong Hem. Tingbaot toktok blong Presiden Spensa W. Kimbol: “Mi disaed se taem mi go long haos afta long jeneral konfrens ia …bae i gat plante, plante saed long laef blong mi we bae mi mekem i stret evriwan.¹⁴ Mi mekem lis long maen blong mi, mo mi luk fored blong go wok stret afta we konfrens i finis.” Presiden Monson i talem i no longtaem: “Mi leftemap tingting blong yufala blong ridim ol toktok … mo tingting hevi long ol mesej insaed long olgeta. Mi faenem long laef blong mi, se mi kasem moa long ol tabu toktok ia taem mi stap stadi gud long olgeta.”¹⁵

Antap long invitesen we i kam long yumi blong gat skripja stadi blong yumiwan mo famle, Papa long Heven i wantem yumi blong stadi oltaem mo praktisim wanem yumi lanem long konfrens. Mi testifae se olgeta we oli putum tras blong olgeta long Lod mo i mekem folem kaonsel ia wetem fet, bae i kasem moa paoa blong blesem olgetawan mo famle blong olgeta blong plante jeneresen we i stap kam.

Papa long Heven i givim rod ia. Long konfrens ia, 97 pesen blong jos i save harem ol mesej ia long lanwis blong olgeta. Milian memba long 197 kantri bae oli luk konfrens ia long 95 lanwis. Long tu o tri dei taem, ol mesej bae oli stat blong kamaot long LDS.org long Inglis, mo afta wan wik, bae oli stat blong kamaot long 52 lanwis. Naoia yumi kasem ol magasin blong Jos 3 wik afta long jeneral konfrens. I nomo nid blong wet blong ol toktok i kam long postofis. Long kompiuta, telefon, o nara lektronik tul, yumi save ridim, lisin, lukluk mo serem ol tijing blong ol profet. Enitaem, eni ples, yumi save mekem save blong yumi i kam bigwan moa, mekem fet mo testemoni i kam strong moa, protektem famle blong yumi mo lidim olgeta i kam hom sef.

Ol mesej blong konfrens ia, bae oli putum tu i go insaed long yut kurikulum long intanet. Ol papa mo mama oli save tekem ol yut lesen long LDS. Org. Faenemaot wanem pikinini blong yufala i stap lanem, mo mekem i kam topik blong stadi blong yufala, famle storian, famle haos naet, famle kaonsel, mo wanwan intaviu wetem wanwan pikinini blong yufala abaot wanem tijing oli nidim blong kasem wanwan.

Mi leftemap tingting blong evri memba blong yusum ol tul long ol websaet blong Jos mo ol program blong mobaelfon. Oli stap kam gud oltaem blong oli isi blong yusum mo i go stret wetem laef blong yumi. Long LDS.org, bae yu faenem ol tul we i helpem yu blong stadi long gospel, mekem hom mo famle i kam strong moa, mo wok long koling blong yu. Yu save faenem tu ol bubu blong yu we oli nidim ol odinens blong tempol mo ol tul we oli sapotem yu long wok blong fasin blong sevem man, wetem wok blong serem gospel. Papa mo mama i save lidim wok blong mekem ol pikinini blong olgeta i rere from baptaes, prishud, fultaem misin, mo tempol. Oli save helpem yumi blong wokbaot long stret mo smol rod i go long ol odinens mo kavenan blong tempol, mo kwalifae from ol blesing blong laef we i no save finis.

Long las konfrens long Epril, long jeneral prishud miting, mi tokbaot papa blong mi we i stap droem wan soldia wetem klos blong faet, blong tijim mi blong werem ful klos blong faet blong God, mo proteksen long spirit we i kam wetem.

Afta sesen ia i finis, wan papa i talem long famle blong hem wanem hem i lanem. Tru long insperesen, yang boe blong hem, Jeson, i lukluk long LDS.org blong harem mesej ia hemwan. Sam dei afta, hem i kam long famle haos naet blong serem lesen ia wetem ol brata mo sista blong hem. Pikja ia nao.

Pikja

Jason

Wan simpol konfrens mesej, we i kam long insperesen blong Lod, we pikinini i kasem, mo i tijim long wan famle long wei blong hem we i gat paoa. Mi lavem bresplet blong stret mo gud fasin. Mi lavem aean blong fet blong blokem ol faea ara blong devel. Hemia oli ol blesing blong konfrens.

Ol brata mo sista blong mi. Mi talem spesel witnes blong mi se Lod, Jisas Kraes i stap laef mo i stap long hed blong Jos ia. Hemia i jeneral konfrens blong Hem. Mi promesem yufala, long nem blong Hem, se sapos yufala i prea wetem wan tru hat blong harem voes blong Papa long Heven long ol mesej blong konfrens ia, bae yu faenem se Hem i toktok long yu blong helpem yu, blong mekem yu kam strong moa, mo blong lidim yu i go hom long ples blong Hem. Long nem blong Jisas Kraes, amen.