“Omko Ko Mle Medengelkak”

A otilii a klaumera er kid er a Jesus Kristo a mo ultuil er a ikel ungil omerellel a Osobel, chubechub, me a krasia.⁷ Ke de omuchel el meral mo medengelii Osobel sel domuchel el mo ultuil er a ikel chedaol tekoi el dolab e bo dolasm osischeklel, el di merekmo le bo er ngii a telkib el basio er a chelsel a rengud el kirel a Tekingel.⁸ Sel lorael meleketek a klaumera er kid er a Rubak, e ke de mo oumera er Ngii e mo ansing er sel klisichel el olsobel, omekungil, e melisiich er kid.

A mera el klaumerang a mokdubech lokiu a Rubak e blechoel uchul a ungil omeruul. “A klaumera er a [Kristo a] kot el osisechakl er a mla mocholt el klechelid, … e dodai er a rokui el llemalt, … e uchul a moktek er a rokui el mellomes el chad.”⁹ A omerelled a kirel loltirakl a meral bleketakl el osisechakl el mla muchais er a Osobel le tia ikid a uchul e ke de mo nguu e mo ultuil er a meral klaumerang, le “klaumerang el diak longitengtik a ulekeuad.”¹⁰ Kid a kired el mo “nga er a omerellel a tekoi, ng diak di dorrenges el merekong.”¹¹

A rongesii a tekingel a Dios me a nguu a chedaol sengk er a klaumerang er a Osobel a kabekbuk el tekoi, le “klaumerang a mei lokiu orenges, el rongesii a tekingel a Dios.”¹² Ke de mo medengelii e medengelii oto er a ngerel sel dosuub e domekeek er kid er a tekingel el nga er a chelsel chedaol llechukl,¹³ e meral nga er a rengud e meluluuch el mo er a Chedam el nga er a Ngklel,¹⁴ e osiik er a ongelodel Chedaol Reng.¹⁵A suub e oltirakl er a klengar kid a osischeklel a Kristo a kirel mekedmokl ruchei er a denguu a sengk er a klaumera er kid er Ngii.¹⁶

A ultiled er a klaumerang er a Rubak a klou a belkul kedmekled el mo oltirakl er Ngii.

“A Jesus, er a lorael er a debel a Galilee, e ng milsterir a reteru el chad, a Simon lokedongall el Petrus, me a ochellel er a Andrew, lomuked: le tirka mle chad er a omenged.

“Meng dula er tir el kmo, Moltirakl er ngak, e a kmo rullemiu el mo oumenged er a rechad.

“Me te di mle mereched el chemoit a ukedir, e merola lobengkel.”¹⁷

A Petrus me a Andrew a mesisiich el okesiu er a rongesii e oltirakl er a Mastang.

A Osobel a dirrek el olisechakl er kau me ngak, “Alsekum a ngii di el chad a mo oltirakl er ngak, e bo likrii a klechad er ngii, e le nguu a kerus er ngii, e bo loltirakl er ngak.”¹⁸ A mo oba kerus er Ngii a belkul a kmo ke de mo imikr a rokui el mekngit me a ngibesereng er a kloklel a beluulechad e mo oltirakl a llechul a Ruabk.¹⁹

A Osobel a mla mellach er kid me bo de uai Ngii.²⁰ A le uaisei, e a mo oltirakl er a Rubak a uldimukl oltirakl Okesiul. Ke de mellemolem el mo medengelii a Rubak sel dosiik lokiu a klisichel a Tngakireng er Ngii el uchul e ke de mo uai Ngii.

Se er a le nga er a beluulechad, e a Jesus a ulechotii a rael, e uleba medal omerael, e ulechotii a cherrungel lokesiu. “A meral ungil teletelel a blekerdelel, cherrungel el klechad, me a omerellel”²¹ a meskid a blak el reng el moktek me a bleketakl el rael sel doltirakl er Ngii el ngar sel rolir a roltirakl.

A doltirakl er a Osobel e ng dirrek el rullid el mo “ungil medengelii a meral rael er a klengar el dokiu ngii”²² loltirakl er sel soal a Dios. Tial klemedengei a diak el ko er a rrau a rengud er ngii e diak lultuil er a ikel ngii a soad el meruul er tial beluulechad malechub el ngii di el ngera el melutk el kirel a tekingel a beluulechad. Ng bai, ultuil er sel duch el reng e mellemolem el ngar sel rael loltirakl a telbiil el ngii a rael er a klengar el Soal.

A berrusel a Lehi er a chelsel a Babier er a Mormon a ochotii a rael el kired loltirakl er ngii, a ongarm el bo dechelebangel, me a ikel chedaol ngesou el mo ngosukid sel doltirakl e dorael bedul Osobel. A omelasem el ngar sel melemalt e chibutek el rael a Ngii a soal bo doruul er ngii. Sel bo denguu a redechel sel kerrekar e meral “obult el mo er a Rubak”²³ a ngii a klengeltengat el Ngii a meral soal a bo dengai. A le uaisei, e Ngii olengit er kid el kmo, “Mei, e moltirakl er ngak.”²⁴

A ultuil er a klaumerang me a otirekled er a Jesus Kristo a ngii a meklou a belkul kedmekled el mo mesiou er Ngii.

“Le ng me kera chad e medengelii a mastang a lak losiou er ngii, ma le ngodech el chad er ngii, el rengul me a uldesuel a kmal cheroid er ngii?”²⁵

Ke de mo mui el medengelii a Rubak sel sekum e ke de mesiou er Ngii e oureor el mengederoder er a Rengedel. Sel bo de uaisei, e Ngii a mo bekerurau el meskid a ngesou er bab, chedaol sengk, me a chachisois el duch er kid. Kid a kmal diak bo decheloit sel doruul a Urerel.

Ng mla melekoi el kmo: “Ngii a mo okiu medad, Ngii a mo nga er a kadikm me a katur kid, e a Reng er Ngii a mo nga er a chelsel a rengud, e a reanghel er Ngii a mo iliuekl er kid el sobecheklid.”²⁶

Ke de mo medengelii Osobeled sel doruul el mo er sel tkul er bab el sebeched el mo er sel Ngii a soal a de bo er ngii, sel dolasm el melekoi a ikel Ngii a soal a dolekoi, me a sel bo de sel Ngii a soal a bo de ngii.²⁷ Sel demui el kongei er a ultiled er Ngii, e Ngii a kilungii sel dechad el muut el kmal mo ungil mesiou. E mekekokil, a ikel soal a rengud el mo osisiu ngii me a ikel Ngii a soal, me a moktek er Ngii a mo moktek er kid, el mo uchul e ng “diak dolengit er sel ngii a omtok er a [Soal].”²⁸

A bo dosiou er Ngii e ng kired loba rokir el rengud, uldesued, me a klisiched.²⁹ Osisiu, sel dosiou er a rebebil e ng oridii sel rengud el di melatk el kired me a dirrek sel bechelingaol reng er a chad. Ke de meral mo oubeltik el reng el mo er tirkel dosiou er tir. Le omesiunged el mo er a rebebil a olechotel omesiunged el mo er a Dios, a uchul e ng meral mo dmolech a beltkil a rengud er Ngii me a rodam me a rodos er kid. Tia ikid el beltik el reng a olchotel a chedaol sengk er a dmolech el beltik el reng, el ngii a klikiid el beltik el reng er a Kristo.³⁰

“Moluluuch el mo er a Chedam loba rokir el klisichel a rengum, me bo mui er tial beltik el reng, el ngii a mla odersii el mo er tirkel rokui el meral oltirakl er a Ngalek, el Jesus Kristo; me bo meral ngelekel a Dios; me sel dum e ke de mo uai Ngii, le ke de mo mesang er sel teletelel; me bo mo ba urungulel; e bom klikiid el uai ngii el klikiid.”³¹

Ke de meral mo medengelii a Rubak sel demui er a beltik el reng er Ngii.

Ng locha sebechel tekoi el ngar ngii a klaumera er kid er Ngii, oltirakl er Ngii, mesiou er Ngii, e sola diak doumera er Ngii?

Ak medengelterir a rechedal a Ikelesia el kongei a ikal klemerang el osisechakl me a suobel el nga er a chelsel chedaol llechukl e mla ngar tiei e ouchais. E ng di ng meringel er tir el mo oumerang el kmo a ikal klemerang el osisechakl er a ebangkelio a kmal sebechir loltirakl er a klengar tir me a klechad el tir a nga er a chelsel. Ng uaia le ngar ngii a klaumera er tir er a Osobel, e ng di te diak loumera el kmo a ikel mla metib el klengeltengat er Ngii a medechel el kirir malechub e ng sebechel usbechall er a klengar tir. Ak dirrek el mla mesterir a rodam me a rodos el kmal blak a rengrir meruul a ngerchelire ng di a mla moluut el ebangkelio a uaia le dirkak bol mesisiich el klemerang er a klengar tir. Ke de mo medengelii a Rubak el diak di doumera er Ngii ke de dirrek el oumerang a ikel Ngii a mla dmung me a yaksok el Ngii a mla remuul.

Chelsel a Beches el Renged, e a tal chedam a ulengit er a Osobel me lomekungil er a ngelekel. A Jesus a ulenger:

“Omko ke di oumerang, e a rokui el tekoi a mo mekedmokl er ngike el ngii oumerang.

“Me a demal ngika el ngalek a di mle mereched el longelang, e dula el kmo, Rubak, a kuumerang; mngesukak er a ikel diak kuumerang.”³²

Ng betok el taem el bla kulbedebek er tial ongtil a chedam: “Mngesukak er a ikel diak kuumerang.” Ak melbedebek el uase a ongtil ngika el rubak a locha dimlak di lolengit a ngesou me luchul e bo loumerang er a Jesus el Osobeled me sel klisichel el omekungil. Ng locha mla mo medengei el kmo a Kristo a meral Ngelekel a Dios. E ng di ngii a locha ulesbech a ngesou el mo oumerang er sel klisichel a Mastang el omekungil el kmo ng meral sebechel el mo omekngeltengat er a betik er a rengul ngelekel. Ng locha uluumerang er a Kristo e ng di dimlak el sal loumerang er a ngii me a klisichel ngii el Kristo.

Ke de blechoel louchais el kirel a ikel tekoi el dodengei el uase ng klemerang, e ng di a ker el mei er kid a kmo ke de oumerang a ikel dodengei.

A chedaol ruoll el mekedmokl er a ulterekokl el priesthood a meklou a belkul kirel a klaumera er kid er a Osobel, me a dirrek el mo ungil medengelii, e, oumerang a ikel dodengei.

“A [Melchizedek] Priesthood a mengedmokl a kedmekill er a ebangkelio e oba kiis er a ikel ongasireng el tekoi, luldimukl er a kiis er a klemedengei er a Dios.

“A le uasiei, e a klisichel a kledios a mocholt lokiu chedaol ruoll.”³³

Ke de oumerang e meral mo medengelii a Rubak sel sekum a kiis er a klemedengei er a Dios a mekedmokl lokiu a Melchizedek Priesthood sel bok a chesimer el uchul me a dersta er kid a nguu a klisichel a kledios er a klengar kid. Ke de oumerang e meral mo medengelii Osobel sel doltirakl er Ngii e dengai e doltirakl a chedaol ruoll e bo dolab a meral blekerdelel.³⁴ Ke de oumerang e meral mo medengelii a Kristo sel domelchesiu el mla mengodech, e bo dungil, e de mesisiich, e de klikiid lokiu a Tngakireng er Ngii. Ke de oumerang e meral mo medengelii a Mastang sel sekum a “klisichel a tekingel a [medalm a risel] er kid”³⁵ e llechukl er a uldesued me a rengud³⁶ e mo “mechei a rokiu el kengtid el mo [Medengelii].”³⁷

A oumera er Ngii a mo medengei el kmo a ikel chachisois el klengeltengat er Ngii a medechel el kirel a klengar er a redersta er kid me a telungalek. A oumera er Ngii loba rengud el rokir³⁸a mei sel dolemolem el nga er a rolel a telbiil, e osiik er a sel Ngii a soal, e oltirakl a ikel moktek er Ngii me a temel kired. Sel bo doumera er Ngii—e dekengei a ikel uase a klisichel me a yaskok er Ngii— a merang e ng meskid a bleketakl el ues me a budech er a chelsel a klengar kid.