Ouketui er a Mekngit el Telcheroll

Tal rak me a tedobech er a memong, e a President Russell M. Nelson a milngedecheduch el kirel a klou el belkul a “dolisechakl er a tial telcheroll el mo ouketui er a mekngit.”¹Tial tekoi el telcheroll louketui er a mekngit a kmal mle dmolech a chedaol belkul el me er ngak.

Kede chemat er a rengalek el tir a melasm el kiei er a klikiid e olngesenges a llach er a klengar tir. Ak mla sioning er a klisichir a rebetok el ngalek er a beluulechad el rokir. Te mesisiich lodngakl, e “diak el mesim”²er a chelsel a kakerous el ongarm el teletael er a klengar tir. Tirkal ngalek a medengelii sel chedaol blebelir, e melchesuar a beltik el reng er a Chedam er a Babeluades, e osiik el mo oltirakl er a Soal.

E ng di, te kuk ngar ngii a rengalek el meringel el melasm el “diak el mesim” e dirrek el okedeldaol el uldesuir a ngara ringel.³Betok el “ongetikaik er a cherarou⁴ a mo er tir” me te kmal ousbech a olisiich me a ngesou. Te ousbech er kid el mo mui lolngeseu lomtok er a mekemedil a mekngit sel dolasm el melai er a rengeleked el mo er a Kristo.

Morrenges a tekingel a Elder Bruce R. McConkie er a kmeed el okeua mea edei el rak er a memong:

“Kid a rechedal a Ikelesia, a ulsiseb er a chelsel a klou el uldikel. Kede ngara chelsel a mekemad. Kede mla mucherangel lobengkel a Kristo loumekemad er a Diablong. …

“Tial klou el mekemad el di iliuekl er kid el ngii a uchul e te betok el chad a mla touchakl, el bebil er ngii omekodall, a diak el beches el tekoi. …

“Chelechang e ng diak a ko er a di cheloit er a belngel tial mekemad.”⁵

Chelechal sils e tial mekemad a mla lmuut el kmal mo mesisiich. Ng subechii er kid el rokui, e a rengeleked a tir a ngara medal lomtok er a cherarou. A leuaisei, e ng kired el muut el kmal mo mesisiich er a chedaol teletael.

A ngosuterir a rengalek el mo ouketui er a mekngit er chelechal telcheroll a ngerachel e dirrek el klengeltengat el mo er a roungalek, remechas me a rubak, rechedal a telungalek, resensei, me a roungerachel. Ngerchelel a dersta er kid lolngeseu. E ng di a Rubak a kmal mla melekoi er a roungalek el chedam me a chedil el mo olisechakl er a rengelekir el mo medengelii a ouchel reng er a klengit, me a klaumerang er a Kristo el Ngelekel a ngar el Dios, me a telcholbechelid me a sengk er a Chedaol Reng e mo meluluuch, e mo meruul a llemalt er a medal a Rubak.”⁶

Ng mekera domekeroull er a rengeleked er a llomes me a klemerang”⁷ a locha meringel el ker le ng kakerous er a chelsel a bek el telungalek me a dersta el ngalek, e ng di a Chedam er a Babeluades a mla meskid a llach el mo ngosukid. A Chedaol Reng a mo omekellomes er kid el kirel a bedochel el rael el mo sebeched ngosuterir a rengeleked.

A kot, e ng kirel mo dmolech osenged er a klou el belkul a ngercheled. N kired el mo medengelii— sel chedaol blebeled— me a chedaol blebelir me a moktek ruchei er a dolngeseu er a rengeleked el meral mesterir el kmo te techang e ngera uchul me te ngara tial beluulechad. Ng kired el ngosuterir el mo medengei e diak loumededenger el kmo te meral sechal me a redil el ngelekel a Chedam er a Babeluades e Ngii a ngar ngii a longerchir el chedaol tekoi er tir.

Ongerung, a klemedengei el kirel osisechakl er a ouchel el reng a klou a belkul el kirel odngeklel a klengit. A odngakl a mekngit a diak el belkul a kmo ng diak a kngtid, ng bai belkul a kmo kede melemolem el ouchel a rengud, e klekar, e blak a rengud. E sel dotngakl a mekngit e ng locha mo uchul a klengeltengat el bo de blechoel mengeroid er kid er a mekngit. El uaia tekingel a Jakobus el kmo, “modngeklii a mekngit, e ngii a mo cheroid er kau.”⁸

Tirkel erul telael el soldau a “kmal mle blak a rengrir e diak el medakt … ; e dimlak dil tiang el merekong te kmal … mle mui er a klemerang er a bek el taem er a ngii di el ngerang le bla er ngii. Oi, … te mla mosisechakl el oltirakl a llechul a Dios e melemalt er medal.”⁹Tirkal ngeasek el chad a mlora mekemad lolab a blekerdelel a Kristo el mle dongu lousbech lomtok er a cherarou. A President Thomas S. Monson a ulemeklatk er kid el kmo “a okedong el kirel a duch el reng a mei er kid el rokui. Bek el sils er a klengar kid e kede ousbech—er a duch el reng el diak di el bo er a mekekerei el tekoi ng blechoel mo er a ikel uldasou el dolatk el meruul malechub e ng teletael el kid a ngara chelsel.”¹⁰

A rengeleked a mo bleiull er a chedaol dongu sel le kedmeklii a teletael er a chedaol tekoi lousbech er a bek el sils. A bebil er a taem e kede locha oumededenger er sel duch er a rengalek el mo urrekodel osisechakl er a roltirakl. A President Henry B. Eyring a millekoi er kid el “mo omuchel sel le mekekerei e melemolem.”¹¹ A leuaisei e a ongedei el tekoi el ngosuterir a rengalek el mo odngeklii a mekngit a sel domuchel lolisechakl er tir sel mekekerei lolisechakl er tir er a ebangkelio— el ngara chedaol llechukl, me a Tebechelel a Klaumerang, me a Kirel a Klisichir a Rengeasek, chelitakl er a Primary, chelitakl er a ikelesia, me a olchotel a klaumerang er kid—el ngii a mekrolterir a rengalek el mo er a Osobel.

A blechebech el kse er a omeluluuch, omesubel chedaol llechukl, ongdibel er a telungalek, me a omengull er a Chedaol sils a uchul a cherrungel, ungil blekeradel, me a mesisiich el llach— ng belkul a kmo, chedaol klisiich. Chelechal beluulechad, el ko er a dikeang a chedaol klisiich, e a rengeleked a kirir el mo medengei el kmo ngera meral chedaol klisiich e ngera uchul meng klou a belkul—oumesingd sel dongedmokl er tir el kirel a chedaol telbiil sel metecholb me a dirrek sel le bo er a templo. El uaia ikel lolisechakl a Preach My Gospel el kmo, “A doltirakl a telbiil e ng kudmekelterir a rechad [luldimukl er a rengeasek] el mo meruul e oltirakl a chedaol telbiil.”¹²

A Elder Jeffrey R. Holland a ulisechakl el kmo, “Sel dosaod el kirel a oltirakl a telbiil, e kede melekoi el kirel a chelsel a rengud er a moktek er a klechad.”¹³Ngar ngii a klou el klisiich sel doruul e doltirakl a telbiil lobengkel a Chedam er a Babeluades. A cherarou a medengelii tiang, me ng mla ngodechii a uldasou el kirel a omeruul el telbiil.¹⁴ A dengesuterir a rengalek el mo medengelii, e loruul, e loltirakl a chedaol telbiil a tara rolel e kede omekeroul er a rouketui er a mekngit el telcheroll.

Kede mekerang e kudmekelterir a rengeleked el mo meruul e oltirakl a chedaol telbiil sel le siseb e lorael er a rolel a telbiil? Kede olisechakl er a rengalek el mo oltirakl a mekekerei el yaksok sel le mekekerei a mo mesterir a klisichir el mo oltirakl chedaol telbiil ruriul er a klengar tir.

Msall e kuchais er a beot el okesiu: Chelsel a ongdibel er a telungalek, e a chedam oker, “Ngua ngera delongeled el telungalek?” E eim a rekil el Lizzie a ulemondai er a klou el ochedal, er a Kevin, el di omekakou er ngii me ng di mekngit a rengul. A Kevin a kilngei el kmo a Lizzie melekoi a klemera el tekoi. A delal a Kevin a ulelengit er ngii el kmo ng mekerang e mo sebechel ta rengul ngii me a ochedal. A Kevin a ulemdasou e dula el kmo ng tibir el mo er a Lizzie el kmo ng tal sils el kmal diak bo lomekakou er ngii.

A ulebongel er a sils er a bol kukuk er a bocha le keldibel a rebek el chad e loluluuch, e a demal a Kevin a uleker er a Kevin el ko ngua ngerang. A Kevin a ulenger el kmo “Chedam, a kultireklii a yaksok er ngak!” A Lizzie a mle ungil a rengul e kongei. Tial telungalek a mlo chemat er a Kevin.

A delal a Kevin a melkinga el kmo alsekum e ng sebechel lotireklii a yaksok er ngii er a tal sils, e ngera me ng diak el sebechel rullii er a chelsel erul klebesei? A Kevin a kilengei el mo lmuut el melasm er ngii. Ng mlo merek erul klebesei, e a Kevin a kmal mle ungil lotireklii a yaksok er ngii, me a Lizzi a kmal mirreng a saul el kirel! A demal er a loker ngii el kmo ngera me ng kmal ungil loltirakl er a yaksok er ngii, e a Kevin a dilu el kmo, “A kultireklii a yaksok er ngak le ngak el dilung.”

A ungil lotireklel a mekekerei, el yaksok a uchuul a klisiich. A blechebech el teletael er a oltirakl a yaksok a kudmekelterir a rengalek el mo ngii a kot el telbiil er a techolbechelid me a sengk er a Chedaol Reng, el tir a tibir el mo mesiou er a Dios e oltirakl a Llechul.¹⁵ A yaksok me a telbiil a diak el kakeakl el tekoi.

Chelsel a hong er a Daniel e kede mesuub el kirel a Shadrach, Meshach, me a Abed-nego el mle kotouar el mo mengull a bleob el chaus er a King Nebuchadnezzar.¹⁶ A king a dilu er tir el kmo te mo medul er a ngau alsekum e ng diak loltirakl. Te liluut el kotouar e dilu el kmo:

“A bol uaisei, e a Dios er kemam el kemam a mesiou er ngii a mo otebedemam er a ngau. …

“E a lak, e di bo modengei, kau el king, el kmo ng kmal diak ki mongull er a dios er kau.”¹⁷

“A lak.” Ka momtab a belkul aikal keldei el tekoi el kmo ng mekerang e ulech el mo er a oltirakl a telbiil. Tirkal tedei el ngeasek el chad a dimlak lultuil er a blekongesenges er tir omko diak el sobel. Omko meng dimlak el sobel, me tir a di oltirakl a yaksok er tir el mo er a Rubak le tir el dilung. A otirekled er a telbiled a iileakl er a teletael el kid a ngara chelsel. Tirkal tedei el ngeasek el buik, el di uaia tirkel ngeasek el soldau, a meral ungil okesiu el kirel ouketui er a mekngit el mo er a rengeleked.

Aika el okesiu ng mekera e soiseb er a rekeblid? “Ng derstelkib, el osisechakl,”¹⁸e kid a ngosuterir a rengeleked el oremii a telkib er a klungiaol. Sel loltirakl a yaksok er tir, e te melchesuar a Chedaol Reng er a klengar tir. A Elder Joseph B. Wirthlin a ulisechakl el kmo “sel kot el ngarbab el ngkedel a klikiid a sel belchoel kldemel Chedaol Reng lobengked.”¹⁹ E seikid e a rengeleked a mo ansing er tir el mesisiich er medal a Dios.”²⁰Tiaikid el klikiid el teletael a mechelii a klisiich, er a rouketui er a mekngit el telcheroll.

Rodam me a rodos, molisechakl er a remekekerei el ngelekem—me lesang sel chedaol blekerdelem er a bek el sils e lomes er kau loltirakl a yaksok me a telbilem. “ A rengalek a kmal mesuub a teletael, me besterir a kmo ngerang losuub er ngii.”²¹Kid a meral lolngeseu lolisechakl e omekeroul er a re mo ouketui er a mekngit el telcheroll el mo er a Rubak lokiu a yaksok me a telbiil.

A kuchais el kmo a Jesus Kristo omekrael er tial Ikelesia. Me sel molisechakl, e momekrael, e moubeltik el reng el mo er a rengalek loba teletelel Osobel, e kemo ngmai chedaol ocholt el mo ngosukau lomeob e omecheliu er a remesisiich, e ouketui er a mekngit el telcheroll. A nglunguchek a kmo a rengeleked bo lolekoi a tekingel a Nephi el kmo: “Ng diak mrellak me bok cheroid er a klengit?”²² A kuchais el kmo a Osobeled a tilngetengii a klengar ngii el kirel a kngtil a beluulechad²³—le Ngii el dilu el kmo Ngii a mo kudmeklii, e Ngii a kmal imis el betik a rengul er kid el diak a chad er a beluulechad el medengelii²⁴—le Ngii el dilu el kmo Ngii a mo kudmeklii. El ngara ngklel a Jesus Kristo, amen.