Mngai a Klubelem er a Alma me a Amulek

A ta er a diak dobes er ngii el chad er a chelsel chedaol llechukl a Kekerei el Alma. Ng uaisei el mle ngelekel a chetengakl el profet, e ng di ng mlo cheroid er a rael el telkib el taem e kmal mlo “mekngit e dengerenger el chad.” Ng diak de sa ungil medengelii a uchul, e ng di ngii a ulemtok er a demal e millemall er a Ikelesia. Sel duch er ngii el mengedecheduch el mengesuseu er a rechad, a uchul e ng kmal mlo ungil.¹

E ng di a klengar er a Alma mlengodech lokiu a anghel er a Rubak er a bo el dum e longedecheduch er ngii el ua oto er a derremkel a derumk. Me ngedei el llomes me a klebesei, el Alma mla er a “klou el ringel, … el kmal klou el ringel er a bedengel.” E ng di, ng kmo ngera el tekoi, e ng mocha dobedebekii er a chelsel tiaikid el taem a diak a ulebengelel klemerang, el demal a ulisechakl: el kmo a Jesus Kristo a mei el mo “chuarm el kirel a kngtil a beluulechad.” A Alma meketeketang er a lobes er tial tekoi, e ng di chelechang e a “uldesuel a mla metechudakl er tiaikid el uldasou,” e ng mocha ngariou a rengul, e oba blak el reng, e odersii a klaumera er ngii er sel klisichel a tangkireng er a Kristo.²

Sera letobed er a chelsel tiaikid el teletael a Alma, e ng meral mlengodech el chad. Me ng ulemuchel er tiaikid el taem, e ng uldersii a klengar ngii el mo sumechokl aikel telemall el ngii a riruul. Ng meral mesisiich lokesiul a ouchel reng, klausubes, me a outekangel el ngara klaumerang

A uriul e a Alma mlengilt el mo nguu a deruchellel a demal el mlo bdelul a Ikelesia er a Dios.

A rebek el chedal a belurir a re Nephite a locha di mle medengelii a cheldechedal a Alma. A rua Twitters, Instagrama, me a Facebook er sel taem a locha di mle mui er a siasing me a cheldecheduch el kirel. Kede locha mesang el ngar sel kot el llel a babier er a Zarahemla Weekly e a rebek el chad er a omeluches a locha di mesaod er ngii, e locha tuobed er a tibi, me a katsudo er ngii meng locha tuobed. A dongedeb er ngii e ng locha kmal mirael chisel chad er sel taem.

E ng di Alma er a lesterir a rechedal lomerollir mocha obes er a Dios e bocha le mekedidai a rengrir el le kautok, e ng millilt el mo diak le ngara tekoi el buai e odersii a “klengar ngii el rokir el mo e ra ngarbab el priesthood er a chedaol Dios,”³ lolisechakl el kirel ouchel el reng er a klengit el mo er a re Nephites.

A kot, e ng betok el ungil klungiaol a milkedmokl lokiu a Alma—el mo el muut, er sera le bo er a beluu er a Ammonihah. A rechad er tial beluu a mle ungil medengei el kmo a Alma dikea loungerachel a tekoi el buai, e mle kekerei omengull er tir er a klisichel a priesthood lulebang. Te uleketui er ngii, oltuub er ngii, e odikii er a belurir.

Me ng moalech a rengul a Alma, e mocha iikrii a beluu er a Ammonihah.⁴

E ng di a anghel a dula er ngii me luut.

Ka di momtab er ngii: ng mle kirel lobult el muut el mo er a rechad el tir a uleketui er ngii e mekngit a blekerdelir el bedul a Ikelesia. Tia di locha kmal mle kengaol, e locha dirrek el sebechel omekodall el ngerachel. E ng di Alma dimlak el ko er a omael er a rengul. “Ng di mle “mereched lobult.”⁵

A Alma mla olsengerenger el betok el klebesei er a bocha lesiseb er a beluu. Me ngulengit er a ngodech el chad el kmo ng sebechel “msa chebuul mesiungel a Dios a sesei el kall me longang.”⁶

A ngklel ngika el chad a mle Amulek.

A Amulek a mle merau, e merael chisel er a beluu er a Ammonihah. Me ng uaisei, el resechir a rechedal a chelid el chad, e ng di a klaumera er ngii a mla mo mechitechut. A uriul e ng ulechais el kmo, “Ng betok el taem lemei okedong a mei er ngak eng di dimlak kurrenges, e ngak a mle mui el medengei aika el tekoi, e ng di ua lak [kumerang]; me ak millemolem el omtok er a Dios.”⁷

E ng di a Dios a milngedmokl er a Amulek, me sera lebetik er a Alma, e ng milngemedaol er a mesiungel a Rubak el mo er a blil, me a Alma kiliei lobengkel el betok el klebesei.⁸ Chelsel tiaikid el taem, e a Amulek a milkengii a rengul el kirel a klemechel a Alma, e a mesisiich el omelodech a mlei er ngii. Me ngulemuchel er tiaikid el taem, e a Amulek a dimlak di bo loumerang, ng dirrek el milsebechakl er a klemerang.

A Alma er a luut el merola el mo olisechakl er a rechad er a Ammonihah, e ng uleba ongeru el sioning osischeklel—el Amulek, el ngii a chad er tial beluu.

A ikel dilubech ruriul a obengkel a ta er a meral deureng e klengitelreng el cheldecheduch er a chelsel a rokui el chedaol llechukl. Ng sebechiu el menguiu el kirel er a chelsel a Alma chapters 8–16.

Chelechal sils, e ng soak lolengit er kemiu me bo momtab a eru el ker:

A kot: “Ngera sebechek el subii er a Alma?”

Ongerung: “Ak mekerang e uaia Amulek?”

Msall e kumuchel loker tirkel mla oungerachel, me a roungerachel er chelechang, me tirkel mo oungerachel er a Ikelesia er Jesus Kristo er medad el taem. “Ngera sebechem el subii er a Alma?”

A Alma mle tokubets el dachelbai e meduch el chad. Ng locha mle sebechel lomdasou el uase ngdiak lousbech a ngesou er a kmo ng techang. E ng di, ngerang rirellii a Alma er sera luut el mo er a Ammonihah?

A Alma miltik er a Amulek e ulengit a ngesou er ngii.

Me a Alma ngilai a ngesou lousbech.

Ngii di luchul, e sel bebil er a taem e kid a roungerachel a meringel er kid losiik e olengit a ngesou er a rebebil. Kede locha omdasou el kmo ng bai ungil a di le kid el kudmeklii a tekoi, a lechub e ng diak el soad el mo ongesang el mo er a rebebil, malechub e kede di melchedech el kmo a rebebil a locha diak el sorir el meruul. Kede blechoel lomael er a rengud a olengit er a rechad el mo ousbech aikel duch er tir el Dios a mla mesterir e bo el ngara chelsel tial klou el ureor lolsobel.

Ka momtab er a Osobel—Ngii ngulemuchel er a Ikelesia er Ngii el di ngii el tang?

Ng diak.

A klemechel a dimlak el du el kmo “Ko mengesang, bom cheroid e kuruul er ngii.” Ng bai millekoi el kmo “Mei, moltirakl er ngak.”⁹ Ngii a ulemekellomes, e ulengit, e ulsisechakl, e ulumerang er a roltirakl er Ngii el mo “meruul aikel tekoi el kemiu a mla mesekak el meruul.”¹⁰ Tiaikid el teletael, a uchul e a Jesus Kristo a dimlak di longederoder er a Ikelesia er Ngii ng dirrek el milngederoder er a Remesiungel.

Ngii di el deruchall el kau a ngarngii—a moredel er a chelechad er a deacon, a moredel er a stake, malechub a om ngara Area President—e a mo uchul e ke ngoriakl, a sel msikiterir a rechad el mo ngosukau.

Ng locha chad ngariou a rengul a lechub e ng diak msal mesang er a chelsir a rechedal a ikelesia. Ng locha dirrek el chad el diak el sal semeriar malechub el sebechel mo mesiou. A rechad el mo olngeseu er kau a sebechir mekekerei malechub e te meklou, meklou el chad malechub e te redil, diak el sal meduch, mesaul a rengrir, malechub e ng diak el mesisiich er a Ikelesia. E ng di sel diak modengelii a kmo tir oureng rongesau el kmu er tir el kmo “A Rubak ousbech er kau! Ngak ousbech er kau!”

Chelsel a rengrir a rebetok el chad e ng sorir el mesiou er a Dios. Ng sorir el mo donguu er a chelsel Chimal. Ng sorir el meringel e loureor el kudmeklii a beluulechad el kirel sel luut er a Osobel. Ng sorir el mekedecherur a Ikelesia er Ngii. E ng di tomael a rengrir el omuchel. Te blechoel el mengiil er sel oderucher.

Ak siotai er kemiu el mo omtab er tirkel ngara branch me a ward er kemiu, me a re ngara mission me a stake er kemiu, el mengiil rongesii okedong el mo oureor. A Rubak a mla oureor lobengterir—e mengedmokl er tir, e melemdemk a rengrir. Mosiik er tir loba rengum.

Bo mesterir. Mosischekelterir. Mo mekellomes er tir. E molengit er tir.

Mouchais er tir a tekingel a anghel el mo er a Amulek—me a klengeltengat er a Rubak le bo er tir me a delengcheklir.¹¹ Kom locha mo mechas a rengmiu el mo metik er a meral blak a rengul mesiungel a Rubak el omko ng dimlak ongit el mo er ngii e ng millemolm el uaia di le berrotel.

Ng uaisei el bebil er kid a kirir lomes e osiik er a uaia Amulek, e ng di kuk denguu er a rebebil e a bai ungil ker a kmo, “Ak mekerang e uaia Amulek?”

Kom locha uai ngii, el chelsel a betok el rak, e ko merael mo diak msal semeriar loltirakl. A ngeuil a klaumera er kemiu a locha kekeringang. Ke locha mla oridau er a ikelesia er a Kristo. Ng locha dirrek el mla metemall a rengum malechub e ng kesib a rengum. Me kom uai tirkel chuodel el chedal a Ikelesia er a Efesus, el mla mo cheroid er “kot el ngii a somiu”¹²—me a klebokel, e diak a ulebengelel klemerang er a ebangkelio er a Jesus Kristo.

Kom locha, dirrek el uaia Amulek, el medengei er a chelsel a rengmiu el kmo a Rubak a mla mo betok el taem “lomekedong er [kemiu]” e ng di “dimlak mrengesii.”

E ng di, a Rubak a mesekemiu el uai sera lomes er a Amulek—er sel techellem el mo mesisiich el mesiungel el klou a belkul ureor a medechel el kirem el mengiil rongesii a klaumera er kau. Ngarngii a ureor el diak a chad el mo kudmeklii el uai kau. A Rubak a mla otilii a klaumera er ngii er kau loba chedaol priesthood er Ngii, el ngii a urrekodel er sel chedaol techall el mo omekngeltengat e mesebechakl er a rebebil. Morrenges loba rengum e moltirakl odbechel a reng.

Ng kmal rirtechii a renguk a cheldechedechal a tal odam el di mle ngii loker ngii, “Sel lomekedong a Rubak, e ak rongesii?” A kmo omekedong er ngika el smiich el odam el David.

A David a ulebult el mo chedal a Ikelesia er a kmeed el okedei el rak er a memong. Ng mlo er a mission e a uriul e mlo er a skuul er a llach. Tiaikid er a le ngara skuul e loureor el mesiou er a kekerei el telungalek er ngii, e ng miltik a bebil er a tekoi el kirel a Ikelesia el rirelii el mlo rrau a rengul. Sera lolemolem el menguiu aikal teloched el tekoi, eng mirrael mengal mo cheldeng a rengul. Ng mocha olengit me a ngklel lotebedii er a record er a Ikelesia.

Me ngulemuchel er tiaikid el taem, e ng mle uai a Alma er sel mekngit el taem er ngii, le David a chiloit a betok el temel loumondai lobengterir a rechedal a Ikelesia, e mengedecheduch er tir er a online el melsemai a klaumera er tir.

Ng kmal mle meduch er tial teletael.

A ta er a chedal a ikelesia el ble loumondai er ngii a kuleker ngii el Jacob. A Jacob a mle blechoel bekokeuii e mengull er a David, e ng di dirrek el mle mesisiich el mesebechakl er a Ikelesia.

Chelsel a betok el rak, e a David me a Jacob a kmal mlo kakull e sechelei. Sel dimlak lodengelii a David a kmo a Jacob a meketeketang el meluluuch el kirel a David e mle blak a rengul uaisei el meketeket el taem. Ngilai a ngklel ngika el sechelil er a prayer roll er a templo er a Rubak e ulureng me bol medemdemk a rengul a David.

Cherengel a taem, el mikekokil, a David el mengodech. Ng mocha melbedebek aikel taem lulmelchesiu a chedaol tekoi, e mlo dobedebekii sel deureng el mle tal lolchesuar er a le dirk el chedal a Ikelesia.

Ng uaia Alma,le David a dirkak lobes el rokui aikel klemerang er a chelsel ebangkelio el ngii a mle tal lolab. E uaia Amulek, el David a ulemelchesiu er a Rubak lolngeseu er ngii. E ng di chelechang e a David a teloi er a rechad er a llach—el ngii a chetengakl el ureor. E bla bo lodengelii a rechad el kmo ng ta er a ouketui er a Ikelesia, e kmal mle ngarbab a rengul me ng mle meringel er ngii lolengit me luut el me soiseb er a ikelesia.

E ng di, ngii a millemolem lomelchesiu er a Ungil Mengkar a Sib el mengurs er ngii.

Ng mlo mui loumerang er a chedaol llechukl el kmo “A le ngarngii er kemiu ousbech a llomes, e lolengit er a Dios, el mimokl el mesterir a rokui el chad, e diak longreos; me bo lengai.”¹³ Ng milluluuch, “Kau el Dios, ng soak el mo Uriul-klebesei el Santo, e ng di ngarngii a kerik lousbech a nger.”

Ng mocha omuchel lorrenges er a odbechel a Reng me a ungil nger er a resechelil, el diak el uai ngii er a ngaramong. Cherengel a taem, e a rraureng er ngii a ulebult el mo klaumerang, el mo el muut er a bocha lodengei el kmo, ng sebechel lomelchesiu er a klaumera er a Jesus Kristo me a mla moluut el Ikelesia er Ngii.

Tiaikid, e ngii a mlo medengei el kmo ng kirel mengeroid er ngii er a kldidai el reng e mo meruul aikel ngii a kirel meruul el mo sebechel muut el soiseb er a Ikelesia.

A uriul, e a David a ngiluu a techolbechelid e ulemuchel lomechur a sils e ng mo sebechel muut el moluut aikel klengeltengat el kirel.

Ng dmeu a renguk louchais el kmo tial mlomerek el summer, e a klengeltengat el kirel a David a mloluut el mo er ngii. Chelecha e ng mla lmuut el mo mesisiich el chedal a Ikelesia e mesiou el sensei er a Gospel Doctrine er a ward er ngii. Ng mai a bek el techall e mengedecheduch el kirel a beltel, e mesmechokl aikel tellemall el riruul, e ouchais el kirel a klaumera er ngii er a ebangkelio me a Ikelesia er a Jesus Kristo.

Rodam er ngak, me a resechelik, mei e bo dosiik, e bo de betik, e domekrael, e dultuil er a rebebil er a rechad er a ikel ward me a stake el de ngarngii. Te kmal betok a rechad el uaia Amulek er a chelsel a Ikelesia er chelechal sils.

Ng locha ngarngii omodengelii. Malechub e ke ta er tir.

A Rubak a locha meketeketang el mengelulau er kau, el mengelechel er kau me mluut el mo er ngike el kot el soam, e modars a duch er kau, a lechub e bom klikiid lousbech er a priesthood, e mosiu el kaukledem kau me a Resanto lolekeed er kemiu er a Jesus Kristo e mengederoder er a rengedel a Dios.

A betik er a rengud el Osobel a medengei el kmo ke ngar ker. Ngii a medengelii a chelsel a rengum. Ngii a soal losiik er kau. Ngii a mo odars chimal lekor kau. Ke di mekengii a rengum el mo er Ngii. Ng urungulek me tirkel mla touchakl er a rael er a roltirakl—luldimukl a di le telkib—a mo melbedebek er a klungiolel me a chubechub er a Dios, e mo mok a rengrir, e subii a Alma me a Amulek, e remenges aikel tekingel Osobel el ngii a ngmodech a klengar tir: “Mei, moltirakl er ngak.”

Ak mengelechel er kemiu el mo oltirakl er a Okedongel, le ng klemerang el tirkel mo oltirakl er ngii a mo meridm a ngkedel babeluades. A klengeltengat er a Rubak a mo keldoel er tir me a delengcheklir.¹⁴

Aikang a kuchais e meskemiu a klengeltengat er ngak el Apostol er a Rubak el ngara ngklel a Jesus Kristo, amen.