Sioning er a Dios
Ma kulengit mem tomer a klengit el reng el kirel a tekoi el omriruul me a uldesuem el kirel a ngerang sebechem liluut el remuul sel mouchais er a ebangkelio. Ng bai, moluluuch “el mo dechor el [sioning] er a Dios.” Tiang sel bai melisiich a blak el reng ra bai klengit el reng.
Betok el meklou a ututelel el urelel a Dios a diak lodengei a betok el chad er a beluulechad. Malta e sel okolem el century er a uchei er a Kristo a ulecholt er tirkel ungil chad er a uldasuo el uai a Confucius er a Sina me a Buddha er a Eastern India, engdi sel klisichel a priesthood er a Dios a mla er a Daniel, el ngkel profet el mle kiei er a kelbus er sel temel a king Nebuchadnezzar er a Babylonia.
Meng rau a rengul er tial berusel, a King Nebuchadnezzar a mle soal tirkel chad er a olai me a ulaoch el subedii el kirel tial berusel. Meng uaisei, dimlak el sebecherir louchais er a king el kmo ngera tial berusel e milekoi. “Ng diak a tal chad er a beluulechad el [sebechel subedau kau el kuoll er a ikel soam] el mo medengei.”1 A King Nebuchadnezzar a ngilasech a rengul er tir eleng dimlak el sebecherir lochotii tial berusel el mo er ngii meng dilu el kmo tirkel rokui el counselors er ngii a mo mad.
A Daniel, el ngii a ta er tirkel mellomes el chedal a king, a miluluuch el kirel a “klechubechub er a … Dios … me lesodii sel berotel.”2
A ongasireng a dilubech. Sel berotel el King a milrusii a lulechotii er a Daniel.
Te ngiluu a Daniel el mo mesang a king. “Kau e ng sebechem el subedak er a mle berrusek me a belkul?”
A Daniel a ulenger:
“A remellomes a rengrir el chad , chad el meduch el omes a btuch, chad er a olai [a diak el sebecherir el ouchais er kau er tial berusem]. …
“Eng di ngar ngii a Dios el ngara eanged el [ngii olecholt a berrotel] ng mla subedau kau el kuoll … el king el Nebuchadnezzar er a ikel mo dubech er a uriul klebesei. …
A Daniel a milekoi, “Dios el ngara eanged” “a [mo] toketekii a rengedel, [bad el di mle ngii el obached er a tkul a rois el dimlak a chad el mechedii, el ngii a mo klou el rois el mekekii tial beluulechad] diak el sebechel [ el mo] metelmall … [ngbai di] medechel el mo cherechar.
“… A Daniel a dilung, “Ak mla subedau er a kmal mle berrusem,” e mla “meskau sel … meral belkul.”3
Ma berrusel blal lochotii a belkul, ea king a milekoi, “A Dios er kau a kuk ngarbab er a rokui el chelid, el ngii a Rubak er a re kings.”4
Mesel ongasireng el Dios a rirelii el mo er a Daniel e ng mlo er ngii sel ues er a ngar medad el taem er a ebangkelio er a Jesus Kristo el liluut el me er a beluulechad, a rengedel el mo mekekii tial rokir el beluulechad, “e diak [el]bol metemall … [ngbai] medechel el mo cherechar.”
Sel lidisir a rechad er a Ikelesia er a uriul klebesei a mekesai, el uaisel Nephi a ulemlaoch el kirel, e ng di tir a bai mo ngara bek el beluu er a beluulechad, ea klisichel me a ruoll er a priesthood a sebechel mo er tirkel semeriar el melai er ngii, el omekeik er tial beluulechad el uai a Daniel sera lomlaoch er ngii.5
Sera 1831 ea Profet Joseph Smith a ngiluu tial ues: “Sel kiis er a rengedel a Dios [me a cheldellel a Israel e raikel eual ullebongel er a beluulechad] a mo er a rechad el ngara beluulechad, meng ngar sei ea ebangkelio a mo er a ullebongel er a beluulechad, mesel bad el di mle ngii lobached er a tkul a rois el dimlak a chad el mechedii, molemuut sel bol bekekiii tial rokir el beluulechad.”6
Ngerachel el de kaingeseu
Sel chedellel a Israel a ongasireng el di uai sel klou el puzzle el aikel tebechedel a mo kabtech er a uchei er sel klebokel el Ongeru el taem el mei a Kristo. Meng osisiu el teletael e kid a kora mo rau a rengud el kirel sel klou el lochur e ra tebedechel aikel puzzle, el tirkel Santo er a uchei a ulemdasuo aikel ngerachel el mo nguu tial luut er a ebangkelio el mo er a beluulechad a mo meringel el teletael. Me te omuchel, ea tal chad, me a chimong el tebedechel a puzzle er a tal time, el smiik aikel melemalt el bkul a puzzle, loureor er a lemalt el omeruul er tial chedaol lureor. Kekerei ma kekerei, e sel bad el di mle ngii lobached el dimlak a chad el mechedii a mocha melitai; el ngara dart el mo er a telael, el mo er a teruich el telael, me chelechang e ng million el chad er a Uriul-klebesei el Santo el meliuekl er a bek el beluu a omech er sel puzzle er tial klebokel e ongasireng e lureor
Derta er kid a tebedechel a puzzle, me a derta er kid a a olngeseu el melecha a ikel kuk dolab. Kau a klou a ultutelem er tial klou a blekul a tekoi. Osenged ra ngarmedad a bleketakl. Ng sebeched el mesa ongasireng el melemolem ma chimal a Rubak el mengetikaik er kid er a urered el merkui a ikel dirk ke teleu. E seikid, e ngkel “Ngarbab el Jehovah a mo kmu el kmo ng mla merku a ureor,”7 e seikid e ng lemuut el mei el mui ra ngarbab el klebkall.
A President Thomas S. Monson a dilung: “Chelechang e ng taem el rechad er ikelesia me a re missionari el mo kabetech, e mo dmak loureor… el lobtiterir a rechad el mo er Ngii. … Ngii a mo olngeseu er kid er a ureled alsekum ke de olecholt a klaumerang el mo meruul a Urellel.”8
A chedaol el miltutk el ngerachel el mle tal ngara ongelngelir a re full-time el missionary a ngar kid er rokui. Kid el rokui a soad el louchais er a oltel a ebangkelio, e ngak a oureng a saul, er tirkel telael el chad el metecholb er a bek el sandei. E ng di oba tial klebokel el klengeltengat, e sel cheokl el kirel a rodam ma rodos ma semeriar el reng el mo oldeu a rengul a Dios a oba sel orrechudel el mo ouchais e melisiich er sel rengedel a Dios el meliuekl er a beluulechad.
Telkelel a klengit el reng
Malta ngar ngii a rengum el soam louchasi er a ebangkelio, e kau a locha diak el sal mo ungil a rengum el kirel aikel blam ruul. Ng locha ngar ngii a sechelim el uasei, “Ak mla mengedecheduch er a rechad er a blik me a resechelik el kirel a Ikelesia, e ng di bebil a sorir, ea rebebil a kotouar, me ngak a mla mo diak el soak louchais. Ak medengei el kmo ngkirek el melemolm, e ng di ak mla mo diak kudengei, ma kumelchesuar el mekngit a renguk.”
Ng soak el ngosukau.
A klengit el reng a klou a ututelel eleng rullid el mo medengei aikel tekoi el kired el mo omekngodech, e ng di ngar ngii a telkelel sel bol ngosukid.
Klengit el reng a di uai a bateri er a ikel mlai lousbech a kasoring. Ng sebechel mekerdii a mlai, orelii a mesil, e mekerdii a otelel a mlai, e ng di diak el lebesang a cheluchul el kirel a kemanget el lomerael. Tia el bateri, sel dil ngil tang; e ng diak el sebechel remuul a rokui er a mlai. Ma klengit el reng meng uaisei.
Ma kulengit mem tomer a klengit el reng el kirel a tekoi el omriruul me a uldesuem el kirel a ngerang sebechem liluut el remuul sel mouchais er a ebangkelio. Ng bai, moluluuch, el ua Alma sera lulsisechakl, elkirel a techall “el mo dechor el [sioning] er a Dios er a bek el taem me a rokui el tekoi, me a ngii dile basio … ma [rebebil] le mosobel er a Dios, me bo mulcherangel lobengterir tirkel mo ngara kot e lokiis er a kodall, [me] bom nguu a diak a ulebengelel klengar.”9 Tiang sel bai melisiich a blak el reng ra bai klengit el reng.
Sel de sioning er a Dios er a bek el taem me a bek el basio a olechotel a uangerang a klengar er kid ma uangerang a dongedecheduch
Bol sebechem el melekoi a klemerang el kirel a klaumerang er kau er a Kristo. Mesel bol ngar ngii a techall , e mongedecheduch er a klengar er Ngii, Osisechklel, ma klou el sengk er Ngii el mo er a rokui el chad. Mouchais aikel mesisiich el klemerang er Ngii el ngara Babier er a Mormon. Ngii a mla meskid tial yaksok: “Misei…e ngikel ochotak er a mederir a rechad, a bo kuchotii er a medal a Demak el ngara eanged el kmo ngchedak.”10 Ak yaksok er kemiu el kmo sel om blechoel meluluuch e ngar ngii a rengum er a techall el mo “dechor e sioning er a Dios,” aikal techall a mo er ngii, me a tirkel losiik a llomes me a klaumedengei a mo chemolt er kau. Mesel moruul aikel odbechel a reng, ea Chedaol Reng a mai a tekingem lotuu er a rengrir a rebebil, me a ta er a klebesei ea Osobel a mo ochotau el mo er a Demal.
Betok el chad el kaingeseu
Sel chedaol tekoi er a ureor lolngeseu er a ta er a chad el me soisb er a rengedel a Dios a urelir a betok el chim. Mousbech er a ngeseu er a re missionari sel mereched el taem, e moluluuch el kirel a ngeseu er a babeluades. E ng di bo momtab, sel temel a chad el mo omult er a rengul a diak el dil ngar kau.11
A sister Kamla Persand a chad er sel beluu er a Mauritius, el ngara skuul er a Bordeaux, France, sera kimesang er a February er a 1991. Kemam a miluluuch el telungalek me bol sebechemam el mo ouchais er a ebangkelio el mo er a chad losiik a klemerang, maki ululsisechakl er ngii er a belimam. Ng mle dmeu a renguk el rirelii a techolbechelid er ngii, e ng di kemam a diak el kmal mle klou a ututelam el kirel a Kamla sera lebol chad er a Ikelesia. Sechelil, re missionari, me a rechad er a blil a mle “sioning er a Dios” er a belual, e sel tara klebesei el ngara France, e mle ungil taem el mo er a Kamla, e ngii a rirelii a uldesuel el mo nguu a techolbechelid. Chelchang, mla chemoit a lluich ma eim el rak, e sel klengeltengat er sel telbilel a meliuekl er ngii, e a ngelekel sechal a missionari er a Madagascar.
A kulengit melak mesang sel urelem el uluchais er sel beltik el reng er a Osobel el mo er a tang el uai a skeng el ngar ngii a teng er ngii lobengkel a teng el lolechotel a kmo a resechelim a mle ungil a rengrir sera omongedecheduch er tir malechub sel siotai el mo mesterir a re missionari.12 Ma lak aikal medad, e ng diak el sebeched el lou kerkeriil a ngerchelid, malechub e ng sebeched el rulii sel klemengetel a taem. Sel mouchais er a beltkil a rengul a Osobel el mo er a rebebil, ea teng er kau a blechoel el A+.
A bebil er a amt a mla omul er a urelel a missionary, meng bai mla rulterir a rechad er a ikelesia el mo blak a rengrir el “sioning er a Dios er a bek el taem ma bek … el basio.”
A sister Nadezhda el chad er a Moscow a blechoel nguu a Babier er a Mormon loia er a chelsel a baks lobengkel a betok el kiande el meliuekl er ngii. Ng dilu, “ak ouchais er tir el kmo tiang a kot el merekos el sengk el ngak a sebechek el nguu el mesterir.”
Kedeb el taem er a lemetecholb sera le ngara Ukraine, Svetlana ulmelchesuar el kirel mo ouchais er a ebangkelio el mo er a tal sechal el blechoel lesang sel ngara bas. Sera ngikal sechal al tuobed er a bas, A Nadezhda a uleker, “Ng soam el lemuut el mo medengei el kirel a Dios?” Ngkal sechal a dilu, “Choi.” A re missionary a ulsisechakl er a Viktor, e ng mocha metecholb. Ngii me a Svetlana a mlo merenged er a chelbechilir er sel templo er a Freiberg Germany.
Bom kerekikl, a klengeltengat er kau a mo er ngii loiak a ngeldengodech el rael.
A ikal mla mo merek el euid el rak, e ngak me a Kathy a milsang a Diego Gomez me a telungalek er ngii er a Salt Lake City. Te mle er a open house er a templo lobengkemam e ng di te mle kotouar er a siotai er kemam el mo mesuub el kirel a Ikelesia. Tial mlo merek el Ongeim el Buil eng mlo mechas a renguk ele Diego uludengua el mer ngak. Ng teletael el dilubech er a klengar er ngii a rirellii meng mlo meluluuch. Ngii a di mle ngii el metik er a re missionary, e milsuub a olisechakl, e mlo keldmokl el mo metecholb. Sera 11 er a Ongelolm el Buil, eak mirael el mo soisb er a ralm er a techolbechelid lobengkel a sechelik e mesiungel a Dios el Diego Gomez. Tial blult er ngii a dilubech er sel temel e mlo er ngii lokiu a ngeseu me a klekerreu er a rebetok el chad el uldars a chimorir el mo er ngii el “sioning er a Dios.”
Siotai el mo er a Rengeasek
Mo er a rungil ngeasek me a rengeasek el meklou el chad el meliuekl er a beluulechad, Ak meskau a tokubets el siotai me a omelasm el mo “sioning er a Dios.” Tirkel meliuekl er kau a sebechir el ngosukau er a nger er a chedaol tekoi. Ke metebengii sel puzzle? Kau a diak momuchel er tial ureor elak a klekedelem e ng bai ngar ngii a technology me a social media el sebechem lousbech. Kemam a ousbech er kau; a Rubak ousbech er kau el mo meruul er tial urellel a Dios.
A Osobel a dilung, “morael el mo er a rokui el rengedel el rulleterir a rechad el mo obengkek, e molecholb er tir loba ngklel a Chedam, me a Ngalek, me a Chedaol Reng.”13
Meng diak luchul kau a kiei er a Africa, Asia, Europe, North, Centeral, malechub e ng South America, Taiheio, malechub e ng ta er a basio er a beluulechad er a Dios, ele a ebangkelio a kirel el mo er a “bek el beluu, rechad, klauchad, omelekoi, me a rechad.”14
“Dios el ngara eanged a [mo] toketekii a rengedel, [bad el di mle ngii el obached er a tkul a rois el dimlak a chad el mechedii, el ngii a mo klou el rois, a el mekekii tial beluulechad] diak el sebechel el mo metemall … [ngbai di] medechel el mo cherechar.
“… Berrusem, e mla meskau sel meral … belkul.”15
Ak mo mengesimer loba sel tekoi el ngara Doctrine and Covenants: “Momekedong er a Rubak, me a rengedel bera beluulechad, me a rechad lebol nguu, el bol keldmokl el mor sel mei el taem, el Ngkel Ngelekel el me metengel el [mla er a] babeluades, el blail er a llemesel a klebkellel, el mo mesang a rengedel a Dios … el nga er a beluulechad.”16 Loba ngklel a Jesus Kristo, amen.