Klengeltengat er a Odanges

A ta er a kmal klebokel e medemedemek el teletael el dilubech el melluches er a chedaol llechukl a babier er a odingelel a Osobel el mo er a rechad er a Merikel er a uriul er a Kodellel me a Okisel er a Kodall. Tirka el rechad a mla mo chuarm er a klou el telemall el mlo uchul “e a rokir el beluulechad [el mo] diak el nga er a meral teletelel.”¹ Omelechesel aike el tekoi el milekdubech a ouchais el kmo a uriul er tia el klou el telemall e a rokui el chad a millemolem el lilangel,² e a delongelel aika el lengelir, te mle songerenger el kirel aomekungil, budech, me a osebelir.

Se er a Osobel letengel er a babeluades, e a rechad a mle eru el rebet er a Ochil. A kot a milekdubech er a uriul er a Lullekoi, loba chedaol klisichel:

“Momes, Ngak a Jesus Kristo, el ngii a re profet a mla olecholt a klaumerang er tir el kmo ak me dum er tia el beluulechad.

“E momes, Ngak e a llomes e klengar er tia el beluulechad.”³

Uaisei e mocha mengemedaol er tirka el mla er sei el kmo “bom dechor e morael me bedul ngak, e mngai chimam el me er bita er ngak, me dirrek el bo molechesuar a ika el util a deel er a chimak me a ochik, me bo modengei el kmo ngak e a Dios er a Israel, e dirrek el Dios er a beluulechad el rokir, e mla mo chuarm el kirel a klengit er a beluulechad. …

“Me tia er a bla lorael mong e le sioning er a mederir, te lilangel el mo klou loba ta el omelekoi, el kmo:

“Hosanna! Klengeltengat a mo er a ngklel ngike el Kot el Ngar er Bab el Dios!”⁴

E a uriul, er a mocha ongerung el taem, “e te rirebt el me er a ochil a Jesus.” E ng di tia kid el taem e tuleba moktek, e ke de mlo medengei el kmo te “uaisei el uleldanges er ngii.”⁵

Uchelel tia el rrak e ak mla er a ureor el mo oldingel er a stake el nga er a ngebard er a beluu er a Merikel. Ng mle ua bek el Sandei, di ua bek el miting, lobengterir a oumesingd el rechedal a Ikelesia. Ak ulemes er a rechad el soiseb er a chelsel a ikelesia e kmal nga er a omelengmes el mo ngmai a kingellir. Se el kmal mlo ulebongel el taem, e a cherrodech er a ta el siseball a mlo er ngii. Rechedam me a rechedil a millasm—bebil er a taem el nga er a meringel el blekeradel—el meruul er a rengelekir el mo chelellakl. Oumesingd.

E ng di, a uchei er a lomuchel a miting, e a omekllomes el tekoi el mla er a Chedaol Reng a siliseb er a chelsel a uldesuek.

Tirka el rechad er a ikelesia a dimlak el di le mlei el me rokir a urerel me a orrengesel a re mo mengedecheduch.

Tirka mlei el kirel a kmal el dmolech e muut el kmal el klou a ututelel.

Tirka a mlei el me oldanges.

Me tia er a lorael a temel tia el miting, e ak ulemes er a rebetok el rechad el ngar tia el ongdibel. Te uleba ua teletael er a babeluades, el blekeradel er a omengull me a budech. Kmu ngera el teletelir a dilemekii a renguk. A teletael el ulebang er a sel Sandei a ta er a tekoi el kmal mle tokubets.

Te mle oldanges.

Te mle melechesuar er a babeluades.

Ng mle sebechek el mesang er a blekerdelir.

E ak mle dmeu a renguk e uleldanges el obengterir. E tia er ak uaisei, e a Chedaol Reng a milngedecheduch er a renguk. E se ikid el sils, e ak silubii a ta er a tekoi el kirek, kirel a Dios, me a dirrek el kirel a mera el oldanges er a chelsel a klengar er kid.

Uriul-klebesei el Santo a diak el uriml se el bo el tekoi er a omesiou er a okedong er a Ikelesia. E ng di se el bebil e ke de mo omuchel el di omelekl a urered, el ua se el de mera el meruul a ureor. Bebil er a taem e a temed el nga er a miting me a omesiou er a rengedel a locha diak a chedolel er a tekoi er a odanges. E a lak sei, e ng diak doba se el diak el sebeched el mengaisisiu er ngii el chedaol el omeruul el mo er se el kot el ngar er bab—se el ngii a de mungakl el rengelekel a betik er a rengud el Demad er a Babeluades.

Cheroid er a ngi di el mokdubech, ungil el omekdubech, odanges a klou a ututelel a dodai er a chedaol tekoi er a klengar er kid. Ng tekoi el kid a kired el mesisiich a rengud el kirel, osiik er ngii, e melasm el mo melechesuar er ngii el tekoi.

Se el doldanges er a Dios, e ke de me duum er Ngii loba a olengesenges el beltik el reng, delemedemek, me a chat. Ke de kullii e nguu Ngii el kot el ngar bab el King, el Umeob er a beluulechad, e betik er a rengud e oubeltik el reng el Demad.

Ke de kullii e olengesenges er Ngii

Ke de nguu a klengar er kid el Mesang.

Ke de odars a rengud el nga er a mesisiich el nglunguuch,e ngmai a Tekingel, e nga er a deureng er a kerasia er ngii, e yaksok el mo oltirakl er Ngii el nga er a mui el klaumerang.

Oldanges er a Dios a kmal el klou a belkul er a chelsel a klengar er a disaiplo er a Jesus Kristo el sekum kid a diak denguu el me er a chelsel a rengud, e kid a mo osiik er ngii er a meringel el kelsuul er a omellach, ikelesia, me a templo.

A remera el disaiplo a mengaiel mo “oldanges er ngii el rirellii a babeluades, me a beluulechad, me a daob, me a madedok er a ralm—e oleker er a ngklel a Rubak er a llomes me a klebesei.”⁶

Ng sebeched el suub a betok el kirel a mera el oldanges se el domtab el kmo me kera a rebebil—rechad el tir a ualsa el diak el sa el kmal el kakerous er kid—obangel, meruul, e oldanges se el nga er a medal a chedaol.

Se er a kot el uchelel a 19th century, e a tekoi er a Kristiano a ulab el rokui e ng di te milcherei a uldasou el kmo a Dios a dirk mengedecheduch er a rechad. E ng di se er a spring er a 1820, se a milengodech el mocherechar se er a ngariou a rengul el kekerei el buik er a sers a tiluu er a delul a betok el kerrekar e luutubaruach e milluluuch. Se ikid el me er chelechang, e a baoch er a klebokel el ues er a ngarmedad, ocholt, me a oldingel er a babeluades el mei a mla tocholbii a beluulechad, el omekngeltengat er a rechad er ngii el lolab a meang el uldasou el kirel a teletelel me a moktek er a Dios me a Delongelel el lobengterir a rechad.

Oliver Cowdery a milsaod a ike el klebesei el ua “diak el kirel bo lobes. … Tia el Deureng! tia el omelbedebek! tia el ongasireng!”⁷

A tekingel a Oliver a uluuchais er se el kot el telengtengil el obengkel a klemerang el odanges er a chedaol—tekoi er a mesisiich el ongasireng me a dmolech el omereng el saul.

Bek el sils, e ng di se el kot el klou ututelel el ngii a Chedaol sils, kid a ngar er ngii a tokubets el techelled el mo melechesuar a omelebedebek me a olengesenges er a babeluades e odars a nglunguched el mo er a Dios el kirel a ungil klengeltengat me a kmal el oberaod el klechubechub er Ngii.

Tia a mo omekrolid el mo oureng. A ikaia kot el telengtengil a odanges.

Nga er a ngeltengat el sils er a Pentecost, e a Chedaol Reng a siliseb er a rengrir me a uldesuir a re disaiplo er a Kristo, el olab a llomes me a klaumedengei.

Di merekmo se el sils el tir a mla er a ike el taem el tir a mle rrau a rengrir el kirel a kmo ngera te kirir el meruul. A Jerusalem a mle kengaol el basio er a roltirakl er a Osobel, e te locha mlo melebedebek el kmo ngera te mo meruul el mertir.

E ng di se er a Chedaol Reng a milekeek a rengrir, e a rrau el reng me a keldidai el reng a mlo dibus. Chelsel tia el tokubetsel teletael el dilubech el kirel a mera el odanges, er a re Santo er a Dios a mlo ngmai a chedaol el llomes, klaumedengei me a mesisiich el olechotel a klaumerang. E sei a ulemdid el mo er a klaumerang.

Tia el sils el mong, e a re Apostol me a re Santo a uluureor loba blak el reng el omeruul. Oba klisiich, te ulemerk er a osisecheklel a Jesus Kristo el mo er a beluulechad el rokir.

Se el doldanges el oba chedaol reng, e ke de siotai er a llomes me a klemerang el me er a rengud, el ngii a smisichii a klaumerang er kid. A ika kid a dirrek el kmal el klou a ultutelel el kirel a tengtengil a mera el oldanges.

Chelsel a Babier er a Mormon e ke de silubii el kmo se er a taem er ngike el kekerei el Alma a mle chuarm er a ike el kirel el ngii a ulemtok, ngii a dimlak el di losisiu. Ngii a mle mesisiich “el merael er a bek el beluu … er a delongelir a rokui el chad … , el blai a rengul el meruul a ike el rokui el telemall el [ngii] a riruul el mo er a ikelesia.”⁸

Tia el omeleklel er a odanges el mo er a Dios el olab a klisiich a ngiluu a klou el teletelel a blak el reng el chad er a oltirakl.

A klemera el odanges a ngodechid el mo meral el ngar er ngii er a rengud e mera el disaiplo er a betik er a rengud el Mastang e Osobeled, el Jesus Kristo. Ke de mengodech el mo uai Ngii.

Ke de mo blechoel el medengei e oumekerreu. Betok a klausubes. Mo klou a beltikelreng.

Ke de mo medengei el kmo ng diak el sebechel el kmo ke de oubeltik el reng er a Dios e osisiu el taem e ke de chetid, kotouar, me a lechub ke de mengoit er a rebebil el meliuekl er kid.⁹

A klemera el odanges a orelid el mo er a diak el mesmesim el blak el reng el mo merael er se el rael er a chad er a oltirakl. E sei a mo orelid el mo er a mededaes el rael mo er a bliochel el beltik el reng. A ika a dirrek el klou a ututelel el telengtengil a odanges.

Se el bo kulebedebek erse el dilubech el ua bek el tutau er a Sandei, sei el ua bek el blai er a ongdibel, el ngar se el ua bek el stake, me lemuut er chelechang e ak mechas a renguk er se el tokubets el chedaol el tekoi el dilubech el ngii a mocherechar el omekngeltengat er a klengar er ngak.

Ak silubii el kmo alsekum kid a ungil el oltirakl a temed, okedong, me a ngercheled—dirrek el sekum ke de remuul a ike el rokui el beldukl el ngii a kedmekill er a “cherrungel” el ta el chad, telungalek, me a lechub e ng merredel— alsekum kid a diak doldanges er a chubechub el Osobel, chedaol King, e kmal el klebokel el Dios, e kid a diak doba sel el mera el deureng me a lechub e ng budech er a ebangkelio.

Se el doldanges er a Dios, e de kullii e denguu el oba se el osisiu el omelengmes el ua tirke el chad er a irechar er a beluu er a Merikel. Ke de me duum er ngii el oba diak el sebeched el metebengar el omelechesuar er a omelebedebek me a omelengmes. Ke de ungil a rengud el kirel a omereng el saul er a ungil er a Dios. E uaisei, ke de mo ngar ngii a urunguled

Ke de melebedebek er a tekingel a Dios, el ngii a mekeek a chelsel a rengud el oba llomes me a kelemerang. Ke de metebengar er a omengaisisiu er a chedaol tekoi el me er a klebokel el kerodel el ngii a di sebechel el moues el okiu a llemesel a Chedaol Reng.¹⁰ E uasei, e ke de nguu a klaumerang.

Se el doldanges, e a rengud a obtanget e kid a mo mera el merael er a bekesel a betik er a rengud el Osobeled, el Jesus Kristo. E mengai er tia el omeruul, e ke de nguu a bliochel el beltik el reng.

Se el doldanges, e a rengud a moterekokl er a nglunguched el mo er a ngeltengat el Dios er kid er a tutau, sueleb, me a kebesengei.

Ke de mellemolem el chedoliie kullii—er a blil a ongdibel, rekeblid, templo, me a rokui el ureled.

Sel doldanges, e ke de mok a rengud el mo er sel omokungil klisichel a Tngakireng er a Jesus Kristo.

A klengar er kid a mo oisechallme a olechotel a klodanges er kid.

Rodam me a rodos er ngak, a chedaol el tekoi el mekdubech a ngar er ngii a kekerei el uchul el kirel a ike el ngii a mekdubech el meliuekl er kid a ngar er ngii a klou el lerellii el kirel a ike el ngii a nga er a chelsel a rengud. Ng sioning er ngak el kmo a klemera el odanges a mo ngodechii a ua bek el osisiu el miting er a Ikelesia el mo lmuut el kma el mo tokubets el chedaol omesuub. Ng mo melisiich a klengar er kid, e kilou a klaumedengei er kid, e smisiich a klaumerang er kid. El uaise el sel de urekodel a rengud el mo er a Dios, el ua cheuodel el Psalmist, e ke de “soiseb er a sisebellel el oba omereng el saul, e mo er a ukerkeriil er ngii el oba odanges: [kid a] mesaul a rengud el kirel, e klengeltengat a mo er a ngklel.

“E le Rubak a ungil; a klechubechub er ngii a diak a ulebengelel; e a klemerang er ngii a mellemolem el mo er a rokui el telcheroll.”¹¹

Ngokiu a merang e mui el reng er a odanges, e kid a mokdubech e mukeroul er a oureng, klaumerang, me a bliochel el bletik el reng. E okiu tia el teletael, e kid a odak a chedaol llomes er a chelsel a rengud el kmard a klengar er kid el oba chedaol a belkul, mellemolem el budech, me a diak a ulebengelel el deureng.

Tia e a klengeltengat er a odanges er a chelsel a klengar er kid. Okiu tiang e ak ngariou a renguk el sioning el oba chedaol el ngklel a Jesus Kristo, amen.