Me lak Mobes

Ungil suelb, betik er a renguk el rodam ma rodos. Kede mla mukngeltengat e lokiu tial longdibel. Tial kot el rrak mek chedal a Cheldebechel er a re Teruich ma terung el Apostol a meral mle klebechel.Ng rrak el kumakes, mukeroul, ma tmolech e mekedekudem el longtik el mora Demak ra Babeluades.Ak melchesuar ra ngelsuil a nglunguchir a rechad er a blik, sechelik, ma rechad er a Ikelesia el meliuekl ra beluulechad. Mesulang ra omeletkiu ma nglunguuchiu.

Ng mlo rengii a techelek el mesterir a re kim kaiuekeid el chad, el bebil er tir a meketeket el kim kaudengei ma re betok el direke ki blom kebtech. Ng uriul ra kisang a sechelik el kudengelii e betik a renguk er ngii el meketeketang el taem el mla remlak el kutmeklii a tekingek er chelechal sils.

Sera kim kebtech, e a sechelik a uluchais er ngak el kmong mla mou chemau a ringel. Ng melechesiu er tial blekeradel, el ua ikel dilung, “mechitechetong ra klumerang” mek ngesuir. Ng mlo ungil a renguk el kmo ng sebechel louchais a ngara rengul ma tekingel el me rengak.

Ng ouchais e oureng meluut el ua ngaramong me lolchesuar sel reng e chelechang eng ngomdasu el dikeang. Meng ngouchisang, e ngak a blak a renguk el lorenges e meluluuch el mo medengei el kmo a Rubak ng ngara soal a bo kdung.

Locha ua re bebil er kemiu, e luleker ra ker el beot e bedochel el elduib ra chelitakl ra Primary el kmo, “Demak ra Babeluades, ke meral ngar ngii?”¹ Te ngar ngii er kemiu a locha oker er tial losisiu el ker, meng soak elmo ouchais er kemiu ersel ngeseu el bo kudersii el mora sechelik a urrungulek me a klaumerang er kemiu e loleketek e lomekbeches a uldesuiu el moltirakl el chedal a Jesus Kristo.

Ak mo muchel e lomeklatk er kemiu el kmo kom ngelekel a oubeltik el reng el Demad ra Babeluades e kmo a beltkil a rengul a di mellemolem. Ak medengei el ua ikal lomekduch a rengud el beltik el reng a chetituokel e dolatk sel sekum e ke meringel el mengisemuk malechub e ke cheuarem, ng telirem a rengum malechub e a mulureng a mlo diak el tekoi.

A Jesus Kristo a medengei a meringel e lomengisemuk ma ongarem. Ng ilitii a klengar er Ngii el kired. A klengar er Ngii a mle mui ra mekngit el lomeruul ruchei ra le mad, e lengelakl er a ngidil tekoi el dodengelii, engdi tngakireng er Ngii el me rekid a mle kot el ngarbab e lochotel a klikiid el beltkil a rengul.

Ng diak el chelibirukel, klengit, malechub eng soam a mo ngodechii a beltkil a rengul a Dios el me rekid. Sei a diak el belkul a delengerengel el lomeruul a subed,malechub el ngebetii a ngerchelem el mo uchul a rengum ra klengit el mrilelii. Lak ke mobes, el Demad ra Babeluades a medengei e betik a rengul er kau, e Ngii a keltmokl el molengeseu.

Sel kulbedebek er a teletael el ngarngii a David, eng ngara uldesuek ersel klou el llomes el de betik er ngii ra Babier ra Mormon: Chelechang, kemiu el rengelkek el sechal, molbedebek, molbedek el kmo ngsel bedul a Osebeled, el ngii a Kristo, el Ngelekel a Dios, e kau kirem el meleketek er a uchetemem; mesel diablong a lodureklii a mesisiich el iolt, ma biskelngel ngara iolt, ma rokui el klisichel bedul kau, eng ngmo diak a klisichel el ngoikau el morsel klengit el reng, ele kau el dechor er sel bad, el ngii a uchetemel a Dios, alsekum a chad a dechor er ngii eng diak el reuebt.²

A kuchais el kmo “sel kliokl ra klengit el reng ma diak a ullebengelel el ringel” a basio el diak a chad el soal el mo rengii. A sechelik a ulmelchesiu er ngii el merael el kirel.

Sel kungedecheduch er a rechad, el ua sechelik, e ak mla mengetiit a uldesuir el riruul ra betok el rrak el mlo uchul e tulbes a chedaol el tekoi, e mlo mechitechut, e mlo oumededenger. Mak milisiich er tir, eldi uai chelechang el kulisiich er kemiu, bo molbedebek, tokuni ra taem el soal mo mechitechut a klaumerang er kau, sera omolchesuar ra Reng e a klaumerang a mle mesisiich; momtab a ikel dodai ra reng el blam teketek. Ak yaksok el kmo alsekum e ke rullii tiang, e oridau ra tekoi el diak el ngesukau el sisichi a klaumerang er kau malechub e loltuub a moumerang, a ikel kesiokel el taem ra lolsob a klaumerang er kau a lmuut el mei el mera uldesuem lokiu a tmolch el nglunguuch mesel molsengerengel. Ak yaksok er kau el kmo ke lemuut el mo melchesuar ersel lomengeluolu ma mekekeald el reng el ngara ebangkelio ra Jesus Kristo.

Kede rokui el kired el kot e melisiich er kid ra reng e solang e mochu melisiich ra re ngara bita er kid. Bo blechoel lomtab a chedaol llechukl, e molbedebek a ikel loldasu ma molchesuar el blekeradel sel monguiu. Mosiik a bebil ra ngeseu ra klemerang el dirrek, engdi bom kerkikl er tial luleklatk el ngara chedaol lechukl: “E ungil a le ngarangii klubelemalsekum e toltirakl a lechul a Dios.”³ Mnga ra ongdibel ra Ikelesia, tokuni sel longdibel ra sakrament, e molai ra chedaol belsoil e momekbeches a telbilem, luldimukl ersel telbiil elmo blechoel el melatk er a Osobel mesel Reng er Ngii di lobengkem.

Meng diak el ior ra chelibirukel el bla deruul malechub e kede melchesuar el diak kede cherungel, eng sebeched el blechoel el lomekngeltengat e melisiich ra rebebil. Sel dolngeseu er tir lokiu a Kristo eng sebechel ngosukid el melchesuar ra beltik el reng ra Dios el delalem ra elsel a rengud.

Ng klou a ultutelel el dolbedebek ersel klisichel sel llach el ngara Deuteronomy: “Moba blak el reng el mengeluolu ra delbengem, me lak ke mobes a ikel tekoi el bla mues, me bol riid er a rengum el mo cherechar: e bo molsisechakl ra rengelekiu, ma rengelekir.”⁴

A telecheroll a mou kerebai a ikel tekoi el deruul. Mochotii a klaumerang er kau el mora telungalek er kau; molisiich er tir el mo melatk el kmo te mlo uangerang sera lolchesuar ra Reng ra klenagr er tir e lluches a ikel blekeradel ra babier ma reksii er tir ma ikal tekingir sel le bo rengii a usbechelel, e lomeklatk er tir ra Dios ra lungil el mo er tir.

Ke direk el medengei, ra Nephi ma rebebil er ngii ra luut el mora Jerusalem el mo melai a ikel sentziu el blatong el mle elduib a ikel reksii ra rechederir, luchul, me lak le lobes ra uchelir.

Ng dirrek, ra Babier ra Mormon, e a Helaman a ulemngakl ra rengelekel ra “re bladek” me lak e lobes er a klungiolel a Rubak:

“Momes, e rengelekei, Ng soak me bo molatk el mengeluolu a lechul a Dios. … Momes, mla mngakl er kemiu ra re bladek el tilobed ra beluu er a Jerusaselm; e tiang e kiltmeklii mesel mlatk e ngkliu e komelatk a ngklir; e sel mletkelterir e kom lematk a urrerir; e sel mlatk a urrerir e kom medengei ra le medung, ma lechukl, el kmo ng mle ungil.

“Ma le uaisei, e rengelekei, ng soak a bo moruul a ungil, me bol medung el kiriu, e lemeluches, eldi ua ikel mildung e miluches el kirir.”⁵

Te betok er chelechal sils a oltirakl ra osisiu el siukang sel lomngakl ra re ngelekir ra rulsemuuch el chad el ngara chedaol llechukl malechub e te re bladek el ua lolisiich er tir me lak e lobes a dikesir.

Sera ak mechell, e te milngeklak el Ronald A. Rasband. A ngklel a demak a oldanges ersel kuk dikesir. Esel A a mlodars er me rengak e lomeklatk er ngak e loldanges ersel kuk dikesel a delak el Anderson el Danish.

Ngkel demal a demal a demal a demak el Jens Anderson a mlara Denmark. Sera 1861 e a Rubak a ulekmekrael ra re teru el Mormon missionaris el mora blil a Jens ma Ane Catherine Anderson, me tulchotii er tir ma teruich ma elolem a rekil el ngelekir ra Andrew el mora mla moluut el ebangkelio. Tia e a mle uchelel a reksii ra klaumerang ra lomuchel el telungalk er ngak a meritm er ngii. A re Anderson’s a iliuii a Babier ra Mormon e mlo metecholb ruriul. Esel mlei el rrak, e a re Anderson a ultereklii sel lokedongel a profet elmo melboteb er a daob er a Atlantic elmo obengterir a re Santo ra Diluches Ngebard.

Klengit el reng, le Jens a mlad ersel lomerael ra daob engdi bechil ma ngelekir a lilemelmii el mora Salt Lake Valley, el mlong sera September 3, 1862. Meng mle meringel me a klengit el reng, engdi klaumerang er tir a di mlak el mesim, molmuut er a klaumerang ra betok el ngelekir.

siasing/Llecheklel

Sunga el ngara chelsel a obis er a Elder Rasband

A ngara obis er ngak eng telcherakl a siasing⁶ ra meral klebokel el lungil uleklatk el kirel sel mle kot el miting er ngak el kirel a rebladek metirkei el meketekt el misionaris. Ak melasem el diak kubes er tirke el chedak eleng klek a uchul meng diak kubes e mellemolem el melbedebek er tir ra klaumerang er tir.

Lak ke mobes, e ke omdedenger, malechub eng diak ke momtab a ikel chedaol el blekeradel. Sel luldesuel a cherarou a melasem el mengeuid er kid ra ikel dolchesuar ra reng, esel kuk soal a Rubak a omekelomes e melisiich er kid lokiu a urrelel.

Hall e kuchais er a okesiu ra klemerang el mle rengak. Ak kmal lungil el medengei ra taem ra kulchesuar ra nger lulekiu a tmolech e lomeluluuch. Tial nger a mle bleketakl e mesisiich. Engdi, ng di mlak mereched el louedikel el kirel sel kulechesuar er ngii e a uriul ra telkib el taem, e ak mlo melbedebek el sekum sel blo kulchesuar a meral tekoi. A bebil er kemiu a locha milchitikaik er a uai seikid el chelebeldil a cherarou el dirrek.

E a uriul, ak milkiis el ngar ngii tial mesisiich el bades el ngara uldesuek:

“Ng uaisei, ak kmur er kau el kmo, alsekum meng soam a tara sioning, e bol chelelakl a uldesuem e moluluuch el me rengak el ngara rengum. …

“Ngdi mlak el bol budech a uldesuem el kirel tial tekoi ra kulekoi er kau? Ngera ngodech el klou el sioning a mnguu el uai sel mlara Dios?”⁷

Ng kmal di ngii ma le Rubak a melekoi el kmo, “Chelechang, e Ronald, e ak mla subedau ra tekoi el kirem el mo meruul er ngii. Bom ketmeklii!” Ng mlo dmeu a renguk ra losemechokl e lomekrael lokiu a beltik el reng! Ak di mlo mechelaod ersel longitikaik a mlo sebechek el louedikel e lungil medengei el kmo nglunguchek a bla longer er ngii.

A kuchais er tial teletael, e rodam me a rodos, el louchais el kmo mekerang ea uldesued a le mereched el lobes e mekerang a blekerdelel a reng a lomtebechel er kid. Ak mla subii el lomkekedelad a ua ikal techall, “me lak kubes.”

Mora sechelik, me tirkel rokui el melatk el melisiich a klaumerang er tir, bok beskemiu tial telbiil: sel blak a rengmiu e loltirakl er a ebangkelio ra Jesus Kristo e oltirakl osisecheklel, e a klaumerang er kemiu a mo selbechakl, e mukerool. Mongeluolu a telbiil el mriruul, e lak ke momtab a blekeradel el meliuekl er kemiu. Bol blak a rengmiu el loungalek, rodam ma rodos, re edam ma re chedil, ruktemaol ma re ourot, re kaudengei elmo kasisiich er a delongeliu loba klaumerang e kauchais a blekeradel er a reng. Mollemolem el loumerang e ka mesim, molmuut ra alsekum a eltel a rau reng a soiseb er a klengar er kemiu e lokiu a teletelir a rebebil ra rechad. Mosiik a ikel mo meklemelsau e smisichau ra reng. Mchiridau ra blulak el sengk el lekong “klemerang” el kmal betekngang, e lak ke mobes el meluches a ikel molchesiu el “beltik el reng, deureng, budech, ongarem, delmedemk, lemalt, klaumerang, kle ngariou el reng, [ma] ulsecherakl el reng.”⁸

Mesel dolchesuar a ikel chetiteuokel el tekingel a klechad, e lak ke mobes a chedaol dikesem el ngelekel a Dios malechub eng sel diak a ullebengelel lomerael el tara klebesei e ke lemuut elmo kiei lobengkel, el lmuut el ngarbab er a ngidil tekoi el sebechel a beluulechad el meskau. Molatk a ungil tekingel a Alma: “Momes, a kmur er kau, e rodam, alsekum e ke melchesuar ra rengul el mla mengodech, mal sekum e ke melchesuar el soam el mengitakl er a elitakl ra okisel a beltik el reng, me kuker, ng sebechem el melchesuar er chelechang?”⁹

Me tirkel melchesuar ra usbechel a klaumerang er tir elmo mesisiich, kulengit er kemiu, Lak ke mobes! Adang lak mobes.

Ak sioning el kmo a Joseph Smith a mle profet er a Dios. Ak medengei e Ngii a milsang e mengedecheduch er a Dios el Demad ma Ngelekel ra, Jesus Kristo, eldi uai sel ra loluches a tekingel. Ak dmeu a renguk el di mlak el lobes e luchesii sel blekeradel, me bol sebeched el rokui el mo medengelii a klaumerang er ngii.

Ak melekoi el meral sioning ra Rubak el Jesus Kristo. Ngii a ngar; Ak medengei el ngar e dechor ra btelul tial Ikelesia. A ikal tekoi a kudengei, el cheroid er a ngidil ngor ma ngidil chad, e ngak a meluluuch me kau ma ngak a diak ke dobes a cheledaol el diak a ullebengelel el klemerang—e sel lorechudel a kmo kid a ngelekel a ngar e ou beltik el reng el Chad ra Blid ra Babeluades el sorir a di mo kired el diak a ullebengelel el deureng. A ikal klemerang a kulekoi loba ngklel a Jesus Kristo, amen.